مبعرفش اسوق كويس اشترى عربية جديدة ولا مستعملة-أرجو النصيحة

[teamataha118]

دلوقتي انا مبعرفش اسوق كويس ولسه متعلم
وعايز اجيب عربيه ومعايا في حدود 170 الف
خايف اجيب جديد اخبطه وانا مبعرفش اسوق
وخايف اجيب مستعمل تكون مشاكله كتير وانا مش فاضي
النصيحة ؟؟؟

[midoabdeen]

هات مستعمل طبعا
مش منطقى انك تجيب عربيه جديده وغاليه علشان تتخبط منك وتتبهدل
هات مستعمل بس بحاله كويسه وعلى فكره الاعطال هتعلمك العربيه ماشيه ازاى ياعنى فايده ليك مش مشكله

[saddam]

صديقي المواطن
الصح تخش.3 دورات سواقة في الشارع من أم 200 جنيه وبعد كده تجيب عربية أي كلام ب 8 آلاف تعيش بيها كام يوم تظبط الحياة وبعدين تجازف بفلوسك وتجيب عربية كويسة عشان عربية أم 170 ألف لما تخبطها حتصلحها ب 30 ألف أقل واجب وفيه مثل سوري طبعا المثل يضرب ولا يقاس عليه ومع إحترامنا الشديد لحضرتك ولكافة اﻷخوة.اﻷعضاء ولكن اﻷخوة في الشام عندهم مثل تعلمته لما كنت عايش وسطيهم 3 سنين كان بيقلك الذكي يتعلم بكيس غيره والحمار يتعلم بكيسه
وطبعا حضرتك محشوم والمثل هو كده بس إنت ليه تضيع عربيتك الغالية وتتخبط منك إنت تضحي ب 600 وتاخد 3 دورات كل دورة بمكتب ولو خبطت عربية مكتب السواقة هم مسؤولين عليها أما حضرتك لو خبطت حد بعربيتك فحتصلح عربيتك وعربية اللي خبطته

ودمتم للنضال

ملحوظة عشان أنا نادر لما أرجع أخش الموضوع مرتين فلو حد متدايق من المثل فأنا مقدما أسجل شديد أسفي وإعتذاري لمشاعره بس هو كده المثل وبالتوفيق

[فبريكا]

صديقي المواطن
الصح تخش.3 دورات سواقة في الشارع من أم 200 جنيه وبعد كده تجيب عربية أي كلام ب 8 آلاف تعيش بيها كام يوم تظبط الحياة وبعدين تجازف بفلوسك وتجيب عربية كويسة عشان عربية أم 170 ألف لما تخبطها حتصلحها ب 30 ألف أقل واجب وفيه مثل سوري طبعا المثل يضرب ولا يقاس عليه ومع إحترامنا الشديد لحضرتك ولكافة اﻷخوة.اﻷعضاء ولكن اﻷخوة في الشام عندهم مثل تعلمته لما كنت عايش وسطيهم 3 سنين كان بيقلك الذكي يتعلم بكيس غيره والحمار يتعلم بكيسه
وطبعا حضرتك محشوم والمثل هو كده بس إنت ليه تضيع عربيتك الغالية وتتخبط منك إنت تضحي ب 600 وتاخد 3 دورات كل دورة بمكتب ولو خبطت عربية مكتب السواقة هم مسؤولين عليها أما حضرتك لو خبطت حد بعربيتك فحتصلح عربيتك وعربية اللي خبطته

ودمتم للنضال

ملحوظة عشان أنا نادر لما أرجع أخش الموضوع مرتين فلو حد متدايق من المثل فأنا مقدما أسجل شديد أسفي وإعتذاري لمشاعره بس هو كده المثل وبالتوفيق

يا باشا وتعتذر ليه مهو الرئيس السابق قال القرد والقرداتي. والدنيا بقت غابة فيه اسود على ديابة

كلامك مظبوط طبعا التعليم في مدرسة سواقة افضل لحد لما عضمك يشد وبعد كدة فوت في الحديد وربنا يوفقك .

