خمس رادارات على طريق مصر إسكندرية الصحراوي

[أبو عاصم]

يوم الأحد 5/1/2015 كنت راجع من إسكندرية إلى القاهرة، ووجدت أثناء السير خمس لجان مرور، للكشف عن الرخص ، وجباية مخالفات السرعة، فاحذروا -رحمكم الله- من السرعة فوق 100 كيلو، لأن الظاهر إن الجماعة محتاجين شوية فلوس عايزين يلموهم، لأني متأكد من إن المسألة مش عشان الانضباط وحياة المواطنين ، والكلام ده، لأن حلول مشاكل المرور مش بالرادار، حلول مشاكل المرور تبدأ من التوعية (طريقة السواقة - أخلاق السائق - التعاون مع الآخرين) وبعدين نظبط الطرق، يعني مبقاش ماشي وفجأة ألاقي مطب دون سابق إنذار، ثم العدل ، ميبقاش عربيات الباشوات مخالفة بالثلث ، وبعدين عدي يا باشا ، وعامة الناس هتدفع وتفتح مخك ولا هنسحب الرخص، وبعد كده هتشوف أيام تكره فيها العربية واللي بيركبها واللي صنعها، وهتكره نفسك لما تتعامل مع بتوع المرور، وساعتها بس تتمنى إننا نرجع تاني لعصر الحمير، ومش مشكلة لما نسافر في يوم في شهر في سنة، أهم حاجة منشوفش وش حد من هيئة المرور الموقرة.

[m_marmoush]

جايز عشان حادثة الأسبوع اللي فات اللي كان فيها 50 عربية، خافو شوية مجانين يكسروا الرقم دة عشان يخشو موسوعة الأرقام القياسية

[أبو عاصم]

كلامك معقول، بس مش ده الحل، لازم المنظومة كلها تتظبط، مينفعش نمشي على سطر ونسيب سطر، المسألة مسألة أرواح ، وناس بيتخرب بيتها ، وناس بتقضي بقية عمرها بعاهات مستديمة ، واحد عنده ورم في المخ ، وصباعة واجعه ، إحنا طول عمرنا عمالين نعالج في الصباع ، وسايبين الورم ، وكل يوم مصايب، يعني لو عندنا حنفية بتنقط مية، هل أجيب مساحة وأمسح المية، ولا أصلح الحنفية، البيضة ولا الفرخة، مشكلة الإدارات المصرية العبقرية.

[Mecha]

حلو خلي الناس تتلم وتسوق صح

[breakthrough]

بالزبط انا لسة متصور رادار ف حتة غريبة عمرها ما كان فيها رادار المريوطية بين شبرامنت و كتراكت و مفيش تصالح فوري وحاجة تقرف ، و لما بقول للباشا مفيش اي علامة على امتداد 35 كيلو و اكتر تقولي السرعة القانونية كام يقولي خاطبنا الطرق و الكباري و ملناش دعوة.

[heart_sugar]

أنا معرفش ايه علاقه الفلوس في الموضوع ياريت تبقا اللجان في كل مكان ورادرات في كل شبر في مصر الموضوع متعلق حضرتك بالثقافة والتعليم واحترام الغير لما تلاقي حوادث وناس بتموت من السرعه او ناس بتمشي عكسي عشان مش عايزه تمشي شويه وتستقرب وتتسبب في قتل ناس وناس بتسوق من غير رخص او بلوحات مطموسه وعيال تحت السن ماشيه بعربيات فلازم يتقطع رقبتها
والي مش بيعمل غلط زعلان ليه اكيد الي ماشي صح محدش حيكلمه ولا يخاف ولا أيه

[Mecha]

بالزبط انا لسة متصور رادار ف حتة غريبة عمرها ما كان فيها رادار المريوطية بين شبرامنت و كتراكت و مفيش تصالح فوري وحاجة تقرف ، و لما بقول للباشا مفيش اي علامة على امتداد 35 كيلو و اكتر تقولي السرعة القانونية كام يقولي خاطبنا الطرق و الكباري و ملناش دعوة.

هو مش 50كم/س .حد الكتلة السكنية ,كمان اخر منطقة عمرانيه تمشي بحد السرعة بتاعها ما لم ينص علي غير

[أبو عاصم]

محدش يكره الانضباط إلا الإنسان الهمجي، إحنا مشكلتنا دايما بنصحى بعد الكارثة ثم نرجع ننام تاني، حط رادار ، بس صلح الطرق، وعاقب اللي مسئول عن الطريق اللي متساب مضلم، ومليان مطبات، وبعد كده حاسب الجميع بميزان واحد، اقضي على الرشوة ، اقضي على الغش في قطع غيار السيارت التي تسبب كوارث ، شوف السواقين اللي ماشيين مبرشمين ومحششين، وبعد كده تلاقيه لبس في كام عربية، وخصوصا إذا كان راكب عربية نقل.
اللي عايز أقوله: مش عايزين نمشي على سطر ونسيب عشرة أسطر، وخد بالك أخي الفاضل، كل الكلام ده مش محتاج وقت ولا مجهود كبير، مع احترامي لتعليكم الكريم.