باركن العربية على ال N فى مشكلة ؟؟؟

[ows212]

كل عام والجميع بخير ..
ليا سؤال ياريت اللى يعرف يرد عليا
انا باركن العربية دايما على ال N وبشد فرامل اليد هل ده يمثل مشكلة للفتيس ولا عادى .... وضع ال P انا تقريبا ما باستخدمهوش ؟؟؟؟؟
وشكرا

[yehia]

طب وليه؟ وضع N هو وضع تموير العربية والمفروض تستخدمه فى الحالات اللى الوقوف فيها مؤقت زى الاشارات أو لو راكن مثلا صف تانى وعايز تسمح ان حد يزق العربية.. لكن لما تستخدمه للركن على طول وتستخدم فرامل اليد أعتقد انه فيه تحميل زيادة على الفرامل بما لا لزوم له لو انت معشق على وضعية P...... لأن الوضعية دى أصلا بتساعد فى تثبيت العربية فى مكانها اضافة لفرامل اليد

[ramyfawzy]

خاللي بالك
كتر الموضوع ده ممكن يخليك ما تعرفش تدور العربية بعد كده
لام وضعية الفتيس على ال P ليها علاقة بالمارش (عشان اتوماتيك)
حصلت معايا قبل كده في الالنترا

رامي (ابو احمد و يوسف)

[amir]

مش عارف بس مبيهونش عليا اسيبها علي الp الا لما بركنها عمودي علي الرصيف علشان بخاف اسيبها علي الp و انا راكن موازي ييجي واحد غشيم او واحده من ماركه ازقها و اطلع بدل ما ارجع مرشدير زي خلق الله يزقو العربيه و اقعد اعيط علي الجير بوكس بتاعي و ادفع دم قلبي عشان اجيب غيره!!!!!
و مع ذلك لو حد عنده علم و يقدر يفتي ان مش مشكله ان العربيه تتزق بعربيه تانيه و هي علي الp هكون سعيد جدا جدا لأن الصني مينفعش الفتيس يتحرك علي الn و المفتاح مخلوع و لازم تتدوس علي زرار احمر جنب الفتيس و انت بتمورها و هي واقفه, فالموضوع ممل نوعا ما

[fahd_628]

فعلا انا كمان بسيبها على N علشان ميجيش واحد غشيم يزقها و يبوظ الدنيا

[sab3aawy]

القاعدة البسيطة فى مصر :

N مع الانتظار الموازى

P مع فرامل يد قوية جدا مع الأنتظار العمودى

أنا شخصيا باتحرى الانتظار العمودى قدر الأمكان علشان اوفر فى استعمال ال N

[marsguy]

للأسف في عربيات كتير ما ينفعش تشيل منها المفتاح غير وهي على الـ P

[M.Mokhtar]

للأسف في عربيات كتير ما ينفعش تشيل منها المفتاح غير وهي على الـ P

هو الصح دلوقت بنقول عليه للاسف :)
المفروض بتركن فى اى حته يبقى تسيب العربيه على ال Parking اللى هو P
والعربيه مش هتتزق الا لو فى عربيه تانيه بتشدها او بتزقها مش واحد يعنى هيقدر يحرك العربيه وهى على ال P
ومحدش هيضحى بعربيته ويطبقها عشان يزق عربيتك عشان مش هتتزق بسهوله

[amir]

ومحدش هيضحى بعربيته ويطبقها عشان يزق عربيتك عشان مش هتتزق بسهوله

احنا بنتكلم عن حد راكن قدامك ولا وراك و بيحاول يطلع و بدل ما يطلع زي الناس يقوم زاقك عربيتك بعربيته علشان يوسع لنفسه!!!

[M.Mokhtar]

احنا بنتكلم عن حد راكن قدامك ولا وراك و بيحاول يطلع و بدل ما يطلع زي الناس يقوم زاقك عربيتك بعربيته علشان يوسع لنفسه!!!

مش هينفع والا هيدمر العربيتين
ال P فرامل قوية جدا هتمنع العربيه تتحرك اصلا
مش هيقدر يزقها بعربيته الا لو دمر الاقصدامين :)

[marsguy]

يا باشا لو الونش جه ورفع العربيه وهي على الـ P ولو حظك سئ مثلاً ورفعها من قدام وعربيتك كانت جر أمامي يبقى الجير بوكس بتاعك بالسلامه.

وعلى فكره حتى لو إنت راكن ركنه محترمه ممكن برضه الونش يرفع العربيه، ده بيحصل فعلاً ساعات لما يكون في تشريفه كبيره معديه.

[Hondawy_2008]

أنا دايما بجيب ال P حتى لو أنا في اشارة أو واقف مؤقت عشان العربية تثبت و متتحركش ال N بتخلي العربية لو في منزل أو مطلع تتحرك

[amir]

لو الونش جه ورفع العربيه وهي على الـ P ولو حظك سئ مثلاً ورفعها من قدام وعربيتك كانت جر أمامي يبقى الجير بوكس بتاعك بالسلامه.

انت متأكد ان كلامك ده صح ؟؟و انك متلخبطش من ان العربيه جر امامي و اترفعت من قدام مش هيحصل حاجه للجيربوكس لان الكاوتش الخلفي هو اللي هيلف علي الارض و بس و ايه علاقه ده بالجر الامامي و بوظان الجير بوكس؟!!!!!
اظنك اتلخبطت

[amir]

أنا دايما بجيب ال P حتى لو أنا في اشارة

طيب و متخيل ايه اللي ممكن يحصل لو بني ادم غبي ريح عليك ؟؟؟

[M.Mokhtar]

ولا حاجة العربيتين هيقفوا
ده لو مجرد ترييح
لكن لو خبطه جامده العربيه ممكن تتزق سنه لقدام بس الجير بوكس مش بيتلكك يعنى
مش هيبوظ كده فى ساعتها :)