خبطت موتوسيكل - متضايق و مكتئب جدا

[Sad voice]

اشتريت العربيه من حوالي اسبوعين بعرف اسوق نص نص كده و مش بروح حتت بعيده و بمشي علي مهلي جداااا يعني اخري ٥٠ مثلا

المهم انا ملاحظ عندي كذا نقطه عاوزه تتظبط و العربيه بتطفي مني كتير جدا و ترجرج و الموتور يكركر و ده بسبب اني مش ظابط السرعه مع الدبرياج ( بيتهايلي يعني )
ةالمهم النهارده الطريق واقف و فيه موتوسيكل واقف قدامي و انا وقفت خالص بس مش عارف ايه اللي حصل لقيت نفسي بدوس بنزين و سيبت دبرياج فجاه !!

روحت زاقق الموتوسيكل اللي قدامي وقعته و اتجطيت في موقف بايخ قوي ، الحمد لله سليمه الراجل سليم و الموتوسيكل سليم بس انا مكتئب و اتعقدت و بفكر اركن العربيه و الله و مسوقش بعد كده !!

[ibrahimsaad]

الحمد لله ربنا ستر

بس ماتحطش فى نفسك كده وخليك سلس لان السواقه مش عايزه انك تكون مهزوز او خايف جمد قلبك وركز وبعدين ياما كلنا اتحطينا فى مواقف زى كده

[ahmedmosad]

ولا يهمك ياما هتقابل مواقف زي كده حتي لو بتعرف تسوق من فترة احنا ماشيين بستر ربنا, ريح شوية وكمل سواقة عادي وحاول تشوف ايه الحاجات الي لسه عايزه تدريب وظبطها في مكان يكون بدون سيارات كتير او فاضي

[kazamodia]

هههههههههههههههههههه عادي يا عم منا كنت جايب عربية زيرو وبعد اسبوع ولسه الفرش بكيسه خبطت في بي ام دغدغت العربية وكنت مكتئب كده برضو لاني كنت لسه جديد بس دلوقتي معادش بيفرق معايا والعربية متخربشة من كل ناحية ومش فارقة معايا
صدقني ده في الاول بس واوعى اوعى تركن العربية وقول مش هسوقها تاني خلي عندك ثقة في نفسك وهتبقى ملك الاسفلت بعد كده

[Elawany13]

طبعا اللى عملته ده غلط وربنا يستر طريقك
والحمد لله انها عدت على خير

اتعلم السواقة الأول فى مكان فاضى
وبعدين امشى فى الزحمة

[Sad voice]

شكرا يا جماعه علي ردكم و دعمكم ، انا والله مخنوق جدا و فقدت الثقه في نفسي

عمال افكر كنت هعمل ايه لو خبطت واحد و اتكسر و لا وقع علي دماغه مات !! او او او

[blazer]

الحقيقه انت غلطان انك بقيت تسوق من قبل ما تبقى متمكن من ضبط بدالات البنزين والفرامل و الدبرياج
انزل فى يوم بدرى و ركز انك تنقل كتير بدون اى غلط و تفرمل من سرعات مختلفه و تزود تانى السرعه من قبل ما العربيه تقف... يعنىتبقى ماشى 60 على النقله الرابعه وتفرمل ل 30 و تزيد سرعتك تنى
و تعمل الموضوع دا كذا مره لحد ما تبقى واثق من انك احترفته
و اقرى دعاء الخروج من المنزل و دعء الركوب و ربنا هيحفظك ان شاء الله 0

[blazer]

دعاء السفر

207- "الله أكبر، الله أكبر، الله أكبر،{سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ} "اللهم إنا نسألُكَ في سفرنا هذا البرَّ والتقوى، ومن العمل ما ترضى، اللهم هون علينا سفرنا هذا واطو عنا بعده، اللهم أنت الصاحب في السفر، والخليفة في الأهل، اللهم إني أعوذ بك من وعْثاءِ السفر، وكآبة المنظر وسوء المنقلب في المال والأهل" وإذا رجع قالهن وزاد فيهن "آيبون، تائبون، عابدون، لربنا حامدون"[1].




دعاء ركوب الدابة

- دعاء ركوب الدابة
206- " بسم الله. الحمد لله. {سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ} الحمد لله ، الحمد لله ، الحمد لله ، الله اكبر ، الله اكبر ، الله اكبر ، سبحانك اللهم إني ظلمت نفسي فاغفر لي ، فإنه لا يغفر الذنوب إلا أنت "[1].


