التاكساجيه الحراميه

[cyborg_ift]

بإختصار مشواربالتاكسي 18 كيلو بدون وقوف ولا اشارات يعمل كام على العداد ؟

[m9501]

حوالي ٢٥ جنيه لو الشارع فاضي

[cyborg_ift]

الشارع فاضي خالص الساعه كانت 6 صباحا بعد اذنك حسبتهه ازاى

[m9501]

بداية ٢.٥٠
بعد كده كل كيلو ب١.٢٥ تقريبا
بس ممكن اكون غلط عشان مش فاكر الكيلو بكام

[mohamed_selim]

من 20-25 جنيه
فعلا اول فتح العداد 2.5 لمدة كيلو تقريبا و بعدين كل كيلو ب 1.25
هو اخد منك كام؟

[J A G U A R]

مش اكتر من 25

[meero_boy2000]

طب واللي خد تاكسي من المعادي لل na بالتجمع وطريقه دائري فقط بدون توقف ويوم جمعه ولاتوجد اي زحمه وقال 50 جنيه يعمل ايه

[aboomar22]

موضوع عداد التاكسى ده بجد حاجة محيرة انا لو رحت شغلى من غير العربية باخد تاكسى من الدقى (مقار ) الى اول كوبرى فيصل احيانا العداد يعمل 10 جنية واحيانا 6 جنية مع ان الطريق بيبقى مفيش فرق تقريبا وسعات الاحظ ان اول حركة للعداد بعد 2.5 ممكن العداد يقلب بعد مانمشى مسافة كبيرة واحيان يقلب بسرعة ومره بتكلم مع سواق قالى المعادلة بتاعت العداد بيتلعب فيها عن طريق توصيل العداد بالكمبيوتر --والحجة ان بنديرة التاكسى متغيرتش من 2007 مع ان كل حاجة غليت من زيت لقطع غيار لكاوتش وكده

[meero_boy2000]

في موضوع علي اليوم السابع كان معمول من يومين مع سواق تاكسي وكان بيشرح طريقه النصب واللعب في العداد بطرق احترافيه متقدرش تعرفها بس السؤال هنا فين اللي بيراقب ؟؟؟؟

[Eng_hatemfathy]

بيراقب؟؟؟؟؟؟؟

ناس المفروض مسلمة مش بتخاف من ربنا هتخاف من مين وخاصة فى عهد تحركه اصابع وتقيمه اصابع وتقعده اصابع وتعبث به اصابع وتشعل ناره اصابع وتقتل شعبه اصابع وتحلل اعلاناته اصابع
فكيف تخاف اصابع من العبث بعداد التاكسى وهو زمن الاصابع

[Anaslbda]

ع الأقل ده بيشغّل العداد,
تعمل ايه في التاكسجية اللي يطلع بيك وميشغّلش العدّاد ولمّا تسأله يقولّك الكدبة الشهيرة - "أصل العداد بايظ وبتاع العدادات اجازة امبارح"

كمية الاستغلال فظيعه هنا في التكاسي ف مصر, سمعتنا بقت زي الزفت.
عيلة خليجية كانت طالعة من ماريوت الزمالك وانا معدّي بالصدفة سمعت بنت بتقول للتاكسي قبل ما تركب "عدّاد, ها؟" :)

أنا حلفت على نفسي من زمان والله ما هكمّل مشوار مع تاكسي مش هيرضى يفتح العداد, وفعلاً, ياما بنزل من تكاسي كل يوم.

مره رايح اوصّل الحاجة واختي مشوار بتاع 20 كيلو وكان معانا شنّط, ربّطتها فوق وطلعنا, العداد يا عم الحاج؟ أصله بايظ, - ماهو بيستغل الموقف, واحد ومعاه اهله وبعد ما ربّطنا الشنط أكيد مش هينزل تاني-

ولمّا تركب مع واحد ويحس انك طيّب مش فهلوي هيلفّ بيك القاهرة الكبرى كلها لحد ما يوصّلك مشوارك, سياحة ياعم في الزحمه ايه المشكلة.

