الحقونى المرور عملها فيا

[MOHAMED HASAN]

انا عربيتى مركونة بقالها سنة فى الجراج مرحتش بيها مرة غير اكتوبر و مرة لما كنت بسقها و انا راجع من عند مالك السيارة السابق و فتحت الموقع اكتر من مرة اخر مرة من شهر كانت اجمالى المخالفات 40 جنية ركن فى الممنوع من مالك السيارة السابق و كان قلى عليهم دلوقتى بفتح الموقع براجع المخالفات لقيت عليا
20/09/2012عابدين الانتظار فى الممنوع20
30/09/2012القاهرة الانتظار فى الممنوع20
تسبب دون مقتضى فى تعطيل حركة المرور أو تعويقها500
إجمالى الغرامات540.00
إجمالى الرسوم القضائية8.00
مش عارف اخر واحدة جت ازاى حد يقلى اعمل ايه حرام ابقا حاطط العربية فى الجراج علشان الرخصة بتاعتها خلصانة و الاقى 500 جنبه من الهوا كده مش عارف انا المرور عايز يعيد ولا ايه ؟ و كل سنة و انتم طيبين

[Mostafa Khalil]

اعمل تظلم و حيحددولك جلسة في الدراسة وربنا معاك و يكفينا شر المخالفات

[amr011111]

حصلت مع اخويا برضه وبلدنا عمرها ما هتنضف علشان المخالفه مش هوه اللى عاملها وياما عسكرى المرور اتلخبط فى رقم العربيه ياما بيملوا الدفاتر باى طريقه والسلام علشان الحوافز والتظلم بيخلى المخالفه للحد الادنى يعنى بدل 500 هتبقى 300
والمفروض بلدنا تسجل المخالفات عن طريق كاميرات مراقيه مش عن طريق عساكر اخرها تفك الخط الا من رحم ربى

[shaaban2008]

وهو ده العادي في مصر المحروسة
ياباشا ابن عمتي في نفس المشكلة دي
عنده عربية داتشيا قديمة مركونة امام البيت ليها اكثر من سنة
باعها لجاره وراح المرور يجيب مخالفات وهنا كانت الصدمة
1300 جنيه مخالفات
ايوة 1300 جنيه مخالفات !!!!!!!

[Ahmod]

عادي جدا !! ؟ قول الحمد لله انها جت على قد 500 جنيه وخلاص !!

انا جايلي 1425 جنيه !! منهم مخالفة تعمد سير عكس اتجاه ب 1000 جنيه ولما سالت قالو دي مافيهاش تظلم !!! يعني هدفعها هدفعها

[MOHAMED HASAN]

هو تسبب دون مقتضى فى تعطيل حركة المرور أو تعويقها ينفع فيه تظلم ؟ و لو ينفع اعمل تظلم ازاى انا جديد فى الموضوع دا ؟

[K_E]

الغريب بقا
انا اتلزقلي عالازاز مخالفه انتظار فالممنوع ومره دخلت شارع غلط وهو اتجاه واحد والامين مرضيش يعديها وكتب نمرة العربية

ولما جيت اطلع شهادة المخالفات ملاقتش اي حاجه مع ان فات عليهم وقت !!

بس من غير حسد الله يباركلكم :d

[janagabr]

عادي يا باشا كلنا هذا الرجل

[memo2000soft]

انا مرة كنت راكن في الممنوع في جامعة الدول من حوالي 6 سنين الكلام دة ولما بعت العربية بعدها بحوالي سنة جبت شهادة المخالفات لاقيت مخالفة ركن في الممنوع في شارع فيصل ايلي اصلا ماحدش بيعرف يمشي فية مش يركن فية والمخالفة بتاعة جامعة الدول مش موجودة

[S O P H O S]

عادي جدا !! ؟ قول الحمد لله انها جت على قد 500 جنيه وخلاص !!

انا جايلي 1425 جنيه !! منهم مخالفة تعمد سير عكس اتجاه ب 1000 جنيه ولما سالت قالو دي مافيهاش تظلم !!! يعني هدفعها هدفعها

مفيش تظلم
حتي لما سألت فالدراسة

[benmatar]

ابن خالي كان معاه بيتلز 62 خلصانة
لما حب يبيعها من كذا سنة ب 5000ج.م لقى عليها 2000ج.م مخالفات نصهم في مرسى مطروح، دخل لوكيل النيابة وقالوا لوسمحت تبص عليها من الشباك ولو قلت إنها توصل لغاية بنها اديلكو اللي انتوا عاوزينه، الوكيل ضحك وقالو اعمل تظلم، وعمله ودفعوه 400ج.م
إيه المعايير وليه وفين محدش عارف