غلطة عمري - عملت محضر في اللي خبطني ! لازم تقري وتتعظ

[KemozTanta]

السلام عليكم
انا ياجماعة هقولكم اللي حصلي عشان غيري ميشوفش اللي انا شوفته واللي جرالي عشان تتعظوا بجد وان محدش يفكر يعمل محضر في حد خبطة

انا كنت ماشي الجمعة بالليل علي طرق المحلة وفجاة جالي تليفون ركنت علي جنب الطريق وفاتح الانتظار ... خمس دقايق ولاقيت خبطة جامدة في العربية من ورا والعربية لانسر 2015
انا قولت عليه العوض في الشنطة - الخبطة جت في الشنطة تطبيقة ممكن تترد ع البارد والاكصدام البوية اتقشر ومحتاج يترش - نزلت متعصب وكنت همسك في بتاع الفيسبا اللي خبطني خصوصا لما لاقيته لا اعتذر ولا قال حتي كلمة معلش !!
كلمت النجدة وعملت محضر وروحنا المركز.. واللي خبطي اسعاف خدته وهو كان كويس وهرب من المستشفي علي بيتهم وانا فضلت طول الليل في القسم مستنية
النهاية عملت محضر وقولت اقوالي فوجئت انهم حجزوا عربيتي في المضبوطات ! واجي تاني اليوم الصبح اطلع ع النيابة اجيب اذن استلامها بيه
روحت من المحلة لطنطا بعد السحور مواصلات ومنمتش ورجعت القسم تاني يوم الصبح الساعة 9 عشان النيابة
روحت النيابة اتلطعت 3 ساعات وفي الاخر دخلت لوكيل النيابة قالي ايه اللي حصل - حكيتله اللي حصل - قالي طيب اتفضل
ساعة كمان وطلع القرار ان العربية يتم معاينتها من قبل مهندسي المرور لتقدير حجم التلفيات
روحت القسم قالي تمام روح وتعالي بكرة والعربية لسه هتفضل محجوز عندنا
كنت هتجنن العربية مرمية يومين في الشارع في المضبوطات وانا اللي مشتكي ومتضرر
مشيت ورجلي مش شيلااني من التعب والهم والزعل .. روحت ورجعت تاني يوم اللي هو الاحد
فضلت مستني الامين ساعة في القسم عشان اخد قرار النيابة واطلع معاينة في المرور عشان استلم عربيتي
روحت المضبوطات لاقيت العربية مكسور اشارة المراية ودي حصلت عندهم وكمان اتسرق فلاشة العربية
شوفوا المهزلة بقي - اخدتها وطلعت المرور عشان الفحص لتقدير حجم التلفيات
مهندس الفحص في مرور المحلة لاقي عربيتي متفيهمة
راح سحب رخصي قيادة وسيارة وقالي تستلمها من مرور طنطا كمان يومين
انا بقيت واقف مذهووووووول انا اتبهدلت كل دا ورخصي اتسحبت وعربيتي اتبهدلت عشان عملت محضر في واحد خبطني
الخلاصة استلمت العربية يوم الاحد وحالتي النفسية مايعلم بيها الاربنا من اللي حصلي دا كلة
ومش عارف هيحصل ايه الايام الجاية
وهل انا كدا هصلح التلفيات الاول عشان هدخل فحص تاني في مرور طنطا عشان استلم الرخص
ولا هيعملوا فيا ايه تااااني ..
انا عايز اقول نصيحة اخيرة اوي لو حد خبطك اوعي تفكر تعمل محضر فيه اوعي بجد.. ربنا مايوري حرقة دمي واعصابي اليومين الي فاتوا بسبب حجز العربية وسفر في صيام
حاجة اخيرة : المحضر هيبقي قضية واللي عرفته انه هياخد مخالفة وخلاص وانا بعد كدا هدعي بالحق المدني بالتعويض
المفاجأة ان معظم القضايا دي بيطلعوا منها براءة محامي قالي كدا .. يعني انا اتبهدلت وصرفت قد ثمن الخبطة وخلاص

[Elawany13]

