ليه منبدأش بنفسنا !!!وعتاب اللي اعضاء المنتدي

[SHNORY]

بقالي فتره كبيره بتصفح صفحات المنتدي وبحاول اتابع المواضيع الجديده والقديمه وللاسف فيه جمل كتير اوي بتزعلني لما بشوفها ومنها علي سبيل المثال لا الحصر
1: هو الشعب المصري كده مش حيتغير
2: اصل كل واحد راكب عربيه عامل فيها رامبوا
3: لما تدخل ملف بسرعه عاليه تعمل كذا
4: اصل دا بيحصل بره مش بيحصل في مصر
5: لو حصل كده في بلد تانيه مكانش حصل زي ما بيحصل عندنا
والكثير والكثير من العبارات اللي لو حللناها حنلاقي اننا مش بندور علي عيوبنا انما بندور علي عيوب الناس
الاخطاء عامله زي انوار الزينون كده انت مش بتشوفها انما بتعمي غيرك
هو يا جماعه مش الشعب المصري ده هو احنا انا وانت وابويا وابوك وكل معارفك والناس اللي موجوده في حياتك
هو مش احنا اللي راكبيت عربيات وفينا ناس عاملين رامبوا
هو اللي انا بنصحه بدخول ملف ده بطريقه معينه مش ممكن يطبقها غلط وغلطتها تكون الاولي والاخيره ليه او لغيره
هي مش البلاد التانيه دي عايش فيها بني ادمين زينا وجاير يكونوا عايشين تحت قهر من حكوماتهم احنا مش حاسين بيه
ليه منبداش بنفسنا الشعوب التايه اللي بتحترم المرور دي احترمتها علشان لما كانو عيال صغيره وشافوا اهاليهم بتحترم المرور مثلا لما كبروا احترام المرور كان في دمهم
زي ما عندنا شرب الخمور مثلا حاجه متحرمه في دمنا واتعلمنا من صغرنا انها حرام علشان كده لما بتيجي سيرتها بننفر منها
ليه ميكونش احنا اول الجيل اللي حيحترم نفسه علشان اولاده يتعلموا منه ويكبروا واحترام النفس جواهم
الموضوع كبييييييييييييييييير اوي يا جماعه وتراكمي لو انت احترمتني ححترمك حتي لو انا مش مجرد عربجي لا حتي لو انا سوابق الدنيا كلها عاملها ححترمك
امبارح حصل معايا موقف هو اللي خلاني افتح الموضوع ده
وانا مروح البيت داخل الشارع لقيت عربيتين قدامي وحوالي 3 عربيات جايين في الوش والشارع ضيق فظبطنا نفسنا لحد ما كلهم طلعوا وفضلت انا وجاي في وشي 4 عربيات اخرهم عربيه نقل روحت ماسك يميني ووقفت علشان اعديهم
عدوا كلهم وفضل بتاع النقل ومره واحده جت عربيه نقل تانيه وداخل في وشه وكل واحد منهم مستني التاني يرجعله روحت مقدم نص متر بالعربيه وكلمت سواق النقل اللي دخل جنبي وقولتله يا استاذ (مع انه شكله عربجي فوق مما تتخيل من ستايل يا رب خناقه) انا واقف مستنيه يعدي وانت كده قفلت السكه فبعد اذنك ارجع ورايا علشان نعدي ونشوف مصالحنا راح باصص للتاني وقاله انا حرجع بس علشان الباشمهندس مش علشانك وقالي انا اسف يا باشمهندس
عارفين
الراجل لما حس اني احترمته احترم نفسه مع اني كان ممكن بكلمتين اولع الشارع واعمل خناقه ونوقف السكه وانا شايل في العربيه حاجات تخليني احارب اسرائيل مش سواق نقل
بس بجد ليه ميكونش سلوكنا كده انا فعلا ساعات بتغابي ونظام مش راجع ارجع انت والسكه تقف (خصوصا ان عربيتي عاوزه سمكره فمش حتفرق لو اخدت خبطتين زياده لو الموضوع كبر)
فياريات لو بدانا بنفسنا اكيد حييجي يوم ولو بعد مليون سنه وحييجي واحد اجنبي في بلده ويقول لو انا كنت في مصر دلوقتي مكانش حصل التهريج ده
يا ريت بجد لو نعمل حمله وسط بعضنا واحنا مش شويه احنا لحد اللحظه دي 16,131عضو يعني احنا مدينه كامله
ليه منربيش اولادنا علي احترام انفسهم لان اللي بيحترم نفسه بيحترم كل حاجه حواليه
وبجد يا جماعه حييجي وقت وحنبقي احسن الناس واحنا نقدر نبقي احسن الناس بس لو حطينا في دماغنا اننا نبقي احسنهم بدل ما احنا بنبص لبلاد بره نبص لجوه ونصلح من نفسنا
الكلام للكل بنسب متفاوته لكل الاعضاء ولنفسي قبلهم ولكل المصريين
بجد اتمني اننا نحاول نغير حاجه ويكفينا شرف المحاوله
تحياتي ليكم جميعا

