سؤال بصراحة هل استفدت من المقارنات على النت ؟

[kimotop]

السلام عليكم

حلوة وحشة جامدة تعبانة قطع غيراها متوفره ملهاش قطع غيار .... الخ

دي النتيجة الي معظمنا بيطلع بيها لو تجرأ و سأل عن عربية و كل واحد بدل ما يقول رأيه بموضوعيه لازم يقنع الي بيسأل بالعافية بالعربية الي هو مقتنع بيها او الي يملكها علشان يحس نفسيا انه مرتاح ان في غيره بيشتري عربيته !!

حتى العربية فيات 128 هتلاقي ناس بتقول عليها كويسة ههههههههههههههههههههه

فالسؤال بجد هل انت بتستفيد من المقارانات دي و لا تنزل و تجرب بنفسك لو اتيحت الفرصة و بعدين تحكم ؟

[BLOODY_STONE]

انا لما انوي اشتري عربية بخش اشوف الناس بشكل عام بتقول عنها ايه و ايه السكك بتاعتها في التصليح و الكلام ده

لكن عمري ما غيرت قراري عشان فلان قالي كذا او سمعت كذا او الكلام الفاضي ده

كل واحد بيجيب اللي بيريحه و كل واحد و ليه ذوقه فطبيعي جدا تلاقي ناس بتتخانق ..

و كده كده شركات العربيات كلها دلوقتي بتخاف على سمعتها و بتطبق معايير و حاجات من دي فميش حاجة اسمها عربية وحشة الا لو هي مش عاجبك لأي سبب

اعمل صلاة استخارة و دوس ابرنس

بس كده مات الكلام

[adelghanem]

انا شخصيا استفدت من المقارنات ..من ناحيه انا ليه متطليات معينه فى السياره اللى اشتريها ومن اراء الاعضاء الافاضل كونت فكره على نوع العربيه اللى عايز اشتريها وفعلا اشتريتها وكانت زى ماقالوا الاعضاء بالظيط ...شكرا للجميع

[Y a r i s]

معاكم حق ... بس بيني وبينكم
في ناس فعلاً بتفيدك وتقول الحق ولو على رقبتها وفي ناس سبحان الله يكرهوك في الحاجة وخلاص او يحببوك في الحاجة وخلاص ... زمان كنت هشتري دايو. لقيت الناس بتقولك دي بلاستيك دي مش عارف ايه وهات شاهين احسن وسبحان الله الناس الي قلتلي متشتريش دايو لانوس بقو يجو يسئلوني بعد ما اشتريتها هيا العربية معاك اخبارها ايه ههههه

ونفس الحكاية في الماتريكس وفي كل عربية. اشتريتها ... ولمن فكرت اشتري لوجن سنة ٢٠١١ ناس شكرتلي فيها شوكرانية خليتني رحت اشتريتها على طول. واكتشفت انها بومبة وكويسة ومعقولة للناس. ومش كويسة ولا مقبولة لناس تانية .

لذلك لمن حد يسئلني اختار ايه من العربيات بقولوا قلي ظروفك وظروف شغلك الاول وحجم عائلتك وطولك والاوزان الناس الي معاك وعاوز العربية لايه علشان اقدر ارشحلك عربية مناسبة ليك ده مرات بسئل عن ايه تجاربك السابقه في العربيات. كمان علشان متنزلش من مستواك في عربية لمستوى عربية اقل منها ..

لكن فعلاً استغربت ناس كتير بتقنع عاطل بباطل بعربياتهم وخلاص عاوزين كل الناس تركب زيهم بغض النظر عن كل عيوب العربيات الي معاهم ... فبالتالي يغلوشوا على الواحد في اتخاذ قراروا ...

[S O P H O S]

بتفيد لما الي بيقول بيتكلم بصراحة وعن علم
اما الي بيخش يتكلم علي عربية ويمدح فيها وهو لا جربها ولا يعرف عنها حاجة
كل الحكاية انه نفسه يمتلكها فيقول لكل حد بيتكلم هات العربية دي جميلة وثبات وماتور
وفالنهاية هو حلم شخصي ليه هو
مجرد راي ..

[AirForces]

لما حبيت اقارن بين العربيات فى الفئة اللى عاوز اشتريها دخلت الأول قسم كل عربية من الفئة دى وشوفت التقرير بتاعها وبعدين لفيت لفة فى كل قسم اشوف المشاكل اللى واجهت الناس مع العربية دى واخيرا قسم المقارنات عشان عارف انه اكيد فى ناس هتذم فى العربية الفلانية وتمدح فى الفلانية فبشوف إذا كان فى حاجة فلتت منى فى العيوب وبحاول اتأكد منها تانى

[ضياء عويضه]

زي باقي الاعضاء بصراحه افادنى المنتدى والمقارنه جدا خصوصا انى مكنتش اعرف شيء في السيارات لكن مع المتابعه عرفت وفهمت شويه واوقات بوهم اللى قدامى انى فاهم اكثر منه من كتر المتابعه