دعء الخروج من المنزل

عَنْ أُمِّ المُؤمِنِينَ أُمِّ سلَمَةَ رضي اللَّهُ عنها أن النبيَّ صَلّى اللهُ عَلَيْهِ وسَلَّم كانَ إذَا خَرجَ مِنْ بيْتِهِ قالَ : « بسم اللَّهِ، توكَّلْتُ عَلَى اللَّهِ، اللَّهُمَّ إِنِّي أعوذُ بِكَ أنْ أَضِلَّ أو أُضَلَّ ، أَوْ أَزِلَّ أوْ أُزلَّ ، أوْ أظلِمَ أوْ أُظلَم ، أوْ أَجْهَلَ أو يُجهَلَ عَلَيَّ » رواه أبو داود والتِّرمذيُّ.

وعنْ أنسٍ رضيَ اللَّهُ عنه قال : قال : رسولُ اللَّهِ صَلّى اللهُ عَلَيْهِ وسَلَّم : « مَنْ قَالَ يعنِي إذا خَرَج مِنْ بيْتِهِ : بِسْم اللَّهِ توكَّلْتُ عَلَى اللَّهِ ، ولا حوْلَ ولا قُوةَ إلاَّ بِاللَّهِ ، يقالُ لهُ هُديتَ وَكُفِيت ووُقِيتَ ، وتنحَّى عنه الشَّيْطَانُ » رواه أبو داودَ والترمذيُّ ، والنِّسائِيُّ وغيرُهمِ
وزاد أبو داود : « فيقول : يعْنِي الشَّيْطَانَ لِشَيْطانٍ آخر : كيْفَ لك بِرجُلٍ قَدْ هُدِيَ وَكُفي وَوُقِى»؟ .

[م. حاتم السباعي]

شكرا يا جماعه علي ردكم و دعمكم ، انا والله مخنوق جدا و فقدت الثقه في نفسي

عمال افكر كنت هعمل ايه لو خبطت واحد و اتكسر و لا وقع علي دماغه مات !! او او او

الاخ الكريم الفاضل Sad voice

اولا الحمد لله انك بخير و ان صاحب الموتسيكل بخير و انها جت سليمة

ثانيا انت استعجلت بركوبك السيارة منفردا قبل ان تتمكن نسبيا من الاساسيات التي تجعلك لا تضر نفسك او تضر الاخرين من حولك وحذاري ان تقصر في هذا الامر لان لو اللي كان واقف امامك وقتها طفل او رجل او سيدة لا قدر الله كان زمانهم تحت العجل

اذا انفض عنك الخنقة و الاكتئاب وفقدان الثقة و هيا الي صديق او جار او حتي مدرسة سواقة لكي تثقل نفسك الكام يوم القادمين ( ازاي ترفع رجلك وتزن الموضوع بتاع اللخبطة ما بين تشغيل اليد اثناء الغيارات و نقل القدمين ما بين البنزين و الفرامل من ناحية و ما بين الدبرياج بالقدم اليسري من ناحية اخري وكيف تجعل قدمك حساس مع الدبرياج في الغيار الاول و الثاني حتي لا تكركر معك السيارة ومن ثم تقف فجأة

و تظبط كمان بالمرة شوية الركن و الرجوع بالظهر

كل ما سبق لن يستغرق منك ان شاء الله الا بعض الحصص البسيطة جدا علي يد متخصص او صديق محترف يضبط لك الاداء

و تحفظ نفسك و تحفظ مالك وتحفظ غيرك و تحفظ مال غيرك من اي مكروه بأذن الله

عاوز بقي اضحكك علشان تعرف اننا كلنا في الهوا سوا كما اخبرك الاخوة الاحباب قبلي

انا طول عمري بسوق مانيوال و بعدين في 2010 ربنا كرمني واشتريت زيرو وكمان اوتوماتيك

طيب يا عم جرب الاول تسوق كده الاتوماتيك ( كان حوار بيني وبين نفسي قبل استلام السيارة بيوم )

فقال لي احد اخوة حين قلت له هذه الجملة

هيا كميا يا عم الحاج توكل علي الله روح استلم عربيتك انت محترف سواقة مانيوال يبقي الاتوماتيك هتبقي بالنسبة لك ملبن و هتسوق و انت مغمض ( وده فعلا نظريا صح ولكن و اااااااه من ولكن دي)

رحت التوكيل و كان معايا صديق بسيارة اخري و كان معايا زوجتي ايضا استلمنا العربية و بعدين قبل ما اركبها كنا في الشيخ زايد و المندوب بتاع المعرض كان هيروح من نفس الطريق وهينزل عند الدائري و عرضنا عليه نركبه معانا عربة صديقي و قبل ان نتحرك قلت له تعالي انت سوق لحد ما نطلع علي الدائري ( مش عارف ليه )
فسبحان اللهان انطقني بهذه الجملةو الطبيعي ان اركبها بقي براحتي و افرح انا وزوجتي بالعربية
ولكن اللي حصل و جلست بجواره و صديقي مشي امامنا بالسيارة الاخري
وصلنا مطلع الدائري المندوب مشكورا نزل و سلمت عليه و قلنا بسم الله توكلنا علي الله

