إستفسار عن اوتوماك فورميولا

[George.asmz]

لو سمحتم هو معرض اوتوماك فورميلا اللي هيكون في شهر مارس ده بيكون في إيه؟
هل الأسعار بتنزل ويكون في تخفيضات ولا إيه بالظبط؟
انا كنت ناوي اشتري عربية ديلوقتي لكن فكرت إن ممكن بعد المعرض او في المعرض يكون في عروض او تخفيضات او عربيات جديدة في الشريحة اللي بدور عليها.. فهل ده صح وإيه موضوع المعرض بالظبط.. شكراً

[saddam]

صديقي المواطن
يعني إيه موضوع المعرض طبعا كان قبل الثورة شبه معرض دلوأي بقه زي البطيخة سنة تروح تلاقيه فاضي وحتى شركات مهمة مش مهتمة تعمل أجنحة فيه وسنة تلاقي شركات صينية وشوية مراكب وشوية موتوسيكلات ومحلين تلاتة أيربرش لتعديل ألوان عرببات مثلا وشوية كماليات وقطع غيار أي كلام والراجل بتاع مكنة تصنيع الميداليات كل سنة موجود وبتوع البنوك موجودين عشان يقسطولك عربية وتاخد بروشورات مجانية وهو دورين وكان زمان عليه إقبال عشان كانت الصين كل يوم بتقدم عربية جديدة فكانت الناس تروح تشوف الجديد أما دلوأتي بتواجد حثالات المجتمع كغبور ومنصور وعز العرب إيه اللي ممكن تشوفه بكبيرهم أوي يقدمولك خصم 25 جنيه عالعربية قيمة تذكرة دخولك المعرض وهو بس فايدته يحطلك كذا عربية من كذا شركة في مكان واحد وهو عبارة عن عربيات النقل واللواري واﻷوتوبيسات في الساحة الخارجية المكشوفة ثم تخش الطابق اﻷرضي عبارة عن قسم صغير للعربيات الكلاسيك ومقتنيها وده بتبقه عربيات ملاك مغرورين وعظماء وشايفين نفسهم ورايقين من أمثالي وجنبهم شركة تعديلات بعديها تخش عاﻷجنحة ودايما تلاقي أكثر قسمين عليهم إقبال هم بي إم دبليو لزوم الحسرة والحرمان يليهم إلانترا ودول نفسهم اللي كانوا واقفين في بي إم ببتحسروا وبيشتروا البديل اﻹقتصادي ماركة أرخصهم من هيونداي ثم عندك اﻷجنحة الصينية لو مهتمين السنة دي في مصر حتشوف دلع مرة جيلي ولا فاو فكرت السوق المصري ده فعلا سوق مش عارفين إن سوقنا المصري عبارة عن بسطتين وكشك وكانتين ومحدش بيعبرنا فراحوا جايبين عربية الرئبس الصيني شي مش يشبه شي وهي عربية فخمة ستريتش وبصفتي كنت أكبر مالك في الجناح من ملاك الصيني وبصفتي عمدى الصيني في مصر دخلت في مفاوضات حامية الوطيس وشديدة اللهجة مع مدير الجناح عشان يبيعلي جنوط العربية خد بالك مش العربية ده جنوطها بس عشان فيها مكنو 5 آلاف سي سي وبكده حعد جمارك بتاع 700 ألف وبصفتي كبير مفكرين طرق اﻹحتيال ضد حكومتنا الحرامية الرشيدة قلتلهم أنا شاري بشرط إحنه نرجع الصين وتشيلوا المكنة دي وتشحنوها لوحدها وتحطولي مكنة 1300 أعدي بيها الجمارك والترخبص ثم أسقط مكنتها اﻷصلية وبكده أوفر بتاع نص مليون جنيه طبعا قالولي ما دمت ستدفع موافقين بس عربية زي دي ستريتش فخمة طويلة وتقيلة لو حطيتلها مكنة 1300 سي سي قولا واحدا لو طلعت كوبري غي نص الطلعة حتجيب مرشدير بظهرها ومن سنتين جاري تجميع صواميل هذه الفكرة
وبكده نرجع ونقول المعرض يوم لذيذ تاخد فيه مراتك بس بلاش أطفال تلف وتعيش حياتك وتتحصر على العربية اللي إنت راكبها وتقول إنك ضعت خلاص
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[Mr_revenger]

متابع باهتمام

[S O P H O S]

بيغلوا العربية قبل المعرض بشوية
ويعملوا عليها خصم اثناء المعرض وترجع لثمنها الي كانت عليه قبله بشهرين
الي هيا اصلا عليه غالية
والحمد الله ..