عندما تشاهد حادثة ارجوك افسح الطريق و قاوم الفضول

[zarkoor]

امبارح كنت رايح اسكندرية
و عند كوبرى العامرية كان فيه حادثه رهيبه بين عربيه نقل بمقطورة و كام عربية و حصلت وفيات ربنا يرحمهم

لكن كالعادة توقف الشارع فى الاتجاهين
اتجاه اسكندرية القاهره بسبب حطام السيارات و الزيت و البنزين اللى فى الارض

و اتجاه القاهره اسكندريه بسبب السيارات التى تتوقف لمشاهدة الحادث
تخيلو كل سيارة تقف دقيقة تتفرج على الناس المرمية و الحطام و بعدين يقعد اللى جواها يحلل سبب الحادث و مين المتسبب

تخيلو صف عربيات طويل 100 او 200 عربية مستنيه دورها فى المشاهدة و التحليل و فى نهاية الصف عربية اسعاف او مطافى بتبوس رجل الناس توسع علشان كل دقيقه حتعدى ممكن تكلف حياة انسان

ارجوك ابداء بنفسك و قاوم الفضول و امشى بسرعة و ماتعملش زى الناس

[Abdo_Eldesokey]

الحمد لله الجزئية دي مش عندي خالص

وعمري ما وقفت أتفرج على حادثة أو خناقة على حساب الطريق

بحس إنه جهل إنك تعطل الطريق عشان تتفرج

[Nour_Peugeot]

ه يا جماعة احنا اكتر شعب فب العالم عنده فضول

ممكن دقيقة تعدي كام انسان هيموت

[blazer]

فضول ملهوش لازمه و غلط جدا
لان زى ما قلت دا ممكن يكلف حياه انسان
و ممكن الخساير تزيد لو فى لاقدر الله بنزين على الارض و اشتعل ممكن يفجر له عربيتين تلاته و ناس تتصاب زياده بسبب تاخر عربيه مطافى او اسعاف او شرطه
وبلإضافه طرقنا زحمه و ديقه

[r0xer]

المشكلة ان مفيش حل لان الكل بيحب يتفرج دايماً.

[شاهين - بنز]

معاك حق فعلا طبيعة الشعب المصري إنه شعب زياط بيحب أوي الفرجة والزيطة خناقة كانت أو حادثة أو أي حاجة تلاقي جمع غفييير من الجمهور
وبجد بتغاظ قوي أما أكون مثلا ماشي على المحور وفي حادثة على الناحية التانية وفجأة ألاقي ناحيتي كلها وقفت وطريقي وقف تماما للفرجة والفضول

[actronx]

الحل ان عربيات المرور تنزل على الطريق وتاخد مخالفات فوريه لاي حد يقف او يهدي السرعه ... لان مهما قلت كلامك مش هيوصل لكل الناس لكن اما المخالفات تشتغل والدفع يشتغل الناس هتتعلم

[Dr_Mido]

الحل ان عربيات المرور تنزل على الطريق وتاخد مخالفات فوريه لاي حد يقف او يهدي السرعه ... لان مهما قلت كلامك مش هيوصل لكل الناس لكن اما المخالفات تشتغل والدفع يشتغل الناس هتتعلم

:D:Dياراجل دة العطله هتزيد
تخيل اسطوانه متعرفش انت بتكلم مين هتشتغل كام مرة
واسطوانه طيب انا هوريك ويطلع التليفون يتصل بالسوبر ماركت هتزود العطله 500 ضعف

[sasatony]

انت كلامك سليم
بس المشكلة كلنا بلا اثتثناء هنقول مش بنتفرج وبنمشي علي طول لكن اول ماتيجي الحادثة قدامنا هنهدي ونشوف ايه الي حصل وهنمشي نتكلم عن الحادثة
دي عادات موجودة في الشعب من قديم الازل واستحالة هتتغير في يوم وليلة دي علشان تتغير محتاجة تغير ثقافة شعب باأكمله

