التوكيل المفتوح

[captinahmad]

السلام عليكم
انا ببيع عربيتى
المهم فاضل فيها على الرخصة شهرين ونص
والمشترى مصمم على عمل توكيل مفتوح ياترى اية
مخاطر التوكيل المفتوح دة

[drmsadek1979]

الرخصة قصيرة اعمل له توكيل مفتوح بس ميجددش الرخصة بأسمك

[captinahmad]

لآ هو عاوز يجدد باسمى

[غزلة]

كدة اي مخالفات هتيجي باسمك

[mif]

اوعى تعمل توكيل مفتوح
في الغالب دا تاجر و عايز يجدد باسمك و يبيع بالتوكيل
ممكن ترخص سنة او اثنين بالاتفاق لو الحجة ان الرخصة قربت تخلص

[captinahmad]

اوعى تعمل توكيل مفتوح
في الغالب دا تاجر و عايز يجدد باسمك و يبيع بالتوكيل
ممكن ترخص سنة او اثنين بالاتفاق لو الحجة ان الرخصة قربت تخلص

فعلا الرخصة قربت تخلص وهو عاوز يعمل التجديد باسمى مفتوح
فانا قولتلة لا قالى فى التوكيل الثانى يعنى لما يبعها هو بيتقفل لوحدة
اخر الرخصة 16/3 الجاى اسيلبة التوكيل مفتوح ولا لا ؟

[eslamrace]

اظن بلاش تسيب التوكيل مفتوح ولو الازمه فى قرب ميعاد التجديد يبقى انت جدد سنه كمان على حسابك واعمله توكيل مقفول انما توكيل مفتوح بالتجديد اظن محدش بيعمل كده لانه ممكن يجدد سنتين او تلاته باسمك ويبيع العربيه وتفضل باسمك ولو اشتريت عربيه فى خلال المده دى حتدفع ضريبه وتلت
فاظن ملهوش لازمه المخاطره خاصه ان العرف ان التوكيل بالبيع لنفسه وللغير والتعامل امام المرور"علشان لو الرخصه اتسحبت" وبيتم الشطب على التجديد .
وفى النهايه الموضوع قرارك الشخصي .
تحياتى.

[Imhotep]

معلش هو ايه الفرق بين التوكيل المفتوح و المقفول؟

[eslamrace]

معلش هو ايه الفرق بين التوكيل المفتوح و المقفول؟

ا/ماهر اولا كل سنه وحضرتك طيب ونتمنى تكون بخير
ثانيا التوكيل بيكون مكتوب فيه اكتر من بند البيع للنفس وللغير وقبض الثمن والتجديد والتعامل مع المرور لو التوكيل مش مشطوب على اى حاجه فيه بيتسمى مفتوح لان صاحبه يقدر يعمل اى حاجه فى العربيه يبيعها لنفسه او لغيره يجدد الرخصه باسم صاحبها الاصلي لو الرخصه اتسحبت او فى اى مشكله فى المرور هو اللى يتعامل وهكذا
انما التوكيل المقفول بيكون مقفول بالشطب على اى بند من دول
الاصول والعرف بتكون ان يتشطب بس على التجديد علشان محدش يجدد العربيه باسمك وهى مش فى حياذتك وبالتالى لو حبيت تشتري عربيه تانيه فى اى وقت تدفع ضريبه رفاهيه لانك مالك لعربيتين لان اسمك حيطلع مالك لعربيتك المباعه وعربيتك الجديده وبكده حتى لو بعت بالتوكيل بدون تسجيل بتكون ضامن ان فى ميعاد تجديد الرخصه اللى اشتراها مضطر يكتبها باسمه وتقدر تسجل عربيتك الجديده براحتك
فى ناس كمان بتشطب على البيع للغير علشان يضمن ان العربيه مش حتتباع بالتوكيل وفى الحاله دى التوكيل بيكون فقط وسيله للتيسير على المشترى انه يسجل وقت ميحب بس بدون ميجدد ولا يبيع لحد بالتوكيل ده

اكبر غلطه بتتعمل ان البايع يعمل التوكيل ويشطب على التعامل مع المرور لان فى الحاله دى لو الرخصه اتسحبت بتبقي لفه كبيره علشان ترجعها ومش عارف اللى بيعمل كده بتكون ايه وجهه نظره غير مضايقه المشترى
وفى ناس بترفض التوكيل اصلا وبتأكد ان البيع بعقد مسجل علشان يبعد عن التجار ويضمن انه لما يشتري عربيه تانيه ويسجلها باسمه يدفع ضريبه واحده بس
بس ده الفرق بين التوكيل المقفول والمفتوح
تحياتى .

[احمد المصرى]

اعتقد انه تاجر محترف وعايز يكسب كل جنيه من العربيه وغالبا العربيه هتكون باسمك لسنوات واى مصيبه هتكون انت المالك الاساسى للعربيه


اعتقد لو عاجبه توكيل مقفول او تجديد الرخصه لمده سنه او اتنين كحد اقصى يبق تمام غير كدا يبق نيته سوداء

[Imhotep]

طيب عشان الواحد يعرف الصح من الناس الخبرة فى البيع و الشراء

لو الواحد اضطر يبيع بتوكيل. . . ايه الصيغة اللى تتكتب و الواحد يأمن بيها نفسه لو الرخصة فاضل فيها كتير

و كتر خيركم جميعا

[احمد المصرى]

البيع للنفس وللغير والتعامل مع المرور

دى الصيغه ال اغلب الناس بتكتبها

[eslamrace]

طيب عشان الواحد يعرف الصح من الناس الخبرة فى البيع و الشراء

لو الواحد اضطر يبيع بتوكيل. . . ايه الصيغة اللى تتكتب و الواحد يأمن بيها نفسه لو الرخصة فاضل فيها كتير

و كتر خيركم جميعا

ولا حاجه مجرد انك تتأكد ان الموظف فى الشهر العقاري شاطب على كلمه التجديد والترخيص فى الجزء الخاص بوصف التوكيل
وباقي البنود كلها بتكون من حق المشتري زى التوقيع على عقد البيع والبيع لنفسه وللغير وقبض الثمن والتعامل مع المرور
ومفيش اى ضرر عليك منها غير انك لو بعت بتوكيل بتكون محتاج انك لو حتشترى عربيه متسجلهاش وتمشي بتوكيل "فى حال قبول البائع "لحد ميعدى وقت انتهاء رخصه عربيتك القديمه "علشان تبقي متأكد ان اللى اشتري منك سجلها باسمه" او تجدد عربيتك الجديده سنه واحده وتدفع مضطرا ضريبه وتلت "لو البائع رفض يبيعلك بتوكيل وصمم انه يسجلك .
تحياتى .

[Bassem Youssef]

توكيل مفتوح مع حد تعرفه شخصيا مش مجرد مشتري متعرفوش