ده انا لاحظت فيهم حرامية كتير لو حسابه مثلاً 10 جنيه, تدّيلو خمسة ورق والتانية فضّة, يادوب تلف ضهرك وانت طالع يقولك يا بيه دول اربع مش خمسة!
وانا استغرب ازاي ده انا عاددهم كويس, لكن الشارع بيبقى زحمه وموقّف عربيات وراك مفيش مجال تعطّل نفسك وغيرك عشان جنيه,
طلعوا حرامية, حصلت معايا مرتين والتالته بقيت منتبه, لمّا آجي أدّيلو الفكة احطّهاله في إيدُه جنيه ورا جنيه.

تلاقي الواحد فيهم وهو بيسوق, بسم الله توكلنا على الله, يارب رضا الوالدين,
ويوم متنسا موبايلك في التاكس انسى يرجع تاني, ده رزق من عند ربنا يا عم الحج.

واللي يضحّك اللي تركب معاه ويقعد يشتم في البلد والمصريين, كلام من نوع "شعب وسخ ونصاب, بلد زباله..."
وانا قاعد جنبه عامل كده ":)" معاك حق ياسطى والله ربنا يعينك

لسا امبارح في شارع متفرّع من جامعة الدول بطلّع العربية من الباركن ألاقي تاكسي واقف ورايا مطلّع دماغه من الشباك وبصوت عالي: "الناس اللي معاها فلوس بقوا عاملين زي التيووس"

اللي محتاجينه كالتالي: شركة تنظيم تكاسي خاصة محترمة زي اللي في دول الخليج هي اللي تظبّط الوضع.

[ضى القمر]

فى عدادات بتكون بايضة

[StarLancer]

كسر العداد 2.5 جنيه
أول كم 25 قرش
كل كم 1.25 جنيه أو 25 قرش كل 200 متر
دقيقة الإنتظار 25 قرش
في طرق كتير للنصب.. في night mood بيخللي 100 متر ب 25 قرش.. و في سواقين بتركب زرار بيزود الحساب..

[mk3]

وفى زر السياحى الطلعه بدايتها 6 جنيه

[Eng_hatemfathy]

اللذيذ ان اللى بيشغل العداد بيبقى مستنى البقشيش
انا احتجت للتاكسيات بانتظام وبكثرة مرتين فى حياتى
لما عملت حادثة باللادا وقعدت تتصلح اسبوع ولما اتقلبت بالشارك وعقبال ما اشتريت غيرها وخدت عشر اسبوعين تقريبا وطبعا فى الفترة دى الحمد لله كنت بعمل حسابى انه يكون تاكسى ابيض ولو وقفت كتير ورحت الشغل متأخر واول ما بركب ببص على العداد واتأكد انه ضغط على الريست وعامل 2.5 جنيه وكل كام دقيقة ببص عليه وطبعا لما بنزل بسيبله الفكة بيبقى اتنين جنيه ولا تلاته بالكتير
اصعب موافق معايا فى التاكسى الابيض وكانت بتوصل للخناق لما بكون راجع من سفرية قصيرة وانا مبحبش لا حد يوصلنى ولا يجيبنى
فى المرواح بتصل ب تاكسى العاصمة الله يرحمه (اخر مرة فى رمضان قبل اللى فات كان الجنوط بايظة وواخد 40 كيلو فى عربية بترقص على 80 كيلو/ساعة والفرامل بايظة والعداد بايظ بس حاسبنى على عدد الكيلوات وتمن الكيلو )
المشكلة فى الرجوع انى بركب تاكسى من الى واقفين وطبعا بيفتكرنى راجع من الخليج ومعايا ريالات وانا اخرى معايا شنطتين من سفرية عمل اسبوع فى امريكا ولا اوروبا المهم كل المرات كان بيبقى خناقة على البقشيش والطريق ومين هيدفع الكارته لانى بدفعها وانا داخل ووانا خارج والاتنين بيحلفوا ان الزبون بيدفعها (فى المرتين)
المهم اخر مرة كانت الخناقة قبل ما نركب لان مفيش حد من التاكسيات البيضا عايز يطلع بالعداد والكل بيتقاول قبل ما يتحرك وعايز فى 40 كيلو دائرى 250 جنيه ولما نزلو بقوا 180 !!!!