حاجه حصلت مع صاحبي ورأيكم ايه

[memo_p910]

عايز رأيكم
واحد صاحبي ماشي في مدينة نصر في شارع جديد عليه وعمل يوتيرن علشان يرجع لقى راح طالع له امين شرطه من الضلمه كأنه كان مستخبي ومنتظر فريسه ووقفه وبيقوله انت كده عكس اتجاه مع ان مفيش اي علامات ان اليوتيرن ده اتلغى علشان الشارع بقى اتجاه واحد وان الدوران ممنوع المهم اول ما سمع كلمة عكس اتجاه اتفاجئ لانه عارف انه هايبقى موال وسحب رخص وكده راح قايل للامين استنى هاركن على جنب وراح دايس بنزين وماشي بأقصى سرعه وكمل الطريق بالعكس للاخر والأمين باصص عليه كأنه بيحفظ نمرة العربيه

هو كده ايه بقى اللي ممكن يحصل بالنسبه للقانون الجديد وايه لازمة انه يوقف امين ينتظر فريسته بالشكل الحقير ده ؟؟

[hugan]

لو امين في المرور ها يشيله اكتر من مخالفه
اهمهم طبعا السير عكس الاتجاه ودي فوق ال1000 جنيه
انما لو مش مرور وبتاع تائمين بنوك مثلا او انضباط
وارد انه يكون مش مرور وكان عايز يعمل علي صاحبك اي شغل ومصلحه
علي كلام بالليل وطالع من الضلمه يعني مش مرور اكيد
مايخافش ولا يقدر يعمل له حاجه

[حسني منصور]

بص يا استاذ لو امين الشرطة طبق القانون بالشكل الصحيح هايكتب مخالفة على العربية ويعمل محضر يتعرض على النيابة اللي بدورها ها تامر بمخاطبة المرور عن مالك السيارة وتنزله متهم طبقا للتعديلات الجديدة اللى ممكن يتحبس فيها وده نص التعديلات اللي في القانون
القانون رقم 142 لسنة 2014 بتعديل بعض أحكام قانون المرور بالقانون رقم 66 لسنة 1973، ونصت المادة الأولى من القرار على "يستبدل بنص المادة 76 من قانون المرور الصادر بالقانون رقم 66 لسنة 1973، بالنص الآتى: "مع عدم الإخلاء بالتدابير المقررة فى هذا القانون أو بأية عقوبة أشد فى أى قانون آخر يعاقب كل من قاد مركبة وهو تحت تأثير مخدر أو مسكر أو السير عكس الاتجاه فى الطريق العام داخل المدن أو خارجها بالحبس مدة لا تقل عن سنة، فإذا ترتب على القيادة تحت تأثير مخدر أو مسكر أو السير عكس الاتجاه إصابة أو أكثر يعاقب بالحبس مدة لا تقل عن سنتين وغرامة لا تقل عن عشرة آلاف جنيه".

[memo_p910]

لو امين في المرور ها يشيله اكتر من مخالفه
اهمهم طبعا السير عكس الاتجاه ودي فوق ال1000 جنيه
انما لو مش مرور وبتاع تائمين بنوك مثلا او انضباط
وارد انه يكون مش مرور وكان عايز يعمل علي صاحبك اي شغل ومصلحه
علي كلام بالليل وطالع من الضلمه يعني مش مرور اكيد
مايخافش ولا يقدر يعمل له حاجه

فعلا انا برجح انه كان عايز يعمل مصلحه لانه قاعد مستني في الضلمه

[kazamodia]

الكلام ده في حسن المأمون ؟

[J A G U A R]

كان عاوز يقلب صاحبك
ده شغل بلطجيه

[Bassem Youssef]

هو طلع يجري بالعربيه ليه ؟؟؟

المفروض كان ركن علي جنب و نزل و كلم العسكري كلمتين حلوين و كرمشله ريال في ايده

و كان الله يحب المحسنين :)))

[memo_p910]

الكلام ده في حسن المأمون ؟

اه سألته الشارع اسمه حسن المأمون

[Mostafa.Mahran]

ولا هيعمل حاجة سيبك منه

[Kareem Fawzy]

مش هيحصل حاجة لان هما فعلاً خلوا حسن المأمون اتجاة رايح بس وشارع الطاقة ( او كاريكا ) بقا اتجاة راجع ودى حركة فى منتهي الغباء رغم انى من سكان مدينة نصر الا انى اكتشفت دة بالصدفة لانهم ولا حاطين يفط ولا حاطين اى اشارة تبين ان دة عكسى فدة غالباً امين شرطة كان عايز يطلع بمصلحة على صاحبك

[kazamodia]

حصل معايا نفس الموقف والعسكري قال لي الشارع بقا اتجاه واحد ومعمايش اي حاجة وصاحبك مع الاسف غلطان في اللي عمله

[S O P H O S]

اعتقد مش هيحصل شئ