رخصة قيادة في ساعة و نص - تحية و تقدير لمرور الشروق

[Samir Elshahawy]

الأخوة و الاخوات الكرام ....

أسعد الله أوقاتكم بكل الخير ...

أخيرا جاء الموعد و تقدمت اليوم لأستخراج رخصة قيادة جديدة حيث أن رخصتي كانت قد أنتهت يوم 20 / 5 / 2013 أثناء عودتي من دمياط و من يومها و انا اسير أو لا اسير برخصة حيث أني كنت خارج البلاد معظم الوقت و عندما عدت مساء الاثنين كانت رخصة القيادة علي قائمة أولوياتي

بداية اود ان استعرض معكم بعض الحقائق المهمة التي تغيب عنا جميعا دون الدخول في تفاصيل :
- عند تغيير محل الاقامة و أصدار بطاقة شخصية جديدة بمحل أقامة مختلف عما هو مثبوت برخصة القيادة يجب التوجهه الي المرور و أخطارهم بذلك خلال 30 يوم و ألا تعتبر الرخصة لاغية وفق القانون

أي نعمممممممم ................ لاااااااااااااااغية
هذه المعلومة التي حصلت عليها عندما توجهت الي مرور دمياط يوم 20 مايو لتجديد الرخصة و تغيير العنوان و بذلك فأنا رسميا كنت أسير بدون رخصة قيادة لمدة تزيد عن ال 7 أعوام

طبعا كان البديل أمامي هو أستخراج رخصة جديدة ... يعني أوراق و أمتحان و هيصة

بالفعل بدأت في تجهيز الاوراق المطلوبة عقب عودتي من مدينة دمياط لكن ظروف العمل و السفر للخارج أجلت الموضوع حتي حان الوقت اليوم

و بالفعل بدأ اليوم مبكرا حيث توجهت للمرور و أنا متوقع أني سأمضي اليوم بأكمله في المرور و قد أتسلم الرخصة في الغد و لكن ..

بعد أن وصلت الي وحدة مرور الشروق دخلت علي الشباك و أستلم الموظف الملف مني و بدأ في مراجعته و هنا ............... بادرني بالسؤال عن اسماء الاطباء و رقم القيد الخاص بهم علي التقارير الطبية

هنا أدركت أن اليوم راح و أحلامي تبخرت و بادرته بأن أسماء الاطباء مطبوعة علي التقارير لكن رقم القيد لا أستطيع الحصول عليه و هو مايعني ضياع اليوم بأكمله و هنا جاء الفرج ...

الموظف أخذني و ذهبنا الي رئيس وحدة المرور الذي كان متواجدا بساحة الفحص الفني و كلمه في الامر و هنا وافق رئيس المرور علي أستكمال الاجراءات

طبعا تنفست الصعداء و شكرت الرجل بشدة فأول و أهم خطوة تمت و تبقي الخطوة التالية المهمة جدا و هي الامتحااااااااااااااااااااااان

توقفت 10 دقائق و أذا بالموظف يطلب مني أن نتوجه لرئيس المرور مرة أخري لأداء الامتحان و كنا أثنين أنا و سيدة معها ابنها الصغير ووالدها , و هنا طلب مني أحضار السيارة و دخول الامتحان العملي مباشرة

و ماهي الا دقائق حتي دخلت بسيارتي و خلال ثواني كنت قد أنهيت الامتحان العملي بمنتهي البساطة

بعد ذلك بدقائق توجهت للخزنة لدفع الضريبة 51.00 جنيه و بعدها مباشرة نادوا علي أسمي للتصوير و يادوب 10 دقائق و كانت الرخصة في أيدي

بأختصار دخلت المرور 10 ألا ربع و خرجت منه بالرخصة 11 و ربع , يعني ساعة و نص
أيشي خيااااااال يا نااااااااااااااااس

بجد ماكنتش مصدق نفسي , أن فيه في مصر مرور كده و من غير واسطة و لامحسوبية و لا فلوس و لا أي حاجة

طبعا توجهت لرئيس المرور و شكرته بشدة هو و الموظف اللي عمل لي أجراءات الرخصة , و قد أيه كانوا في منتهي التواضع و أنهم ماعملوش غير الواجب


بجد أحب أشكر مرور الشروق و أخص بالشكر :
- الرائد / محمد المرشدي ... (رئيس وحدة مرور الشروق)
- ا/ نبيل .... (موظف شباك رخص القيادة الجديدة)
- و كل العاملين بالوحدة

---------------------------------------------------------------------------------------------------

الأوراق المطلوبة لرخصة القيادة الجديدة

1- أثبات الشخصية (بطاقة شخصية - جواز سفر)
2- شهادة المؤهل الدراسي
3- شهادات اللياقة الطبية (باطنة - سمع - نظر - فصيلة دم) عليها أسماء الاطباء و رقم القيد
4- عدد 4 صور شخصية
5- نموذج 256 مرور لطلب الرخصة (من الخزنة)
6- نموذج الامتحان الشفوي و الكمبيوتر (من المرور)

[dem0]

