ضابط وامين ....... و ثلاث مهندسين

[nassef]

ضابط وامين ....... و ثلاث مهندسين
حبيت اشارك معاكم قصة كدة من باب العظة وكمان من باب التفاؤل والامل وياريت تشيروها علشان ضميري يرتاح واكون عملت حاجة للناس دي.
انا مواطن عاااادي جدا مليش حد اعرفه في المرور واول مرة اشتري عربية في مصر ( تويوتا ياريس)
وطبعا قبل مانقل ملكية قعدت ادور في الصفحات للمنتديات و مواقع التواصل الاجتماعي على الخطوات علشان ماتبهدلش
وكانت الحصيلة اللي وصلتني /
1- عرفت الخطوات .
2- عرفت انه امر متتتتتعب واكتئبت ، ورايح متوتر وشايل الهم .
3- عرفت ان الكل بياخذ فلوس علشان تنجز وغير كدة موت ياحمار وابقى قابلني لو خلصت .
وبالفكر دة رحت مرور عبود علشان ارفع بصمة ، وداخل متوتر لقيت الدنيا في المعقول ، العامل رفع البصمة وخد الشاي وفقا لما قرأت ( ماشي ع الكتالوج اهه ) وعامل ناصح
دخلت على مهندس الفحص ( م/ عبد العزيز ) شاف الورق وسألني شوية أسئلة وطبعا انا بناء على ماقرأت ( وعامل ابو العريف وعاوز انجز ) حاولت محاولة سخيفة كدة ، والراجل بكل أدب احرجني بالذووووووق ولو فكرت تحط فلوس هتتقطع فوري امام عينك ( قدامة ع الارض هتلاقي بقايا الفلوس المتقطعة ) ويفهمك بالأدب ان البلد صحيح مليانة بلاوي بس ناس كتير لسة بخير وبتاكل بالحلال ، وانكسفت كسفة عمري لدرجة اني عاقبت نفسي باني سبت العربية ورحت مواصلات ( في عز الحر و الايام دي ) لمرور العتبة لأطابق البصمة وانا في قمة الضيق وارغب في استرضاء هذا الشخص باي طريقة لاني حسيت اني اسأت اليه جدا .
وفي مرور العتبة قررت اني تووووووبة افكر امد ايدي في جيبي إلا لوطلب اللي امامي صرااااااااحة واكون مرغم وقلت انسى كل اللي قريته ع النت ( يخربيت الشحن الكلامي المسبق ) .
وفي مرور العتبة من الباب باسأل امين الشرطة اللي ع الباب فين مطابقة البصمة ، فوجئت انه قام معايا ونادى عسكري وقاله وصل الاستاذ لانه ميعرفش المكان ؟؟؟؟؟ ووصلت للمكان وبسهولة وقمة الادب طلع الملف ونزلنا لمهندسين 2 قاعدين في عز الحر ده تحت تندة ( المهندس رجب احمد ) و ( المهندس علي حسين ) وفي ثواني وبشياكة عملوا اللازم بدون تملل ولا تاخير بل كمان قالولي مالك مضايق فحكيت لهم ع اللي حصل قالولي اهه انت جيت وشقتنا ولا نعرفك ولا تعرفنا واللي يرضيك عملناه ( وعلى فكرة كنت محتاج اصور ورقة المهندس عالي كان عاوز يحاسب عليها وقالي يمكن متلاقيش فكة )
طبعا كنت مذهول من التعامل واهه 2 مرور الناس في قمة الذوق و الاحترام وماعرفهمش ومليش واسطة ، وحظي ان واحد منهم يعرف مهندس عبد العزيز فطلبت منه لما يكلمة يعتذر لي منه تاني ووعد انه هيكلمة ونفذ الوعد وعرفت ده بعدين وكمان وصا الناس انهم يدلوني وميسيبونيش في حاجة .
واضيفلكم من الشعر بيت في مرور عبود حصلت كدة مشكلة في الاوراق واستكمالها قالولي ادخل للضابط ( نقيب / محمود عبد الفتاح ) دخلت وطبعا في دماغي تعقيد وقصص ، واستكمالا لمسلسل الدهشة ، الراجل اتعامل بكل ادب وذوق وطلع موبيله ( مش تليفون المكتب ) واتصل بمرور العتبة وعمل اللي يقدر عليه علشان الدنيا تمشي .
وكمان الامين المسئول عن الاستعلام الامني الجهاز كان عطلان ، وكان برضه بيتصل بتليفونه على حد من زمايله في الوحدات المرورية التانية اللي شغال فيها الجهاز ويستعلم للناس علشان ميوقفش حالهم ويقعد يتحايل في التليفون معلش اخر رقم الدنيا حر والناس تعباانة علشان زميله طبعا عنده ضغط شغل هو كمان
واخيرا مندوب شركة التامين عم / محمد جابر بقى يمش معايا يقوللي ع الناقص ويكمل الورق وينبهني ع المهم وبرضو والله ماعرفه من قبل .
معلش طولت عليكم لكن الخلاصة /
1- لسة البلد فيها خير .
2- متسمعش كلام حد ويتكون لديك رأي مسبق لانه في قصتي كان خطأ في خطأ .
3- روح وشوف واتعامل وبعدين كون حكم. ولو ايجابي عرف الناس بيه لان للاسف غالبا ماتنشر السلبيات و المواقف المحبطة.
4- خالص اعتذاري للمهندس / عبد العزيز
5- خالص شكري للمهندس رجب و المهندس علي
6- الف شكر للامين اللي مأخدتش بالي من اسمه
7- شكرا للنقيب / محمود عبد الفتاح
8- شكرا لعم محمد جابر

