العربية راشة برا ليه ؟

[speranz]

السلام عليكم ورحمة الله وبكرتاه

سؤال ليه اصحاب العربيات بقو يرشو برا

ومين رش عربيته ورشها ليه

بما ان الرش بيقلل من تمن العربية

ليه بنلاقي عربيات موديلات حديثة راشة برا

ومحدش بيقول الحقيقة وبيقولو راشة نضافة

دا غير الكيلوات العالية

وهل كل الى بيبيع عربية مستعملة

بيبيعها عشان مشاكل وانه بيكون قفل منها

زي ما بيقولو اذا كان فيها الخير ماكنش رماها الطير

وهل الحل اننا نبعد عن المستعمل

زي مابيقولو ابعد عن الشر وغنيله والجديد جديد

وهل الاحسن انك تشتري عربية زيرو على قد فلوسك

وهتتنازل عن امكنيات العربية والفخامة وتجيب عربية مش قد كده

لان انا ملاحظ ان المبيعات بتاعت العربيات الزيرو الى مش قده كده عالى

زي الفيرنا واللانوس وسوق المستعمل نايم

[Omar2017]

بص مبدأيا الرش البرة دة مبينزلش تمن العربية الا و مكسرتش ال5 سنين بعد كدو عادي
انا لسة راشش عربيتي شهر 9 اللي فات لسببين السبب الاول شكلها لا يرضي قريب ولا غريب ثانيا علشان لما اجي ابيعها مخسرش حاجة
و بالنسبة المستعمل لو خدت عربية مش كويسة تبقى غلطتك لأنك مكشفتش عليها كويس ا
و اللي بيبيع المستعمل بيبيع علشان يركب حاجة اعلى انا هبيع عربيتي على شهر 8 و هجيب فيرنا 2009
و طبعا الزيرو لا يعلى علية

[Mostafa.Mahran]

حكة و انت داخل الجراج - حد بمسمار خربشها - طوبة عالية تكسر الاكصدام - تحك فى عربية

اكتر من حاجة تبهدل العربية و مش شرط حادثة

[shiko85]

السلام عليكم ورحمة الله وبركاته
وعليكم السلام ورحمة الله وبركاته
سؤال ليه اصحاب العربيات بقو يرشو براومين رش عربيته ورشها ليه
العربيات بتترش علشان حادثه - خبطه - حكه - تجريح
بما ان الرش بيقلل من تمن العربية ليه بنلاقي عربيات موديلات حديثة راشة برا
لان معظم العربيات الجديده بيكون متأمن عليها و طبعا اى عربيه معرضه لحادث او زى ما قلت تجريح على الأقل خصوصا فالزحام الشديد اللى فالشوراع و التأمين بيتحمل مصاريف التصليح
ومحدش بيقول الحقيقة وبيقولو راشة نضافة
للأسف معظم الناس معندهاش ضمير
دا غير الكيلوات العالية
المسافات بعدت و كل واحد شغال فمكان و ساكن فكمان تانى خالص و زمان كان فيه ناس بتعتمد على المواصلات العامه او الشغل كان بيوفر اتوبيسات للموظفين و ده دلوقتى قل عن زمان و كل واحد بقى بيستخدم عربيته الملاكى
وهل كل الى بيبيع عربية مستعملة, بيبيعها عشان مشاكل وانه بيكون قفل منها زي ما بيقولو اذا كان فيها الخير ماكنش رماها الطير
مش شرط, ده بيحصل طبعا بس فيه ناس بتغير لأسباب تانيه يعنى كمثال اخويا باع العربيه القديمه بتاعته و كانت ممتازه جدا فابريكا بالكامل كم قليل مشكلتها انها كانت مانيوال وهو كان عنده مشكله قديمه فرجله من بعد ما عمل حادث زمان و سواقه المانيوال بقت بتتعبه جدا و وصل لمرحله انه مش قادر يسوق عربيه مانيوال تانى فقرر البيع و اشترى عربيه اوتوماتيك
وهل الحل اننا نبعد عن المستعمل زي مابيقولو ابعد عن الشر وغنيله والجديد جديد
لو مستعمل و تكشف عليه كويس يبقى خلاص مش مشكله لكن لو تقدر تشترى جديد يبقى افضل طبعا
وهل الاحسن انك تشتري عربية زيرو على قد فلوسك وهتتنازل عن امكنيات العربية والفخامة وتجيب عربية مش قد كده لان انا ملاحظ ان المبيعات بتاعت العربيات الزيرو الى مش قده كده عالى زي الفيرنا واللانوس وسوق المستعمل نايم
المشكله ان قرار الشراء مش سهل و فيه حاجات كتير بتحدد نوع العربيه
يعنى اللى مخلى الفيرنا و اللانوس تتباع رغم انهم بدون اى عوامل امان ان قطع الغيار رخيصه و مصاريف التشغيل معقوله و سعر اعاده البيع

[speranz]

ملحوظة انا بتكلم عن العربيات الموديلات الحديثة
2010 وانت طالع
مش معقول عشان حكة ولا خربوش هترش العربية
وانا راكن تحت عمارتى اكتر من 6 عربيات
والناس عربياتها زي ما هى بدهان المصنع فيها خربيش ومبيفكروش يرشو ولا يبيعو
انا بلاحظ الرش فى الى بيبيع اكتر
لو زي ما بتقول عشان شكلها يبقي حلو وتتباع
طيب ليه ميفرجهاش للمشتري وينزلو تمن الرش

[monamize4]

مين قال ان اللى عايز يبيع عربيته بيرشها الاول ؟!!!!!!!!!!!!!! بالعكس ,,
معظم اللى عايز يبيع (حتى لو كان ناوى يبيع بعد كذا سنة) مابيرضاش يرش اى جزء
و احيانا حتى مابيرضاش يرش الاكصدام و يسيب العربية شكلها زفت ف مقابل
ان لما يجى يبيع يقول دى فابريكة و تمنها بيكون اعلى من اللى راشة
و الكلام دا منتشر اكتر ف الموديلات الحديثة

لكن لما تلاقى عربية موديل 2010 فما فوق و راشة كلها او ماعدا السقف
و صاحبها يقول اصلها راشة نضافة ,, طبعا ماتصدقش لان من مصلحته ان العربيه ماتترشش
مايمنعش ان فى حالات فردية لناس مابتطيقش عربياتها لو فيها خدش واحد ,, تلاقيه بيرش كل سنة او سنتين مثلا

لكن الفكرة ان ف شرا العربيات المستعملة لازم تفرض دايما سوء النيه لحد مايثبت عكس ذلك
و ان كل كلام البايع ترميه ف الزبالة و الفيصل هو الكشف على العربية و التاكد من سلامة ورقها
و طبعا السبب ف كدا هو انتشار حالات النصب بشكل غير طبيعى و للاسف من كتير من حالات النصب
كان سببها الثقة اللى مش ف محلها ,, وطبعا العربية المستعملة المضروبة بتكره صاحبها ف العربيات

[S O P H O S]

عادي احيانا عوامل الوقت والشمس وبعض التجاريح
بتخلي الواحد يرش العربية
وطالما مفيش حوادث يبقي عادي