[dr_abooody]

انا بصراحة بعمل زيك كدا و اطول بالي على الاخر عشان الامور تسلك

[OlaOsman]

كلام جميل و موزون :)

نفس الكلام ده كان موضوع نقاش في الاجتماعي من كام يوم و كان النقاش حول الإصلاح يبدأ من الفرد و ينتهي عند الدولة أم العكس.

على فكرة المنتدى هنا عدده ما شاء الله مش قليل.. يعني لو خلينا هدفنا هنا اننا نهتم بأخلاق السواقة زي بالظبط اهتمامنا بحرفية السواقة بالتأكيد ان شاء الله هانعمل فرق.. بس المهم.. كل واحد يبدأ بنفسه.

[SS]

بالتأكيد ان شاء الله هانعمل فرق.. بس المهم.. كل واحد يبدأ بنفسه.

تمام ....و انا هبدأ بنفسى ....هبطل اركب عربيات:)... تجنبا للسلوكيات الهباب اللى الواحد بقى يمارسها من كتر تعامله فى الشارع

[cobraa2008]

ماشي المنتدى كله هايبتدي بنفسه وانا بصراحة بفضل محترم لحد ما العملية تتنيل واروح متحول

على العموماذا احنا 16 الف اذا بدينا موش هنشكل فرق خالص احنا احسن حاجة المنتدى يعمل حملة باسمه


ويشارك فيها ناس بره المنتدى كده نعمل فرق وصوتنا يوصل

[mohamed ismail]

يا جماعة زي ما قلنا قبل كده لو كل واحد بص لنفسه وضبطها الدنيا هاتتظبط وبعدين الحاجات اللي احنا بنتكلم فيها حاجات تافهة ومش بتحتاج مجهود ولا وقت كبير بس لو عملناها هاتفرق كتير
مترميش ورق فيالشارع من العربي
متمشيش مخالف
تقف فيالاشارة حتي لو لوحدك
كده يعني
بصوا يا جماعة انا تعبت من الكلام في الموضوع ده لازم يبقي فيه خطوة ياريت الاخوة اللي موافقين يعلنو من النهاردة الالتزام بقدر الامكان ونشوف النسبة كام ويارب المنتدي كله يبقي كده عموما
انا من النهاردة ان شاء الله ملتزم
يلا ياجماعة فين الهمة لازم يبقي فيه خطوة

[Ahmed Samy]

مترميش ورق فيالشارع من العربي
متمشيش مخالف
تقف فيالاشارة حتي لو لوحدك

أنا كده من زمان و بقف في الإشارة قبل الخط الأبيض كمان
و معاكوا في حملة نايل موتورز لضبط النفس

[mohamed ismail]

علي فكرة يا استاذ احمد ظريف قوي الاسم
حمله نايل موتورز لضبط النفس
والله يا جماعة لو اتجمعنا علي حاجة اكيد هنتغير وهانغير
يلا يا جماعة شدو حيلكم

[دموع الثلج]

