الفحص اثبت ان العربية مغيرة نص امامى

[eslamrace]

اولا ربنا معاك وييسرلك امورك
ثانيا حضرتك لازم تاخد اجراء مع الشخص اللى باعلك العربيه دى بغض النظر عن التحقيق حيوصل لايه لان حتى لو خلصت الموضوع فهو حيستمر فى تلبيس الناس فى عربيات مغيره اجزاء ويبيعها كعربيه عاديه
ثالثا طالما الموضوع ممكن يتحول لجنائي فانت محتاج تسأل محامى اذا كنت تاخداجراء فى اداره المرور ولا تتحول للمحاضر وهكذا علشان تحفظ حقك .
تحياتى .

[aldesha989]

فعلآ روح لمحامى علشان تعرف تخلص ازاى وتعمل ايه مع اللى باعلك العربيه علشان لو التحقيق اثبت ان عليك حاجه يبقى توريهم المحضر اللى انتا عامله مع اللى اشتريت منه العربيه وخصوصآ ان زى ما انتا بتقول ان الرخصه لسه بأسمه يعنى هو اللى هيلبس مش انتا وتقدر ترفع عليه قضيه تعويض او اى حاجه زى ما المحامى هيقولك وربنا يعينك على ما اصابك ويخلف عليك

[MITSUKERO]

يا رجالة الموضوع ان الرخصة سليمة عادى والرقم الى فيها بتاع العربية الاصلية الفبريقة عادى جدا

اللى حصل لما البيه عمل حادثة وغير النص ، خد رقمه القديم من النص القديم ولحمه في النص الجديد عشان يبقى كأنه ما عملش حاجة اصلا ، وهنا المشكلة لانها زي ما قال استاذ احمد سيد تزوير وجناية لان كدة كأن النص الجديد ده منتحل شخصية النص القديم ههههههههه

الفكرة في حاجة واحدة ان السمكري اللى لحم الرقم ده حمار لدرجة انه يبقى باين اوى انه ملحوم كدة ، والا كان الموضوع عدى طبيعى جدا لان اي عربية بتغير نص بتعمل كدة اصلا، بياخد الرقم القديم ويلحمه ع النص الجديد ، ومفيش حاجة اسمها ورق للنص الجديد في حدود علمى لان لو ليه ورق اصلا كنا خدنا العربيات الاستيراد اتخن عربية بـ 20 الف جنيه ورخصناهم في المرور ومشينا بيهم ، انما الانصاص دى اصلا مالهاش ورق والاجراء المتبع دايما بيبقى قص ولحام الرقم القديم مكان الجديد والله اعلم برضه ، ممكن يكون في طرق تانية بتتم بشكل اكتر قانونية ..

يعنى المشكلة هنا ان الرقم ملحوم بغباء لدرجة انه ظاهر بالعين المجردة انه ملحوم وده اللى كشف اللعبة

هي دي المشكلة بوضوح

الراجل عمل حادث
نزل اشتري نص امامي برقم شاسية مختلف
قطع رقم الشايسة القديم و حطه مكان الرقم اللي في النص الجديد و شكرا و كده فاكر انه عمل اللي محدش عمله !!! ميعرفشي انه عمل جناية و فيها حبس !!!!

كل العربيات اللي مغيره نص بيبقي فيها الموضوع ده المشكلة بقي ان بعد فترة اوقات البوية بتطلع من مكانها لانه بيرش السدر حوالين الرقم ببوية متوسخة علشان ميبانشي اللحام و البوين مش بتبقي ثابته

الصنايعي الشاطر يرش ببوية غالية علشان متقشرشي و يرشها في فرن كمان

تغيير النص خطر جنائيا و خطر علي جياة صاحب السيارة لانها ممكن تفك في اي لحظة و اعرف واحد بيهونداي اكسنت مغيرة نص العربية اتقطمت منه علي مطب علي طريق السويس !!!