جلست زوجتي بجانبي و منشكحين بقي بالعربية و شاور لي صديقي المتوقف امامي بالسيارة هيا بنا نتوكل علي الله فقلت له يا مسهل ( عادي بقي دا انا محترف سواقة )
انزلت فرامل اليد و كانت العربية علي المور وضع ال N
اول شئ اتحرك وانا بحاول انزال فرامل اليد كانت رجلي الشمال بتبحث عن الدبرياج ههههههههه وطبعا ابتسمت بيني و بين نفسي في غمضة عين و هوبا
رحت مديها غيار الحركة D و قبل ان اضع رجلي علي البنزين وجدت السيارة بتتحرك للامام ( لا اله الا الله ) كان صديقي يقف امامي علي بعد حوالي اقل من 70 سم
فأذا بالسيارة بتاعتي تتقدم نحوه ( لا حول و لا قوة الا بالله ) فدست فرامل بقوة

تمام الحمد لله العربية كلبشت في الارض
زوجتي مخضوضة من هول الصدمة ( خير فيه ايه ) قلت لها العربية بتتحرك من غير ما ادوس بنزين ههههههههههههههههههههههههههه فقالت لي لا اكيد انت دوست بنزين

قلت خلاص يبقي انا دوست بنزين بدون ان ادري

في هذه الاثناء بدأ صديقي يتقدم للامام رويدا رويدا و هو لا يدري ما الذي حدث عندي

المهم رحت مسمي الله مرة اخري و شايل رجلي من علي الفرامل و اذا بالعربية تتحرك ايضا للامام مرة اخري واذا بي ادوس بنزين في هذه اللحظة بدلا من الفرامل فأصبحت قاب قوسين او ادني من ان اكبس علي شنطة عربية صديقي و بالفعل قبل ان ادوس فرامل ريحت علي الاكصدام بتاعه شعره والحمد لله ان ذلك حدث في اثناء حركته هو للامام فأشار لي بيده مستغربا من الشباك فقلت له توكل علي الله وامشي ابوس ايدك من قدامي العربية فيها عفريت اظاهر هههههههههههههههه

انا في اللحظات دي نسيت كل حاجة و التوتر خلاني اعرق و عمري ما انسي اليوم ده ابدا
و بعد ما هوه مشي استعنت بالله وركزت واكتشفت لحظتها انني كنت مفكر نفسي بسوق مانيوال و ان العربية مش هتتحرك الا لما رجلي تتشال من علي الدبرياج و طبعا مكانش في حاجة تحت رجلي وكنت بدوس في الارض من الخضة هههههههههههههههههههههههه

روق يا جميل

[moh_faheem]

ياباشا قدر الله وماشاء فعل
والحمد لله
وبعدين هتتعود على كدة والا يهمك
شوية كدة وهيبقى عادى عندك وكمان هتضحك على المواقف

[Omar Mahmoud]

ايه اللي حصل علشان ده كله؟؟؟ ماشي خبطت موتوسيكل طيب معلش مش انتوا الاتنين كويسين يبقي خلاص حصل خير لو انت لسة مش متمكن اوي و دي عادي مع الكل و مع الوقت هتتعود و الافضل يوم الجمعة الصبح تشوف حتة فاضية و تطلع بالعربية و تقف كذا مرة علشان تتعود مش عيب.المهم و انت سايق متبقاش قلقان خليك هادي خالص و متقلقش.

[kokowasfy]

عادى ياما هتشوف و هتتعود لحد متتمكن

[Sad voice]

الحمد لله النهارده سوقت كتير تقريبا طول اليوم بسوق و مفيش اخطاء الحمد لله

شكرا علي تشجيعكم و فعلا الموضوع محتاج صبر و اراده

[محمود سامح]

ان شاء الله والحمد لله خير

[yyy]

الحمد لله النهارده سوقت كتير تقريبا طول اليوم بسوق و مفيش اخطاء الحمد لله

شكرا علي تشجيعكم و فعلا الموضوع محتاج صبر و اراده

مش مهم المشى بالعربية دلوقت المهم هو انك تتدرب على ضبط البنزين والدبرياج تشوف منطقة فاضية وتتدرب على الطلوع بالعربية اول وتقف وتطلع تانى كام مرة لغاية ما تتعود نفس الكلام مارشدير وبعدين تجرب تطلع اول وبعدين تانى وتفرمل وترجع تطلع تانى خلصت الكلام دة تبدى تمشى بالعربية وتفرمل تهدى بس ما تقفش وتنزل بالنقلات على حسب سرعتك(يعنى تهدى و تدى النقلة الاصغر وتسحب تانى) والاحسن تشوف واحد صاحبك بيسوق يبقى معاك
كدة يبقى انت شلت الكلام دة من دماغك ويبقى تركيزك فى الطريق بس