اول مرة اخد مخالفة وبـ 300 جنيه :(

[buksh]

بسم الله الرحمن الرحيم
انا بقالى 3 سنين مشترى العربية وعمرى ما اخدت مخالفة وانهارده رحت مرور العجوزة عشان اطلع شهادة بينات اول اللى اسمها مخالفات لقيته بيقولى عليك 326.5 مخالفات طبعا صدمة كانت بالنسبة ليا لانى عمرى ما عملت حاجة تخالف قانون المرور كله ماشى فى السليم معايا
ببص على نوع المخالفة تعمد " تعمد تعطيل حركة المرور 300 /// الانتظار فى الممنوع 20 رسوم قضائية 6.5 "
مش عارف اعمل ايه بصراحة انا المشكلة مش فى الفلوس المشكلة نفسى اعرف انا لما عملتها الامين ولا الظابط مش قالى ليه ؟؟
وواحد انهارده بسأله عليها قالى دى كانت معمولة عشان الاخوان لان الاخوان كانو عاملين حملة على النت انهم يعطلو حركة المرور ويعملو شلل فى القاهرة قولتلو المخالفة بتاريخ 16/4/2013 يعنى قبل الثورة بكتير

مش عارف اعمل ايه
انتو ايه رأيكم فى اللى حصل ده
شكرا

[lidosasa]

هى كل بلاوى البلد حيلبسوها للإخوان ؟
وإفرض فعلاً إنها عشان تعطيلهم المرور هل أنت شاركت في تعطيل المرور ؟ معتقدش ابداً .
هى ليها تفسير منطقى إن اللى بيأيد المخالفة أتلخبط فى رقم من الآرقام وهو بيأيد المخالفة وجات فيك .

[MOTOR HEAD]

اعمل تظلم و ان شاء الله حيخفضوها

[besso33]

روح لوكيل نيابة المرور وكلمه وهو هيخفضهالك

[saddam]

صديقي المواطن
لك.الله.دي في مصر من.مستحبات الظلم. الشائعة ولا حل لها.سوى حلين طبعا تقدم تظلم.لو فاضي حيخفضوها للنصف أو واسطة كبيرة ويخلوهالك صفر وطبعا عيب تحرك واسطة كبيرة على شوية فكة ثق يا أخي عندي عربية من عربياتي مرفوعة من سنتين ونص وكنت كاشف عليها يوم الرفع ومتغطية حتى نمرها مش باينة يعني عربية ومتغطية من كام يوم بلعب عالكمبيوتر وبكشف على عربياتي في موقع البوابة اﻷلكترونية لقيت عليها مخالفات.1136 جنيه والحمد لله لما أرجع أركبها تاني حفكرلها في حل
مبدئيا متتعبش نفسك تأقلم وإستعوض ربك وإدفع الفلوس بعد التظلم.
وبالتوفيق
ودمتم.للنضال

[mOuStaFa_ERTU]

هو فعلا اموضوع مش بيتحسب بالفلوس انا كنت جايب اخويا من المطار من 3 سنين وانا راجع اتلغبطت ودخلت داخله غلط فمشيت 30م عكس ولبست مخالفه ب 1005ج وساعه التجديد دفعتها والله من غير ما اعترض عشان انا فعلا عملتها.
رحت اجدد عربيتى يوم 30/6/2013 لقيت مخالفه 520ج 20ج انتظار فى الممنوع و 500ج التسبب دون مقتضى فى تعطيل حركه المرور فلما طلبت بيانات الواقعه طلعت فى حته عمرى ما رحتها ولا اعرف هى فين اساسا ومش فى القاهره كمان قلت مش هدفعها وعملت معارضه من يوم 30/6/2013 واتحددى جلسه يوم 13/11/2013 ودفعت الضريبه والتأمين وادينى مستنى كل ده عشان مش بحب الظلم والافتراء ولو كنت عملتها كنت دفعتها من سكات.
التظلم بيقعد 48س بالكتير اوى انما المعارضه بتقعد بتاع 3 اة 4 شهور وبختك يابو بخيت.
لو مستعجل على العربيه استعوض ربنا ودفعهم وامرك لله

[mizomizomizo]

نفس المشكلة

كنت مسافر خارج البلد قبل احداث 25 يناير ورجعت شهر 10 2011 و لم بشوف المخلفات لقيت مخلفة 1005 سير عكس الاتجاة اسكندرية في شهر 2 2011 خلي باللك من التاريخ مع ان العربية مرفوعة في الجراج ولاتظلم نفع و لاحجة البلد عطشانة فلوس وكلة هيدفع او خش في قضية

[أحمد كمال]

المرور طول عمره فسدان و طول عمره بيلبس الناس مخالفات


من قديم الازل ...... الموضوع مش مبارك و لا مرسي و لا السيسي و لا الاخوان و لا البلا الازرق

الموضوع موضوع جهاز فاسد


و مين فينا عمره ما لبس مخالفات و من سنين طويلة؟




الناس في مصر دلوقتي لو واحد طلعت له حباية هيقول الاخوان عملوا سلاح بيولوجي بيطلع حبوب

[CCIE]

مخالفات السيارات ما هي إلا عن سرقة مقنعة



عندي يقين تام إن مخالفات السيارات ما هي إلا عن سرقة مقنعة في إطار قانوني للغلابة المحترمين اللي ملهمش في موضوع الوسايط .
عمرك شفت قاضي أو وكيل نيابة أو ظابط أو حتى أمين شرطة جتلو مخالفة جنية واحد حتى !!!!! مع انهم مشين على طول مخالف .