موضوع انك تشتري النص بورق ده فعلا موجود و بيبقي له مراحل بس مشفتهوش غير مرة واحدة في تاكسي و صاحب التاكسي عمله مضطر لان العربية المرور شافها ساعة الحادث و مهندس الفحص حفظها فمشي قانوني

اول حاجة بتشتري النص بفاتورة و افراج جمركي من التاجر و تركبة برقمة بدون ما تقصة و الكلام الفاضي ده
تروح المرور تسلم الفاتورة و الافراج الجمركي
تعمل فحص فني و تقول للمنهدس انك غيرت نص و تظهر له الفاتورة و الافراج الجمركي
يدق رقم الشاسية الجديد علي القايم و يتحط ورق تغيير النص في الملف و يلغي رقم الشاسية اللي علي النص الجديد بطريقة تختلف من مهندس لأخر
طبعا الموضوع بياخد وقت كتير شوية و بيعيب العربية و يخلي اللي ميعرفشي اي حاجة يعرف ان العربية مغيره نص

الانسب في حالة تغيير النص انك تغير السدر بالكامل فحتي لو جابوا مزيل للبوية حوالين رقم الشاسية مش هيلاقوا لحامات !!! لان السدر متغير بالكامل و معمول ليه فلتو و كله تمام و دي اصيع حاجة بتتعمل و مش اي صنايعي بيعملها لانها بتحتاج صبر و فك التابلوه طبعا و الضفيرة و العفشة و كل حاجة بتبقي العربية علي الصاج فقط و بيفك السدر بس و يركبة في 4 ايام علي الاقل و الفلتو و البوية في 5 ايام علي الاقل و بيرش السدر في حال اختلاف لون النص عن لون العربية ببوية مطفية متوسخة في فرن

ربنا يبعدنا عن العربيات دي و يفك لصاحب المشكلة كربه

[فادى محمد]

المرور بيفهم ان الشخص ده جاب نصين ولحمهم مع بعض ونقل رقم الشاسيه اللي في عربيته القديمه
ودي كده قضيه تزوير للاسف ربنا يكفيك شرها .كان المفروض انه يركب الصدر القديم علي بعضه لان مفيش مهندس هيفك السيرفو او اي اجزاء قدام رقم الشاسيه اللي بيبقي غالبا في المكان ده
الحل ان البحث الجنائي يحدد اللحام ده تم امتي؟؟ ومع تقديمك مايفيد وقت استلامك العربيه هيبقي اللحام قبل كده
وبالتالي يلبسها اللي باعهالك

[mahmoud.69]

الحل ياباشا تروح الشهر العقاري وتجيب الملف هتلقي بطاقة الي باعلك العربية حلو جبت عنوانة ميكروباص صغير تأجرة وتلم اصحابك او تشوف بلطجية من الي معها سلاح تخطفوة وهاتك ياضرب لغايه محد من اهله يفكة بي الفلوس
وبعدين بعد ماتخد فلوسك تطلع بيه علي الشهر العقاري وتخليه يلغي التوكيل وبكده تسيبة هو يعيش بقا في القضية

[amr011111]

الحل ياباشا تروح الشهر العقاري وتجيب الملف هتلقي بطاقة الي باعلك العربية حلو جبت عنوانة ميكروباص صغير تأجرة وتلم اصحابك او تشوف بلطجية من الي معها سلاح تخطفوة وهاتك ياضرب لغايه محد من اهله يفكة بي الفلوس
وبعدين بعد ماتخد فلوسك تطلع بيه علي الشهر العقاري وتخليه يلغي التوكيل وبكده تسيبة هو يعيش بقا في القضية

وهوه بعد ما يجيب بلطجيه ويخطفوه ويضربوه ويفكوا أسره
تتوقع انه مش هيجيب ناس ويقتلوه
خاصة ان الشهر العقارى هيجيبوا عنوانه منه
وحتى لو باع فى الشهر العقارى تاريخ التوكيل الجديد هيكون بعد ما سحبوا العربيه

[mahmoud.69]

وهوه بعد ما يجيب بلطجيه ويخطفوه ويضربوه ويفكوا أسره
تتوقع انه مش هيجيب ناس ويقتلوه
خاصة ان الشهر العقارى هيجيبوا عنوانه منه
وحتى لو باع فى الشهر العقارى تاريخ التوكيل الجديد هيكون بعد ما سحبوا العربيه

ياعم هو سعتها هيكون فاضي سعتها هيكون في قواضي وهيكون متسلم وياريت وانتا بتسلمة لو عايز تعمل معاه الغلط متحطلهوش اي حاجة في جيبة لي انه هيطلعو برائة سعتها حطله شعار رابعة علي ظهرة ودخلة قسم الشرطة وهو هيتوجب معاه احلي واجب
عندنا هنا بسيبة الناس الحرامية والمسجلة وبيمسكة الناس بس الي بترفع شعار رابعة اصلة بيغظهم اوي فا دي حركة برضة
هههههههههههههههههههههههههههههه هه

[Karim_Monir]

