رأيكم فى تأجير عربيه لشركة بترول

[EgyArmy]

شوفت اعلان لشركة بترول طالبه عربيات من موديل 2010 حتى موديل السنه
زى سيراتو و شيفروليه كروز و النترا و حاجات كتيرة جدا
الايجار شهريا بدون سائق متوسطة 3000 جنيه الى 6000 جنيه
ده غير وعدهم بالاصلاح فى التوكيل و بالفواتير
لما سألت ليه بيدفعوا المبالغ دى لما هما قادرين يشتروا عربيات اتقالى عشان اصول الشركة متبقاش مبلغ عالى و بالتالى يدفعوا فلوس كتيرة جدا
طيب ايه رأيكم فى تأجير كروز الى سعرها اساسا 150 الف
لو فى 3 سنين هنحسب على اقل ايجار = 12×3×3000=108 و بعد 3 سنين العربيه هتكون ببلاش تعتبر ايه رايكم فى الموضوع ده و اسعار الايجار كدة كويسه ولا تعتبر قليله و حد جرب القصه دى ؟ و لو حد فى شركة بترول يقولنا العربيه بتتعمل فعلا فى التوكيل ولا لا ؟

[mr_green]

للأسف الإعلان بنسبة كبيرة نصب
شركات البترول بتعمل كده فعلا و بعقد سنوى بس إللى بيأجروا منه بيكون بنسبة كبيرة موظف كبير أو معرفة موظف كبير عندهم و بتكون عربيات أعلى من كده و بعدين أغلب الشركات دى دلوقت بقت تشترى أكثر من ما تأجر

[Abo_Mazen]

هي نظرية فعلا الإيجار أحسن من الشرا بالنسبة للشركات دي .وده فعلا برضه حفاظا على أصول الشركة عند حد معين ما يزيدش عشان الضرايب وعشان حساب نسبة الأرباح آخر العام اللي بناء عليه بيتحدد المركز المالي للشركة

طبعا الإيجار بالنسبة للشركة له مزايا ..زي مثلا إن العربية آخرها معاك هيكون التصليح في التوكيل ..ومش بتحتاج بعد فترة من الإستخدام إنك تضطر تحولها لكهنة ..فا بتالي بيكون اللي بتدفعه فعلا ركبت فيه ..ده بالنسبة للشركات دي على الأقل ..وطبعا الشركات دي بالطريقة دي بتريح نفسها بقى من مصاريف ترخيص وتأمين ومؤسسة وغيره

وارد قوي يكون الإعلان معمول كسد خانه ..أو معمول إستيفاء للورق والمستندات اللي المفروض بتتعمل في المواقف اللي زي دي ..زي مثلا مسابقات التعيين اللي بتعملها الشركات وبتكون الناس متعينه قبل الإعلان ما يتعمل ..بس ده طبعا بيكون لازم (اللي هو الإعلان) عشان الجهاز المركزي للتنظيم والإدارة بيفرض عليهم كده ..فيتعمل الإعلان كشكل من أشكال القانون لكن التعيين من الأول معروف ومتحدد ..

روح الشركة اللي عامله الإعلان وإسأل بنفسك ..بس أهم حاجه تكون شركة كويسه ومعروفه عشان ما يتنصبش عليك ..خلي بالك العربية لما بتروح الشركة بتتفحص وبيطلب تقرير فني بالحالة بتاعتها من التوكيل قبل ما ياخدها منك عشان يبقى عارف إيه حالة العربية اللي هو هياخدها منك وعشان ما ياخدش عربيه يصرف على صيانة وغلب

[A.Saad]

اغلب الاعلانات من مكاتب تأجير
ومبيكنش فيه التزام فى العقد

[ibrahim sallam]

شركات البترول والقطاع العام بصفه عامه لايتعامل مع افراد انما يتعامل مع مكاتب وليس افراد

تمنياتي لك بالتوفيق

[hesham fawzy h]

واحد اعرفة كان ماجر برضو بس لشركة سياحة .. كانو قالو لة هيصلحوها فى التوكيل برضو

و رجعولو العربية متهانة و حرم يعملها تانى

و بعدين الشركة اسهلها تتفق مع معرض للايجار !!

[sherif1988]

طيب رئيكم اية في العمل مع شركة زى Ubr ???
يعنى فية مكاتب بتقول شغل يومى 10 ساعات دة بعقد شهرى من 6 الالف ل 8 على حسب

وفية شركات تنية بتقول والله انت وشغلك انت اشتغلت ساعة هتاخد مقبلها كذا اشتغلت 10 هتاخد كذا
بس دى مش بعقد
اية رئيكم انا بفكر اجيب عربية قسط واشغلها كدة وعلى الأقل هيا عربيتى ملاكى وبشتغل عليها بردك بدل التكس وبهدلتة وتناكة وتعامل الشرطة والكلام
خاصة ناس بتقولى ممكن اعمل في الشهر بتاع 15 الف لو اشتغل كتير
اية رئيكم