[Rsarabia]

دى من العادات الزبالة عند الشعب المصرى الطيب و ربنا يهدينا

[OsKaR]

انا عن نفسي عشان طريقي كل يوم في حادثه على الاقل (الدائري و طريق السويس او الدائري و طريق الاسماعيليه)
بقت عاده عندي ان في حادثه ففقدت الفضول و اني اقف و اتفرج لأني مش هشوف حاجه جديده

[Mosso]

يا جماعه الي الناحية التانيه مش دايما بيتفرجوا بس ساعات بيقفوا و ينزلوا جري يساعدوا ,
زي مره على المحور كان في عربيه النار ماسكه فيها كأنها منفجره في فيلم اكشن اجنبي
و كل الطفايات بتاعت العربيه مأثرتش فيها و فجأه كان ماشي أوتوبيس سياحه الناحيه التانيه وقف و وقف الشارع بس الطفايه بتاعته هي الي طفت النار
طبعا دي حاجه تعتبر ايجابيه مش سلبيه بس,,

لكن برضه من الطبيعي و من اللا ارادي ان لما يكون في حاجه هتهدي و تتفرج و تيجي تكتب هنا على المنتدى انهارده شفت كذا كذا كذا و بالصور كمان

[zarkoor]

العاده الزفت دى مش عندنا احنا بس
من كام اسبوع كان فيه فقرة فى mbc4 الصبح بتاعة النشرات الامريكية و كان فيه برضه نفس المشكلة عند الامريكان

من كام سنه كان فيه حريقة فى شقه فى برج على الخليفة المامون فى روكسى
طبعا الكل وقف يتفرج و الشارع اتسد فى الاتجاهين و عربية المطافى خدت ساعه و نص علشان تيجى من روكسى و ماوصلتش الا لما ظابط اسد وقف بعربيته بالعرض و حول المرور لشارع الميرغنى علشان المطافى تدخل

نبداء بنفسنا و اهلنا و اصحبنا و نرفع مستوى الوعى
تخيلو الواحد ممكن يوصل المعلومه دى لعشرين و العشرين يبقو الفين و هكذا

احنا مش وحشين احنا بس مستوى الوعى عندنا هو بس اللى لازم يرتفع

*** ابداء بنفسك ***

[Ghamrawy]

معاك حق فعلا طبيعة الشعب المصري إنه شعب زياط بيحب أوي الفرجة والزيطة خناقة كانت أو حادثة أو أي حاجة تلاقي جمع غفييير من الجمهور
وبجد بتغاظ قوي أما أكون مثلا ماشي على المحور وفي حادثة على الناحية التانية وفجأة ألاقي ناحيتي كلها وقفت وطريقي وقف تماما للفرجة والفضول

فعلا كلامك كله مظبوط جدا و الموضوع ده تحسه اكتر عندنا فى اسكندرية بلد ال 3 شوارع و 3 مليون مصييف .
الحل للموضوع ده هو ان المرور يبقى معاه قماش داكن و يعملوا كرودن حوالين الحوادث و المصابين و القتلى و ده طبعا حل غير عملى بالمرة
و الحل التانى هو تطبيق مخالفة تعطيل المرور عمدا و الوقوف فى عرض الطريق يعنى 2 فى 1 و تبقى معروفة للناس كلها علشان محدش يقف و يبلم و يتنح و يريل و هى اساسا مش ناقصة عطلة و بصراحة مش عارف ايه الكيف و المتعة الغريبة من رؤية دم و ناس ميتة و عربيات متكسرة .........فضول غريب و جهل أكبر و أعظم

[Osama_soliman]

فعلاً ده مشكلة انا الناس - وانا حقيقى واحد منهم - تقف تتفرج على الحادثة

ده موضوع محتاج تغيير ثفافتنا فيه فعلاً