السايس والأتاوه !!!

[a raafat]

السلام عليكم

حصل موقف وبناءا عليه حبيت أخد رأى حضراتكم فيه ممكن اكون صح وممكن امون غلط

النهارده الصبح كنت رايح مشوار بالعربيه والركنه بتكون صعبه وصلت ومشغل انتظار لقيت واحد سايس بيشاورلى قولت الحمد لله ودخلت ركنت واديته 2 جنيه وانا راضى جدا لانه لحقنى بركنه حلوه وهوه كمان كان راضى جدا وروحت مشوارى وبعد حوالى 7 ساعات وانا مروح روحت دورت العربيه وطلعت من الركنه ومشيت حوالى اربعه متر وخلاص بقى مسكت الطريق وبشد لقيت واحد سايس تانى غير الاولانى طالعلى وبيشاور طنشته لانه مساعدنيش فى حاجه ولا طلعنى ولا دخلنى المهم بعد ما عديته لقيته بيقول بصوت عالى " مينفعش كده أباشا " طيب يعنى هوه ده عملى ايه عشان اديله فلوس ؟ هل هيا بقيت اتاوه عشان اخرج بعربيتى لازم أدفع ولا ايه !! على فكره انا وانا رايح اركب كنت مجهز فكه عشان لو سايس طلعلى اديله اللى فيه النصيب بس ده لو كان جالى طلعنى من الركنه او دخلنى انما صاحبنا ده معملش اى حاجه وعايز فلوس !!!!! هل انا كده أخطأت وكان المفروض أديله ؟ ولا انا كده اتصرفت صح ؟
حاجه تانيه هوه المفروض لما اروح اركن فى حته وسايس يساعدنى فى الركنه مثلا ادفعله فى ساعتها ولا بعد ما اخلص مشوارى ووانا راجع اخد العربيه بدفعله ؟

[ابو لؤى]

انت اخطأت انك اديت للاولانى اصلا فين الحكومه اللى مابتتشطرش غير على الاخوان بس حتى مش عارفين يمسكو ارهاب فى سيناء ياراجل اسكت ده الواحد لو اتكلم هيفرقع

[maio_do]

الموقف ده حصلى تحت كوبرى رمسيس وكان فيه مظاهرات ف التحرير كان عايز 10 جنية وغلط فيا لما مﻻدتش ادفع ومشيت مركنتش بس كنت ع اخرى

[modo88]

ياباشا احنا بقينا شعب كل حاجه بتتاخد اتواه وبقلة ادب بجد .

امبارح راكن وبتكلم في التليفون وفاتح حتة من الازاز كدا واحده منقبة وشايله طفل جايه تقولي حاجه لله هزيت دماغي قولتلها الله يصلح حالك لقيتها بتخبط ع الازاز قولتلها الله يصلح حالك واقفه ولازقه بتقولي حاجه لله بردو قولتلها الله يصلح حالك بصوت عالي لقيتها برقت عينيها وخبطت ع الازاز جامد وزعقت وغارت في داهيه
اقسم بالله لو مكنش معايا فون لكنت نزلت بهدلتها ومديت ايدي عليها
بجد حاجه بقت تقرف كل حاجه في البلد بقت عافيه .

[Silent~Dream]

و هو ده العادى من مصرنا الحبيبه الناس مبقاش عنها دم و واخده التسول و الشحاته بوجه متخفى و فاكرين ان مالكين العربيات دول عندهم بير فلوس لا ينتهى و الله اعلم كل واحد تعبان قد ايه و شقيان عشان يجيب عربيته بفلوسه الحلال ده الواحد لو هيدى زى ما كل واحد عايز كان زمانه بيدفع كل طلعه 50 جنيه بقى ولا حاجه و الله المفروض الواحد ميديش لحد حاجه ولا جنيه واحد و الفلوس دى تروح فى الزكاه فعلا ناس تستحقها و محتاجاها مش ناس متسوله وواخده العبط شغلانه والى فاكر نفسه بقى راجل و هيكسر ازاز ولا حاجه ده دماعه تتكسر نصين و ملوش ديه عشان يتعدى على فلوس الناس و يارب اصلح حال البلد دى او طلع كل الناس المحترمه والى عايزه تعيش بجد منها على خير

[abohend]

موضوع تقدير

و الله يا أخي أنا شايف أن لو اللي واقف غليان و ساعدك فعلا فالركنة و الخروج إديله و لو حتى جنية.
لكن لو الموضوع بلطجة و فرد إتاوات طنشه و متدفعش و لا مليم و آخره هيبرطم شوية و أنت ماشي.
و كده كده متديش غير و أنت طالع.

