هل أنت مـِن مـَن يتعلق بالسيارة؟

[Adham]

انت جيت عالجرح

انا بعت عربيتي الهوندا النهاردة الصبح و من بعد الفطار و انا حاسس ان العربية دي مفتقدها قوي ووحشاني و عاوز اتطمن عليها :(

حتى ابتديت افتكر عربيتي اللي كانت قبل منها (هوندا سيفيك) كنت بعتها من 8 او 9 سنين و برضة نفسي اشوفها و باسأل نفسي ياترى حالتها اية؟ و هل صاحبها محافظ عليها و للا اتبهدلت :x

انا من النوع اللي يحب عربيتة جدا و يهتم بيها و لما تبعد عني اقلق عليها زي ولادي بالضبط

[Adham]

لسة كنت باحكي لبنتي بعد الفطار (ست سنين و نص) ان العربية القديمة دي معايا من قبل ما هي تتولد و اننا سافرنا بيها حتت كتير و شافت معانا ايام كتير

و بافتكر لما كنت رايح المستشفي في العربية لما كانت بتتولد وراجع بيها تاني يوم في العربية و هي لسة بنت امبارح

العربية بتبقى زي فرد من الاسرة و بتشوف ايام ومواقف و بتعاصر تاريخ

و انا عامه من النوع اللي تديلة عربية بحالة و بعد سنين تلاقيها بحالة احسن بكتير
موتور احسن استيراد او عالاقل متحافظ عليها و عفشة و جنوط و كماليات و اصلاحات و تجديدات كتيرة فيها من برة و جوة

ودة غالبا يرجع لأنها كانت عربيات شاريها مستعملة مش زيرو

فيا باعالج العيوب و الاعطال اللي فيها و بتبقى دايما للأحسن

[sherif_84]

أنا متعلق بعربيتى جدا ماحبش حد يتريق عليها ولا حد يقعد عليها ولا حد يسوقها الا أنا والوالد فقط
لأنها باختصار غالية عندى قوى لأنها شــوشــو

[Ahmed Anwer]

مبتعلقش بالعربية ، و أعتقد معظم الشباب كده ،
المهم تأدي الغرض المطلوب منها وخلاص
و الشكل و الصالون مهمين جدا بالنسبة ليا ،
و الصالون و التابلوه أهم ،،
في حد ميحبش يقعد في مكان شيك ؟؟؟
لكن الشكل الخارجي ما العربية اللي عجباني اتفرج عليها زي ما أنا عايز في الشارع أو المعارض مش لازم اقتنيها

[Mostafa]

طبعا بتعلق بالعربيه . طب دا عربيتى اللى غيرتها بقالى 3 شهور لحد دلوقتى لسه زعلان عليها

[PAYOO]

طبعا بتعلق بالعربيه . طب دا عربيتى اللى غيرتها بقالى 3 شهور لحد دلوقتى لسه زعلان عليها

سؤال من فضلك يا أستاذ مصطفى لو سمحت لي؟

كلنا عارفين مدى تعلقك بسيارتك البيجو 405 موديل 2002 وهذا واضح جدا من توقيعك

لكن سؤالي ليه حضرتك تبيع عربيه موديل 2002 وتشتري نفس العربيه موديل 1999 ؟؟؟؟؟

أعذرني على السؤال السخيف ده

[CryptonX]

اعتقد ان الواحد فى الاغلب بيبقى فيه ارتباط روحى بينه وبين اول عربية يجيبها مهما كانت امكانياتها ضئيلة او مفيهاش رفاهية
لكن لما ربنا يكرم الواحد ويقدر يجيب حاجة احسن مش حيتردد اكيد
بس برضه يحس ان فيه رابطة بينه وبين القديم
بس دى وجهة نظر شخصية[/b]

+1000

انا بحب سيارتي الحالية جدا , بس اعتقد ان اكتر من 70% من هذا الحب بسبب انها سيارتي الأولي و لو جاتلي فرصة اني اجيب حاجة احسن ( فرصة كبيرة يعني مش اي كلام ) اكيد حجيب :)

[hatem_badawe]

طبعا لازم تتعلق بعربيتك لانك لو متعلقتش بيها يبقي مالكش غالي حتي لو عربية مهكعة دي عشرة يا ما شالت الواحد وياما اسعفتة حتي بنت اللي عندها سنتين لما بعت العربية (مع انها طلعت عيني) كانت كل شوية تقولي هي العربية فين (عربية بابا فيين) يعني دي بالفطرة صح ولا للأ

[Adham]

طبعا لازم تتعلق بعربيتك لانك لو متعلقتش بيها يبقي مالكش غالي حتي لو عربية مهكعة دي عشرة يا ما شالت الواحد وياما اسعفتة حتي بنت اللي عندها سنتين لما بعت العربية (مع انها طلعت عيني) كانت كل شوية تقولي هي العربية فين (عربية بابا فيين) يعني دي بالفطرة صح ولا للأ

+1

[Abonora]

طبعا طبعا يا سلام اول عربية حبيتها كانت عربية والدتي البرايد ( العصفورة ) مع اني كنت مستهيفها الاول بس لما سوقتها حبيتها علي الدوجان اللي كانت معانا قبل كده ( يمكن لان الدوجان عملت بيها حادثة جامدة فكرهتها )

