ده محل أكل عيش

[OlaOsman]

فتح في شارعنا محل حلاق من فترة.. طبعا ممنوع الركنة قدام المحل.. آل يعني الشارع الركنات فيه بالهبل فبناقص الركنة قدام محل الحلاق.. و لما تعترض يقول لك ده محل أكل عيش.. ماشي يا سيدي هو انا قلت لك انه محل أكل باتون ساليه؟ بس هي عربيتي لما تركن قصاد محلك أو أي عربية هاتعمل ايه في أكل عيشك؟ يعني لو زبون عند حلاق، نازل من بيته رايح للحلاق اللي هو متعود عليه و زبون عنده.. لو جه يدخل المحل و لقى قدامه عربية و لا حتى مدخل المحل مسدود، هل الزبون ده هايغير رأيه و مش هايدخل المحل؟ و لا هايلاقي طريق يدخل منه المحل و يمشي له مترين تلاتة؟

طبعا ما اختلفناش على انه مش لذيذ ان مدخل محل يبقى مسدود تماما كده بالعربيات.. انما هو برضه في رأيي مش من حقه انه يحط حجرة كبيرة و الفواطة تحت الرصيف في مكان الركنة عشان مافيش عربية تيجي تركن.. و فعلا اللي بيغتت و يحاول يشيل الحجرة اللي في المحل بيغتتوا زيادة ومش بيخلوه يركن. موضوع الركنة ده بأه بصراحة بأه عامل قلق مش طبيعي

[Ahmed Samy]

كنت زمان -ايام ماكان عندي امل في المخروبة دي- كنت باغتت و اعمل راسي و الف قديمة انى اركن و اشيل الطوبة او الكرسي وكنت باركن

بس خلاص بقى زهقت و بقيت باكبر دماغي خاااااااالص بلدهم و هما حرين فيها

احنا ضيوف ان شاء الله

[mohamed ibiza]

علي ايه الواحد يعد يعمل مشكلة و يتكلم مع واحد ممكن يكون مستواه الفكري و التعليمي صفر!!و عنده قناعة ان الركنة ادام المحل حرااااااااااااااااام علي ايه الرغي و المشاكل بلاها ركنه ادامه يعني

[abdelaziz-waleed]

كابوس
كابوس
كابوس
كابوس
كابوس
كابوس
كابوس
كابوس
كابوس
اسمه الركنة. وكل يوم الامور بتتعقد وبتزيد سوء. انا شايف ان معظم العربيات اللي ماشية في الشوارع موديلات حديثة (ربنا يزيد ويبارك اللهم لا حسد) بس ده معناه ان العربيات بقت بتزيد بشكل فظيع. دلوقتي الواحد قبل ما يروح اي مشوار . اول حاجة بيفكر فيها يا ترى هاركن فين وهلاقي ركنة كويسة ولا لأ.
يااااااااااه يا علا انتي جيتي على الجرح. حاليا انا لو نازل وسط البلد مستحيل اخد العربية معايا لأنها بتمثل ليا عائق ومشكلة ولخمة فظيعة.

اما بقى بالنسبة لموضوع البياعين دول. فعلا زودوها اوي. طبيعي ان تحت كل بيت او عمارة فيه محلا. ولو كل محل رفض ان العربيات تركن قصاده ده معناه ان ما فيش عربية هتلاقي حتة تركن فيها. انا مش عارف هما ليه بيعملوا كدة تقدري تقولي عادات وبتتوارث وخلاص. هما نفسهم ما يعرفوش هما ليه بيعملو كدة اهو يقولك ده مكان اكل عيش

[MoDyBeNz2008]

عندنا في الشارع في محل عامل كدة و كان في واحد جاي زيارة لجرانا مكنش لاقي مكان يركن فيه و احنا عندنا الرصيف اعلى من الشارع بحاجة بسيطة راح راكن الكرستالة بالورب بين الحجرين و ابقى سلملي على اكل العيش يومها انا فطست من الضحك و صاحب المحل معرفش يفتحه غير لما صاحب العربية مشي


الشعب المصري ابو الافتكاسات

[OlaOsman]

و الله الواحد ما بيتخانق و لا يعمل مشاكل.. بس ده ما يمنعش اني بيتحرق دمي.. عادي يعني.. ده بأه روتين الحياة اليومي في القاهرة

[hamdy]

