ليه الناس بتمشي كده مع أن عربياتها مش كده ؟

[SAMEH_FOUAD]

هية طبعا مش بتتقاس كدة

مش معنى انى معايا عربية جامدة وماتورها قوى , امشى اتنطط بية على الخلق , طيب مانا لو عملت كدة يبقى بثبت لنفسى اية ؟؟؟ ماهو شىء منطقى انى انا اكون الافضل

ومش شرط ان معايا عربية قوية افضل اجرى عمال على بطال , بدون داعى , دة كدة يبقى اسمة جنان

وكمان فية حاجة مهمة جداا, ان اغلب السيارات المدرجة فى الموضوع بتكون قريبة للارض جداا , فطبيعى لازم صاحبها يخاف عليها , وكمان فية حاجة مهمة اوووووووووووووووى

متعة القيادة , لان اصحاب السيارات دية بيبقوا مستمتعين بيها وهما راكبينها طبعا بتكلم على فئة معينة

فانا شايف ان الموضوع عادى جداا

[mshmshm3]

انا معاك ان المشي في الشمال علي 60 ده منتهي الغباوة و ياسلام تلاقيه بيتكلم في التليفون
بس لما يبقي في مطر ماينفعش اجري 100 و 120 مهما ان كان نوع عربيتي

[metal_slime]

أولا متنساش ان اسعار العربيات من 2012 وانت طالع فى زيادة عجيبة فده بيخلى صاحبها ماشى يحسس عليها ...
ثانيا انا معاك فى حكاية الآيفون ولا النوت 3 واحد بيجيب موبايل بستلاف جنيه ومبيستخدمش ربع امكانيات المعالج او الرامات ولا عارف يستخدمهم وبالمثل العربيات

ثالثا حالة الطرق فى مصر من بلاعات وحفر ومطبات عشوائية ممكن تكسر اى عربية بتخلى اللى دافع 150 الف ولا 200 الف ماش بيحسس على الطريق وانا باعذره تماما

رابعا العربيات بتاعة التمانينات والتسعينات حتى لو امكانيتها اقل بس اللى سايقها بيكون قلبه جامد حبتين

خامسا انا كنت مرة سايق بيجو 504 وشكلها مرعب من كتر ما كانت متبهدلة وكنت ماشى مالك ..مطبات ارزع ..حفر وماله ...بلاعات ميهمنيش و كانت العربيات اللى حواليا بتعملى حساب وبيوسعولى الطريق مش احتراما طبعا بس خوفا من شكلها

[aliabdo]

ركوب العربيه مش كله جري و سرعه الاهم من السرعه انك توصل انت و عربيتك سلام من غير حوادث و لا خدوش
بس برضو المفروض كل واحد يراعي الحاره الى ماشي فيها

[Samir Elshahawy]

الراجل مش قصدوا المشى براحه يعنى المشى فى حدود المعقول والسلامه وكل الى مكتوب فى التقرير دا انا قلتوا لنفسى قبل كدا معايا شاهين وبمشى احسن منهم ولما يكون بعدى من نقل على سفر وقدامى عربيه لو لمسها بس هتطير وتعدى فى ثوانى ودا يفضل ماشى جنبيها ربع ساعه وانا الى معايا الشاهين بخف رجلى من على الدواسه لغايه لما البيه الى قدامى يعدى ويفتحلى طريق

شكرا لحضرتك فهمك للموضوع و للمحتوي الذي أقصده

يا جماعة الخير ..
- اللي خايف علي عربيته و عايز يمشي علي مهله يتفضل يمشي في الحارة اليمين
- اللي خايف من المطر يا أما يقعد في بيتهم أو لو أضطر ينزل يبقي يلتزم بتعليمات الامان صح يعني يشغل أنوار العربية حتي لو الظهر و يمشي علي اليمين مش يبقي ماشي من غير أنوار و بيتكلم في الموبايل و ماسك الشمال بأقل سرعة ممكنة
- اللي خايف علي عربيته مايركنهاش غلط , يعني مايركنش في ملف و لا أمام يوتيرن و لا في مدخل طريق فرعي و لايركنها في نص الشارع أو صف تاني