[Saeed-Taha]

ياباشا حتى لو معاك مليون جنيه
لو اشتريت عربية جديدة هتزعل من اى خدش فيها
هات الاول عربية مستعملة اتعلم فيها وبهدلها وحكها واخبطها براحتك لحد ما تتعلم
وبعد كدا هات الزيرو

[lidosasa]

هاتلك حتة ماروتى موديل حديث حتعمل 25 أو 26 ألف أعطلها قليلة وحتتعلم فيها وتعرف تبيعها من غير خسارة ولو حصل ليها حاجة لا قدر الله ب 3 صاغ تلمها وأتعلم فيها وخبط براحتك كام شهر . بس لو حتقدر تستحمل حجمها الصغير لآنك لو جبت حاجة تانية من أم 8 آلاف حتتعلم ميكانيكا مش سواقة وأعطالها كتير .
أنا شخصياً عملت كده وبعد تفكير أستبعدت الزيرو تماماً لآن كنت لسه بتعلم سواقة وخصوصاً إنى كنت حشترى تقسيط . تعالى دلوقتى أتفرج على عربيتى بقت مشرحة من الحكات والخبطات يعنى لو كانت زيرو ولسه بدفع ليها اقساط كمان بصراحة كنت أتشليت جنبها

[ACC.Eslam Arif]

مستعمل طبعا زى ما قالوا الاعضاء المحترمين ...
وانا عندى وجهة نظر غريبة شوية انا شايف ان المستعمل فى ميزة مخفية وهى انها هتعلمك الميكانيكا واجزاء العربية بسرعة على عكس الجديد

[aldesha989]

حتى لو محترف سواقه ده مش هيمنع الحوادث لا قدر الله والخبطات

طب ما انا لسه مخبوط امبارح من سواق تريلا وانا راجع من القاهره على اسكندريه وخبطتنى فى اخر 30 كيلو على اسكندريه يعنى كنت وصلت وخبطتنى وانا بأخد مطب وجرى ما عرفتش اعمل معاه حاجه

ما اعتقدش ان الموضوع متعلق بالجديد والقديم وان اللى بيسوق محترف او بيعرف يسوق او ما بيعرفش يسوق

اللى ما بيعرفش يسوق مسيره يتعلم سواقه احسن ما يقضى وقته كله يتعلم ميكانيكا والصنايعيه يشتغلوه على الاقل لو حصل حاجه فى الجديد هتروح التوكيل زى الباشا تخلص حاجتك

القديم لو حصله حاجه مجبر اخاك لا بطل يروح للميكانيكا والصنايعيه ويصرف ولما تيجى تيبعها مش هتلم اللى صرفته عليه

انا اسف لكن وجهة نظرى جديد زيرو وتتعلم السواقه الاول وتبتدى تركب وتستمتع بمميزات الجديد وواحده واحده على نفسك وهتبقى محترف سواقه اهم حاجه النصائح الاولى

الهدوء عدم التوتر والقلق حكمة التصرف
على الاقل تسوق 10 الاف كيلو جوا البلد بشكل مستمر قبل ما تروح تسافر بالعربيه اى مكان

تهتم بالصيانات بتاعت العربيه فى التوكيل وما تخرجش من التوكيل ابدآ على الاقل لو التوكيل ضحك عليك فى جنيه الصنايعيه هيضحكو عليك فى ميت الف جنيه عن تجارب سيئه وزى الزفت كلهم حراميه الا من رحم ربى

[aboomar22]

على فكرة دايما اللى بيسوق جديد بيبقى حذر جدا وغالبا مبيعملش حوادث لكن المتمرس بيبقى جريء واحيانا واثق زيادة وبتبقى حوادثه اكثر وفى الاول والاخر دى تقدير ربنا سبحانة وتعالى انت بتتخبط وانت واقف فى اشارة او وانت راكن فى الشارع خد اكتر من دورة قيادة لحد ماتحس انك ممكن تمشى وسط العربيات

[MARTINDALE]

خد اكتر من دوره وهات عربيه مستعمله كسر زيرو , المستعمل اللي واقع ورخيص هيتعبك ويرهق اعصابك بالاعطال وانت لسه مالكش في الميكانيكا . السواق المبتدي بيكون حذر على الطرق وماشي براحته وبيبقى بكده ان شاء الله اقل عرضه للحوادث , المشكله انك لما تيجي تركن او تدخل حته مزنوقه ممكن تتحك منك وده لا يعتبر حوادث ومش هيأثر بشده على سعر اعاده البيع . لحد ما تنشف في السواقه وتتعلم بجد هتبيع اللي معاك وتجيب زيرو .

