السادة الاعضاء احظروا الردارات الجديدة علي المحور!!

[Ahmod]

مفيش حد ضد تطبيق القانون
بشرط ان يطبق على الكل
بس الحقيقة ان القانون لا يطبق إلا على الغلابة

+11111111

مع شديد احترامي لشخصك دي شماعه بتعلق عليها عدم قدرتك علي الالتزام القانون قانون و عليك الالتزام به.

انا مقيم في دوله خليجيه و القانون مبيطبقش علي كل الناس زي بعضه بس برضوا لا اجرأ اساسا اني افكر اكسر اشاره دي غرامه 12 الف جنيه مصري بالاضافه الاحتمال السجن لو عملت حادث اروح بقي اقولهم اصل القانون مبيطبقش علي الكل

لا يا باشا لازم يكون فيه عدل ومساوة بين كل الناس !!!

مايبقاش الفاميه ممنوع والظباط واللى ليهم وسائط عادي بالنسبالهم !! ؟

يا باشا انا عايز اقولك حاجة !!

اللى مالهمش وسايط هما بس اللى بيقفو في الطوابير - سواء كانت مرور او اي حد خدمة حكومية -

اللى مالهمش وسايط هما بس اللى بيدفعو المخالفات !! انت فكرك لو حد معاه واسطة وجاله ان شاء الله 100 جنيه مخالفات هيدفعها ؟

انا فاكر كويس اوي زمان لما كنت بطلع الرخصة واقف في طابور من 8 الصبح لحد 1 الظهر عشان تدخل تمتحن وفي الاخر تنجح في امتحان السواقة وتطلع لامتحان الكومبيوتر عشان يسقط

اقولك بقى كام واحد جيه قدمنا معاه عسكري او ظابط وخلص رخصته ومشي من غير حتى مايمتحن ؟؟

انا موافق ان اللى معاه واسطة يخلص كل حاجته ومايدفعش بس على الاقل سيب اللى معهوش وسايط يتعامل معاملة ادامية !!! ؟ لكن فعلا اللى معوش وسايط في البلد دي بيتبهدل من اللى يسوى واللى مايسواش

[benmatar]

يا بتوع المرور شعلقو الرادار ولو في النايلسات،،، برضه هيبوووووووظ
أصل اللي مبيبصش من الغربال يبقى أعمى،، رادار إيه وطين إيه مش لما الشوارع تتعمل بما يرضى الله ويحطو لافتات تحذيرية الأول ويظبطوا الطرق يبقوا يحطوا رادارات، بيفكروني بمحل كشري مشهور في وسط البلد قبل ما تقعد على الطرابيزة يقولك الحساب الأول وبعدين نحطلك الطلب، وأكله ضايع وحالته زفت ومش نظيف واللي بيدخله مرة مبيكررهاش.. هاهاها

[Ahmed_Adham]

وأنا مرة واحد تافه وقفني ودفعني غرامة على الزراعي إسكندرية وكنت ماشي بسرعة 93

طب 93 دي معقوله انما فيه قريه اسمها "دفره" قبل طنطا وانت رايح اسكندريه زراعي فيها التصوير على 60! 60 دي مبتبقاش العربيه ماشيه أساسا بس هما من كرمهم بيصورو على 65 فتصور بقى لما تتخالف على 66!

بس أرجع وأقولك طرق مصر غالبيتها ميستحملش أكتر من 90 عشان لما تحتاج تفرمل تلاقي أسفلت الكاوتش يمسك فيه.

[Abdelmoneem]

سؤال برئ هو كل الاساتذه الي ردوا من قبلي سمعوا عن اختراع اسموا القانون! طيب حد عاش بره المحروسه و شاف يعني ايه مخالفه سرعه و اساسا يعني ايه كسر اشاره

مع كل احترامي لحضراتكم عاوزين البلد تتقدم ازاي و انتم اصلا ضد تطبيق القانون

مش كل المانيا يا سيدي الفاضل بدون سرعه محدده دا طرق معينه الشئ الوحيد الصح في كلام سيادتك انه مش منطقي تاخد مخالفه علي 93 في اغلب الدول بيكون في هامش للخطأ في حدود 10%

بافتراض إن القانون بيطبق على الجميع والناس كلها بتراعي القانون، المفروض عتبة السرعة المسموحة تترفع شوية، 90 دي ماشي على الطرق المجاورة لمناطق سكنية عشان الحوادث، إنما الطرق "[overline]السريعة[/overline]" لو كله مشي على 90 محدش هيسافر أصلاً، الطرق كلها زي الزفت والواحد بيدور على أي طريقة يختصر بيها وقت السفر، ولو الطريق سالك وفاضي ومفيش منطقة سكنية والمفروض إنه طريق "سريع"، يبقى ايه الحكمة نحدد السرعة 90 إلا إذا كانت جباية وبلطجة وشخلل عشان تعدي. وليه أصلا تعمل طريق سريع وتطلب من الناس تمشي زي البط. في رأيي المفروض الحد يبقى 120، معقول أوي، فوق الـ 120 تعتبر سرعة مفرطة، إنما أقل من كده على طريق سريع يبقى استهبال.

