أنا اتصلت بالميكانيكى , وقولتله ( حسبى الله ونعم الوكيل فيك ) - أنت نصاب

[أبو يوسف]

السلام عليكم
انا معايا ( فيسبا ) بجانب العربية , وبتحرك بالفسيبا داخل المنطقة علشان المطبات ( شبرا الخيمة )
المهم الفيسبا كان بتنتش أو ما ديتيها غيار , والمهم سألت واحد صاحبى بيفهم فى الفيسبا , قالى غير الديسك , روحت سألت على الديسك , لاقيته بـ 60 جنيه شامل ( الديسك + ورق دبرياج + جلبه ديسك )
فقلت اروح للميكانيكى الاول قبل ما اشترى , روحت وقلتله أشترى ديسك , قالى لأ الديسك سليم اللى بايظ عندك ( جلبة الديسك قفط ) ولا أنت عاوز تكلف نفسك وخلاص , قولتله لأ طبعاً
المهم فك الديسك وطلع الجلبة , وراح جايب صنفرة , وصلح الجلبة , وجاب ورق دبرياج جديد , وركب الديسك تانى , جينا بقى للحساب
ورق دبرياج 12.5 جنيه
وش جوان 5 جنيه
قلتر زيت 5 جنيه
صاملوة ديسك 2.5 جنيه
المصنعية
تصليح جلبة ديسك 25 جنيه
تركيب الديسك 25 جنيه
تركيب الفلتر 10 جنيه

يعنى 80 جنيه

المهم قولتله يعنى المصنعية 60 جنيه أزارى
ما أنا كني أشتريت ديسك جديد أحسن ب 60 جنية , وركبناه وخلاص اية اللى يخلينى أصلح الجلبة بـ 50 جنية , واشترى ورق دبرياج ( معفن ) بـ 12.5 جنيه
مع انك قولتلى الموضوع بسيط , طبعاً بعد جدال وخناق دفعت الفلوس
بس تانى يوم حسيت أنى مخنوق من الموقف قوى
روحت أتصلت بالميكانيكى , وقولتلى
انت بستحل الفولس دى ازاى على نفسك , على العموم انا مش مسامحك , وحسبى الله ونعم الوكيل فيك
قالى : عادى هو انا نصبت عليك , قولتله اه انت نصاب , وحرامى
وقفلت فى وشه السكة
وبعديها استريحت

انا عارف ان فيه ناس هاتقول 80 جنيه حاجة بسيطة مش مستهلة دة كله
بس والله العظيم الموضوع مش موضوع فلوس , موضوع تحس انك انضحك عليك
أبو يوسف

[Nashaat Rady]

تصدق حرقت دمي بالراجل، انا قاعد أتخيل نفسي في موقفك.... و رقبة الراجل بين أدية.

بس انت عملت الصح... الكلام الكتير مع الأصناف منعدمة الضمير ما منوش فائدة.

الفلوس اللي راحت أكيد فداء حاجة تانية.

ربنا يعوض عليك و بنتقم من كل ظالم

[zoalla]

بص انت بتتكلم صح بس خليك عارف محدش بيتعلم ببلاش وبعد كدة اسال هيعمل ايه وحسابة كام قبل ما يشتغل
ولو تسمحلى اقولك رايى الشخصى مكنش لازم تكلمة وتحرق دمك دول 80 ج وانت بردو خدت خبرة جديدة والحمد لله على كدة

[mesaharaty]

ولا يهمك طبعا فداك الفلوس كلام فاضى
حسبنا الله ونعم الوكيل فى النصابين اللى بياكلوا مال الناس بالباطل وبيستحلوه على نفسهم وعلى أولادهم .

[Ahmed_Ramadan]

و لا تحرق فى دمك ... خلى فى دماغك إنه لو نصب عليك ربنا هيردهاله فى حاجة ممكن حتى تبقى أعز و أغلى بكتير من الفلوس اللى أخدها منك

[MohammedAladel]

عادى عادى هتتعرض فىمصر لحاجات أكترمن دى بكتير

واللى عملته صح الصح حسبى الله ونعم الوكيل

[KemozTanta]

محسبش ليه كمان بدل وقت تركيب الحاجة دي !!
متزعلش واللي حصل حصل واللي عملته صح وكفاية انك عرفته انك مش راضي ولا مسامح في الفلوس اللي فاكر انه فهلوي واخدها منك
ربنا يعوضك ان شاء الله

[mem]

ما تزعلش نفسك هو اللى خسران
اللى عند ربنا مش بيروح
وخليه يقبلهم على نفسه
وانت عملت الصح

[EngAhmedSayed]

ربنا يهدى

[rompo10]

معلش كلنا حصل معانا كده

[Sehsss]

للأسف أغلب الصنايعية بقوا بيستحلوا الحرام