ماساة الطريق الدائري انهار دة

[janagabr]

انهاردة الطريق الدائري كان واقف من قبل منزل المنيب بشوية بطول ٤٠ او ٥٠ كيلو في اتجاة الجيزة نتيجة انقلاب عربية نقل علي جنبها بعرض الطريق وطيران الكونتينر اللي شايلاه لمسافة ٣٠ متر تقريبا وربنا ستر ان مفيش عربيات لبست في النقل والا كانت هتبقي ماساةالصراحة قعدت افكر طاب الونش اللي هيقطر النقل هيوصله ازاي الا اذا طلع عكسي من المنيب لحد مايوصل الي الحادث
الطريق الدائري دة سعات تحس انة بينجز وسريع وواسع وساعات تحس انة واقف علي طول وزحمة وعشوائية النقل والميكروباسات والتكاتك
يعني هتلاقي وانت ماشي عربيات نقل ماشية بسرعة جدا وكمان محمل حمولة زيادة طاب انتي معاك فرامل توقفك علي سرعات عالية طاب متاكد من وضع الحمولة بتاعتك واللذيذ انك تلاقي عربيات الرمل والزلط الصغير الابيض بيقع علي الطريق ومبهدل عربيات بشرية وراه طاب هي الحمولة ده بيتبقي منها حاجة عقبال ما توصل الموقع
ولا الميكروباسات والسوزوكي فعلا.............،.،،،
ولا بلاش خسارة ناخد فيهم سيئة واحدة
ولا التكاتك والحنطور بتاع الخضار والفاكهة
انهاردة لسة شايف توك توك ماشي علي الدائري ومعاه ركاب ورابط حصان في ظهر التوكتوك
اتصدمت لما شوفت المنظر دة قمت قعدت اصورة لقيت الواد سواق التوكتوك بيضحك ومبسوط وبيعملي باي باي مش عارف هو فهم إيه عشان يضحك
الصراحة الدائري دة لو نضف واتخطط وشالوا الدبش اللي مرمي يمين وشمال الطريق وعدلوا السور والأسفلت هيبقي طريق جامد وفري واي ياريت الجيش يظبطة زي كوبري الجيش المصري والمشير وسعد الشاذلي بجد طرق تفرح
مش الدائري اللي احتمال تموت علية كل يوم
تحس ان الناس بتلعب العربيات المتصادمة
بلا قرف
كفاية عشان أنا اتنرفزت
ربنا يهدي

[AlGazar2]

الدائرى امبارح قبل نزله المعادى بكيلو او اتنين تقريبا كان فى عربيه رمل جزء كبير من حمولتها وقع على الطريق الكلام ده بالليل طبعا من ستر ربنا ان مفيش عربيات اتقلبت فى الحته دى لان الحتة دى اكتر حته بيتجرى فيها على الطريق كله

و بجد ياريت يعدلوا الطريق ده و يظبطوه هو هياخد فتره و هيعمل اختناق مرورى شويه بس هيتظبط عن الاول كتير

[Ahmed Amin]

أنا شوفت صور الحادثة دي علي بيقولك أنهارده وانا في الطريق للشغل,

https://www.facebook.com/photo.php?fbid=629420193749596&set=a.163742876983999.34287.159381114086842&type=1&relevant_count=1

بصراحة الطريق دا بقي صعب أوي.

[besso]

قصدك حلبه الفورميلا 1 مش الطريق الدائرى

[hugan]

الدائري ماهو الا سيرك كبير

[Ahmed Amin]

طريق المغامرات والشقلابانات والغرز والأدغال.

[Imhotep]

و هو الدائرى بس.... تعالوا اتفرجوا على المحور النهاردة على الصبح عربية نقل محملة رمل اتقلبت بحمولتها و من كتر السرعة اللى كان ماشى عليها الحيوان اللى كان راكبها الاكس اتكسر و العجل بقى فى حتة و البوكس بقى فى حتة و حاجة تقرف

[Land_Cruiser]

في اي حادثه فتش عن النقل ... مفيش حادثه بقت بتحصل إلا و هتلاقي النقل سبب فيها . يأ إما كسر علي عربيه او لبس فيها او وقع حمولته عليها و طبعا بقت الموضه انه يمشي شمال براحته و مفيش حد بيقوله انت بتعمل ايه فعمّال يعيث في الارض فسادا

[akmm]

ربنا يستر ..............

[Amo0o0oRa]

كنت على الدائرى من شوية وكان فى مقطورة مفلوبه عند بشتيل كده ملحقتش اصورها بس كان الكابينه معدية على الاتجاه التانى والمقطورة مقلوبة على جنبها ووقعت الحموله كلها وكانت عبارة عن حجارة كبيرة لونها اسود عامله زى البتاع اللى بيسفلتوا بى ده

[Ahmed Lotfy]

الرحمة من عندك يارب العالمين

[besso]

تحس ان سواقين النقل دول بيبقوا مش شايفين غير نفسم
وحجم العربيه وقوه الماتور وصوته بتحسسه انه ممكن يهرس اى حد (ليهم حق الصراحه هههههههه)

حقيقى احنا بلد العجايب

[S O P H O S]

الطريق ده هيفضل خطر بشكل كبير

[mo7a_mo7a]

الدائري ماهو الا سيرك كبير

لك الله يا مصر