صحينا من النوم لاقينا كاوتش عربيات الشارع كله مضروبة بالمطواه !!!

[Elawany13]

السلام عليكم ورحمة الله وبركاته

إمبارح الإثنين 28-1-2013 طقت فى دماغى انزل اسكندرية علشان استغل فرصة أجازة نصف السنة وافسح العيال يومين واضبط التاكيهات هناك عند متخصصين تاكيهات
وصلت العصافرة امبارح بالليل فى حوالى 9 مساءاً وركنت العربية فى شارع مدرسة الشيماء متفرع من شارع المعهد الدينى وغطيتها وأمنتها بالكلابش وبالموبايل ونمت
النهاردة الثلاثاء 29-1-2013 الساعه 9:30 الصبح نزلت علشان اروح لبتاع التاكيهات أول ما خرجت من مدخل البيت لاقيت قدامى عربية لادا قديمة فردتين الكاوتش على الأرض ... استغربت قوى ان الفردتيتن يناموا بالشكل ده فى وقت واحد
طول ما انا ماشى فى الشارع كإن فيه مذبحة للكاوتش شارع طويل عريض يمين وشمال عربيات كتيرة جدا كاوتشها نايم على الجنط ... اللى عنده فرده نايمة واللى عنده فردتين !!!
وصلت لعربيتى لاقيت انظف فرده عندى (مفيهاش لحام واحد ولا خابور) نايمة على الجنط .. بقالها معايا حوالى 12 ألف كم فقط
بصيت فيها لاقيتها مضروبه بالمطوة من الجنب قد طول عقلة الأصبع
الحمد لله ضربلى فرده واحده بس مش اتنين زى معظم عربيات الشارع ... كملت مشى فى الشارع كل العربيات متبهدلة إلا بعض العربيات القليلة جدا المحظوظة التى نجت من هذه المذبحة
مش مفهوم ايه سبب هذه العمله
هل هو عيل مبرشم طقت فى دماغه يفرتك كاوتش العربيات اللى واقفه فى الشارع ... طيب هيستفاد ايه !!!
هل هى تصفية حسابات بين العيال اللى واقفه على النواصى بتاجر فى البرشام والمخدرات فى هذه الشوارع ... الله اعلم
هل هم عيال مخربين هدفهم اثارة الناس واظهار ضعف الأمن ... مش عارف

كلها أقاويل ترددت فى الشارع ... وكل الناس كانت مستغربة ... أول مرة يحصل الكلام ده هناك

والدى كان معايا وقلق جدا على العربية وقالى بلاش نبيت هنا ويالا نروح بدل ما تلاقيش العربية أو تصحى تلاقيها متكسرة واضطريت ارجع تانى طنطا بعد اقل من 24 ساعه علشان اريحه

الحمد لله وقدر الله وماشاء فعل
بالنسبة للجرح القطعى اللى فى جنب الكاوتش تنصحونى بإيه
ينفع يتلحم ولا مش هيبقى امان !!!

[hassanin_lada]

ممكن لحام ان امكن

او لاحام وتركبلها فرده داخليه اضمن وتخليها استبن وربنا يعوض عليك


غالبا هيكون في واحد مبرشم وضربت في دماغوه

ربنا يعوض عليك ويبعد عننا الناس دي

[zinger]

خير ماعملت إنك رجعت وإن شاء الله الفسحه تتعوض ف ظروف تكون احسن من كده , ولو انى بيتهيألى مش حييجى على مصر أحسن من كده تانى

[mahmoud_afifi]

والدك معاه حق احسن من الندم على العربيه كلها لا قدر الله. وربنا يعوض عليك في الفرده.
اللحام المكوه هو الي بيتعمل بيه قطع بالشكل ده بس بيبقى خطر ومش أمان حتى لو اتعمل صح. ماتضمنش.
بس صلحها واعملها سبير

[Khaled Online]

الحمدلله إنها جت على أد كده. تسمحلي أسأل حضرتك ازاي مأمن العربية بالكلابش؟ زي بتاع المرور ولا كلابش الدركسيون العادي؟

[NaderNabil]

كأنك بتحكي على اللي حصلي بالظبط يوم ٠٨-٠٢-٢٠١٢ يعني من سنة تقريبا
كنت مبيت عند حمايا في حلوان و نزلت الصبح الاقيلك الفردتين اللي ورا على الارض....و ببص حواليا لاقيت الشارع كله كده...من فردة ل ٣ فرد و كله بالمطواةو منهم عربية حمايا و عربية صاحبي و ابوه
كان يوم ما يعلم بيه الا ربنا...يوميها الكوريك باظ و العتبة الشمال اتفعصت و بتاع الكاوتش رفع العربية غلط من تجويف الاستبن قام اتفعص هو كمان!!!حاجة زي الفل يعني