ولما اتجوزت وجبت شهاب 3 اصبحت بالنسبالي سلاح استراتيجي من اهم ما يمكن عشان بضمنلي اني في اي وقت اصوبها في اتجاة المقاطيع اصحابي كرد فعل لاي هجوم بالسلحة النكد الشامل في البيت ده غير انها سبب لان الواحد يقدر يصل رحمة بسهولة اكتر ولو عديت فوائدها مش هنخلص بس الاصل في حبي ليها هو حب البرايد العصفورة من صغرى وامنيتي اني يبقي عندي واحدة زيها لما اكبر والحمد لله اتحقق الحلم فلازم احبها طبعا

[nahla]

اتعلق بالسيارة كل ما تكون اصيلة و اعطالها قليلة لكن لو بدأـ تخرف و تعمل مجنونة بالرغم من العناية المركزة يبقى على بيت ابوها عدل
يعني اول ما بابا جابلي الانوس مفاجئة قلت في بالي :ايه العربية العكرة دي؟ اصوم اصوم و افطر على لانوس؟ و لكن لما سقتها و عملت بيها اكتر من 20الف كيلو عرفت ازاي هية عربية مريحة و اصيلة بس بصراحة اخويا متابعها مع عربيته في كل حاجة
و حاليا طول ما هية على قد جيبي و عاملة بأصلها بكون متعلقة بيها جدا لكن لو لعبت الدنيئة يبقى بالشلوت على طول بدون تفكير

[Ahmad Allawy]

موضوع جامد والله..
انا عدي عليا في عمرة 3 عربيات..
الاولي سيات 133 قعدت معانا 12 سنة.. كنت باتعامل معاها علي انها اختي..
(مش هاقول بنتي عشان كنت لسة صغير..)
اتعلمت عليها السواقة. و كنت باصلحها و اغسلها بنفسي و مدلعها..
فاكر ايام ما كان والدي بيودينا بيها المدرسة وانا في 2 و 3 ابتدائي..
يعني حاجة من 20 سنة تقريبا.. او اقل شوية..

كانت معانا من 1990 لحد 2002
معظم الفترة دي كان والدي مسافر و كانت مركونة

بعدها فيات 125..
كانت بتاعت 2 اصحابي اخوات..
اكنت معاهم من الزيرو
ربنا فرجها عليهم و كانوا جابوا اوبل استرا و سكودا فابيا زيرو..
مكانوش زعلانين عشان كانت العربية هتتباع بس مش لحد غريب..
وكانت قدجامهم علي طول.. كنا بنركن اصلا في نفس الجراج..

طلعت رخصتي و عيشت معاها 6 سنين.. انا بس اللي باسوقها..
عملت بيها حواد.. خبطات يعني.. مش كوارث..
قصيت بيها احلي ايام الكلية..
احلي سفريات مع العيلة و مع جدتي رحمة الله عليها..
احي خروجات مع الاصدقاء..
اكتر حاجة كرهتها فيها كانت البطارية.. و الشكمان..
البطاريات مغير ييجي 5 في ال5 سنين.. وده كتير جدا..
و الشكمان.. كان بيتكسر كتير جدا و كان مقرفني..
بس الحق يقال عمرها ما عملت معايا موقف نص كم غير حاجات بسيطة يعني..
فردة ضربت وانا مسافر وكان معايا اهلي.. و في نفس السفرية وانا راجع الشكمان اتكسر..

لما بيعتها كنت زعلان جدا.. و اهلي في البيت كمان كانوا زعلانين.. بس سنة الحياة..

دلوةقتي معايا كورسا هاتش باك..
بدأت اتعود عليها و احسها زي بنتي فعلا..
بس بحكم الظروف الشغل و الوقت..مش معتني بيها قوي.. بس مش كتير المشي بيها..
ولو قعدت معايا شوية.. هاطلعها ع الاخر..
هي الحمد لله اساسيات زي الفل..
بس عايزة شوية دلع..
كاسيت.. مرايات الكهربا تتغير.. فرش و دواسات كده يعني..

يا رب يبقي ليا معاها ذكريات كويسة زي اللي كانت مع اللي قبلها..

[homme49]

اعتقد ان الواحد فى الاغلب بيبقى فيه ارتباط روحى بينه وبين اول عربية يجيبها مهما كانت امكانياتها ضئيلة او مفيهاش رفاهية
لكن لما ربنا يكرم الواحد ويقدر يجيب حاجة احسن مش حيتردد اكيد
بس برضه يحس ان فيه رابطة بينه وبين القديم
بس دى وجهة نظر شخصية[/b]

المثل بيقول : القديمة تحلى و لو كانت وحلة

[homme49]

أنا متعلق بعربيتى جدا ماحبش حد يتريق عليها ولا حد يقعد عليها ولا حد يسوقها الا أنا والوالد فقط
لأنها باختصار غالية عندى قوى لأنها شــوشــو

سبحان الله
أنا كنت فاكر إن ده طبع موجود فى أنا بس
أنا أتجنن لو شفت حد قاعد على العربية
و أتنرفز جدا لو شفت واحد خارج من المسجد و يربط حزائه فوق جسم السيارة
حتى لو كانت مش عربيتى
و ألومه و أعنفه

[kimo-nubira]

انا كتعلق بعربيتي جدا وبحبها جدا لانها اصيله وما قلتش باصلها معايا .....

بس بفكر ابيعها علشان عايز اجيب اوبل فيكترا بس صعبانه عليا ابيعها اووووى !!!!!!