عيوب الفيات اونو؟؟؟

[enazaky]

انا كنت عاملة موضوع بخصوص احتياج للسيارة وكانت مواصفاتها :-

مساء الخير

يارب تساعدونى ضرورى

انا عايزة اشترى سيارة مستعملة ياريت ترشيح بالماركة والنوع والسنة وتقييم سعر الشراء

فكرت فى البونتو - قطاع الغيار غالية ومش موجودة غير عند اتنين بس

وسالت كام ميكانيكى جنبى قالولى انهم مايجبوش يشتغلوا فيها
هى مانيوال مش اتوماتيك وطبعا اقلعت عن الفكرة بالرغم من شكلها الرائع

وانا مش عارفة دلوقتى اعمل اية
انا عايزة عربية مستخدمة فى حدود 35 الف يزيدوا حاجة بسيطة
وكمان باور وتكيف

القطاع الغيار متوفرة ورخيصة والميكانيكا بيفهموا فيها ومشاكلها قليلة
وكمان تكون مثلا 1300 سىسى وموديل 2000 او اكثر
وطبعا تكون شكلها كويس
علشان انا سيدة
ومش عايزة مشاكلها كتير علشان لو حصل حاجة وانا فى الشارع هعيط جنبها
وتستحمل اسافر بيها 4 او خمس مرات فى السنة + الاستخدام اليومى

فبرجاء النصيحة علما ان كل الناس بتقول الدايو والهيواندى وانا مش لا قية حاجة على امكانيتى كويسة

وكمان انا لو وصلت بالعافية المبلغ 39 الف برضة مش لاقية

ومش عارفة اعمل اية

ياريت تحطوا نفسكم مكانى

مش عايز ترشيح للمبلغ وبس
اهم حاجة قطع الغيار والميكانيكا وسعر اعادة البيع فيما بعد

انا اسفة انى طولت عليكم
وشكرا

والناس والمشاركات ربنا يكرمهم رشحولى هيونداى اكسنت

بس كلها غاليه ومعدية 40 الف وانا مش هقدر خالص خالص

ففكرت فى الفيات اونو

ياريت تقولى عيوبها بجد؟ انا محتاجه لاراكم قوووووى

وشكرا بجد على تعبكم

[beshomilan]

الهيونداى اكسيل فيها كل اللى انتى عايزاه ومتوسطها فى السوق 35000 حسب الحاله
وكمان اسمع ان الفيات تمبرا والسوزوكى سويفت ممتازين كذلك
فكرى فحاجه من التلاته دول

[Sehsss]

الهيونداى اكسيل فيها كل اللى انتى عايزاه ومتوسطها فى السوق 35000 حسب الحاله
وكمان اسمع ان الفيات تمبرا والسوزوكى سويفت ممتازين كذلك
فكرى فحاجه من التلاته دول

+111111
الإكسيل أفضل اختيار والسعر اللي حضرتك حاطاه يجيب الـ 1500 سي سي كمان وتكييفها شغال زي الفل كمان

[dedo_ryo]

و ممكن كمان بيجو 405 قطع غيار متوفره و رخيصه و سهله و 1600 سي سي و تكيف تلاجه و باور و سعرها من 35-40 و موديلاتها من 1990 - 2002 دي الفرنساوي و فرنساوي تجميع مصري
يعني كل اللي حضرتك طالباه فيها بس ياريت حضرتك تختاري حاااااااله كويسه لان اي عربيه مهما كانت
لو حالتها مش تمام يبقي بلاش منها احسن لان هتبقي علي طول محتاجه حاجات

[aw2100]

خليكى فى الأوروبى عندك ابيزا او جولف او سكودا فليشيا وخليكى فى الكاربراتير ابعدى عن الأنجكشن علشان محتاج ميكانيكيه غاليين وحتلاقى مستعمل مكيف بس طبعا مافيش باور وفى حدود 35000 جنية عربيات قوية وقطع غيار معمرة بس موديلات من 90 ل 97 مش موديلات 2000 ومبروك مقدما !!

[أبو يوسف]

رأيي
الاونو _ صغيرة جداً , ومش عملية
أكسيل- عربية جميلة وسعرها كويس وميكانيكا وقطع غيار رخيصة
البيجو - الفرنساوى معقد
إبيزا - قطع غيار غالية
شاهين - محترمة - قوية - قطع غيار ميكانيا برخص التراب

[ahmedteam]

اسبيرانزا 113 عربيه جميله و شيك موتور 1300

[SYD]

طبعا مع كامل احترامي للأراء السابقة
انا بس حابب اوضح معلومة لكل اللي شاركوا في الموضوع
الأبيزا قطع غيارها مش غالية زي ما الناس مطلعة عليها
وبقول لكل اللي شارك وبيقول غالية - شوف الموضوع دة وبعدين قرر هي غالية ولا لاء

http://www.nilemotors.net/Nile/341028-a.html

كمان - عايز ارد علي ترشيح الأبيزا كارب ومش انجيكشن
مين قال ان الكارب مشاكله اقل او ارخص في صيانته ؟؟؟
انا معاك ان الحساسات اجمالاً اغلي من الكارب كله علي بعضه جديد
بس دة في حالة لو هتغيرها بالكامل مع بعض - ودة عمره ما هيحصل

لكن مع الأستخدام اليومي - هتلاقي الأنجيشكن اوفر واريح وبيعلي الأداء

انا مش بقول لحضرتك هاتي ايه وماتجيبيش ايه
بس انا برد علي المشاركين وبيرددوا كلام التجار في السوق

رأيي الشخصي
الأبيزا - اكثر عربية حققت المعادلة الصعبة
1- موديل عالي (99-2002)
2- سعر مناسب (35-40)
3- كماليات (باور - تكييف - 4زجاج - مرايات - سنتر وانذار فبريكة - مفتاح بالريموت مدمج - فوج لايت)
4- انجيكشن وكمبيوتر اعطال في بعض الموديلات
5- قطع غيار (سعر وتوافر وعمر افتراضي)
6- بلد المنشأ (تكنولوجيا الماني بالكامل ومعايير اوروبي بتصميم اسباني رائع)
7- عوامل الأمان (ايموبلايزر لمنع الدوارة بمفتاح مصطنع - 5 احزمة امان ثلاثية النقاط - 4 مساند رأس - اير باج في بعض الموديلات - ثبات علي السرعات والملفات)
8- تكاليف التشغيل (موفرة جدا في البنزين مع المحركات ال1.0 وال1.4 الأنجيكشن - قطع غيار معمرة بسعر مناسب)
9- شكل شبابي عصري

ااما عن العيوب
1- صغر المساحة التخزينية في الشنطة للأبيزا - والعيب غير موجود بالمرة في موديل القرطبة
2- في حالة التعامل مع ميكانيكي او كهربائي غير متخصص - بتقضي علي العربية
3- في حالة التحميل لأكثر من 4 افراد بتحك في المطبات

بخلاف ذلك - العربية اكثر من ممتعة

تحياتي للجميع ومحدش يزعل من كلامي
انا بس بوضح للناس كلها يعني ايه سيات ابيزا

والله المستعان
،
،