استشارة قبل شراء سيارة مستعملة

[wahba87]

السلام عليكم

امامى سيارة نيسان صنى 2008 فابريكة برة و جوة , 89000 كيلو مطلوب فيها 75000 جنيه و كل صياناتها فى التوكيل

السيارة فى القاهرة و لكنها مرور محرم بك فى اسكندرية و هى دى المشكلة

انا اصلا تبع مرور الوايلى , اشتريها ولا بلاش وجع دماغ

و ايه الخطوات علشان انقلها مرور الوايلى , و محتاج اسافرلها كام مرة ؟

[A_Ismail]

لابد من التأكد أن هذه السارة لها أوراق فى مرور محرم بك

الأخ المحترم،
أولاً لابد من التأكد أن هذه السارة لها أوراق فى مرور محرم بك و تسلسل التوكيلات مظبوط و مثبت فى ملفاتها، حتى تتأكد أنها ليست مسروقة. لأنك لو اشتريتها لن تستطيع ترخيصها و ستخسر نقودك، و لو مررت بكمين و تم التحفظ على السيارة لأنها مسروقة سيتم القبض عليك أيضا حتى تثبت أنك لست السارق. هذا هو أول ما يجب الحذر منه.
ثانياً، التأكد تمام التأكد من أنها ليست مغيرة ربع أو نص أو سقف و هذا لا يتم التأكد منه إلا عن طريق سمكرى أمين، و ضع تحت كلمة أمين ألف خط و خط.
أنت محتاج ثلاثة مشاوير تقريبا لمرور اسكندرية منها مشوار للتأكد من الخطوة الأولى التى ذكرتها فى أولاً.
أخيرا،،،، اشترى سيارة زيرو بهذه المبلغ أفضل مائة مرة مهما كان نوعها، ممكن تقسيط باقى المبلغ، و لكن إذا هممت بشراء زيرو، اشترى من التوكيل مباشرةً و ليس من أى معرض.

[wahba87]

أشكرك A_Ismail

السيارة بإسم مالكها و هو مالكها من الزيرو (أول يد)

يبقى نقدر نقول انى محتاج مشوارين تقريبا ؟

[A_Ismail]

أشكرك a_ismail

السيارة بإسم مالكها و هو مالكها من الزيرو (أول يد)

يبقى نقدر نقول انى محتاج مشوارين تقريبا ؟

باشا مين اللى قال انه أول مالك،،،، الرخصة اللى معاه صح؟ طيب مين اللى قال ان الرخصة دى مش مضروبة،،، مرور اسكندرية صح؟

[Mostafa.Mahran]

الاحسن انك تشترى دماغك و دور على عربية من القاهرة و ورقها هناك و غير كده العربية تعتبر عادية مش حالة شاذة

[S O P H O S]

اشتري من هنا افضل ..

[mo7a_mo7a]

خلي صاحبها يجيبلك شهادة بيانات معتمدة من مرور محرم بك وموجهه لمرور الوايلي كده تبقي تمام
ثاني حاجة شهادة مخالفات
ثالث حاجة تنقل ملكية فورا
كده تبقي في السليم


تحياتي