دهان وقع ع العربيه اطلعه ازاي ؟

[Hikayat]

من اكتر من شهر كنت راكن العربيه تحت عماره بتتشطب وانا مش واخد بالي
المهم نزلت لقيت العربيه واقع عليها دهان
جيت اشيله بايدي لقيته بيتشال
و انا كنت مسافر يومها وسايب العربيه علي ما رجعت لقيت الدهان نشف
ودلوقتي مبقتش عارف اشيله ازاي
هوه عباره عن نقط بس كتير ومنتشره في العربيه كلها

ناس قالولي روح اسحقها ولمعها ؟ فعلا ده يطلع الدهان ؟ ولا في حل احسن ؟ ولو عملت كده تتكلف كام يعني اتفق مع الراجل علي كام ؟

[speed_magnum]

متابع

[Ayman-Ahmed]

حضرتك جرب الاول تروح محطة بنزين وتقوله يرشلك عليها بالهوا سولار كلها وتسيبه 5-10 دقايق وبعدين يغسلها كويس بالفوم ويدعك شوية وتشوف ايه الاخبار.وان مطلعش يبقى بتنر او بنزين على خفيف ويستحسن تعمل الموضوع ده بعيد عن الشمس او بلليل.

[hany63]

لمعها عند اي ورشة دوكو ب 100 جنيه و هترجع عروسه

[matrix012]

لمعها عند اي ورشة دوكو ب 100 جنيه و هترجع عروسه

او انتا ممكن تجيب حته سنفره ناعمه ومع شوية مايه تبدأ تسنفر الحته ديه على خفيف يعنى متزودش
وان شاء الله هتتشال
وربنا يستر طريقى وطريقكم

[أبو يوسف]

لأ طبعاً بالش موضوع الصنفرة دة , هايشلك اللون الاصلى للعربية
جرب ترش عربية مياة + جاز , وسيبها شوية وبعدين امسحها بسفنجة

[hany63]

لأ طبعاً بالش موضوع الصنفرة دة , هايشلك اللون الاصلى للعربية
جرب ترش عربية مياة + جاز , وسيبها شوية وبعدين امسحها بسفنجة

الصنفره الناعمه مش هتشيل الدوكو لو العربيه مبلوله
و زياده في الاحتياط ادي العيش لخبازه

[Sehsss]

جرب بالكومباوند

[Land_Cruiser]

روح يا فندم كار كير و هو يطلعهالك. بيبقي عندهم مواد بتطلع بقع البويه دي من غير ما تأثر علي دهان العربيه

[youssef_u]

بلاش تجربة فالعربية يا باشا عشان اللون الاصلي يستحسن تروح اي كار كير و هما هناك ينضفوها و يلمعوها و كل حاجة

[mem]

روح كاركير كويس وهما هيقوموا بالازم

[p r i n c e]

يطلع ب تينر بإذن الله
و ممكن بوليش
و في حل اوفر، ب طين بس طين صافي عشان لو فيه حصى هيبهدل العربية و لو مسحت جامد لون العربيه نفسه هيبقى باهت
احسن حاجة تينر و ا ش ا هيطلع او روح ل مغسلة عربيات كويسة و ا ش ا هينضفوها ب كل سهولة
متقلقش

[amrw2006]

انا حصلى نفس الموقف من 3 أيام

السلام عليكم

انا حصلى نفس الموقف من 3 أيام - و برضه مسحت جزء كبير اول لما وقع الدهان عليها - لكن الجنب التانى كان متبدهل وماخدتش بالى خالص و ركنت و سبتها و لسه برضه مش وائق اعمل ايه - يا ريت لو حد حصلتله و حلها يقولنا

[Hikayat]

تمام الف شكر ليكوا ولكل واحد رد عليا
انا رايح النهارده ان شاء الله للراجل هيصنفرها وبيقولي مش هتشيل البويه الاصليه ويسحق ويلمع ومتفق معايا علي 100 جنيه
ان شاء الله هبقي اقولكوا عملت ايه