المهم...اوعى تصلح الكاوتش ده....يترمي علطول و اضمن نفسك

الله يعوض عليك و ينجينا من البلد دي

[youssef_u]

ربنا يعوض عليك يا باشا و بلاش تصلحه وارميه احسن يا باشا لانه مع الحراره و تمدد الهواء ممكن ينفجر وانتا سايق و دي عواقبها وخيمة لا قدر الله

[MohammedAladel]

اللى عايز أعرفه بقى لما بيدب المطوة فى الكاوتش ضغط الكاوتش بيبقى عالى جدا ميطيرش المطوة دى تيجى فى بطنه ؟؟

[kimotop]

ربنا يعوض عليك

و دي اكيد تصفية حسابات بين الكاوتشات و الاسفلت d:

حبة فرفشة كدا علشان المشكلة تفك

[dr.hazem]

القطع في البروفايل مبيتصلح غالبا الا لو اقل من سم فقط!!
ربنا يعوض عليك...

[hossam_elwani]

هو الغل والحقد وصل للحد ده !!!!!!!! حسبى الله ونعم الوكيل

وكويس انها جت لحد كده

[Elawany13]

شكرا على مشاركاتكم
حسبنا الله ونعم الوكيل فى اللى عمل كده واللى بيأذى لناس
اللهم انتقم منهم وارنا فيهم عجائب قدرتك
وربنا يسترها على البلد ديه
اللى عمالة تخيب يوم ورا يوم
:b4_611:
مدام كلكم اكدتم ان تصليحها فيه خطورة يبقى الأمان أهم خلاص مش هحاول اصلحها

ان شاء الله هشترى 4 فرد جداد لإن الفردتين اللى ورا حالتهم مش قد كده
الفردة الحلوة الأمامية هعملها استبن
أنا عاوز اشترى كاوتش كويس بس مش غالى علشان الظروف الزفت اللى البلد فيها ديه وعلشان الطرق اللى ناقصها الزفت اللى بنمشى عليها ديه
معنديش استعداد ادفع فى الفرده الواحده اكتر من 300 جنيه
كمان انا مش من النوع اللى بيجرى أخرى 120 كم/س لو ظروف الطريق تسمح
و 99% من مشاويرى داخل المدينة
تنصحونى بإيه
هانكوك ولا جى تى ولا ماكسيس ؟؟؟

[cameeron]

باشمهندس علوانى اعتقد و بنسبة 99 المية ان اجابة اللى حصلك دى هى
هم عيال مخربين هدفهم اثارة الناس واظهار ضعف الأمن ... مش عارف

لان امبارح فى شارع الهرم واحد قريبى عملوا فى الشارع بتاعه حاجة غريبة جدا بعد ما سرقوا عربيتين من الشارع خلعوا اربع بواب حديد لاربع عمارات

[abo_lamar]

ربنا يعوض عليك و يعوض علينا في البلد دي
ارمي الفردة دي وخليك في المضمون واشتري واحدة جديدة ... والحمد لله انها جت على قد كده .

[Dr.Rayyan]

باشمهندس علوانى اعتقد و بنسبة 99 المية ان اجابة اللى حصلك دى هى
هم عيال مخربين هدفهم اثارة الناس واظهار ضعف الأمن ... مش عارف

لان امبارح فى شارع الهرم واحد قريبى عملوا فى الشارع بتاعه حاجة غريبة جدا بعد ما سرقوا عربيتين من الشارع خلعوا اربع بواب حديد لاربع عمارات

معلش ازاى خلعوا الابواب هيا الناس نايمه على ودانها للدرجادى !!!!

بالنسبه لصاحب الموضوع ربنا يعوض وارمى الكاوتش احسن انا حصلتلى حادثه من اسبوعين بسبب فرده كويسه مفيهاش الا لحام واحد ومكواه فبناقص 300 جنيه تامن بيهم حياتك وربنا يسترها عليك وعلى المسلمين اجمعين وينتقم من المتجبرين المفسدين فى الارض
يا رب اللهم انا نشكوا اليك ضعف قوتنا وقله حيلتنا
يا رب انهم لا يعجزونك فى الارض
يا رب ارنا فيهم قدرتك وطهر الارض منهم واصلح لنا مصر واهلها انك ولى ذلك والقادر عليه