قول رأيك فى مشروع الميكروباص

[Delta Force]

شباب مصر بعد قلة توفير العمل اتجهت الى العمل فى مجال السواقة منهم الممول و منهم السائق و لهذا المجال عدة سيارات ( سوزوكى فان - تويوتا هايس - هيونداى h1 - باو - جولدن دراجون - سيارات أخرى صينى )
المشروع بلا شك مربح و لكن هل التعامل مع رجال المرور متوتر - و هل المشاكل بالمواقف متوتره
و هل يمكننى أئتمان السائق عليها لانه و بلا شك لم اكون انا قائد هذا الميكروباص
و ما الفرق بين سيارة الرحلات و السيارة الأجره ؟

[amr011111]

طبعاً مشروع مربح جداً بس لو اشتغلت عليه بنفسك
خلاف ذلك
المشروع معرض للخساره بنسبه كبيره لو السائق مش أمين
وفيه موضوع هنا كان عن مشروع التاكسى واحد الاعضاء كان بيتكلم على الاعيب السائقين لدرجه ان واحد منهم غير العفشه كلها عند ميكانيكى وهى لسه زيرو وحط عفشه مستعمله
وواحد كان بيطلع بالتاكسى يقول عطل من بعد ما طلعت الورديه بساعه بحيث ميدفعش التلتين بتوع الورديه لصاحب التاكسى ومن غباؤه انه كان بياخد التاكسى متفول ويرجعه فاضى

[kantofanto]

محدش بيخاف على ماللك الا نفسك او حد منك .نصيحة متخليش حد ياخد تعبك و يسواقللك الميكروباص بتاعك و الخير هايجلييك ان شاء.

[speranz]

مشروع كويس
لكن لازم تكون ضامن السائق
يعني على الاقل يكون ليك معرفة قديمة بيه
لان السواقين بيبهدلو العربيات ومعظمهم معندهمش امانة
والافضل يكون خط السير طويل رحلات مثلا او اجرة لمدن جديدة

[eng.m7md.ali]

احسبها صح

لو رحلات اسكندرية من القاهرة وحضرتك اللي هتسوق احسن الرحلة هتعمل كام وكام رحلة في اليوم ونقص منهم الجاز والصيانات واتيال الفرامل والكاوتش وشوف الاجمالي في الشهر كام هتلاقيه مغري جداً

الفرد ب 40 جنيه دلوقتي ويمكن اكتر

40×17= 680 في الرحلة الواحدة .. لو هتعمل رحلة رايح جاي تبقى 1360 .. ده صافي ايراد اليوم من رحلة رايح جاي

[kokowasfy]

الحقيقة مشروع مربح لو انتا الى هتسوقو لو غير كدا الخير كلو هيروح للسواق و كمان هلك و دمار فى العربية و السواق ميهموش العربية هيشغلها زى الحمارة اهم حاجة الفلوس بس غير طبعا لما انتا تسوقها

[mr.moustafa]

احذر السواقين تماما حتى لو كان معرفة .. خد النصيحة ديه علشان ماتندمش

[abdulkhaleq]

في مشاريع كده
مش بتاعتنا
وده واحد منهم
ده اللي بيتاجر لو فاتح جديد ووسط سوق هيتاكل أكل

انسوا ياجماعه فكرة اني اجيب حاجه واقعد مربع وتجيني فلوس دي خاااااالص الا لو عندك عقار بتأجره
في بلد كل حاجه فيها ماشيه فهلوه

[egyption2012]

فيه سواقين بتراعي اكل عيشها وعددهم قليل للاسف
وفيه سواقين ربنا يهديهم ويصلح حالهم وفيهم اللي ممكن يقلبلك العربية او يستغلها في الحرام

الأمر الأخر موضوع شراء عربية وانك تنزلها على خط
ممكن يكون فيه ما يشبه الاتاوات ولازم واحد منهم يكون معاك في اول ايام نزول العربية على الخط
السواقين ممكن يزاولوك واللي حيكسر عليك واللي حيدخل يحمل قبلك بالعافية

لو حتنزل عربية طرفين لازم يكون ليك طرف فيهم ان شاء الله
عشان تستلم العربية من السواق التاني
حاول تقدر السواق اكثر من تقديرك لعربيتك
راعيه في الاعياد والمناسبات وفي ظروفه الخاصة عشان يخاف على عربيتك وعلى اكل عيشه معاك
فوتله الحاجات الطارئة زي تغيبه عن العمل في يوم لكن لو الموضوع تحول لاسلوب شغل خليك حازم معاه