يا بختك هنا لازم تستني للساعه 12.30 ظهرا لما تمتحن علشان الراجل مش فاضى فيمتحن كل المقتدمين ورا بعض :d فبيستنوا لما يجمع عدد ده الفرق بين الشروق والصعيد :d

[kokowasfy]

بس سوئال من امتا بيمتحنوا سواقة بس مش المفروض تمتحن بلكمبيتور النظرى وبعد كدا اختبار السواقة ؟؟ و على فكرة انا طلعت الاختى رخصة فى عشر دقاق ب 500 جنية و هية لا تعرف شى عن السواقة

[hossam_elwani]

مبروك الرخصه

بس على فكره هما حافظين مش فاهمين

كلمة تعتبر الرخصه لاغيه معنها اعادة استخراج الرخصه بخطواتها المعهوده لكن بدون امتحان قياده وده يحصل فى اغلب وحدات المرور

يعنى شغل ورقى فقط لاغير

تحياتى

[koshary]

مبرررروك ياباشمهندس ,, شىء خيالى فعلا

[Dr.Karim Emam]

و على فكرة انا طلعت الاختى رخصة فى عشر دقاق ب 500 جنية و هية لا تعرف شى عن السواقة

و انت فخور و فرحان قوي بنفسك كده؟!!
لا حول ولا قوة إلا بالله

[S O P H O S]

مبروكــ
شئ جميل فعلا ..

[hossamalsadik]

مبروك
زى مابينتقد السلبيات
لازم ندور على الإيجابيات ونشجعها

[alaamousa]

مبارك عليك الرخصه الجديده يا هندسه

[stormboy]

المقصود بمرور الشروق هو اللى فى مدينة الشروق ولا مكان تانى ؟
مبروك على الرخصة

[el diesel]

مش تقول انه مرور الشروق :)
مبروك الرخصة يا هندسة و يارب كل ادارات المرور تبقى بالمنظر ده

[kazamodia]

فكرتني يوم ما رحت ارخص العربية الجديدة من شهر طلعت من الرحاب على طريق السويس وللاسف دخلت الشروق من بوابة غلط ولاقيت نفسي تايه فيها ومش لاقي حد خالص اسأله فين المرور وراكب عربية من غير نمر ومش معايا رخصة وممكن اتثبت في لحظه وتتاخد العربية والساعة 12 وخايف المرور يقفل لكن الحمد لله وصلت المرور وفي نص ساعة بالظبط كانت المر طلعت واتركبت وانا قاعد في عربيتي والواد بتاع سمير ريان خلصلي كل حاجة وخد 50 جنية مع اني كنت ممكن اعملها بنفسي لكن الوقت كان اتأخر اوي وكنت خايف ارجع بالعربية بدون نمر

المرة التانية لما رحت اطلع الرخصة وكانت امي برضو عايزة تطلعها معايا دخلت لرئيس الوحدة وقعد يسألني في الاشارات ومع اني كنت مذاكرهم والله لكن معرفتش اجاوب بس قعدنا نضحك شوية مع بعض وقال لي انا هنجحك بس عشان ضحكتنا وعملت الاختبار العملي والحمد لله طلعتها لكن امي للاسف منجحتش وكانت الوحيدة اللي منجحتش عشان كانت رايحة بنية انها تدفع 500 جنية وتعملها من غير اختبار قام ربنا مسقطها وانا فرحت فيها بصراحة هههههههههههه

انا عندي سؤال اخير الكمبيوتر عندهم اشتغل ولا لأ لانهم مطلعنلي ورقة كده عشان المبيوتر بايظ فانا عايز اعرف هو اشتغل ولا لسه ؟؟؟؟

[houba85]

ثانية واحدة .. يعني انا عشان اجدد رخصتي لازم اعمل اختبار نظري وعملي ؟؟؟!! العملية مش مجرد ورق بستوفيه وباخد رخصتي وخلاص على كدة ؟؟

[ICE_MAN]

ثانية واحدة .. يعني انا عشان اجدد رخصتي لازم اعمل اختبار نظري وعملي ؟؟؟!! العملية مش مجرد ورق بستوفيه وباخد رخصتي وخلاص على كدة ؟؟

لا لا ياباشا الموضوع ورق بس لكن المشكلة لو غيرت عنوانك فى البطاقة لازم تخطر المرور خلال مدة معينة والا تعتبر الرخصة لاغية و تمتحن من جديد .. انما لو العناوين فى البطاقة زى الرخصة خلاص مفيش مشكلة.. و على فكرة القانون ده انا عارفه من فترة لكن للاسف ناس كتير ماتعرفوش و بتقع فى المشكلة دى.

[houba85]

لا لا ياباشا الموضوع ورق بس لكن المشكلة لو غيرت عنوانك فى البطاقة لازم تخطر المرور خلال مدة معينة والا تعتبر الرخصة لاغية و تمتحن من جديد .. انما لو العناوين فى البطاقة زى الرخصة خلاص مفيش مشكلة.. و على فكرة القانون ده انا عارفه من فترة لكن للاسف ناس كتير ماتعرفوش و بتقع فى المشكلة دى.

تمام جدا .. انا كدة كدة حغير العنوان الشهر الجاي .. امري الى الله .. شكرا ليك :)