[amr011111]

بصراحه موضوع السياس دول حاجه بقت فوق الوصف كل واحد عاوز فى كل ركنه 5 جنيه. وفى الاخر اسمك راكن فى الشارع مش فى جراج
والمفروض الشارع ملك للجميع انما هى مهنه من لا مهنه له وشويه عالم اغلبهم (الا من رحم ربى ) بلطجيه وصيع بدليل ان انت لو مدفعتش التسعيره ياما تمشى ومتركنش ياما هتبقى خنافة وقلة ادب
وللاسف ده نظام بلد واقع والشرطه واللى ماسكين البلد مش عاوزين يعملوها بلد للقانون وانما هى بلد الصيع والسرسجيه

تبص تلاقى كمين شرطه بيوقف الملاكى وسايب الميكروباصات من غير نمر ولا رخص بس بيتشطروا على الملاكى علشان يقلبوا اى فلوس

فى المهندسين كل سايس واخدله مكان ل 40 عربيه العربيه ب 5 جنيه يعنى 200 جنيه فى اليوم فى الشهر 6000 الاف جنيه ده اقل واجب ومؤهلاته انه بلطجى وخلاص

اسمع من واحد زميلى سافر الكويت ان لو حد نسى ازاز العربيه مفتوح بيرجع يلاقيها زى ما هى

[a raafat]

والله الموضوع فعلا بقى ممل يا جماعه
بس انا عن نفسى معنديش اى مشكله انى ادى فلوس بس لو هوه فعلا دخلنى او طلعنى خصوصا لو شارع زحمه ومفيش ركنات لكن واحد زى الراجل اللى معملش حاجه ومجرد لمحنى من بعيد طلعت فعايز ياخد فلوس ده ياخد ليه عمل ايه عشان ياخد !!!!!!!!!
بس يعنى المفروض بعد كده لما اركن وسايس مثلا ساعدنى فى الركنه مديهوش فلوس فى ساعتها واديله وانا خارج ؟ هل العرف والعادات فى مصر قد جرت على هذا ولا ليس هناك ما يمنع انى اديله وانا نازل لو انا هتأخر مثلا :)
بصوا انا مش عايز ابقى بظلم حد وفى نفس الوقت ومش عايز ابقى بيضحك عليا

[mem]

المفروض حاجه زى كده تدفع وانت ماشى قله وانا راجع هحسبك
على شان لو مشى تدى اللى واقف وتريح نفسك
لكن هتدفع مرتيين ليه يعنى انا بعمل كده

[egyption2012]

اولا انا ليا وجه نظر ارجو تقبلها
انا بكون مستريح جدا وانا بدي للسايس اي حاجة
لكني مش مضطر اني اديله .. ولو مش معايا فكة .. بقوله كلمة حلوة وخلاص .. وساعتها مش حيقدر يفتح بقه .. "اسف يا ريس تعبناك معانا بس معلش خليها عليك المرة ده عشان معييش فكة .. بابتسامة" "متتعبش نفسك يا ريس مش معايا فكة دلوقتي .. بابتسامة"
انا بكون مستفيد من وجود السايس من ناحيتين
انه بيوفرلي مكان اركن فيه وانه بيحمي العربية في اغلب الاوقات بالاضافة انه ممكن يمسح العربية مسحة علي السريع
بالامكان ايضا ان تتعامل مع الله في هذا الامر كأن تنوى ان تكون صدقة

خليك سبب في توفير وسيلة عمل محترمة لهؤلاء الرجال
افضل من انه يشتغل حرامي ولا نشال ولا بلطجي الداخلية بتأجره عشان يطلع يضرب في الثوار

لكن اهم شئ انه ميحددش مبلغ معين .. يعني لو اديتله 2 جنيه ميجيش يقولك .. ايه ده
لكن برضوا متهزرش وتديله ربع جنيه فكة ومنتظر منه انه يحترمك

ارجع واقول ان علينا ان نحترم هؤلاء لانهم يسعون للكسب بشكل شرعي ومحترم

وبلاش نجي علي الغلابة ده وفي نفس الوقت بتدفع مبلغ اضافي على فاتورة الكهرباء نظير القمامة اللي ملية الشوارع
متنساش ان الحكومة اصلا بتاخد اتاوة في كل حاجة .. مفيش دولة في العالم بتعمل كارته وبتاخد فلوس عشان تطلع من اسكندرية للقاهرة

[maio_do]

اولا انا ليا وجه نظر ارجو تقبلها
انا بكون مستريح جدا وانا بدي للسايس اي حاجة
لكني مش مضطر اني اديله .. ولو مش معايا فكة .. بقوله كلمة حلوة وخلاص .. وساعتها مش حيقدر يفتح بقه .. "اسف يا ريس تعبناك معانا بس معلش خليها عليك المرة ده عشان معييش فكة .. بابتسامة" "متتعبش نفسك يا ريس مش معايا فكة دلوقتي .. بابتسامة"
انا بكون مستفيد من وجود السايس من ناحيتين
انه بيوفرلي مكان اركن فيه وانه بيحمي العربية في اغلب الاوقات بالاضافة انه ممكن يمسح العربية مسحة علي السريع
بالامكان ايضا ان تتعامل مع الله في هذا الامر كأن تنوى ان تكون صدقة