لا حول ولا قوة إلا بالله
ده ايه الوكسه اللى احنا فيها ديه
هى ديه دولة الحق والعدل والقانون
وانت كمان محامى ياعنى تعرف القانون
ياعنى ايه اللى الواحد يعمله لما يحب ياخد حقه ؟؟!!!
مفيش غير البلطجه وشريعة الغاب
حسبنا الله ونعم الوكيل

ربنا يعوض عليك يا ابو حميد
انا مش عارف ملطشه معاك كده ليه
قدر الله وماشاء فعل

[غزلة]

والله انا ضحكت وبكيت في نفس الوقت ربنا يصبرك علي بلاوي الروتين

[Abo_Mazen]

ممدوح شاهين قالها كلمة

هكلملك القاضي

[fooooot]

يا حبيبى انت فى مصر... مش فى اوروبا ولا حتى الخليج...وانا برده اتخبطت امام الكمين ذات نفسياته افيو 2015...ولما رفض يدفع ما افسده انا اللى رفضت اعمل محضر...وزي ما الزميل علق ابقى خلى حد يكلملك القاضى.

[Mohamed_Hamid]

الحمد لله على سلامتك ومتزعلش . ده ابتلاء وفى ميزان حسناتك ان شاء الله.

[احمد التربانى]

الهدف من قانون بالتراتيبية دى والقوانين المشابهة هو جباية أموال من السوقة وعامة الناس أمثالنا ، مهما سبق أو لحق إسمك لقب يدل على منزلة علمية أكاديمية ، ستظل دائما" من الرعاع السوقة ، لأنك أحد أبناء المحروسة عديمى السلطة والنفوذ ، أما أبناء اللصوص وناهبى الثروات والمقدرات ، فحقهم يجيلهم لحد عندهم لا ينتقص منه مثقال ذرة من قائد الڤزبة لأنه أيضا من عامة الناس اللذين ينظر لهم القانون على أنهم رعاع وسوقة ، وكان هيدفع لسيده حق التلفيات حتى لو إضطر يبيع الڤزبة عشان يصلح سيارة إبن المحروسة الحقيقى ، وذلك طبعا" بدون أى روتين أو تعقيدات ، بل بعد فنجان من القهوة فى مكتب الباشا المسئول ، والسلام عليكم ورحمة الله وبركاته.

[Ashraf Abugra]

اهم شئ حمدا لله علي سلامتك
انا يوم الاحد الماضي عربيتي جين 2 ركنة امام البيت اتوبيس رحلات حك الجانب الشمال كله الرفرفين و البابين و طير المراية و انا كنت نايم بعد العصر و الحارس صحاني الحق عربيتك اتحكت نزلت قولت حكة صغيرة لكن اتصدمت وطلبت النجدة كتير الحمد لله مردوش افتكرت صديق قديم كان مدير مرور احد المحافظات
استشارة يا باشا : قالي اوعي تعمل محضر حاول تهدده و توصل معاه لاتفاق يصلحها لك
يا باشا العربية 2015 و في الضمان و مؤمن عليها
اسمع الكلام حاول تتراضا معهاه لحسن يعملك محضر و تتحجزوا و تتعرضوا علي النيابة سوا و العربيات تتحجز
الناس في الشارع جابو امين شرطة يهدده و العربية اتصلحت بمستوى لا يرضيني لكن كده احسن من ؟؟؟؟؟؟؟

[moshakes]

أولاً وأخيراً الحمد لله
لأنك خرجت سليم من غير اصابات وماشي عل رجليك
نفس موقفك ده تقريباً حصل لواحد جارنا واقف ع الطريق عشان مكالمة والعربية (اتدشملت واتعجنت من الخلف) وهو اتكسرت رجليه ال 2،وفكه ودراعه وشرايح ومسامير وعلاج طبيعي، 4 سنين بيتعالج وبيمشي بعكاز، لسه في اول رمضان ولأول مرة شفته ماشي بدون عكاز
وصرف رقم خيالي على نفسه وع العربية
ممكن تتمن لي وقوفك على رجليك وصحتك تساوي كام لانسر 2015 ؟؟؟