[Abdelmoneem]

طب 93 دي معقوله انما فيه قريه اسمها "دفره" قبل طنطا وانت رايح اسكندريه زراعي فيها التصوير على 60! 60 دي مبتبقاش العربيه ماشيه أساسا بس هما من كرمهم بيصورو على 65 فتصور بقى لما تتخالف على 66!

بس أرجع وأقولك طرق مصر غالبيتها ميستحملش أكتر من 90 عشان لما تحتاج تفرمل تلاقي أسفلت الكاوتش يمسك فيه.

أنا بسافر كتير على الطريق ده وأقل حاجة ببقى ماشي 120، بس أنا باخد وصلة "الطريق السريع الجديد" اللي بيخليك تبعد عن طنطا وتمشي سالك وتدفع كارتة 3 جنيه وبجمع سرعة براحتي على الطريق ده يعني 160 مثلاً، قرية دفره دي قبل الطريق السريع الجديد؟ عشان أنا مش فاكر بصراحة أي رادار بيصور على 65.

[kokowasfy]

خلاص مفيش 220 تانى على المحور يخصارة كانت ايام حلوة

[shifo]

مفيش حد ضد تطبيق القانون
بشرط ان يطبق على الكل
بس الحقيقة ان القانون لا يطبق إلا على الغلابة

والله حقيقة فعلا - من فترة كنت على الطريق الصحراوى مصر اسكندرية وسرحت وانا سايق عديت 140 كم/ساعة فجأه لقيتنى داخل على كمين وفعلا اوقفنى - بس شوف النكته - انا كنت قافل الزجاج وفى التكييف ومطقم بدله اخر تمام وعلى واجهة السيارة بادج نادى القضاة - انا مش قاضى ولا حاجة بس انا بادخل النادى كتير لزوم شغلى - المهم امين الشرطة بعد ما اوقفنى فضل مبلم شوية وبعدين قاللى حنادى على الضابط ولما الضابط جه ولا طلب منى رخص ولا حاجه فضل برضه مبلم ثوانى وبعدين قاللىممكن استأذنك فى شوية مياه لو سمحت
أه والله العظيم دا اللى حصل - بس ببجاحتى لما لقيت الموضوع كده قلت له لا sorry
طبعآ هو كان عايز يخرج من احراج ان ان مستشار فمش لازم يطبق على المخالفة زى بقيت خلق الله - وعجبى

[Ahmed.Ali]

بافتراض إن القانون بيطبق على الجميع والناس كلها بتراعي القانون، المفروض عتبة السرعة المسموحة تترفع شوية، 90 دي ماشي على الطرق المجاورة لمناطق سكنية عشان الحوادث، إنما الطرق "[overline]السريعة[/overline]" لو كله مشي على 90 محدش هيسافر أصلاً، الطرق كلها زي الزفت والواحد بيدور على أي طريقة يختصر بيها وقت السفر، ولو الطريق سالك وفاضي ومفيش منطقة سكنية والمفروض إنه طريق "سريع"، يبقى ايه الحكمة نحدد السرعة 90 إلا إذا كانت جباية وبلطجة وشخلل عشان تعدي. وليه أصلا تعمل طريق سريع وتطلب من الناس تمشي زي البط. في رأيي المفروض الحد يبقى 120، معقول أوي، فوق الـ 120 تعتبر سرعة مفرطة، إنما أقل من كده على طريق سريع يبقى استهبال.

