عايز نصيحتكم فى مشكلة حصلت وانا مأجر عربية

[Mody2500]

انا اجرت عربية من شركة عالمية طوال فترة اجازتى ووقت الايجار تم الحجز على مبلغ 650 دولار فى الفيزا حسب الشركة 150 لو حصلت مخالفات و 500 لو حصلت حوادث بحيث ان ال 500 دولار هو الحد الاقصى اللى بدفعه فى حالة ال total loss بالاضافة ان المسئول عن التأجير قالى لو حتى البربريز بتاع العربية اتكسر فهو ال 500 دولار برضو لان تمنه آلاف

بعد ماستلمت السيارة حصل تجريح فى جانب اثناء مرور عربية تروسيكل بحيث ان الباب اتخدش وحصل ان مكان الخدش اتعلم على الباب والصاج دخل لجوه وكمان اتخدشت العتبه والصاج اتعوج

ده غير بعد ماركنت تانى يوم العيال اللى بتمشى بالمسامير خدشت الباب والرفرف
وبعدها بيومين لاقيت بقايا حبر جاف على شنطة العربية
رحت لسمكرى قالى محتاجه تتعمل على السخن مينفعش بارد
والبوهيجى قالى هتتكلف على الاقل بويه 700 جنيه غير شغل السمكرى ولما عرف انها ايجار قالى حرام وحاول تتفق مع المكتب

من خبراتكم ايه المفروض اعمله دلوقتى وخصوصا اننا داخلين على العيد والوقت ضيق جدا وهاسلم العربيه بعد العيد مباشرة
خايف اسلمها للمكتب ياخدوا ال 500 دولار كاملين

[pepo2011]

لا سيبهم يا خدو 500 دولار لانك اساسا غير مصرح ليك بعمل شغل في العربية بنفسك وحضرتك بتقول خبط وعوج وتجريح باب وجنب وعتب وشنطة يعني 500 دولار كويس واشتري دماغك طبعا حاول تفاصل معاهم لكن مفيش وقت عندك لعمل الكلام ده وتاكد انك مش هاتعرف تغلب او تضحك علي مكتب ايجار ابدا

[K_E]

انا كمان رأيي تسيبلهم ال 500 دولار ولو حسبتها انت الكسبان
سمكره وعطله غير انك مأجر العربيه يعني وقتها بفلوس وتكاليف الشغل وكمان ممكن جداً لما تروح يكتشفوا انك عملت كده ويلزموك بال 500 دولار برضه

[Mody2500]

انا كمان رأيي تسيبلهم ال 500 دولار ولو حسبتها انت الكسبان
سمكره وعطله غير انك مأجر العربيه يعني وقتها بفلوس وتكاليف الشغل وكمان ممكن جداً لما تروح يكتشفوا انك عملت كده ويلزموك بال 500 دولار برضه

ياجماعه يعنى اؤجر العربية اسبوعين ب 600 دولار تقريبا وادفعهم زيهم علشان خدوش
ياترى مفيش اى حل تانى !!

[MOTOR HEAD]

مش انت اللى كنت موافق على الشرط ده من الاول و لا حد غصبك !!

[دكتور خالد]

الاعضاء عندهم حق فى كل كلمة قالوها

[Mody2500]

مش انت اللى كنت موافق على الشرط ده من الاول و لا حد غصبك !!

ياخى انت محسسنى انى باحاول استهبل عليهم او انصب على شركة الايجار
انا كنت عايز اؤجر عربية فى اكتر حاجه مضمونه فى مصر ومفيهاش تمضى على ايصالات امانه بكامل مبلغ العربية زى باقى المكاتب التعبانه دى

وكمان انا اجرت قبل كده بره مصر ومفيش الكلام ده كله حتى مبلغ التأمين مايعادل 250 دولار فى عربيات اعلى بكتير من اللى هنا

[aymanshebl]

والله الواحد خايف يقولك صلحها المكتب يكتشف الكلام ده و بعدين تغرم مبلغ التامين زاد تمن تصليحك ليها احسن شى قولهم على اللى حصل بامانة و حاول تفاصل فى مبلغ التامين و ان كنت اشك انهم هيخفضوه

[moha sasa]

- ريح دماغك وسيبلهم ال 500 عضمة بتاعتهم.

[K_E]

ياجماعه يعنى اؤجر العربية اسبوعين ب 600 دولار تقريبا وادفعهم زيهم علشان خدوش
ياترى مفيش اى حل تانى !!

حاول تتفاهم معاهم شوية وتقولهم انه ممكن انت تصلحها على حسابك وتدفعلهم 100 دولار مثلاً
لكن حتى لو دفعت ال 500 دولار ده حقهم حسب الاتفاق واريحلك بكتير لو كنت ماضي وصل امانه

[Bassem Youssef]

قدر الله و ما شاء فعل و الحمد لله انها بسيطه

هتروح المكتب تحكيلهم ايه اللي حصل و احتسب ال 500 دولار كأنهم زكاه عن صحتك مثلا

[MOTOR HEAD]

ياخى انت محسسنى انى باحاول استهبل عليهم او انصب على شركة الايجار
انا كنت عايز اؤجر عربية فى اكتر حاجه مضمونه فى مصر ومفيهاش تمضى على ايصالات امانه بكامل مبلغ العربية زى باقى المكاتب التعبانه دى

وكمان انا اجرت قبل كده بره مصر ومفيش الكلام ده كله حتى مبلغ التأمين مايعادل 250 دولار فى عربيات اعلى بكتير من اللى هنا

هو دا فعلا اللى انت بتحاول تعمله بتنصب و بستهبل

هتعد تحكى كتير و تقولى اجرت قبل كده بره مصر و مبعملوش كده
هرجع اقولك تانى ..هو كان فى حدغصبك توافق على كده !!

اللى اوله شرط اخره نور -_-

[devil_storm]

متعملش حاجه في العربيه و سلمها ذي ما هي، سواء حياخدو كل ٥٠٠ دولار او حيرجعو جزء منها

[Mody2500]

شكرا يارجاله وربنا يسترها ان شاء الله

[ibrahim sallam]

مشكلتك لو عملتها هتبقى مشكلتين

الاولى انهم يرفضو اللي عملته في العربيه وبالتالي يلزموك بالمبلغ المتفق عليه

الثانيه الوقت اللي هتتعمل فيه العربيه مش هيبقى قليل زي ما انت حاسب او متوقع


يبقى انت تريح دماغك خااالص وساعة التسليم تقولهم حصل كده كده في العربيه

وهما يقدرو المبلغ اللي هيتصرف عليها وياخدووه حسب الاتفاق وانت في الاثناء ديه تبقى تسال ممكن تكلفك كام

كلها ولو لقيت انهم بيستعبطو في تقدير الخبطات ابقى كلمهم كلام ناشف وقولهم اد كده اللي هو المبلغ اللي

عرفته من الصنايعيه حتى لو اخدو زياده شويه مش مشكله اهو لدل العطله ووقفة الصنايعيه