جديد فى السواقه يجيب زيرو ولا مستعمل

[OmarEzzat93]

عندى واحد قريبى عايز يجيب عربيه زيرو رغم انه لسه مبتدا و متعلم جديد و هو قلى انه هيتعلم عليها بالليل و الطرق فاضيه لحد ما يحفظ زوايا العرببه و هو ناوى يجيبها اتوماتك عشان تكون اسهل فى السواقه فانا قولت اشوف راى اعضائنا الكرام و رايهم هل يجيب جديد و يتكل على ربنا و لا يستنى شويه....

[mahmoud_ali]

يجيب جديد بس تكون قطع غيار رخيصه زى الاوبترا مثلا او اللانسر علشان لو لا قدر الله حاجه اتخبطت منه يقدر عليها لكن انا بفضل انه يجيب 128 يتعلم عليها الاول بعد كده يجيب زيرو

[OmarEzzat93]

هو تقريبا هيأمن عليها تأمين شامل

[هانى ظرف منصور]

انا لسه متعلم سواقه جديد وبفكر اتكل على الله واجيب زيرو وربك يسترها ياما ناس حريفه سواقه وعربياتهم اتخبطت واتجرحت

[ahmedalaahosny]

مستعمل مانيول وهقولك ليه؟ مستعمل لان اغلب الزيرو قطع غياره الخارجية غالية علي مايتعلم هيكون صرف قد تمن العربية (لو ناوي علي حاجة من الكوري الجديد) ومانيول لانه لو اتعلم علي اوتوماتيك وسواء لظرف او باارادته حب يسوق بعد كده مانيول ومن اول مره هتبطل منه هيفقد الثقه ف نفسه وهيقفل من السواقه فانا رايي لو الميزانية تجيب لانوس ولا فيرنا مكنتش ماروتي او التو

[Land_Cruiser]

يجيب حاجه مستعمله حالتها كويسه و سهله في البيع يتعلم عليها و بعد كده يبيعها بعد سنه و لا اتنين و يجيب زيرو لو عايز. الموضوع مش علشان الخبطات و الحكات فقط و لكن علشان رجله تاخد علي العربيه و يعرف يتعامل مضبوط مع الفرامل و الدبرياج و حتي البنزين و الا هيلاقي العربيه الزيرو بتتبهدل منه بالذات في الاول و هي المفروض بتلين و هو بيقرص عليها او بينسي ينقل او بيدوس فرامل زياده عن اللزوم فالتيل بيتاكل بسرعه و شويه و يدخل علي الطنابير و قطع غيار الزيرو اكيد هتبقي أغلي من المستعمل اللي موديله اقدم و حاجاته منتشره في كل حته. كل ده طبعا غير الخبطات و الخرابيش نتيجه عدم التقدير الصحيح للمسافات و اللي بيبقي امر طبيعي لأي حد لسه بيتعلم. كمان نقطه مهمه لما بتبقي بتتعلم علي عربيه مستعمله ده بيقلل توترك كتير عن لو كانت العربيه زيرو و خايف عليها

[OmarEzzat93]

ما هو هيكون اكيد خايف عشان كده عايز يامن عليها تامين شامل و بالنسبه للمستعمل ناس كتير حذرته عشان المستعمل هتعطل و هتقرفه و هتكره فى حياته

[J A G U A R]

يشوفله حته لانوس ولا فيرنا استعمال وبعد كده يقلب

[shiko85]

يجيب جديد
امان من نصب و غش المستعمل
حالة العربيه افضل طبعا
هيتعلم السواقه مش الصيانه
اتوماتيك اختيار مناسب جدا علشان الزحمه

[rotanamasoud]

يضحى بالفين تلاته(يقدرها خبطه فى الزيرو) ويتفق مع واحد بعربيه لادا يعلمه بيهم فرم وبعد كده يشترى زيرو

[shiko85]

المستعمل بحاله جيده سعره غالى
المستعمل حاله غير جيده محتاج مصاريف كتير

[almohaor]