امال اما اعمل ايه انا بقا كل واحد حططلي حديدة قدام بيته ولما اجي اركن تحت بيتنا الاقي حد راكن طب اعمل ايه
قمت قلت حديدة بحديدة قمت نا كمان حاطط حجر زي الداهية قدام بيتنا عشان لما اجي الاقي ركنة علما ان مفيش محلات تحت بيتنا وبرضو مبلقيش ركنة
واللهي امبارح لسة سائل يا جماعة في جراج
تخيلوا قالي بالنص :
يابيه مفيش مكان لعربيتك عربيتك هتبقا في النص و اديني نسخة من المفتاح عشان اعرف احركها ومعاهم 150 جنيه
كل ده بسبب انا كل محل مش عايز حد يركن قدامه هو احنا مش من حقناا نركن يلا ققول ايه الحمد لله
واللهي يا جماعة انا لما بنزل منالشغل بقعد متعذب بفكرة انا مش لاقي ركنة ومش عارف اعمل ايه
اشترك في الجراش واعمل مصروف تاني ليه هي ناقصة ولا أعكل ايه

[R A N A]

فعلا ياعلا موضوع الركنة دي شئ مقرف كل يوم وانا رايحة شغلي وداخلة الشارع اللي فيه المكتب مبحملش هم حاجة قد هم الركنة بقعد الف بالربع ساعة والنص ساعة لحد مالاقي ركنة ولما اركن مكان حد من سكان العمارة اول مايشرف ييجوا يندهولي عشان اطلع العربية عشان الهانم اللي متعودة تركن في المكان ده تركن (وتبقي بتبصلي شظرا وبيقولوا انها قال صاحبة المكان ده (هو قدام جراج مهجور كده) وصاحبة العمارة مع اني اشك في الكلام ده طبعا بس اهو اعمل ايه بس وفي شركة محتلة المكان اللي قدامها (ياخد 3 او 4 عربيات) وحاط يافطتين ممنوع الوقوف وحاطط اقماع مكانه وعاملينه جراج والغريب انك تلاقي المكان فاضي طول اليوم ومتحاوط بسلاسل حاجة تحرق الدم مع ان ليهم ساحة جراج خاصة بيهم برده بس تقولي ايه بقي
ده مرة الونش جه ومعاه امين ضابط ودخل الشارع ده وشال الاقماع دي وقعد يتناقش معاهم وكان هاياخد الاقماع راحو متكلمين معاه شوية ورجعوا الاقماع دخلوها جوه وتاني يوم طلعت والحياة بقت زي ماهي بالضبط.
ده غير ان كل واحد حاطط حجر قدام العمارة يحجز بيه مكان واللي حاطط ماسورة وكلام سخيف سخيف.
انا فعلا زهقتمن موضوع الركنة ده والله وبحس ان العربية بقت هم تقيل في ركنتها.
انا ركنت في جراج يبعد عن البيت حوالي 20 دقيقة مشي عشان اريح دماغي من الحوار ده هاعمل ايه بس مفيش حلول تانية غير كده.
يالا حسبي الله ونعم الوكيل في كل مالك عمارة يحول جرجات عمارته لمحلات وحسبي الله ونعم الوكيل في كل مسئول يشوف الكلام ده ويعديه ويسكت.

[sab3aawy]

انا ممكن اقبل ده فى محلات اعمال السيارات(ميكانيكا، كاوتش، بطاريات...الخ) مع ان الواقع ان برضه مش من حقه يشغل المكان قدامه ومش ذنبى انه استرخص واشترى كشك سجاير ميساعش عربية واحدة وعمله محل خدمة سيارات على اعتبار ان الشارع من بقيه املاكه، لكن خلينا واقعيين ونقول ان محدش من ارباب مهن السيارات يقدر على تمن مكان ياخد عربية جواه غير المقتدرين جدا

لكن الخضرى والفكهانى والحلاق والبقال ...الخ اللى يقول لك، اصل ده مكان اكل عيش ومتركنش قدامه ده مالوش غير اقدم زوج من النعال يتسد بيه بقه وتركن العربية مطرح ما انت عايز، بس العربية تكون قديمة ومش هتزعل اوى من اللى ممكن يعمله فيها ويكون ذريعة ليك انك تدغدغ المحل على اللى فيه...اما لو مالكش فى الصراع والعراك والمطاوى والأقسام والتعليق من القدمين، فاقتنع بقانون الغابة وفر بسيارتك من وجه الأقوى الذى امن لنفسه البقاء بقوه البلطجة

[hamedo0]

في مره ولدى الله يرحمه كان في مره راجع من الشغل لاقي السكنين في العماره المقابله راكنين عربيتهم امام البيت راح دخل العربيه في مدخل بيتهم وساب العربيه طلع نام المفروض كل عماره العربيات الفيها تركن قدام البيت بتاعهم

[Ghamrawy]

