شيفورليه أوبترا (أسهل سيارة تتسرق)

[lionheart1313]

تجربتي مع السيارة شيفورليه أوبترا:

يوم الأربع الماضي سافرت للأسكندرية ونزلت عند أحد أقاربي وركنت السيارة (الشيفورليه أوبترا 2010) وقفلت السنتر وسوجرت الطارة وكله تمام التمام وطلعت أنام.
وبعد حوالي 4 ساعات نزلت وأذا بالعربية مش موجودة (يانهار أسود).
زي أي حد جريت على القسم عملت محضر وبلغت النجدة وكل ما يلزم من أجراءات قانونية.
المهم ده كله ما فادنيش بحاجة.
وبعد الفطار لقيت واحد بيتصل بيا (لأن علبة الكروت بتاعتي كانت في العربية) وبيقولي هات 35000جم وخد عربيتك.
وبعد مفاوضات وصلت ل 15000جم وغصب عني دفعتهم والحمد لله أخدت عربيتي (متنفضة) مفيش أستبن - مفيش كاسيت - مفيش كوريك - مفيش كونتاكت - مفيش - مفيش - مفيش ........
وده طبعا بعد فيلم هندي شوفته في التعامل مع عصابه تحت تهديد السلاح (الحمد لله أنهم ماقتلونيش).
وهنا المفاجأة!!!!!!!!!!!!!
العربية مش مكسور أزازها أو فيها أي علامات عنف.
جريت على التوكيل وسألت أزاي العربية أتفتحت؟؟؟؟
وأزاي الأنزار ما ضربش؟؟؟؟
وأزاي الطارة أتفكت؟؟؟؟
وأزاي العربية دارت؟؟؟؟
وأذا بالباشا في التوكيل بيقولي :
((( العربية مافيهاش أي وسائل أمان ضد السرقة و بتتفتح بأي مفك رفيع وبتدور بنفس المفك وده كل غير سهولة تعطيل الأنذار )))
من الأخر أسهل من ال 128 في سرقتها.
مش بخوفكم (بس نصيحة مني محدش يفكر يضيع فلوسه في عربية يحزن عليها بعد 5 دقايق).
وحسبي الله ونعم الوكيل في منصور وألي يجي منه.

[Ahmed_Adham]

كده يبقى ربط أي عجلتين بجنزير هيكون اسلم حل لتأمينها ولو انه متعب شويه.

[Lifz_Good]

ربنا يجعلها آخر الأحزان

تذكر دائماً
"إن مع العسر يسراً"

[elpasha1]

يا نهار اسود
للدرجة دى
يعنى مفك بـ 2 جنية = عربية بـ 90 الف جنية
لولا ان الدنيا صيام كنت قلت كلام تانى

[S O P H O S]

لا حول ولا قوة الا بالله
يعني 100 الف قصاد ولا شئ امان

[lada2105]

الله يعوض عليك .. الحمد لله انها رجعت وربنا يسترها على كل مالكى السيارات .. حاسس كده ان بتوع توكيلات السيارات بطلعوا اسرار ونقط ضعف السيارات للحراميه .
حسبى الله ونعم الوكيل

[marlborooo]

الحمد لله انها رجعت وقضي اخف من قضي

[mohamedhagrass]

يا فندم انا نسيت المفتاح فالعربيه وقفلت عليه مره ومعرفتش اعمل ايه بس كنت جنب ميكانيكي جتب حته خشبه كدا وشال الجلد الي بيبقى فوق الاكره ده الحرف الي بيقفل الفراغ بين الازاز والباب من بره شاله ودخل الخشبه تك تك المسوجر فتح لا سحر ولا شعوذه امان ايه كل سنه وحضرتك طيب مش فمصر الكلام ده والحمد لله على سلامتك ورجوع عربيتك وانك خدتها كان ممكن متخدهاش ولا تاخد الفلوس بتحصل وحمد الله عل سلامه وربنا يكفيك شر العربيه

[monamize4]

الحمد لله انها جت سليمة و الموضوع خلص على خير ,,,

حضرتك ممكن تجيب انذار اللى بيفصل الكهربا او طلمبة البنزين
انا مجربتوش بس بسمع عنه و ان شاء الله حد من الاضاء يفيدك ف الموضوع دا

او ممكن تبيع و تجيب عربية فيها امبوليزر

[haisam ali]

باشا الحمد لله على كل شيء ! انا بقى كنت عاشق لعربيات أوبل كانت بتجرى فى دمى وركبت موديلات كتيره آوى فيها وفى الآخر قررت ابيعها بالرغم من اقتناعى الشديد حتى الآن أنها من افضل السيارات على الإطلاق عارف بقى انا بعتها ليه ( عشان الوكيل منصور أوبل ) أفشل وكيل سيارات فى العالم هوه بس بيدور على المكسب يعنى هوه كفيل يشيل من العربية الكراسى ويحطلك مكانها كراسي خشب فى نظر انه يخلى العربية أرخص وفارق السعر اكسبله فانت معلش وقول الحمد لله لحد كده وفكر تبيعها بقى وتجيب عربيه أأمن وآسف جدا للاطاله

[ahmdmagdy]

معقوله مفك رفيع يدور العربيه

[el diesel]

الموضوع ده مش المفروض يعدى كدة و المفروض ان ادارة المنتدى تعمل حملة على توكيل منصور مش بغرض التشويه لكن بغرض كشف الاخطاء و اجبار التوكيل على ايجاد الحلول
وحضرتك يا استاذى الفاضل ممكن تروح حماية المستهلك و تعمل محضر تثبت فيه ماحدث ولو فى اى دليل ورقى يثبت كلام مهندس التوكيل هايفيدك اكتر

[magic girl]

لا حول ولا قوة إلا بالله.. بجد ناقص ان كل واحد يبقى يشيل البطارية او فردتين كاوتش و هو طالع بيته و خلاص.. -_-

[start_wow]

لا حول ولا قوة الا بالله ازاي كده عربية ب 100 الف جنيه مفيهاش ولا اي وسيلة امان بصراحة حاجة غير طبيعية.ولو علشان تجيب عربية فيها وسائل امان تلاقي نفسك بتدفع 200 الف ولا حاجة..يعني تحس 100 الف دول ولا ليهم اي لازمة :( دول 100 الف جنيه يا جدعاااان مش 100 قرش..

[ysamerlabib]

انا كنت جايب جهاز بيركب في ولاعة العربية وبيشغلها ب usb flash يعني العربية متشتغلش الا بال usb ده وشغال معايا زي الفل الحمد لله