أكبر مثال على إن المخالفات عشوائية عند تجديد الرخصة اكتشفنا وجود مخالفة عكس ١٠٠٠ جنيه مصري + ٣٠٠ جنية مصري تعطيل حركة المرور في يوم واحد في ساعة واحدة يعني مخالفة دوبل
عملنا تظلم شال ٣٠٠ بس في نفس الإسبوع بنعمل بيان مخالفات اكتشفنا واحدة تانية بالظبط بتاريخ من 3 شهور ١٠٠٠ + ٣٠٠ دوبل بردو ، عملنا تظلم كان بعدها بشهر بس خللي بالك بتخش على الماكسيموم يعني ٢٣٠٠ اصبحوا ٤٦٠٠ جنيه مصري !!!! القاضي كان راجل محترم و عارف إللي فيها دفعنا مئة و شوية وعمل كدة مع كتير إللي كان ٣٠٠٠ دفع بردو مئة و شويه
و بعد ١٠ أيام بتاخد بيان مخالفات جديد متصفر .

طيب معلش سؤال جانبي هو احنا لية بندفع ألف جنية و شوية كل 3 سنوات من غير مخالفات !!!! هي فين الطرق الكويسة ولا الاسعاف العادي حتى مش الطائر اللي على الطرق السريعة ولا لازم أكون يسري فودة علشان حد يعبرني و أنا بموت على الطريق !!!!!!

[lidosasa]

عندي يقين تام إن مخالفات السيارات ما هي إلا عن سرقة مقنعة في إطار قانوني للغلابة المحترمين اللي ملهمش في موضوع الوسايط .
عمرك شفت قاضي أو وكيل نيابة أو ظابط أو حتى أمين شرطة جتلو مخالفة جنية واحد حتى !!!!! مع انهم مشين على طول مخالف .

أكبر مثال على إن المخالفات عشوائية عند تجديد الرخصة اكتشفنا وجود مخالفة عكس ١٠٠٠ جنيه مصري + ٣٠٠ جنية مصري تعطيل حركة المرور في يوم واحد في ساعة واحدة يعني مخالفة دوبل
عملنا تظلم شال ٣٠٠ بس في نفس الإسبوع بنعمل بيان مخالفات اكتشفنا واحدة تانية بالظبط بتاريخ من 3 شهور ١٠٠٠ + ٣٠٠ دوبل بردو ، عملنا تظلم كان بعدها بشهر بس خللي بالك بتخش على الماكسيموم يعني ٢٣٠٠ اصبحوا ٤٦٠٠ جنيه مصري !!!! القاضي كان راجل محترم و عارف إللي فيها دفعنا مئة و شوية وعمل كدة مع كتير إللي كان ٣٠٠٠ دفع بردو مئة و شويه
و بعد ١٠ أيام بتاخد بيان مخالفات جديد متصفر .

طيب معلش سؤال جانبي هو احنا لية بندفع ألف جنية و شوية كل 3 سنوات من غير مخالفات !!!! هي فين الطرق الكويسة ولا الاسعاف العادي حتى مش الطائر اللي على الطرق السريعة ولا لازم أكون يسري فودة علشان حد يعبرني و أنا بموت على الطريق !!!!!!

تأكيداً لكلام حضرتك أنا كنت شارى العربية من رئيس محكمة صديق ليا وكان عملى توكيل وقالى أمشى بيه ومش لازم تسجل وتنقل ملكية بس أوعى تبيع لحد بتوكيل أنا عامل الموضوع ده ليك أنت وأمشى بالعربية براحتك وميهمكش ( بس انا ولله الحمد بحب ألتزم بالقوانين وعمرى ما مشيت عكس السير ولو كنا الفجر والشارع فاضى ) وفى نهاية الرخصة كل سنة ببعتله الرخصة ورسوم التجديد ويعدها بكام يوم يبعتلى الرخصة الجديدة لحد البيت

[ramymechanics]

باشا انا كنت بجدد رخصتى كل سنة من 2009 ومفيش ولا مرة دفعت جنيه ... السنة دى لقيت عليا 300 جنيه من 2010 طب ازاى يا جدعان دة انا بجدد كل سنة ومكنش فيه حاجة قالولى معلش على ما وصلت لنا ... كانت مخالفة رادار على اسكندرية الصحراوى وانا السنة دى فعلا كنت رايح جاى على هناك وللأسف كنت مسافر تانى يوم ومضطر أخلص الإجراءات فدفعت من غير تظلم ولا حاجة ويبقى أنت أكيد أكيد فى مصر

[S O P H O S]

معلش المرور رجع يمارس افعال غريبة تاني

[buksh]

تم بحمد الله تخفيضها الى 51 جنيه

[ahmed4000]

انا جايلى بنفس القيمة برده ومش فاهم هى ايه تعمد تعطيل المرور
يعنى ايه اللى عملت مخالفته 300 جنيه؟
وقفت بعرض الشارع؟

[buksh]

انا جايلى بنفس القيمة برده ومش فاهم هى ايه تعمد تعطيل المرور
يعنى ايه اللى عملت مخالفته 300 جنيه؟
وقفت بعرض الشارع؟

والله ما حصل ... اقف ازاى بعرض الشارع هو انا سواق ميكروباص ولا توك توك
لما دخلت لوكيل النيابة فى مرور الدراسة قولتلو عايز اعرف ده معناه ايه ( قصدى على المخالفة) قالى فى ناس بتحب تبين انها شغالة وبتكتب مخالفات وفى ناس ما بتلحقش تحفظ رقم العربية يعنى ممكن يكون غيرك هو اللى اخدها واللى كتب المخالفة اتلخبط وغلط فى حرف او رقم .....