الافضل زيرو
عشان يقدر ياخد على ابعادها
لان المستعمل راح يتعلم عليها الصيانة موش القيادة
وكمان عشان يتعود على العربية ويعرف ابعادها
وممكن الواحد يزهق ويصرف نظر عن شراء السيارة من قرف الاصلاحات
وممكن يصرف على صيانتها واصلاح الاعطال اكثر من الخدوش او الخبطات فى الجديد
والافضل يشترى سيارة مانيوال موش اتوماتيك حتى لا تشجعه على ان يسرع بالسيارة

وانا ساعرض عليكم تجربتى فى تعلم القيادةوالموضوع كله يعتمد على الله ثم الثقة فى النفس

انا شخصيا اشتريت سيارة على الزيرو وجارى هو اللى ساقها لحد البيت !!! وماحدش علمنى غير اذاى اادور العربية وكيفية الغيار على الفتيس نظرى لعدم وجود مدارس تعليم قيادة وفتهاوركبت عربية زميلى لوحدى ومرة واحدة فقط فى مكان واسع ونجحت فى تديورها والسير بها وايقافها

وبعد ذلك قعدت اقرأ كتالوج السيارة (لمدة شهر ) لمعرفة اجزائها وكيفية التعامل معها
وكل ده والعربية مركونة امام البيت....ههههههههههههه
ثم تشجعت ومدور العربية لاول مرة وخرجت للطريق العمومى ولفيت حوالين المربع السكنى بتاعى طبعا كنت ماشى على التانى ومشغل الانتظار...هههههههههه
ا
الحاجة الوحيدة اللى كنت متخوف منها اذاى اخد الغيار وكمان اذاى امشى واحرك هذا الصندوق المعدنى الكبير اللى هو السيارة فى الشوارع بين الناس والعربيات الاخرى

المهم انكسر حاجزالخوف والرهبة بداخلى واخدت ثقة فى نفسى
كل يوم اقوم بعمل هذه الدورة وكل كام يوم اقوم بتوسيع الدورة بزياة عدد الشوارع

وبقيت كمان اقوم بعمل دورنات لليمن واليسار لمعرفة ابعاد السيارة وكمان الرجوع للخلف واذاى اهدى واعدى المطب وكل ده لوحدى وبتوفيق من الله
واللى ساعدنى على كده ان الشوارع فى منطقتى واسعه وغير مزدحمة

بعد شهر ابتديت انزل للشوارع المزدحمة بس الطوالى
بعدكده ابتديت ادخل الشوارع الضيقة الجانبية

وبعدها خلاص بقيت انا والسيارة نتحرك كقطعه واحدة وانسجمت معها
وبقى شىء عادى

صحيح اخدت خبطات كتير ومعظمها لم يكن خطأ منى
وطبعا الفضل بعض الله سبحانه وتعالى فى جميع الاخوة الافاضل بالمنتدى
اتعلمت منهم ومن تجاربهم الكتير وبقيت ملم بحاجات كتير

طبعا الحمد لله السيارة لم تتعبنى ولا توجد مشاكل منها
باتابع مستوى جميع السوائل بالسيارة بما فيها مياه البطارية
وكل شهر اراجع ضبط ضغط الكاوتش بالنتروجين مع تغيير زيت الموتور والفلاتر فى الميعادوانا بنفسى ازود المياه الخضراء ومياه البطارية لانها سالة

الحاجة اللى غيرتها فى التلات سنوات الماضية والحمد لله كانت خرطوم البنزين وكمان علبة الشكمان اتخرمت من كتر الاحتكاك بالمطبات الحلوة اللى كترت بالبلد

العربية استلمتها بدون فلتر هواء للتكيف رغم انها فول اوبشن (غبور الحرامى والبخيل)
مع ان تمنه 45 جنيه وانا برضه اللى قمت بتركيبه بعد رؤية فيديو لطريقة تركيبه

لذلك انا اؤيد للاخ الكريم ان يتوكل على الله ويكون عنده ثقة بالنفس و يشترى زيرو

وربنا يديه خيرها ويكفيه شرها

[S O P H O S]

يجيب زيرو طبعا
لكن بشرط تكون قطع غيار متوفرة وفالمتناول خارج التوكيل
مجرد رأي