تجربتي : إحترس لا تتعامل مع معرض نور كار .

[mohamedshosha]

السلام عليكم ورحمة الله وبركاته: معرض نور كار للسيارات المستعمله امتداد جامع الفتح المهم صاحب المعرض اسمه منصور ومساعده اسمه ضياء المهم كان فيه اعلان عن سياره بي ام ٣١٨ بدوبيزل فذهبت علشان اشوف السياره وتوكلت ع الله واشتريت والمعرض عمل عقد بيني وبين البائع المهم رحت افحص بالمرور علشان اطلع الرخصه وفوجئت بأن صاحب السياره مغير الموتور وبالتالي عزت اللي ف مرور النزهه قال لي الموتور متغير هاتلي ورق الموتور الجديد علشان امشي للك ورقك واختم للك ورق الفحص اتضح لي ان منصور صاحب المعرض نور كار والمساعد بتاعه اسمه ضياء متآمرين وعارفين ان الموتور متغير لكن مات ضميرهم وهما بيغشوا الناس ، المهم لقيت نفسي تايه مش عارف اعمل ايه فاتصلت بصاحب السياره اسمه مصطفي هاشم ساكن ف النزهه الجديده ويعمل ف مجال المقاولات المهم سألته انت مغير الموتور رد وقال فعلا انا مغير الموتور طيب فين يابني ورق الموتور والافراج الجمركي قال لي اصل الموتور الجديد عليه فلوس لازم تدفع اولا طيب يابني مين عمل لك موتور السياره ...مين الميكانيكي قال منصور اللي ف عزبة شنوده رحت لمنصور هات يا منصور ورق الموتور قال لي اولا باقي ١٢٥٠ جنيه باقي حساب الموتور ومصطفي هاشم عليه ٢٠٠٠ جنيه مصنعية الموتور رحت المعرض نور كار وقابلت صاحبه منصور وقال كلام تمشيه حال واحنا عنينا ليك وغيره من الكلام اللي لا يقدم ولا يأ خر المهم دفعت انا الديون اللي ع الموتور عدا المصنعيه مرضيش منصور الميكانيكي يطالبني بيهم لاني مليش ذنب فيهم وانا من تاريخ اول يناير ٢٠١٤ حتي تاريخه لسه مرخصتش السياره لان الافراج الجمركي لسه مجاش المرور . البعض بيعتقد انه لما يغش الناس ويضحك عليهم دي نصاحه ابدا الرسول الكريم قال من غشنا فليس منا ويبقي مصطفي هاشم مديون امام ربنا سبحانه وتعالي سيحاسبه علي غشه للناس . اخيرا تم عمل محضر بقسم النزهه تحت رقم ٢٧١٧ جنح بتاريخ ٨ فبراير ٢٠١٤ . ودي تجربه حاولوا تستفيدوا منها .شكرا

[sasatony]

طيب بص انا مش عارف بس مش ده يعتبر اساسا غش وتزوير من البائع لان الورق الي معاك فيه رقم موتور والموتور الي في الواقع رقمه مختلف عن المحضر صح ولا انا غلطان؟؟
لو صح انا وجهة نظري كان يتعملو محضر غش وتزوير وتاخد فلوسك تاني وتبعد عن العربية دي

[abohend]

ربنا يعوض عليك

حسبنا الله و نعم الوكيل في كل غشاش
أصبر و أحتسب

[lidosasa]

مبدئياً لا تلومن إلا نفسك
المفروض إنك بتفحص العربية فحص شامل ودقيق ولو كنت بتشترى من أخوك مش من معرض
تشوف رقم الشاسية ورقم الموتور وتطابقه باللى مثبت فى الرخصة ...
كمان حتلاقى بند فى العقد بيقول إنك عاينت العربية معاينة تامة نافية للجهالة قبل الشراء ... يعنى إنسى تماماً موضوع إنك تعمله محضر نصب وتزوير والكلام ده لآنه ساعتها مفيش أى دليل على إن تغيير الموتور متمش بمعرفة حضرتك مش المالك الأصلى فى النهاية أعتذر لحضرتك على نبرة الحدة فى كلامى لكن الإنسان مش بيتعلم ببلاش والفلوس بتيجى بطلوع الروح فخليك دقيق ونمكى فى الشراء لأبعد الحدود وخصوصاً فى العربيات وبالذات فى المستعمل وبالأخص لو من معرض

[Anaslbda]

اخيرا تم عمل محضر بقسم النزهه تحت رقم ٢٧١٧ جنح بتاريخ ٨ فبراير ٢٠١٤

القانون لا يحمي المغفّلين.