يا جماعة زي ما قلنا قبل كده لو كل واحد بص لنفسه وضبطها الدنيا هاتتظبط وبعدين الحاجات اللي احنا بنتكلم فيها حاجات تافهة ومش بتحتاج مجهود ولا وقت كبير بس لو عملناها هاتفرق كتير
مترميش ورق فيالشارع من العربي
متمشيش مخالف
تقف فيالاشارة حتي لو لوحدك
كده يعني
بصوا يا جماعة انا تعبت من الكلام في الموضوع ده لازم يبقي فيه خطوة ياريت الاخوة اللي موافقين يعلنو من النهاردة الالتزام بقدر الامكان ونشوف النسبة كام ويارب المنتدي كله يبقي كده عموما
انا من النهاردة ان شاء الله ملتزم
يلا ياجماعة فين الهمة لازم يبقي فيه خطوة

انا بلتزم 90 % بس لما حد بيكسر عليا بقى ببقى عاوزه مش اكسر عليه ببقى نفسى انزل اولع فيه

ما علينا مفيش كارثه هتحصل لو انا وكل واحد فينا ادى فرصه وخلى اللى قدامه يعدى وصبر ثانيه زياده ومفيهاش مصيبه لو انا وسعت شويه لحد ممكن يعدى من جمبى

انمــــــــا تكســــــــر عليا وفاضل تحك لى عربيتى عشان تاخذ غرز فى شارع زحمه اسمحولى دى مفيهاش التزام بئه ومحدش يقدر يستحمل كده
مش عارفه نفسى التزم معاكم بس لما يبطلوا الغرز والحدف على بعض

[Ahmed Samy]

مش عارفه نفسى التزم معاكم بس لما يبطلوا الغرز والحدف على بعض

ازاي بقى
دا الفكرة هي اننا نمسك نفسنا و مانغلطش مهما الناس غلطت
يعني لو الناس كلها كويسة ...نقفل الحملة بقى و عشانا عليك يا رب

[mohamed ismail]

انا بلتزم 90 % بس لما حد بيكسر عليا بقى ببقى عاوزه مش اكسر عليه ببقى نفسى انزل اولع فيه

ما علينا مفيش كارثه هتحصل لو انا وكل واحد فينا ادى فرصه وخلى اللى قدامه يعدى وصبر ثانيه زياده ومفيهاش مصيبه لو انا وسعت شويه لحد ممكن يعدى من جمبى

انمــــــــا تكســــــــر عليا وفاضل تحك لى عربيتى عشان تاخذ غرز فى شارع زحمه اسمحولى دى مفيهاش التزام بئه ومحدش يقدر يستحمل كده
مش عارفه نفسى التزم معاكم بس لما يبطلوا الغرز والحدف على بعض

يكسر اولع فيه غرز
ايه الشراسة دي كلها ؟؟؟؟؟؟؟؟
عموما يا ستي احتسبي الاجر والثواب علي الله ( مش بنشحت لا سمح الله هههههههههههه)
وبعدين ليس الشديد بالصرعة
انما الشديد الذي يملك نفسه عند الغضب
صلي الله عليه وسلم

[Ramy.Gamal]

وحتى لو 16.131 عضو اصبحوا ملتزمين وبقوا عباره عن ملائكه يقودون سيارات .طيب وبقيه ال80 مليون . اصل 16.131 بنى ادم عباره عن نقطه فى بحر جنب ال 80 مليون ومش هيقدر 16.131 يغيروا 80 مليون . ممكن بعد ما يلتزم جميع اعضاء نايل موتورز نحكم عقلنا نهاجر كلنا

[دموع الثلج]

يكسر اولع فيه غرز
ايه الشراسة دي كلها ؟؟؟؟؟؟؟؟
عموما يا ستي احتسبي الاجر والثواب علي الله ( مش بنشحت لا سمح الله هههههههههههه)
وبعدين ليس الشديد بالصرعة
انما الشديد الذي يملك نفسه عند الغضب
صلي الله عليه وسلم

كلام حضرتك صح بس حاجات تغيظ بتخلى الواحد ينرفز غصب عنه

وعشان الحمله دى تنجح لازم تخرج لمحيط اكبر من من اطار نايل موتورز
مش اعضاء المنتدى هما اللى هيغيروا بعددهم لاننا من المجتمع واحنا برضوا واكيد مننا اللى بيعمل اخطاء فى الشارع
دى ممكن تنجح وتبقى هايله جدا بس لو اتعمل لها دعايه واكبر عدد من الناس تعرف عن الحمله دى فى الوقت اللى بيطبق فيه القانون الجديد اعتقد الدنيا هتتظبط كثير