[طارق _عبد السلام]

شكرا على نقل الصوره الايجابيه ويارب البلد كله تمشى بضمير

فعلا ينقصنا الضمير فى اماكن كثيره

ربنا يكتر من امثالهم

[ayaamna]

سبحان الله انا فى مرور اوسيم طلعوا عين اللى خلفوا اهلى لما انا لعنت اليوم اللى فكرت اجيب فيه عربيه وخدت 3 ايام فى المرور وبعتنى مهندس مره تانيه لمرور الاميريه عشان ختم الموظف قالى والله ما هى محتاجه ختم قلتله حطله اى ختم وريحنى انا الحر تعبنى دا غير لازم هاتدفع غصب عنك وازيد حضرتك من الشعر بيت
دخلت للضابط اختم منه ورق الباشا ما كنش فاضى عارف ليه لانه بيمتحن كمبيوتر بدل الناس اللى ها تطلع رخصه شفت التعاون لحد فين
اغلب الموظفين فى ماسر يموتوا لو ما كالوش حرام ربنا يرحمنا منهم من اكبر راس لاصغر راس
واخير اتمنى اننا نكون افضل امه على وجه الارض فى العدل والحريه والامانه والكرامه

[MaZaGAngeE]

اول مرة اشوف حد بيشكر في مصلحه حكومية و بالذات جهنم الدنيا اللي اسمها مرو.… دي ناس اتخلقت عشان تنهب و تقلب الناس ..

[hilal]

هو الأخ تشرها باعتبارها من عجائب الدنيا السبع أن تجد شخص طبيعي في وسط غير طبيعي

[bassemali]

والله انا اتعاملت مع مرور البساتين على مدى ال 3 سنين اللي فاتوا بجدد الرخص كل سنه عشان العربيه قسط ماشوفتش منهم غير كل احترام.. لما بدفع حاجه لحد بديهاله بمزاجي من باب الاكراميه وبعد ماكون خلصت كمان اقوم مراضيه بحاجه واجمالي الرش اللي برشه ( بمزاجي) مايجيش 20 او 30 جنيه كل الحكايه.. فعلا لسه الدنيا بخير وهاتفضل بخير لان صوابعك مش زي بعضها.. الوحش كتير.. والحلو كتير.. وكل واحد بيقابل من دع ومن ده..

[exelence]

زى اللى حصل معايا فى مرور شبرا مع ان العربية كان فيها شوية حاجات عاوز تتظبط

[gade2]

غريب الكلام ده على المرور انا حسيت انك بتتكلم على مرور بوسطن

[nassef]

طبعا زي ما انا شايف الردود متباينة ، وده كنت متوقعة بس انا حبيت انقل الصورة كما هي زي بالضبط ما ممكن انقل اي سلبية هاشوفها ، وانا ياما عانيت في مصالح اخرى و الجوازات على سبيل المثال لا الحصر
ومتأكد انه لسة هاعاني
بس حقيقي الناس دي عملت كده بالحرف لذا ذكرتها بالاسم و الصورة لمكن امكن تصويره

[omarhelalyehia]

مرور فيصل ....مرور تحت الكوبرى.....

[Bassem Youssef]

شئ ايجابي و اكثر الله من امثالهم

[shaaban2008]

وكمان مرور عبود !!
وعجبي. وكمان عجبي