ازاي اصب البنزين من الجركن في العربيه؟

[amagroup]

باختصار شديد كنت رايح الاسكندريه وانا معايا بنزين ميكفيش كل الطريق من المنصورة
وكان نفسي اوصل لاحلي بنزينه في الطريق لكن قضاء الله وقني في بنزينه اعقد فيها ساعتين ونص ...اه والله لولا الصبر اللي بعتهولي ربنا وكيس لب قعدت اكله كان طلعت روحي

المهم قلت انا اجيب جركن يكون معايا ينفعني وجبت والحمد لله من اسكندريه حوالي 22 ليتر ولا حاجه

بس ازاي اصبه في التانك

مش عارف

[horas3000]

لسه متعرض للموقف ده

http://www.nilemotors.net/Nile/363309-a.html

و سواق التاكس اللي ساعدني جاب ازازه ميه معدنية و قطع قعرها و استخدمها كقمع
انت ممكن تعمل كده او تخلي معاك قمع

[aboamina]

ولو فتحة التانك مش عدلة والقمع هيبقى مايل قوي زي ماكان عندي في عربيتي القديمة...

ممكن تقطع ازازة بلاستيك وتحط قطعة من خرطوم طولها من20 ل30سم في بوز الازازة وتخليها معاك في العربية تحسبا

للطوارئ. انا بنصح الناس كلها تعمل كدة في الايام البيضة دي.

[MohammedAladel]

دى حاجة بسيطة جدا !

لتر بيبسى أو أى زجاجة بلاستيك وقص الجزء اللى فيه البق بتاعها وهات حتة خرطوم بلاستيك بتاع مية ولف عليه شريط لحام لحد ما يدخل معاك زنق فى بق الزجاجة وبعدين لف شريط لحام تانى وخليها فى شنطة العربية على طول

[mona_881]

مع كامل احترامي لآراء الاخوة اللي علقوا قبلي وفكرة القمع دي والزجاجة الفارغة المقطوعة من تحت بس دي بقت حاجة قديمة قوي
دلوقتي ظهر في الاسواق (حلوة ظهر في الاسواق دي) قمع كاوتش ومتصل بيه خرطوم كاوتش برضه مرن ومتعرج كده طوله حوالي 20 او 25 سم ودا يناسب جميع التانكات
وفعلا الحاجة ام الاختراع في الايام الحلوة اللي احنا فيها دي
اه كنت هانسي القمع ب 10 جنيه عند ابراهيم اللي في شارع دمشق

[midofarh]

الفكره الجمده اهى...خرطوم فقط...حط الجركن على شنطه العربيه ووصل الخرطوم بين الجركن وفتحه التانك وبعدين عند فتحه الجركن اقفلها بايدك كويس وبعبدين انفخ فى الجركن هتلاقى البنزين بيصب فى التانك وعلشان تتاكد اسمع صوت البنزين وهو بينزل

[MohammedAladel]

مفيش أحلى من الحاجة اللى تعملها بإيدك وأنا إيه ضمن لى القمع دا يتقطع ولا يكون خامته إيه وبعدين لما يكون عندى حاجات بدل ما أرميها وما فيش أكتر من الزبالة فى بلدنا ... أستغلها وأعمل منها حاجة بسيطة وببلاش وتؤدى الغرض

[m_elkhishin]

لو زجاجة او جركن صغير۔ الاسهل قمع
انما لو جركن كبير:
اعكس اللي عمله في الفيديو۔
حط الجركن على سقف العربية
اسحب بنزين ببقك لحد ما يوصل لطرف الخرطوم وبعدين حط الخرطوم في التانك


[youtube]https://www.youtube.com/watch?v=iRUJrSe8iCc[/youtube]

[exact]

لو الدنيا تربست قوي قوي ممكن تعمل دواسه صغيره زي القرطاس وتصب فيها... احسن حاجة الازازة البلاستيك

[Hossam_hassan4]

مش غلط انك تسيب بنزين في العربيه مع درجه الحراره دي مش خطر ؟!!

[Ahmed Nasser]

الفكره الجمده اهى...خرطوم فقط...حط الجركن على شنطه العربيه ووصل الخرطوم بين الجركن وفتحه التانك وبعدين عند فتحه الجركن اقفلها بايدك كويس وبعبدين انفخ فى الجركن هتلاقى البنزين بيصب فى التانك وعلشان تتاكد اسمع صوت البنزين وهو بينزل

دى احر حاجة تعملها وسيبك بقى من الاقماع والكلام دة
انا باستخدم الطريقة دى على طول وزى الفل

[amagroup]

لو زجاجة او جركن صغير۔ الاسهل قمع
انما لو جركن كبير:
اعكس اللي عمله في الفيديو۔
حط الجركن على سقف العربية
اسحب بنزين ببقك لحد ما يوصل لطرف الخرطوم وبعدين حط الخرطوم في التانك


[youtube]https://www.youtube.com/watch?v=irujrse8icc[/youtube]

شكر خاص لصاحب هذه المشاركه اللي وضح لي ازاي اتصرف وبالاستعانه ببعض الزملاء في العمل طلعت بالنتيجه

شوف
1. تحط الجركن علي شنطة العربيه وتفتح الغطا وغطا التانك
2.تجيب خرطوم شفاف 2 متر ولا حاجه وتتأكد ان يخش في زور التانك
3.تحط الخرطوم في الجركن لغايه اخره وتشفط من الطرف الثاني لغايه ما تملي نص الخرطوم(هتشوفه طبعا لانه شفاف)
طبعا لو شفطت جامد هتلاقي البنزين جري في الخرطوم وده حصل معايا تقوم لاحق نفسك وقافل الخرطوم بصبعك عشان توقف البنزين قبل ما يوصل للطرف اللي في ايديك
4.بكل بسطاه وسرعه حط الطرف الثاني في التانك واتأكد انه زق البوابه اللي علي زور التانك عشان يقعش البنزين بره وسبه يفضي ولما تلاقي الجركن بدأ يفضي اتأكد ان الخرطوم في آخر الجركن وميل الجركن ناحيه الخرطوم عشان الهو ميدخلش فيه لغايه ما يفضي
5.اول ما يفضي ارفع الخرطوم من الجركن لفوق عشان تفضي التصافي اللي فيه في التانك وبعدين كده خلاص

مش غلط انك تسيب بنزين في العربيه مع درجه الحراره دي مش خطر ؟!!

انا بحط البنزين في الجراج في الجركن عشان الحرارة زي ما انت قولت وبعدين انا مش ضامن البنزين ممكن ياكل الجركن ولا لأ لاني شاري جركن مياه(عرفت انه بتاع مياه لان مكتوب عليه من تحت الشريف للبلاستيك والمصنع ده معمول للشرب مش للبنزين) مش جركن بنزين للأسف معرفش النوعيات النظيفه دي بتجاب من فين

[S O P H O S]

اي زجاجة بلاستك وتقصها من النص

[amagroup]

اي زجاجة بلاستك وتقصها من النص

في بعض عربيات بعد ما تفتح التانك بتلاقي بوابه جوه لازم دخلها حاجه طويله عشان تتفتح وعشان كده مينفعش زجاجه بلاستيك لازم قمع بدل الزجاجه

[mahmoud85]

جركن البنزين هو جركن الزيت الكبير تشتريه من اي حد بيغير زيت فاضي ب 5 جنيه