[SHNORY]

انا بشكركم اوي يا جماعه علي تفاعلكم مع الموضوع
بس فيه ناس بتقول اشمعني انا اعمل وفلان ميعملش
وبيقولوا احنا 16 الف وسط 80 مليون
طيب ممكن سؤال وكل واحد يرد عليه بصراحه قدام نفسه
لو 79 مليون من ال 80 سرقوا واختلسوا ولعبوا قمار وعملوا كل ماهو محرم ومكروه حتعملوا زيهم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
دا علي فرض اننا من المليون اللي فاضل
الموضوع بسيط اوي يا جماعه
الموضوع وباختصار شديد
كل واحد يحترم نفسه علشان الناس تحترمه وفي السباقات والغرز والتخميس مفيش حد خسران غير اللي سايق
والعضو او العضوه اللي بيقول هو يغرز وانا عربيتي تتحك
احب اقولك ان اللي ييجي في الحديد يغور في داهيه طالما انتي سليمه متدوريش علي خربوش ولا حتي علي رفرف
مره سواق عربيه نقل اخدلي العربيه من اول الاكصدام الي ورا لحد الباب عندي ما بيت تطبيق وحك بس خلاص اللي حصل حصل حعمله ايه طالما انا سليم الحديد يتعوض
انما انا لو جرالي حاجه الحديد مش حينفعني
ولما حد يلاقي حد بيجري مش لازم يعمل فهلوي ويزنق عليه مش حتخسر حاجه لما ترفع رجلك من علي البنزين وتعديه يمكن الراجل ده بيجري علشان يلحق واحد في زنقه او ينقل مريض
وحتي لو بيجري غباوه سيبه يغور في داهيه يمكن ربنا بيسترها معاه علشان امه ولا اخته ولا مراته
يا جماعه مش علشان الناس بتعمل احنا نعمل
السن بالسن والعين بالعين بس القصاص مش في العربيات والغرز
والله الواحد بيحاول يهدي ويضبط نفسه متفكرش في نفسك فكر في الناس اللي حتشيل همك لو لا قدر الله جرالك حاجه فكر في امك اللي حتعيط لو ضفر من ضوافرك اتكسر فكر في ابوك اللي حيجري وراك سواء انت سليم او مصاب او اصبت حد بعربيتك
فكروا في الضرر النفسي اللي حنعمله للناس اللي بنحبهم بتهورنا
تخيلوا انكم زنقتوا علي واحد بالعربيه وطلع مبرشم وعمل فيكم حاجه
امبارح انا ماشي بالعربيه علي البحر شوفت 5 حوادث في ساعتين
ليه كل ده
الناس بتنتحر ليه
اللي زهقان من الدنيا ومستبيع يروح يحط عربيته في شجره ولا ترعه ولا حتي يرمي نفسه بيها في البحر متاذينيش انا وجاري وصاحبي واي حد ملهوش علاقه بيك
كفانا الله واياكم شر الطريق

[MoToRiZeR]

حضرتك فكرتني ببرنامج arrive alive كان بييجي علي نايل إف إم

جزاك الله خيراَ علي كلامك بجد يا ريت الناس كلها تفكر زيك
انا بدأت أفكر كدة مؤخراَ لأن حسيت إن بحرق في أعصابي بشكل مبالغ فيه من غير لازمة
و ساعات بيطلع مني شتايم من كتر النرفزة و بيبقي فيه ناس قاعدة معايا في العربية بس مبعرفش أسيطر علي نفسي

فا علي إيه يعني ؟ الموضوع مش مستاهل خاصة اما بخش في مود إني لازم انتقم من اللي زنق عليا و أطلع أجري وراه و غرز و بتاع .. ملهاش لازمة أصغر دماغي مع حد الموضوع مش مستاهل

اللي عايز يزنق يزنق و اللي عايز يجري يجري ولا يغور في داهية طالما انا ماشي محترم علي الطريق

انا بس أكتر شئ بيغيظني إن محدش بيقفوا عند حده من الحكومة و لو وقف في أي كمين خمسين جنيه أو مكالمة تليفون بيخلصوا الموضوع