احب اقولك ان دوله زي قطر اغلب الطرق السرعه فيها 80 و اقصي سرعه في البلد علي طريق حر 120

يعني سيادتك تكون راكب البورش و ماشي علي 80 مش راكب شاهين

[BLOODY_STONE]

شكرا للتنبيه

[MemO_KinG]

صديقي المواطن
نسأل الله أن يريحنا من هؤلاء الفشلة فالسرعة مسألة شخصية وفي ألمانيا القيادة مسموحة بسرعة 400 وأنا مرة واحد تافه وقفني ودفعني غرامة على الزراعي إسكندرية وكنت ماشي بسرعة 93 قلتلو بالحرف الواحد أنا لو من أبوك و أمك كنت دفنت نفسي أربي شاب سنين وسنين وفي اﻵخر شغلته يمسك الناس اللي بتمشي فوق التسعين والله البلد دي لازم يكون الواحد دخله اليومي فيها 5 آلاف جنيه عشان يعرف يعيش من الغرامات والمخالفات والجمارك وأسعار الشقق والله المستعان
أكثر ناس أكرههم بحياتي هم بتوع كماين الرخص والرادارات معنديش مانع يمسكوا عربيات مسروقة ولكن هم بيترسموا على الشرفاء فقط
بالتوفيق وإلى اﻷمام ومن نصر إلى نصر
ودمتم للنضال
زمان جهاز كشف الرادار بألف ونص بنقول عليه غالي من هنا ورايح لو وصل 6 آلاف حجيبه وأي جهود لضرب كمبيوترات الرادارات بفايروس ولا حاجة فندعو لكم بتسديد الخطى
عربيتي رقم 3 مرفوعة بقالها سنتين ونص أكشف عليها بالصدفة ألاقي 1136 مخالفات غير إني ركبتها سنة ودافع مخالفات حوالي 1400 ويا ريت بتروح في بناء طريق ولا حاجة محترمة دي بتروح عشان موظف تافه ياخدلي 150 ألف جنيه بالشهر عشان يدينا خبرته الوطنية إزاي نرجع بالبلد للوراء ونمليها بالفشلة من أمثاله
موضوعك يا مواطن جابلي إكتئاب مزمن شديد اللهجة
رحم الله البشرية وأمة محمد صلى الله عليه وسلم

5000 جنيه ايه بس يا عم الحاج
انا صاحبى وارث عربية جيب 4*4 موديل 98 من ابوه و شغال فى وزارة التموين بيقبض 1500 فى الشهر يدوبك بيشيل منهم شهر عشان يدفع الضريبة السنوية
احنا فى بلد تجيب شلل ربنا يرحمنا و يكتبلنا الصبر فى ميزان حسناتنا

[M I D O]

والله كويس اوي الي بيحصل دة بيركبو ردارات و يعملولك كماين وناقص يعملو فخ علي الطريق عشان الي يسرع يتقفش ويدفع غرامة .. اساسا نص اقتصاد مصر قايم علي لم المخالفات من العربيات .. يلا هانت كلها كام سنة ونسبلهم البلد بالي فيها ونمشي

[ghostlion]

مفيش غير رد واحد حسبي الله ونعم الوكيل
كل شوية تركيب ردارات رصف طرق اصلاحات والنتيجة = لا يساوي

[amro0000]

انتو بتتكلمو في اية يا جماعة بتتكلمو في بلد خربانة رادار اية وهباب اية انا شاب مستقبلي مدمر في البلد دي بسبب جهل وتخلف قال اية عشان تشتغل لازم يكون معاك لغات وانتو جايين بتتكلمو في رادار هوة فية اية في مصر صح اصلا ؟؟؟؟؟؟؟؟؟؟ صباح الفل ياجدعان

[SpikeX7]

شُــكرآا ع التنبيــه و فعلا المخالفات ع اللي معندوش واسطة ... سواء فاميه او دعامات او سرعة آو آي حاجة .. و سايبين حرامية العربيات الل هما عارفين مكانهم يطيحوا في خلق الله و يسترزقوووا ..

و الناس اللي بتتكلم ع طريق دفرة اللي قبل طنطا .. الطريق الحر اللي بـ 3 جنيه قبل ما تدخل دفرة .. بعد يافطة محافظة الغربية على طول .. و الطريق ده احسن الف مرة م الطريق التاني عشان بيرحمك من دفرة و من كفر الزيات و شبرا النملة و كذا قرية ع الطريق بيكون الطريق ضيق و فيه مطبات ..

[kmimsa]

هناك حل ظريف بستعمله على طريق مصر الاسكندرية الصحراوي ، لو بتستعمل موبايل اندرويد يبقى ممكن تنزل برنامج اسمه Trapster البرنامج ده بتلقط بيه الرادارات و اماكن القطع فى الطريق و الحاجات دي كلها ، برنامج خفيف و بيشتغل على الباكت داتا بتاع الموبايل ، و دمتم للنضال