انا اتعقدت من المنتدى ده

[masrawy99]

بصراحة انا لسه مبتدئ فى السواقة خرجت بالعربية لوحدى ثلاث مرات فقط ومن كتر قرائتى لمواضيع المنتدى الخاصة بالحوادث وخصوصا من حترفين مثل حضراتكم اصابنى هذا الامر بالخوف الشديد والرعب من القيادة وحاسس انى لازم هخرج اعمل حادثة مش عارف اعمل اه حتى وانا بسوق بقبى متوتر جدا واخويا قالى وشك اصفر كده ليه
اه الحل يا جماعة مدخلش المنتدى العام ده ولا اه؟

[Ahmed Selim]

يا باشا ربك بيستر.......
توكل على الله وسوق بقلب جامد بس أبقى خللى بالك من اللى ماشيين حواليك

ربنا يستر طريقنا جميعاً

[MoToRiZeR]

بصراحة في مصر مفيش حاجة إسمها إحتراف في السواقة لأن مفيش قواعد أصلاَ فا اللي تبقي عنده يبقي محترف .. و الدليل إن سواقين الميكروباصات لا يفقهون البطيخ عن أبسط قواعد السواقة و كل يوم عالطريق .. إضافة لقطاع لا باس به من سائقين الملاكي .

نيجي للجزء اللي يخصنا .. هل هنوقف حياتنا يعني ؟ أكيد لأ .. الواحد مش جايب العربية عشان يركنها ولا عشان يخاف يسوقها و كل ما يركبها يبقي خايف يعمل حادثة .. لذلك سوق و متحطش في دماغك و ربنا بيستر .. و حاول تتجنب قراءة موضوعات الحوادث و أخبار الحوادث .. بس في الأخر ممكن تشوفها في الشارع .. أهم حاجة تبقي ملتزم في سواقتك و ده هيخليك بعيد عن الحوادث بإذن الله .. الحادثة في الغالب بتحصل بين إتنين مش مقدرين الطريق كويس .

[itsonlyme]

يا سيدي. لأ خُش المنتدى العام عادي جداً و ولا يهمك. المواضيع الي تخوف بجد هي الأعضاء الي خبطو ناس ماشيه على رجليها. طبعاً ربنا يسترها معانا كلنا بس الكلام ده بيحصل للي بيسوق من سنين, أما انت فمش هتجري بالعربيه وزحمة الشوارع مش هتخليك تجري اساساً.

[itsonlyme]

بصراحة في مصر مفيش حاجة إسمها إحتراف في السواقة لأن مفيش قواعد أصلاَ فا اللي تبقي عنده يبقي محترف .. و الدليل إن سواقين الميكروباصات لا يفقهون البطيخ عن أبسط قواعد السواقة و كل يوم عالطريق .. إضافة لقطاع لا باس به من سائقين الملاكي .

أنا مش عارف ليه الكل بيقول أنه سواقين الميكروباصات والتكاسي مش عارفين حاجه عن قواعد السواقه. في فرق بين الهبل والإستهبال. السواقين عارفين القواعد وكل حاجه, بس بيستهبلوا. بياخدوها بالعافيه وبيعتمدوا على أن اللي قدامهم هيخاف ويهدي هو.

أما بقى سواقين الملاكي, فالبعض منهم أهبل ولا يقصد الإستهبال. دول في رأيي أسوء.
يعني لما تلاقي ست بتعدي التقاطع من غير ما تبص دي غشامه مش فهلوه ولا حاجه. "الهبل" ده بتغيظ لأنه كل الي محتاجه شويه مفهوميه.

طبعاً أنا لا أقصد التعميم على الستات. كتير من الستات ملتزمات وبيسوقوا أحسن من الرجاله الي بتستهبل. بس برضو كتير منهم بيعملوا حاجات تغيظ عن غير قصد منهم.
أما بقى الرجاله, فبيبقوا قاصدين.

المفروض حد يكتب دراسه تحليليه يسميها:
"القياده في مصر, بين الهبل والإستهبال"

[magomago]

ممكن تدخل المنتدى الاجتماعى لحد ما تتعلم السواقة :K13:

وعلى فكرة الواحد كل يوم بيتعلم :k39:

يبقى الموضوع هايطول ...فاجمد قلبك شوية :k28:

[shanodaa]

جمد قلبك واتكل علي الله

[hanystar]

يا باشا سوق ومتحطش فى دماغك الحاجات دى
وأنت بتقول إنك لسه مبتدىء فى السواقة
الموضوع عايز ممارسة فى السواقة أكتر
وأنسى موضوع الخوف دة
وبعدين بالنسبة للمنتدى
فدة بيفيدك وبيديك خبرات أكثر
فى مختلف المواقف اللى ممكن تحصل للواحد

[omardeneo]