ثانيا: ما تدخلش القسم او النيابة أو القضاء الا ومعاك وسايط وعلاقات قوية جداً
لأنك بدون علاقات بتضيع وقتك وفلوسك، واحتمال الطرف الأخر هو اللي يؤذيك لو توافرت له نفس الشروط

[aymanshebl]

معلش ربنا يعوض عليك انت ناسى انك فى مصر ولا ايه

[eng.m7md.ali]

معلش مع احترامي ليك انت غلطان

بما ان مفيش زفت قانون في الزريبة دي يبقي مكانش ينفع تقف علي جنب ترد علي الموبيل كنت رد وانت سايق عادي

ربنا يعوض عليك مصريتنا ابتلاء من ربنا

[waleed alsudy]

عندك حق
انا لما عملت حادثه وعربيتي مكنش ينفع تمش علشان الكوبلن طلع جبت سطحه علشان تاخدني من طريق بورسعيد للاسماعيلية وبعد لما كلمته قالي عملت محضر علشان محدش يكلمنا على الطريق قلتله معملتش حاجه ومش هعمل ومحدش هيقدر يكلمنا على الطريق وفعلا خدنا العرابيه وعديت من الكمين اللي عند الكارته وانا راجع ومحدش فتح بوقه فيهم مع ان لو حد كان اكلم نص كلمه كنت هبهدله مكانه وانا معملتش محضر مش علشان هعرف اتصرف لا والله علشان عارف الاجراء والروتين والتحقيق في مصر مش بيخلصو


عندنا ايام لما كنت عايش في السعوديه بلاد محترمه والله يجي يعاين الحادثه ويديك تقرير بالنسبة ومين هيصلح ولو عربيتك مخبوطه تروح تعمل محضر عادي وينزل معاك مهندس يعاين الخبطه ويديك ورقه تصليح علشان تقدر تروح السمكري ياخد الورقه ويصلحلك الخبطه
نظام والله

[Bassem Youssef]

#وطن_العك

[nabilar]

شكراً لك لنقل التجربه القاسيه التى تعرضت لها وحمداً لله على سلامتك وفعلاً ماحدش يدخل أى قسم إلا لو كان معاه واسطه وربنا يعوض عليك فى تلفيات العربيه

[ms8]

والله حصل معايا حاجة تجنن اي حد
كنت ماشي بالعربية في الشمال و داخل ع اشارة والكل بيوقف جئت عربية سريعا من اليمين راحت خبط واحده وافقه جانب الرصيف و بعدين حك عربيتي من اليمين بتاعي المهم الدنيا انقلبت و الشارع وقف بصراحه الواد اللي خبط الست و قف كان عايز اسعاف باي طريقة المهم طبعا الشعب المصري اول ما شاف النجدة و الاسعاف جئت مسكوا الراجل قال ده كان عايز يهرب هو بصراحه هو كان عايز يسعف الست باي طريقة المهم قولت انا اروح أقول الكلام ده لظابط الموجود المهم قالي تعالي معايا معليش ع القسم و اكسب ثواب بدل ما الراجل يروح في داهية آكتر من كده روحت هناك قاعد معاه الظابط الراجل كان محترم معايا جدا بصراحه المهم أخذ مني الكلمتين قال ليه معليش انتظر بس نصور البطاقة بتاعتك أقولت ماشي شويه داخل علينا واحد طلع ﻣﺤﺎﻣﻲ الراجل صاحب العربية
الظابط بيقول الاستاذ جي يشهد انه الراجل بتاعك كان عايز يسعف الست برغم انه العربية بتاعته اتحكت المحامي ضحك زاي عادل آدم اثبت ده في المحضر الظابط قالوا ليه عشان هو السبب هو قفل عليه فا خبط الست طبعا انا اتجنت قوي قولت هو في ايه
المهم الظابط قالي اهدا بس سكت المهم بعد ما قعد ساعة لقيت الظابط بيقول هي عربيتك فين تقوله وافقه امام القسم قالي انا المفروض أخذ المفاتيح دلوقتي بس انتا أقفله كويس بكره تأخذ افراج من النيابة المهم قولت هو في ايه انا مالي قال مليش عربيتك جئت في القضية طبعا انا خلاص كنت عايز أولع في المحامي و الظابط