[samyyousef]

اشعر بمنتهى القلق من ذلك السؤال
و الاجابة بأن المفروض تجيب عربية رخيصة علشان لما تخبطها ماتزعلش عليها!!
السؤال حاتخبطها في مين؟؟؟
و يا ترى مش يمكن يكون المخبوط ده عربيته جديده؟؟؟
او يمكن لا قدر الله يكون بني آدم اغلى من اي عربية

نصيحتي لا تقود السيارة ابدا الا و انت متاكد من قدرتك على القيادة الامنة
و يفضل تكون اوتوماتيك حتى تتمكن من اتقان القيادة في وقت قصير

[K_E]

على فكرة دايما اللى بيسوق جديد بيبقى حذر جدا وغالبا مبيعملش حوادث لكن المتمرس بيبقى جريء واحيانا واثق زيادة وبتبقى حوادثه اكثر وفى الاول والاخر دى تقدير ربنا سبحانة وتعالى انت بتتخبط وانت واقف فى اشارة او وانت راكن فى الشارع خد اكتر من دورة قيادة لحد ماتحس انك ممكن تمشى وسط العربيات

كلام مظبوط جداً

انا قبل ما اجيب عربيتي مكانش عندي اي فكرة عن السواقه واحد صاحبي بس مشيت معاه بعربيته شويه يمكن مرتين تلاته كده في شوارع فاضيه "اوتوماتيك"

وبعدين جبت العربيه وسوقتها من اول يوم وروحت بيها لوحدي والعربيه متحكتش غير لما بقيت اسوق كويس ههههههههههه

الاوتوماتيك سهل جداً طبعاً بس الواحد بيكون حذر جداً فالاول بس اهم حاجه تعرف الاساسيات البسيطه زي انك ماتقفش مره واحده وتعرف تتابع المرايات وتبصلها امتى كمان تركن ازاي وكده
التعود هيجي مع الوقت

وياحبذا لو العربيه فيها حساسات امامي وخلفي هتطمنك اكتر فالسواقة

[Arch Mohamed S]

جيب جديد احسن و اريح
انا زيك بالظبط كنت لسة بسوق جديد و اشتريت زيرو و طبيعي اللي بيجيب جديد بيمشي حريص اوي و الحمدلله مرة في مرة بقيت بسوق احسن من الأول و ربنا رزقني بتاكسي و راجل كبير يعني بيسوق من زمان خبطني و انا ( واقف في اشارة )
يعني خبط العربية ملوش علاقة بواحد بيسوق جديد او قديم في واحد لسة جديد بس حريص و ماشي محترم وواحد بيسوق من زمان بس غشييم
و مفيش عربية في مصر مش بتتحك ولا بتتخبط هي اه بتزعل عليها لو زيرو بس لما تفكر بتقول الحمدلله انها بتيجي في حاجات خفيفة

[hilal]

أنا مع المستعمل في البداية
بشرط ان تكون عربية منتشرة وسهلة البيع وحالتها جيدة
وبعد ما تتعلم تقدر تغيرها بسهولة وتجيب اللي نفسك فيه
هات لانوس أو لانسر مستعملة حالتها كويسة

[عبدالله برعى]

نصيحتى لحضرتك فى الاتى مقسمة على 3 شهور
الشهر الاول انعلم السواقة نظرى من كتب ومن منتدى نايل موتورز وفى نفس الوقت اسال على العربية اللى حتجيبها
الشهر التانى اتعلم سواقة عملى بس شرط تكون عربية قديمة من الموديلات القديمة لانك لة ركبيت على طول جديد مش حتبقى ماهر سواقة
الشهر الثالث تكون حددت العربية اللى حتجيبها وتكون بردو بتتعلم عملى
لانك مش منطقى انك تشترى عربية مستعملة علشان تتبهدل الواحد بيجيب العربية علشان تريحة فاحنا نمسك العصا من المنتصف نتبهدل بعربية مستعملة موجرة وبعدين نحس بقيمة العربية الجديدة من ناحية التكنولوجيا والراحة طالما 170 الف
ومبروك مقدما