[ashrafmahmoud93]

ليه كدا بس ياجماعه كل انسان فينا معرض للغش والنصب بالراحة ع الراجل بدل ما تواسوة تقولوا كلام مش ف محلة
ربنا يعوض عليك وان شاء الله تفائل والموتور هيتثبت باذن الله

[Elawany13]

الأخوة اللى بيقولوا لازم يعاين ويطابق ... بتعملوا ايه لما تشتروا عربية ؟

رقم الشاسيه بيكون واضح على الركبة وعلى القايم
انما رقم الماتور مش اى حد يقدر يعرف مكانه
انا عربيتى شاهين ياعنى عربية الصنايعية حافظينها صم
أنا اشتريت العربية وكانت رخصتها لسه فيها سنتين ونص
بعد ما خلصوا وليله لما كنت رايح افحص جالى وساوس ان الماتور متغير
نزلت ادور على رقم الماتور يمين وشمال وفوق وتحت
لقيت ارقام كتير على ان واحد فيهم يطابق الرقم اللى فى الرخصة ابداً !!!!
قلبى وقع فى رجلى روحت لكهربائى بيتاجر فى العربيات الدوجان والشاهين وقولتله تعرف رقم الماتور فين
قالى ايوه يابيه وطلعلى رقم غريب الشكل ملوش دعوة بالرخصة ... واعصابى باظت خالص
روحت للميكانيكى بتعرف تتطلع رقم الماتور قالى امال ايه ده سؤال بردو يابيه
وطلعلى رقم تانى بردو ملهوش دعوة باللى فى الرخصة
روحت الدنيا بتلف بيا ومجاليش نوم طول الليل
وقولت انا اتنصب عليا وهروح المرو ويطلع ماتور مسروق ولا ملهوش ورق
تانى يوم الصبح لما روحت الفحص الراجل بتاع الفحص طلع الرقم فى لحظات
طبعا الرقم غير ظاهر ومينفعش يتشاف بالعين المجرده لازم ورقه وقلم رصاص
وتنفست الصعداء لما لاقيته مضبوط ومطابق للرخصة

[mohamedshosha]

شكرا لجميع الزملاء حتى من كان حادا منهم.

الحمد لله والشكر لله واشكر كل الزملاء حتى من انفعل لانه يريد المصلحه واحب أوضح الآتى :
ـ انا عملت الفحص للسياره من الالف الى الياء لكن فعلا لم يتم اخذ بصمة الموتور او الشاسيه .
ـ انا حبيت ان الجميع يستفيد من التجربه لانك ممكن تشترى سياره العداد ملعوب فيه ومستحيل تكتشف ذلك .
ـ تغيير الموتور للسياره شىء جيد مش وحش لكن صاحبها ضميره مش كويس مع التاجر اللى اشترى منه الموتور بدليل ان مبلغ 1250 ج المتأخرات يعتبر سهل الدفع طالما سدد ثمن الموتور كله .
ـ رقم الموتور فى ال بى ام فى مكان اصلا صعب تاخذ البصمه منه وغير واضح بالمره .
ـ تم الاتصال بالتاجر فى بورسعيد وتم استخراج الافراج الجمركى والموتور باسمى و ارسله لى بالسوبر جيت لكن لسه مجاش المرور .
ـ تحياتى للجميع وارجو ان يستفيد الجميع من ذلك واحيانا تكون هذه التجارب فى الحياه منجاه من شىء اكبر والله اعلم.

[Elawany13]

طيب الحمد لله ان المشكلة اتحلت
وربنا يعوض عليك

[mohamedshosha]

يقول الرسول الكريم " من غشنا فليس منا "

يقول الرسول الكريم " من غشنا فليس منا "

[sasatony]

الحمدلله ان المشكلة اتحلت وربنا يكفيك شرها وديك خيرها

[mohamedshosha]

حديث الرسول الكريم (ص)

حدثنا عبيد بن أسباط بن محمد القرشي حدثني أبي عن هشام ابن سعد عن زيد بن أسلم عن أبي صالح عن أبي هريرة قال : قال رسول الله صلى الله عليه وسلم المسلم أخو المسلم لا يخونه ولا يكذبه ولا يخذله كل المسلم على المسلم حرام عرضه وماله ودمه التقوى ههنا بحسب امرئ من الشر أن يحتقر أخاه المسلم
قال أبو عيسى وهذا حديث حسن غريب

[S O P H O S]

معلش ربنا يعوضك خير

[magedfarid]

تشوف رقم الشاسية ورقم الموتور وتطابقه باللى مثبت فى الرخصة ...

ممكن تقوللي ازاي هانعرف رقم الماتور !!!!

[lidosasa]

ممكن تقوللي ازاي هانعرف رقم الماتور !!!!

عربيتى ماروتى وفيها كارت معدن متبرشم فى حوض العربية عليه رقم الموتور ورقم الشاسية