فكروا معانا .. ازاي نخلي الناس تلتزم بالحاره؟؟

[schengen]

السلام عليكم ورحمة الله وبركاته

أنا الموضوع ده مجنني بصراحه ..

السائق يسيب الحاره ويحط الخط في وسط العربيه!!!

وتبقي العربيات واقفه مظبوطه في الحارات تلاقي واحد إبن حلال راح زانق نفسه في النص!!

يا جماعه ماتفكروا معانا كده .. إزاي نلاقي حل لأم المشكله الخنيقه دي ؟ :d

بجد مش ممكن .. 3 حارات وتلاقي 17 عربيه ماشيه فيهم .. مش ممكن يعني ...

هاااا يا باشمهندين !! تخيلوا وفكروا ... حتي لو الفكره صعبة التحول للحقيقه ... حتي لو لا تصلح في مصر .. بس نفكر ...

وشكرا :)

[eslamsubaru]

ما دام عايز الحل لمصر : مفيش غير حل واحد علشان تبقى العربيات واقفة صح فى حاراتها :

الحل ( تعمل الخطوط البيضاء بتاعة الحارات على شكل زجزاج و ليس خط مستقيم )

و بكده هتلاقى الشوارع و الحارات هى اللى ظبطت نفسها على عربيات مصر و مش العكس ...

مصر السواقة فيها عدت مرحلة السواقة من زماااااااااااااااان ... ربنا يهدى حال الناس..

[hossamalsadik]

يتم تعلم قواعد واداب المرور فى المدارس والجامعات
يتم نشر كاميرات مراقبه لتصوير المخالف
الإستفاده بالخبرات الخارجيه الناجحه فى هذا المجال

[محمد عز]

وضع فواصل بين الحارات عبارات عن قطع سيراميك مدورة وده موجودة في أمريكا وابوظبي

بحيث لو انت طلعت بره الحارة تحس بصوت مزعج وترجع تانى

[speed_magnum]

الحل الوحيد
كارثه طبيعيه تاخد الناس دي
وتيجي بشر جديده بتفهم

[maio_do]

ينزل قانون فورى بغرامة خيالية عن اللى يمشى بره الخط وكاميرات مراقبة وكام واحد يلبس وهتلاقى الشعب كلوا زى الالف

[Deshahcoka]

الحل الوحيد
كارثه طبيعيه تاخد الناس دي
وتيجي بشر جديده بتفهم

باشا باشا باشا :)

انتا جبت الحل النهائي لكل مشاكل مصر :)

تحياتي

[Ahmed.Essam]

نعمل فوق الخطوط البيضة بتاعة الحارات دي مسامير بس تبقى شيك شوية
وكل كيلو او 2 كيلو او قبل كل لفة حتى نقطع الخط الابيض ده بالمسامير اللي عليه عشان لو في عربية عايزة تنقل للحارة التانية عشان لو هتلف تاني او هتركن
وربنا يقدرنا على فعل الخير ولازم اخد براءة اختراع مش هطلع بلوشي انا كده

[amr011111]

فيه عربيات زى الستيروين على ما اسمع لما العربيه تدوس على خط ابيض تدى صوت تنبيه وده معمول علشان لو سائق غفل العربيه تصحيه :)

فيه طلبة فى احدى كليات الهندسه كانوا عملوا حاجه زى الصندوق الاسود بيحتفظ بسرعة السياره والطرق اللى مشيت عليها والسرعه اللى كانت السياره ماشيه عليها وده بيسجل المخالفات طبعاً

وياريت الموضوع ده يتعمم فى مصر

[saddam]

صديقي المواطن
قولا واحدا مش حعلق عالموضوع ومش حنفكر معاك ﻷن ده بيحتاج نوسع الطرق ل 6 حارات وتخطط بعيون قطه زي كل دول العالم ومينفعش الشوارع تضيق وتعرض في مطالع ومنازل الكباري
ولكن أنا حمسك الموضوع من ناحية تانيه
وهي إنه يعجبني فيك إن لسه فيه ناس في مصر لسه جواها أمل إن البلد دي ممكن يتصلح حالها في ال 200 سنة القادمة
صديقي المواطن أحب أبشرك
إحنه إنتهينا خلاص
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[speranz]

الحل الوحيد المفيد شوية هو القطع البارزة فى الخطوط
لما تعدى على الخط تحس بخبط تحت العربية فبيخليك ترجع تانى لحارتك
ودا موجود فى طريق مصر اسماعلية الصحراوى عشان بعدى عليه كل يوم وبجد مفيد والناس بتلتزم بحارتها عليه

[horas3000]

الحل من راي وضع عواميد بدل الخطوط و كل كام كيلو يتعمل فواصل للي عايز يغير الحاره و قبل المداخل و المخارج

[schengen]

تمام ... يعني لو عملنا حصر للأفكار اللي ممكن تطبق في مصر هاتكون كالتالي:
.................................................. .................................................. ....
1- وجود علامات بارزه علي الخطوط البيضاء في الأرض ... بس يا تري لو السائق حط الخط ده في نص العربيه هايحس بقلق أو هاتبقي بالنسباله رخمه او مزعجه ؟

2- وجود فواصل خرسانيه بدلا من الخطوط مع وجود مداخل ومخارج وفتحات .. بس ياتري ده هاينفع مع الشوارع اللي أصلا ضيقه؟ وياتري ده مش هايسبب حوادث؟

3- الغرامات المغلظه علي اللي يعدي علي الخطوط .. بس ياتري اللي بيكسر اشاره ولا اللي بيمشي عكسي ولا اللي بيتكلم ف الموبايل ولا حتي اللي بيسوق منغير لا نمر ولا بتاع .. بيدفع غرامه ؟؟


مستني ردودكم وآرائكم ... وان شاء الله نوصل لفكره كويسه وجديده ... مش نوصل للفكره وبس .. إن شاء الله نعمل نموذج مصغر منها .. ومش كده وبس .. ان شاء الله نحاول نطبقها مع الدوله علي نطاق صغير للتجربه .. ليه لأ؟؟ مفيش مستحيل :)

لازم ف الفكره نراعي ظروف البلد السيئه وسلوك الناس السلبي في نفس الوقت نراعي عدم الضرر بالسيارات او الأرواح طبعاً..

وشكراً للجميع :)

[تامر.محمد]

الحل بتاع القطع البارزة (عيون القط) فوق الخط الابيض ممتاز بس التطبيق هايبقى بالعكس و النتيجة هاتبقى ناجحة
ازاي ؟
يتحط عالخطوط دي عين القط فعلا
ايه اللي هايحصل ؟
الناس كلها هاتحط خط عين القط في نص العربية و تمشي عليه

بس كده هي دي الحارة :)

[3ateef]

الضرب بالنار والشنق فى ميدان عام عشان يكونوا عبرة لمن لا يعتبر. همَّ والحيوانات اللى بتمسك شمال وتمشى على 60.