للاسف الموضوع وسع جدا
كل يوم بتتعمل عربيات انصاص وارباع وضرب ارقام شاسيهات
الحل تاخد معاك محامي صغير بس فاهم وتطلع علي المرور وتاخد عيل من بتوع البصمه علي جنب وتقوله ليك 500 جنيه لو حلتلي الموضوع
وشوفو هايقولك ايه وتمشي ازاي واحدة واحدة لانك لبست في الحيط بالمعني الحرفي ومبقتش مشكلة العربية بقت مشكلة انك تلبس قضية تزوير وسرقة سيارات ودي فيها بين 3 الى 7 سنين سجن

[askanas]

طب مش عارف الاقتراح ده صح ولا غلط بس ممكن تشوف حد معرفة
و تعمل محضر بتاريخ قبل الفحص ان العربية اتسرقت منك . وده ان شاء الله يكون مخرج من اي اجراء جنائي ضدك

[MITSUKERO]

انا اول مره اعرف ان لو حد مغير نص امامي لازم يجيب الافراج بتاعه
اعرف ان الموتور بس انما النص الامامي ده معلومه جديده صراحه
طب ما على كده بقى ممكن حد يجيب عربية نصين زي عربيته ومعاها افراجها وحاجتها ويثبت الموتور والشاسيه عليها وشكرا جدا !!
في حاجه مش مفههومه في الموضوع

بالظبط ، نفس التساؤل ونفس الاستغراب عندى !
فعلا في حلقة ناقصة في الموضوع ومحتاجين حد فاهم الليلة كلها ويشرحهالنا لان فعلا معلوماتى بتقول ان مفيش افراج وورق لشاسيهات العربيات الاستيراد

يا جماعة مهو انت لو جبت نصين و لحمتهم و روحت المرور فانت ملكشي ملف !!

الفرق ان انت لما بتجيب نص لعربيتك ,فعربيتك ليها ملف بالفعل و انت بتعدل في الملف فقط من خلال الفواتير و الافراج الجمركي مش بتعمل ملف من اول و جديد

يعني ايه برضة ؟ يعني انت لو جبت نصين و لحمتهم في بعض هتضطر تشتري ورق عربية عاملة حادثه مثلا علشان يبقي اسمك عندك عربية و بتعدل فيها نتيجة حادث

او تاخد رقم شاسية العربية اللي عاملة حادث تحطة في العربية اللي انت جمعتها و ده حل خطر قانونيا زي ما حصل مع صاحب المشكلة

[saiddik2000]

نفس المشكلة

السلام عليكم
انا حصل معايا نفس المشكلة بالظبط
كانك بتتكلم عنى
برضه انا اشتريت سيارة نوبيرا 2004 اتوماتيك كاملة من اسكندرية وكان فى الرخصة سنة
بعد ما خلصت السنة روحت اجددها سحبو الرخصة وعملو معايا نفس اللى اتعمل معاك
وبعد ما اخدوا العينات والكلام الفاضى ده اللى انا ماكنتش فاهم منه اى حاجة
قالولى التقرير بتاع رابعة بيقول لازم اجيب النص القديم عشان يرخصوا العربية
وطبعا لا انا عارف الراجل اللى باع ولا اى حاجة عنه
وهو اصلا راجل شرانى
يعنى من الاخر ارمى العربية ولا اروحلوش
المهم العربية دلوقتى واقفة ولا عارف اعمل فيها حاجة
لانى مقيم فى السعودية وبرجع كل سنة
فيه ظابط هناك فى مرور اسكندرية قالى اعمل محضر ان العربية وقع عليها طوب ايام الثورة وانا كنت فى السعودية
وقدمه وقدم تظلم لينا فى المرور بتاع العحمى واحنا هنرجع التقرير تانى لرابعة
بس قالى لو رابعة رفض التظلم يبقى مفيش قدامك غير انك تيجى تسلم النمر وتروح تكهن العربية
طبعا انا لا عرفت اعمل محضر ولا غيره اصلا
وسافرت السنة اللى فاتت ومعرفتش اعمل حاجة
فهل ممكن اعرف من حضرتك ايه اللى حصل معاك

[M.ABDOU]

يا ريت صاحب العربيه يطمنا عليه ويقولنا حصل معاه ايه

ربنا معااك ويفك كربك

[hagagatc]

ربنا يعوض عليك

[ahhem]

انا نفس المصيبه حصلت معايا ونفسي اعرف اعمل ايه
لو لقيتي حل لمشكلتك عرفيني