خليك سبب في توفير وسيلة عمل محترمة لهؤلاء الرجال
افضل من انه يشتغل حرامي ولا نشال ولا بلطجي الداخلية بتأجره عشان يطلع يضرب في الثوار

لكن اهم شئ انه ميحددش مبلغ معين .. يعني لو اديتله 2 جنيه ميجيش يقولك .. ايه ده
لكن برضوا متهزرش وتديله ربع جنيه فكة ومنتظر منه انه يحترمك

ارجع واقول ان علينا ان نحترم هؤلاء لانهم يسعون للكسب بشكل شرعي ومحترم

وبلاش نجي علي الغلابة ده وفي نفس الوقت بتدفع مبلغ اضافي على فاتورة الكهرباء نظير القمامة اللي ملية الشوارع
متنساش ان الحكومة اصلا بتاخد اتاوة في كل حاجة .. مفيش دولة في العالم بتعمل كارته وبتاخد فلوس عشان تطلع من اسكندرية للقاهرة

يا باشا اللى انت بتقوله ده تمام بس فيه نوعين اللى ماعملش حاجة ويجيلك بعد ماتتحرك وعايز ياخد

والتانى اللى يقولك عشرة جنية ويبقى عايز ياخدها عافية يا متركنش ياما العربيه هتتجرح

[Elawany13]

سلملى على دولة القانون اللى بيتشدقوا بالكلام عنها فى التلفيزيون لأهداف سياسية فقط
وليس لأمن المواطن وحصوله على حقوقه وحمايته

[Honda_lover]

انا ليا وجهة نظر مختلفة شوية عنكم ارجو تقبلها انا ماشي بمبدا ما اخذ بسيف الحياء فهو حرام او بمعنى اصح واقتداءا بقول النبي صلي الله عليه وسلم" لا يحل مال امرئ مسلم إلا عن طيب نفس منه " .

[Abdelmoneem]

الموضوع أخطر من كده بمراحل، والمشكلة دي كل يوم بتسوء، الأول كان السايس يركنك ويطلعك ويفتح لك الباب كمان وانتا نازل، دلوقتي في حتت كتير بيبقى واقف فيها واحد بلطجي حيوان مينفعش أساس يتعامل مع بني آدمين، يكلمك بآخر قلة ذوق وجليطة وقلة أدب ويسيبك تركن لوحدك وتطلع لوحدك برضه وبعدين يطلع لك من تحت الأرض بعد ما تمشي بكام متر كأنه بياخد "كرتة" عشان تعدي، ولو اديته 3 جنيه، يقولك ايه دول؟ الانتظار هنا 5 جنيه وساعات في حتت يقولك الانتظار هنا 10 جنيه، والبلطجي ساعات بيريح دماغه من الزباين المتعبة ويقولك 5 جنيه الانتظار قبل ما تركن وبمنتهى الهدوء تطلع الـ 5 جنيه وتركن أو تشاور عقلك وتمشي بمنتهى الهدوء.

أنا السايس الغلبان مفيش معايا أي مشكلة معاه، اديله اللي هو عايزه، ولو دفعت وأنا بركن (وده نادرًا) وأنا طالع بقوله "زميلك خد" وخلاص، وممكن لو الاتنين غلابة ادفع وأنا بركن ووأنا طالع مش مشكلة عن طيب خاطر.

إنما على طول مشاكل مع البلطجي، أنا مبحبش حد يبلطج عليا ويتكلم بقلة ذوق كأني بركن في بيتهم مش في الشارع ويحط تسعيرة على مزاجه، "الانتظار هنا 5 جنيــــــــــــــــه يا بــــــــــــــــاشا"، ساعتها ممكن أعمل معاه مشكلة، وومكن توصل إنه يهددني إنه يعمل حاجة في العربية لما أسيبه يهوهو وأمشي وأقوله وريني هتعمل ايه، وساعات كتير البلطجي نفسه بيتكلم شوية بجليطة وبعدين ياخد منك الـ 3 جنيه ويقولك بصوت تخين "ماشي، بس بعد كده الانتظار هنا 5 جنيـــــــــــــــــــه"، ويتخن صوته جامد تحس كأن البلطجية كلهم هرمون الذكورة عندهم عالي وصوتهم جهوري، حتى لو رفيع ولو كلته قلم هيغمي عليه، بس فعلا تحس إن البلطجي قوته في صوته، وفي الإيحاء اللي بيديهولك.

أنا مكدبش عليك برضه ساعات المنطقة اللي بتركن فيها بتبقى صعبة جدًا وبتبقى عايز تخلص مصلحتك وساعتها الركنة "كقيمة" ممكن تساوي 100 جنيه مش 5 جنيه، عشان كده ساعتها بديله اللي هو عايزة وأقضي مصلحتي، ومش مشكلة يركني ويطلعني المهم ألاقي مكان في الحتة المجنزرة دي.

[S O P H O S]

لا مش غلطان
احنا كده هندفع اكتر من صيانة العربية والبنزين الي بنمشي بيه
لكل واحد واقف فحته فاضية وبقت ملكه