[Shocky]

احسبها صح

لو رحلات اسكندرية من القاهرة وحضرتك اللي هتسوق احسن الرحلة هتعمل كام وكام رحلة في اليوم ونقص منهم الجاز والصيانات واتيال الفرامل والكاوتش وشوف الاجمالي في الشهر كام هتلاقيه مغري جداً

الفرد ب 40 جنيه دلوقتي ويمكن اكتر

40×17= 680 في الرحلة الواحدة .. لو هتعمل رحلة رايح جاي تبقى 1360 .. ده صافي ايراد اليوم من رحلة رايح جاي

رحلات القاهرة - اسكندرية .. بيبقى ميكروباص تويوتا 15 راكب غير السواق .. والفرد كان بـ 30 جنية من شهر .. الله اعلم وصل كام دلوقتى

الرحلة كانت ب 450 جنية 15*30 = 450 (15 راكب * 30 جنية)

وفى أوقات معينة بتبقى بـ 40 فعلاً .. مرة كانت بـ 60 جنية وقت الحظر السنة اللى فاتت
وفى الأعياد بتغلى وممكن تكون غليت فعلاً بسبب الصيف
وشكراً

[Delta Force]

يا شباب المشكله ان لكل واحد مهنته و دى مش مهنتى يعنى بمعنى اصح انا معايا مثلا رقم معين من الفلوس و عايز احسن الدخل الشهرى بتاعى عن طريق مشروع جمبه ففكرت الفكرة دى زى ما فيه ناس برضه شغاله عادى جدا و بتفتح محل او كافيتريا او مطعم و هكذا عشان تحسن الدخل الشهرى بتاعى و مش بتشتغل فيه
بس بجد اكتر حاجة رعبتنى الى غير حاجات فى العربيه دة يعنى ممكن واحد يغيرلى الماتور و العفشة و انا مش فاهم مين مع مين

[egyption2012]

ياريت الارقام اللي في الموضوع متخليش عينك تلمع وتتسرع في شراء العربية
هناك خفايا لا يعرفها الا اللي ايديهم في الموضوع
لو الموضوع وردي اوي كده كنت حتلاقي عشرات الآلاف من السيارات في كل مواقف مصر
فيه مثل بيقولوه "الحديدة لاما تجيبلك حديدة او تخليك على الحديدة لا قدر الله" الحديدة يعني العربية
لو معندكش حاجة تخلي السواق يخاف منك زي عيلة قوية او بلطجي في وزارة الداخلية
يبقي خد بالك اوي من السواقين

[Delta Force]

عشان كده عايز اراء اصحاب التجارب سواء ان كانت ناجحه او فاشله

[kantofanto]

ياريت الارقام اللي في الموضوع متخليش عينك تلمع وتتسرع في شراء العربية
هناك خفايا لا يعرفها الا اللي ايديهم في الموضوع
لو الموضوع وردي اوي كده كنت حتلاقي عشرات الآلاف من السيارات في كل مواقف مصر
فيه مثل بيقولوه "الحديدة لاما تجيبلك حديدة او تخليك على الحديدة لا قدر الله" الحديدة يعني العربية
لو معندكش حاجة تخلي السواق يخاف منك زي عيلة قوية او بلطجي في وزارة الداخلية
يبقي خد بالك اوي من السواقين

الراجل ده بيكلم صح الصح :018a1d~146: :018a1d~146: :018a1d~146:

[ashrafwolf]

هنفترض انك هتشغل عليه سواق

1-اكل السواق و سجايره بياخدها من الاجره
2-الفضيه بياخدها
3-الزيت و الجاز و الكارتات و الصيانات عليك
الكلام ده لو السواق امين و بتاع شغل و في الغالب المشروع هيجبلك من 200 ل 400 جنيه في الشهر و ممكن تلاقي نفسك بتدفع من جيبك شهر او اتنيت لو فيه عطل

طب هنفترض انك انت الي هتسوقه (بعد الظهر مثلا)

1-قلة ادب الشرطه و البلطجيه و السواقين التانيين
2-الزباين هتحرق دمك اللي هو اصلا محروق من السواقه في الزحمه
3-المشاكل الصحيه اللي ممكن تجيلك نتيجة السواقه لساعات طويله
بعد الكلام ده هتلاقي المشروع جايبلك 1000 ل1500 جنيه صافي ربح و دول طبعا تروح تدفعهم قسط للميكروباص