بص يا باشا انا اصلا كنت بخاف اركب فى كرسى السواق فى اى عربيه واقفه فى معرض و لا جراج و بعدين بصراحه كنت باتبهدل فى التاكسيات خصوصا وكان وقتها عندى 3 عيال المهم رحت مدرسه اخدت كام حصه بس كنت باموت من الرعب و فضلت أأجل الشراء لولا ابنى الصغير جاتله ازمه فى يوم الساعه 3 صباحا و كان لازم يروح المستشفى و ما كنتش لاقى تاكسى والله كنت هاموت و الحمد لله الموضوع عدى بسلام نزلت تانى يوم اشتريت العربيه اللى كنت مختارها و كان معايا واحد صاحبى ساقهالى لحد البيت و نزلنا رخصنا تانى يوم و ابتديت اخرج بيها كل يوم ساعه و صاحبى جنبى الف فى النزهه علشان فاضيه بس اللى كنت ملاحظه انى كنت متوتر جدا و خايف و لو شفت واحد ماشى على رجليه على بعد كيلو بافرمل و كنت بامسك الدريكسيون بايدى و رجلى بس واحده واحده و على مدار اسبوع ابتديت امشى فى الزحمه بس بحرص شديد اهم حاجه ما ترميش ودنك لاى حد فى الشارع حواليك و ركز و حاول تقتنع ان المكتوب هيحصل حتى لو بقالك 100 سنه بتسوق

المهم اسف على الاطاله و انى حكيت قصة حياتى بس بجد انا مش مصدق انى انا اللى باسوق دلوقتى بعد 3 سنين الا شويه بس الشارع بيعلم والحمد لله فى المدة دى ما عملتش اى حوادث بس واحد خبطنى مره وكان غلطان

و اخر حاجه لو اخوك من النوع العصبى روح اى مدرسة سواقه و خد المدرب خاص على عربيتك 3 ايام هتلاقى الدنيا متغيره

و اسف تانى على الاطاله و ادعو الله لك بالسلامه و الهدوء

[masrawy99]

جزاكم الله كل خير على ردودكم الجميلة اللى شجعتنى شوية
باسال الله ان يستر طرقنا

[ZOZ]

انا رايي خليها على الله لو حد فكر كل شوية زيك كده مش هيبقى فيه عربيات في البلد

[sameh_egy1]

توكل علي الله
و ربنا يسترها معاك و معانا
و ما تشغلش دماغك ، انا كنت زيك كده بفضل ماشي في اليمين و كل شوية اف اخد نفسي بس شويه و بفرض الظروف الزحمه بقيت ماشي بطئ غصب عني !!

[mesaharaty]

من فترة بسيطة كده شعرت بنفس الشعور اللى عند الأستاذ / مصراوى وكان شعور محبط جدا وكتبت بعنوان محبط جدا .
وأنا الآن باتعلم السواقة ولسه حاسس بنفس الكلام اللى بيقول عليه مصراوى

وما دام الكل بيشتكى من مشاكل العربيات يبقى دى حاجة عامة وشاملة ولابد إن أى حد بيسوق يمر بكل الكلام ده ويعانيه .
ورغم كده العربيات موجودة والمرور موجود والحوادث موجودة .
يبقى لو عايز تتعلم العوم إنزل البحر وإتعلم .

صح يا جماعة ؟؟

[Samir Elshahawy]

انا مع الاخ MoToRiZeR في كل ماقاله لك , لانك لو خايف تغرق مش هاتتعلم السباحة لكن أحب ان اذكرك بأن من خاف سلم و ده طبيعي.

توكل علي الله و سوق و لاتخف ممن حولك و مع الوقت و الممارسة ستكتسب خبرة التعامل مع الشارع المصري

[Osama_soliman]

كلامك فعلاً حقيقى

انا بأسواق بقى 6 سنوات ، ولما اقرأ المشاركات اللى فيها كلام عن الحوادث احس ان الدينا كلها حوادث بس

- اظن ان معظم الحوداث بتكون فى طرق سريعة "راجع مشاركة 3 حوادث فى يوم واحد - سلم الله صاحبها، كان فى طريق الاسكندرية ، ومشاركة عملت حادثة على الدائرى - سلم الله صاحبها، طبعاً واضح من العنوان كانت الحادثة فين"

- نسبة مشاركات الحوداث الى مشاركات المنتدى نسبة ضئيلة ، بس علشان الموضوع مؤلم تحس انها كتيرة.

- استعن بالله وانت خارج الصبح وقول اذكار الصباح "مثلاً : بسم الله الذى لا يضر مع اسمه شئٌ فى الارض ولا فى السماء وهو السميع العليم" إن شاء الله تعالى ربنا هيحفظك.


اسأل الله السلامة لنا ولجميع اعضاء المنتدى الاحباب.

اسامه سليمان