اللي بيحصل ده مالوش علاقة بالتنطيط و لا عدم الفهم و لكنه أستعلاء علي باقي خلق الله و تصور أنه طالما راكب عربية مرتفعة الثمن و حديثة يبقي أمتلك الشارع و الطريق و انه لاحق للأخرين طول ماهو موجود في الشارع

اللي انا عايز اقوله : أن مستوي فهم قواعد و أداب القيادة غير مرتبط بنوع السيارة أو أمكانياتها بل علي العكس بأجد أن معظم قائدي السيارات القديمة الغير حديثة أكثر فهما و وعيا لتلك القواعد و الاداب في احيان كثيرة

أما بالنسبة لمن يسأل عن أي سيارات اتحدث :
نعم اقصد بعض قائدي البي ام و المرسيدس و الباسات اللي ماشي بعربيته علي الشمال بسرعة السلحفاة حتي لو الجو كويس و الموبايل علي ودنه و مش مهتم بباقي السيارات اللي وراه و بعدين هوووووب فجأة يلاقي نفسه داخل في تريلا و يرجع يسأل العربية ماوقفتش ليه مع أنها بي أم و فيها أي بي أس

[kokowasfy]

العيب عيب شعب مش عيب عربيات و عدم دراية الشعب بقوانين المرور و التسيب الراجل بيتكلم ان العاوز يمشى براحة يمشى يمين الطريق و امشى براحتك محدش هيكلمك لكن ماشى 60 على الشمال دا الغباء و الاسوء ماشى فى نص الشارع على 20 دا الى بيعمل حوادث ازاى الناس تعوذ تطلع منك فتاخد غرزة يمين شمال اى اتجاة يقوم واحد جاى سريع و البس يا كبير يشباب واللة لازم نلتزم بقوانين المرو و قواعدها و دة مش كلام وخلاص لا انا هبتدى بنفسى لو كل واحد ابتدا بنفسو البلد دى هخيتصلح حلها

[S O P H O S]

حتي لو الطريق عادي
انا بلاحظ انهم سواقتهم هادية وده شئ كويس

[abohend]

إلتمس لهم العذر
أكيد بعد مدفع دم قلبي في عربية ب200 ألف مش بسهولة هجري على طريق مدغدغ تنعدم في أصول القيادة و اللياقة في آن واحد..
حتى لو أنا واثق فعربيتي الألماني أو الفرنساوي,,
لكن أكيد لا أثق في سائق التريلا و لا حمادة غرز و لا الفلاح اللي بيعدي ببهايمه الشارع و لا المطب اللي إتعمل بليل و أول مرة هتكتشفه و أنت بتاكله على الطريق الصبح

بعد سنتين تلاتة متقلقش هتشوف العربيات دي هتجري إزاي و هتقطع الكوري و الصيني لكن بعد متكون الفلوس اللي دفعها صاحبها فيها بردت و إتخبطله كام خبطة خلوا قلبه يجمد و العمليه تبقى معاه مش فارقة كتير
و أكيد لو أنا ماشي على طريق
مفتوح..مرصوف كويس..السائقين اللي عليه يمتلكون الحد الأدنى من أخلاق القيادة...و في قانون بيتطبق على المخالف
هجري لحد السرعة القصوى المسموحة و لو حابب أهدي هاخد يمين

[amrico]

defensive driving is the solution

[ehabouf]

الموضوع بإختصار ان خلطة الأسفلت بتختلف من الطرق السريعة للطرق الداخلية لممرات المطارات
خلطة الأسفلت بتكون على حسب السرعة القصوى للطريق + 15% هامش سماح
بمعنى ان لو الطريق السرعى القصوى للطريق 100كم/ساعة بيكون الأسفلت فيه يستحمل سرعة حتى 115كم/ساعة
الموضوع ماهوش علاقة بالعربية الي بتمشي عليه
ده طبعاً لو كان الطريق معمول بذمة - شيل الذمة وعيد حساباتك من جديد

[amatboly]

و الله يا باشا الواحد بيخاف على العربية بس لان التعويرة بفلوس يعنى لا مؤاخذة هتاخد من قوت عيالك و تحط فى العربية

شكرا على الموضوع