حملة ضد المطبات غير المطابقة للمواصفات

[م.احمد زكريا]

أكيد مفيش حد مننا إلا وإتفاجئ وهو ماشي في أمان الله بمطب صناعي رخم... ويا إما فرمل جامد أو خده وطار شوية في الهوا

أحيانا ربنا بيسترها وتعدي على خير وأحيانا لاقدر الله بيتسبب في مشكلة في العربية أو تؤدي لحوادث

أنا مش ضد وجود مطبات في الشوارع ...... بالعكس أنا مع وجود مطبات في أماكنها الصحيحة
عند المدارس او عبور المشاه او التقاطعات الخطيرة التي ليس بها إشارات

انما كل واحد حابب يعمل مطب بيعمله بشوية خرسانة

والادهى المطبات الي بتعملها الاحياء في الشوارع وتكون نسبة إرتفاعها لعرضها مش صحيح وبيترتب علية ان العربية تحك في المطب و يمكن تغير فيها علبة شكمان او تستعدل المصفحة وغيرها من البلاوي

طبعا غير المطبات الغير ملونة بلون عاكس وواضح وتتفاجئ بيها وانت ماشي ومفيش حتى قبلها علامات ارشادية ان في مطب

طبعا ده غير الحفر الي في الشوارع وبالوعات صرف الامطار المفتوحة في الانفاق ... يعني الغلطة بفورة

انا ادعو جميع الاعضاء للمشاركة بحملة ضد المطبات الغير مطابقة والحفر والبلوعات والمشاركة بصور ليها واماكنها ومدى خطورتها
وبكدة نعمل قاعدة بيانات بيها في مصر لحد ما ربنا يكرمنا والمشكلة دي تختفي من بلد الحضارة مصر

وشكرا

[lancerevolution]

انا معاك و بالذات بعد لما تم رصف شارع وفر على ناس كتير إنه يمشى بتاع كيلو زيادة و يعطل حركة المرور فى شارع رئيسى دا كله عشان يلف حوالين الشارع راح واحد ساكن هناك نازل بمطب إرتفاعه 25 سم أو أكتر و تعرفش تاخده مقص يعنى حتلبس يعنى حتلبس

[Samir Elshahawy]

طبعا موضوع مهم جدا و انا متشكر جدا لسرعة استجابتك دي ياباشمهندس أحمد و أنا عن نفسي اول المنضمين للحملة دي من كتر اللي شوفته من المطبات و مستعد للمشاركة بأي حاجة ضد المطبات الغير مطابقة للمواصفات و الموضوعة بدون فائدة

[MedaSam]

I am IN sure

There are two bumps at the most right lane towards Hyper One; at night you can not see them, they are very high to the extend I feel I make a horse jump with my car over them :D

[tamohsen]

بالعكس
ياريت اللي يلاقي طرق مفيهاش مطبات يبلغ عنها
علشان نحاول نمشي فيها

اصل لو هانبلغ عن المطبات يبقي محتاجين 100 ورقه نكتب فيها

حضرتك انا من بيتي لشغلي رايح جاي
بعدي علي 22 مطب صناعي
ده غير الحفر الطبيعيه

[romancey]

عندك حق يا tamohsen المطبات كتيرة أوووى والحفر زيها وسعات امر
انا معاك والمفروض الحكومة تنفذ المطبات دى بموصفات معينة علشان مضرش حد
بس هتعمل اية بأة احنا فى مصر يا انسى الموضوع دة

[tamera]

فعلا المرة الوحيدة اللي شفت فيها مطب بمواصفات قياسية كان في مدخل مدينة 6 اكتوبر عرضه حوالي 2 متر وواخد الارتفاع تدريجي على هذا العرض و متخطط بلون فوسفوري..:)
انما مطبات غير قياسية زي ماقال الاخوة مش هانخلص لان اصلا الشوارع غير قياسية..
بس ممكن نبدأ برضه بالمطبات ذات التأثير المدمر

[wesam_salom]

هههههههههههه
نبلغ عن المطبات
انا ممكن ابلغ عن العربيات اسهل
ده عدد المطبات اكتر من عدد العربيات

[ibrahimsaad]

هههههههههههه
نبلغ عن المطبات
انا ممكن ابلغ عن العربيات اسهل
ده عدد المطبات اكتر من عدد العربيات

هههههههههههههههههههههه

والله كلامك صحيح الواحد يبيع العربيه اسهل من الكلام ده

دا كل مترين مطب صناعى عندنا لدرجه ان كل واحد عامل مطب قدام بيته

انا شايف ان الواحد يرجع للعصور الوسطى احسن ويجيب حمار وخلاص بدل العربيه ومشاكلها

[iunknown]

بالعكس
ياريت اللي يلاقي طرق مفيهاش مطبات يبلغ عنها
علشان نحاول نمشي فيها

يا ريت بلاش

احسن ياخدوا بالهم ويزرعوها مطبات :)

[Dr.A.Nabil]

معاكم يا رجاله

[ABDULLAH AHMED]

وانا معاكو يا رجالة

دي الشيراتون بس كل متيرن في مطب

ومن كم يوم عاملو 3 مطبات قدام الكلية البحرية في شارع (دوم دوم)

المهم الواحد متعود يشد في الشارع ده وفجاة الاقي المطب قدامي

لبست المطب لبسة بنت لازينا :d

وفي المطب التاني العربية حكت من على الجنب

وقفت بعدها لقيت العربيات كلها بتحك في المطبات ده غير اللي لبس المطب

الخسائر في العربية قعدة فتيس


فانامعاكو في الحملة دي ... لازم المطبات تبقى مطابقة للمواصفات وفي اماكن مححدة مش كل مترين

[م.احمد زكريا]

يا شباب الصورة المرفقة فيها مواصفات المطبات الصناعية

للسيارات الصغيرة
ارتفاع المطب 10 سم وطولة 3.5 م ....... يعنى لا يمكن العربية تتحك او تتضر

وبالنسبة النقل والاتوبيس
ارتفاع المطب 10 سم وطوله 5م

قارن بالموجود في مصر

[ahmed76]

يا جماعة اللى بيمشى فى طريق الميثاق- مدينة نصر
يقوللى بيمشى ازاى
لازم يكون حافظ اماكن المطبات والبلاعات
وكله كوم والبلاعات المفتوحة اللى عاملة زى فخ صيد الاسود فى الغابة
ناقص يحطوا شبكة جواها

[Samir Elshahawy]

للسيارات الصغيرة
ارتفاع المطب 10 سم وطولة 3.5 م ....... يعنى لا يمكن العربية تتحك او تتضر

وبالنسبة النقل والاتوبيس
ارتفاع المطب 10 سم وطوله 5م

قارن بالموجود في مصر

مواصفات المطبات في مصر:

- للسيارات الصغيرة و الكبيرة ( مبدأ المساواة في الظلم عدل )
الارتفاع : يا ريت يكون بارتفاع الساتر الترابي علي الضفة الشرقية لقناة السويس
العرض : انك تحس ان كان فيه مطب و انت اكلته
عدد المطبات : ممكن الشارع كله يكون مطبب
اضافات اخري : بلاعات بارتفاع 40 سم و ياريت كمان تكون مفتوحة
العلامات التحذيرية : حجر حجرجر عمودي قبل البلاعة مباشرة (علشان ماتلحقش تعمل حاجة )
اللون الفسفوري للمطب : ان يكون الشارع مظلم و يكون المطب باللون الاسود
مادة المطب : اسمنت - حديد - خرسانة مسلحة ( كي يتحمل وزن السيارات اللي هاتتهبد فيه )