حلقة من حلقات سلسلة القرف و المهانة و المعاناة فى المخروبة اللى احنا عايشين فيها بس انا عن نفسى كنت باركن و مش بيهمنى حتى لو فيه طوب و نص العربية فى الشارع و للاسف اللى بيقول كده دى ناس مش مؤمنة بربنا و مش معترفة بوجوده أصلا و كأن الرزق يمنح و يمنع من الناس مش من ربنا .
و على النقيض لو العربية دى مثلا فيها ضابط او حد من بتوع الضرايب او شرطة المرافق بيبقى صاحب المحل على استعداد انه يتنازل عن شرفه و كل غالى علشان يرضي البيه .......................... ناس صفارة تلمها و عصاية تفرقها

[Hossam_Hassan]

طب ايه رأيكم فى السلوك ده

شارعنا فى المقطم تقريبا نصفه اراضى فضاء، و مفيهوش محلات، و أغلب العمارات فيها جراجات و الشارع عرضه ييجى 30 متر و اماكن الركن و الحمد لله بالهبل و محدش بيلاقى ادنى مشكلة فى الركنة خااااااااالص.

جميل؟

فجأة من كام شهر انتشرت ظاهرة غريبة فى 3 عمارات، كام واحد يعمل مطلع على رصيف الأرض الفضاء اللى جنبه و حديدتين بينهم سلسلة و يركن فى الأرض الفاضية!!!!!!

مع ان مكان ركنته فى الشارع فاضى وواسع و لو على الأمان، مفرقتش، اللى عاوز يسرق العربية مش هيغلب انه ينزل بيها الرصيف البسيط ده من جنب السلسلة.

ربنا مسهلها علينا، باركن فى ثانية، لازمته ايه انزل و افك سلسلة و اطلع فوق رصيف؟

[CryptonX]

OLA !

طب انتي زعلانة من مفيش ركنة .. و حلاق و مش حلاق ..
طيب انا اعمل ايه في :

1 . الجامع الي قدام بيتنا في رمضان علي وقت الفطار يقوم فارش الشارع كله مصلية ! ( قبل الفطار ب 5-10 دقائق و هو ده وقت رجوعي من الشغل يوميا ) .

اطر الف لفة من 3-4 شوارع جانبية اخرى علشان الاقي ركنة .. و لو ملقتش ركنة بركن في عباس العقاد الرئيسي صف تاني ! ( انا ساكن في شارع متفرع من شارع متفرع من عباس العقاد :) ) .

مش مشكلة بقول ده في رمضان بس .. و شهر و حيعدي ..

تعالي بقى برة رمضان .

2 . عديت بالظبط في عربيتي اول ماشتف موضوعك ....
73 خدش او حكة او خبطة خفيفة في :
- الاكصدامات الامامية و الخفية
- الابواب مليانة
- الرفارف
- مرايتين مكسورتين

و اكاد اقسم ان فوق ال 90% من ال 73 دول ( يعني حوالي 65 خدشة ) بسبب الركن " صف اول " موازي او عمودي علي الرصيف اذا كان عند الشغل او تحت البيت .

كل يوم انزل الافي خدشة جديدة او لون جديد .. عربيتي بقت " فخفخينا ! "

و طبعا مستحرم ارش ( الابواب و الرفارف ) علشان دول فابريكة .و مفيهمش غير خدوش ..

بس الي يشوف العربية يقول دي موديل 2000 .. مش 2006 .

اخر حاجة قدام عيني !!

راكن صف اولاني موازي للرصيف .. و المرايا مقفولة !
واحد بيه معدي بالتريوس ... و مركب طبعا 30000 دفندر و ماكينات حلاقة و صواريخ !

حس انه لازق في الشمال اوي .. طب كريم اهه راكن علي اليمين .. احك فيه ..
النتيجة ؟ الدفنر بتاعه علم علي البابين و الرفرف ... و لا و بمنتهى البرود .. رايح دايس بنزين و طالع :)

طبيعا اليوم ده انا فطرت فيه بدري شوية :)

انا زهقت من الركنة .. بعد كدة والله ماحشتري عربية الا ماشتري جراج حاص و اعين عليه BODYGUARD .

[hishamnasr]

نفس المشكلة

كلنا عندنا نفس المشكلة ،،،

ووجدت ان الحل لعدم المشاكل ان اضع السيارة في الجراج

[Ramy.Gamal]

كنت زمان -ايام ماكان عندي امل في المخروبة دي- كنت باغتت و اعمل راسي و الف قديمة انى اركن و اشيل الطوبة او الكرسي وكنت باركن

بس خلاص بقى زهقت و بقيت باكبر دماغي خاااااااالص بلدهم و هما حرين فيها

احنا ضيوف ان شاء الله

زى حضرتك بالظبط