فرصه - استعمال راقى - لدواعى السفر

[abokoko]

مش عارف الموضوع مكانه هنا
ولا فى الاجتماعى
لكنى بعبر عن رأيى الشخصى و انطباعى

لما بشوف اعلان بيع سياره او اى سلعه قابله للبيع و الشراء
والاقى مكتوب العبارات التاليه

فرصه ...
استعمال راقى
لدواعى السفر
... كلام له نفس المعنى ...


باعتبر الشخص بيبالغ فى عرض السياره او السلعه
او انه بيحاول يبعها باعلى من سعرها
او بيدارى جزأيه معابه فى السياره او السلعه باستخدام هذا الاسلوب


ايه رايكم هل من مؤيد لكلامى وعنده نفس الانطباع
( يمكن تكون دعوه لتجنب هذا الاسلوب فى عروض البيع )

[hugan]

معاك طبعا
ولو سلعته مميزه فعلا او حاله نادره
يكون من داخل الموضوع

[WessamRaafat]

أصلا هى معلومة مالهاش لازمة
مسافر مش مسافر هوا أنا حشتري واللا حناسبه

[emad_2020]

شوف هو ممكن يكون كاتب انو مديك عروسه وتروح تلقى غير كدا هو بيشجع المشترى اما يكتب كدا وفعلا ناس كتير تحب يكون كاتب موصفات اكتر بس المهم فعلا اما تشوفها صدقنى عن تجربة متخدش من الكلام مفيش اكتر منه المهم على الطبيعة ولو معندكش خبرة فى العربيات يبقا تاخد حد بتثق فيه

[abokoko]

الحمد لله
مش لوحدى
هههههههههههههههه

كنت لما بدخل قسم البيع والشراء
والاقى النوعيه دى من العبارات
افتح الموضوع وعند انطباع مسبق بالريبه

[mohamed_selim]

زى بالظبط لما اروح اشترى اى حاجه من شركه اسمها الامانه او تراست باكون متاكد ان هيتنصب عليا :)

[abokoko]

ما اتلسعت من الكلام المعسول قبل كده فى عربيتى الاولى اللى اتعلمت عليها
اشتريتها ب13 وصرفت حوالى 7 او 8 وبعتها ب8.5
حسبي الله ونعم الوكيل

اللى جابها لى قال اهى منصوبه
قلت تمام وبعد الشراء غيرت ال4 مساعدين
وكانت بتطلع دخان ابيض قلى جوان بسيطه 300 او 400 جنيه ويبقي زى الفل
قلت تمام ولما اشتريتها قالوا لى خسارة الشغل فيه فغيرت الموتور باستيراد
وكان الفتيس سايب قلى ورة او غويشه ب10 او 20 جنيه تلم الفتيس ويبقي 100%
قلت تمام ولما اشتريها قالوا لى انزال الفتيس وحله للكشف عليه اغلى من كده وغيرت بواحد استيراد (مع الموتور )
ده غير البيض وعمود الكردان والفلنشه مرتين والزور ووو
ذكريات عربيتى المنصوبه
هههههههههههههه
منه لله

[abokoko]

زى بالظبط لما اروح اشترى اى حاجه من شركه اسمها الامانه او تراست باكون متاكد ان هيتنصب عليا :)

ههههههههههههههه
فكرتنى بواحد اشتغل فى نفس الشركة وبعدين اتفصل
كان اسمه - امين - وطلع حرامى

[أحمد عبدالله]

طبعا ممكن لترويج السلعة بس ممكن القلة بيكتبوها ردا عليك لو بتسال هتبيع ليه فيها عيب

[M.Ayman]

لا في رأيي مش بيداري ولا حاجه هو بس ده اسلوب تجار او الناس اللي بيبيعوا و يشتروا عربيات شخصيه كتير .... دي من ضمن شوية جمل كده بيقولوها علي اساس انك تحس انها عربيه وهميه ... رأيي لو شفت عربيه مكتوب عليها كده و شكلها محترم روح شفها و سيبك من كل كلامه و اكشف عليها طلعت تمام و صاحبها طالب سعر حلو خلاص .... لانها مش شرط انها عربيه معيوبه بس غالبا هيطلع تاجر و لو تاجر ده في حد ذاته عيب لانه هيزود السعر و هيعملك البحر طحينه و يوهمك لو مش فاهم

[SHNORY]

ههههههههههههههههه
فكرتني بعضو كان معانا باع اكتر من 5 عربيات في كام شهر
وكلهم استعمال طبيب واستخدام سفاره ولدواعي السفر هههههههههه
ولو حد دخل يستعلم ولا يفاصل كان بيتروق هههههههه
انا مش بغتابه ولا قصدي اتريق عليه شخصيا
انا بتكلم علي الاسلوب نفسه
خد عينه

http://www.nilemotors.net/Nile/160890-1997.html

[JapRuleZ]

استعمال طبيب .............

[p r i n c e]

المعاينة ثم المعاينة و سيب صاحب العربية يتكلم براحته
حرص ولا تخون
حتى لو هتصرف ألف جنيه على الكشف على العربية أحسن ما تتدبس ف عربية تقرفك
و بلاش كلام و فصال فالسعر إلا بعد المعاينة

[aboamina]

انا الفترة دي بدور على عربية استعمال المهم اتفرجت على كام عربية وسمعت حاجات تضحك بجد على سبيل المثال :
لانسر قرش عاملة 190000كيلو صاحبها بيحلف ان الكاوتش اللي فيها بتاع الفبريكة ، واحد كلمني على بومة 2009 وأكدلي انها استعمال خفيف لزوجته ولما شفتها لقيت عدادها 138000ك .... وغيره من الاكاذيب اللي بتدل على ان صاحبها مش كداب بس بل وغبي كمان . ومن كتر ما قريت وسمعت كلمة لدواعي السفر من اصحاب العربيات المعروضة للبيع بحس ان المصريين كلهم مسافرين بس مستنيين يبيعوا عربياتهم

[p r i n c e]

انا الفترة دي بدور على عربية استعمال المهم اتفرجت على كام عربية وسمعت حاجات تضحك بجد على سبيل المثال :
لانسر قرش عاملة 190000كيلو صاحبها بيحلف ان الكاوتش اللي فيها بتاع الفبريكة ، واحد كلمني على بومة 2009 وأكدلي انها استعمال خفيف لزوجته ولما شفتها لقيت عدادها 138000ك .... وغيره من الاكاذيب اللي بتدل على ان صاحبها مش كداب بس بل وغبي كمان . ومن كتر ما قريت وسمعت كلمة لدواعي السفر من اصحاب العربيات المعروضة للبيع بحس ان المصريين كلهم مسافرين بس مستنيين يبيعوا عربياتهم

:-d :-d هههههههههههه