اساسيات استخدام الاشارات (اشارات التخطي اليمين والشمال)

[الجنرال]

ايها الاخوة الكرام

انا عارف انكوا ما شاء الله كلكوا عارفين اساسيات المرور والسواقة .. لكن حبيت اعمل الموضوع ده علشان ننشره بين اصحابنا وحبايبنا .. ويبقى تذكرة لينا برضه

الاشارة اللى بتنور من الدراع اللى على شمال الدريكسيون (لما تزقها لفوق او تحت) هدفها انك تعرف اللى حواليك انت ناوي تعمل ايه .. وفي بعض الحالات بتبقى الاولوية في المرور لغيرك و ان حقه يمشي قبلك .. وبالتالي الموضوع كأنك بتستأذنه وهو ممكن يوافق وممكن ميوافقش (لان الاولوية ليه)

وبناءاً عليه:
1- لما تدي اشارة (يمين او شمال) بص الاول فى المراية قبل ما تاخد اي Action .. وشوف اللى جاي وراك بسرعة هدى سرعته شوية وسمحلك بالمرور ولا لأ
2- لو لم يسمح لك بالمرور واصر على انه يعدي الاول (وده حقه) .. اوعى تضايق خالص .. هيجيلك اليوم اللى تلاقي حد مديلك اشارة وانت متوافقش .. كما تدين تدان .. وساعتها نييييااااااهااهاهاهاهاهاها بصوت عالي كمان ...
3- متكسرش عليه بالعافية .. وبعدها تطلع ايدك من الشباك تقعد تفعص بصوابعك (كوسيلة لتعريف الناس انك مدي اشارة) لانك انت اللى غلطان
4- اخيرا .. متعملش ناصح وتفتح الاشارة بعد ما تكسر على الناس علشان شكلك بيبقى اهبل قوي


سبب كتابتي للموضوع ان النهاردة الصبح واحد كان بياخد ملف معايا وفجأة لقيته كسر عليا بطريقه كنا هنخبط فى بعض .. وبعد ما هديت طبعا وهو بقه قدامي فى حارتي .. لقيته فتح الاشارة (بعد ما كسر عليا خلاص) وبيشاورلي انه كان مديني اشارة

سبحان الله اللى خلى الموقف يعدي بكل هدووووووووء

وشكرا سيادة الاعضاء المحترمين

[J A G U A R]

هيا حاجات بسيطه بس بسبب ان الواحد ميعملهاش ممكن تحصل حوادث ومشاكل بين الناس وده اللى بيحصل فعلا .. يا ريت كل الناس تبقى ملتزمه .. وربنا يسترها

[تامر.محمد]

تلاتة و اربع دول في الجون

باتشل منهم
و من اللي مجرد ما تدي اشارة يقوم عامل كيك داون و يجري بسرعة قبل ما انت تتحرك

[sasatony]

شكرا علي النصائح دي
وفعلا اكتر حاجة بتشل الواحد ان حد يكسر قدامك وبعد ماعدي يروح مشغل الاشارة

[amatboly]

للاسف السواقة عندنا عافية و اللى خايف على عربيته يحاسب
هى جت على العربيات

[K_E]

ياريت نكتر من المواضيع دي لان اغلبية المصريين وانا منهم متعلمين فالناس :d

احب اضيف ان قبل ماتدي اشارة تبص فالمراية الاول لان لو الي جمبك جاي سريع وقريب منك وشاف الاشارة ممكن يرتبك ويكسر جامد علشان يتجنب اي حركة غباء ودي لاحظتها كتير لما كنت بدي اشارة قبل ما ابص في حد قريب ولا لا

[S O P H O S]

لما بشغل اشارة مش بعرف اكسر اساسا
الناس اتعودت علي سواقة محددة للاسف

[Mohamed_Rashad]

أتفق مع صاحب الموضوع كلية و شكرا للمشاركة بهدف نشر الوعي. ولكن "عمرو بن معد يكرب" يكسب!
لقد أسمعت لو ناديت حيـا, ولكن لا حياة لمـن تنـادي
ولو نارٌ نفخت بها أضاءت, ولكن أنت تنفخ في الرمـادِ