تجربتي مع أوبر Uber

[SYD]

بسم الله الرحمن الرحيم

السلام عليكم ورحمة الله وبركاته

في البداية قبل ما أحكي تجربتي مع أوبر انا هوضح ايه هي خدمة أوبر للي مايعرفهاش
أوبر شركة أمريكية أعتمدت علي خدمات GPS لتحديد المواقع واستفادت من ان الموبايلات الحالية بتقدم الخدمة دي فعملت برنامج للموبايل سواء اندرويد او ايفون
البرنامج لازم يكون متصل بالأنترنت ولازم تكون مشغل الـGPS علشان يقدر يحدد موقعك
أوبر شركة مواصلات بعربيات ملاكي خاصة وليست سيارات أجرة
العربيات بيسوقها أصحابها او سائقين مدفوعي الأجر من صاحبها
البرنامج في منه نسختين
الأولي للمستخدم (الراكب)
الثانية لمقدم الخدمة (السائق)
كلا الطرفين لازم يكونوا متصلين بالأنترنت ومشغلين الـGPS

الراكب بيفتح البرنامج والـGPS بيحدد موقعه (للأسف الشديد ليس بدقة)
الراكب بيعمل طلب Request UBER

السائق بيتلقي الطلب وبيعمل Accept
طبعاً الـGPS بتوضحله مكانك وانت كمان بيظهرلك مكانه (للأسف ليس بدقة)

كدة أحنا فهمنا ايه هو أوبر بأختصار شديد

تجربتي الشخصية لأوبر UBER

قبل ما اتعامل مع أوبر كنت طبعاً بركب التاكسي زي اي حد ما بيعمل
الجديد ان السواقين بقوا دائماً طافيين العداد وبيطلبوا اسعار خيالية في المشوار - ناهيك عن رفضه او امتناعه انه يوصلك - غير رفضه لدخول بعض الشوارع - بالأضافة للتدخين او المزيكا اللي بيسمعها - واخيراً شكله

خدت القرار ونزلت البرنامج وشغلته واستخدمته
تجربة اكثر من رائعة
أولاً سيارات جديدة (موديلات 2015 - 2016)
ثانياً سائق محترم جداً جداً جداً
ثالثاً أجرة متواضعة بالمقارنة بالتاكسي
رابعاً بيروح اي حتة تقولوا عليها - حتي لو مكان غير اللي انت حددته اثناء الطلب وكمان انت اللي بتختار خط السير سواء مثلا دائري او من البلد او يمشي من هنا او من هناك
خامساً ممكن يستناك تنزل تشتري حاجة وترجعله تاني
سادساً بيجيلك لحد عندك وانت قاعد باشا في بيتك وبيكلمك علي حسابه يعرف مكانك بالظبط او يقولك انا وصلت
سابعاً تقدر تحاسب بالفيزا او كاش او تقسم الأجرة مع زميلك لو هو كمان مشترك في أوبر
ثامناً ودي ميزة جامدة اوي انك لو رشحت اوبر لحد من زمايلك واستخدمه - ليك علي كل حد استخدمه رحلة مجانية بحد اقصي 70 جنيه


ازاي اوبر بيحاسبك؟؟؟

اولاً الرحلة بتبدأ من اول لما تحط رجلك في العربية وليس من اول الطلب
يعني احياناً كتيرة كنت بطلب العربية وبتجيلي تقريباً من المكان اللي انا اساساً رايحه (في المشاوير الصغيرة اللي جمب البيت) ومع ذلك بيتم الحساب بمجرد لما بركب ومن حقي كراكب ان السواق ينتظرني 5 دقايق وبعد كدة يبدأ الرحلة حتي لو انا لسة مركبتش

أجرة الرحلة بتتحسب بأكتر من معامل
1- مسافة الرحلة (بالميل)
2- زمن الرحلة (بالدقائق)
3- حالة المرور وساعات الزروة المحددة مسبقاً
4- أجرة بداية الرحلة المحددة مسبقاً
5- الحد الأدني للأجرة المحددة مسبقاً

اولاً فتح او بداية الرحلة ب3 جنيه
كل كيلومتر ب1 جنيه و30 قرش (130 قرش)
كل دقيقة اثناء الرحلة ب20 قرش
الحد الأدني للأجرة 10 جنيه حتي لو ركبت 100 متر وزمن الرحلة دقيقتين
أوقات الزروة بالأضافة لحالة المرور بالأضافة لمدي توافر العربيات بيحدد قيمة الأجرة سواء كانت بالحسابات السابقة او انه يضرب الأجرة في 1.X يعني ممكن يضرب الأجرة في 1.3 او 1.4 او 1.5 او اعلي نسبة 2.0 يعني تبقي الأجرة مضاعفة

طبعاً الـGPS زي ما قولنا في البداية هو الفيصل بينك وبين السواق في الحسابات
يعني الـGPS هو اللي بيحدد المسافة بناء علي خط سيرك كذلك زمن الرحلة (توقيت البدء وتوقيت الوصول او انهاء الرحلة) بالأضافة لحالة المرور وكل المعاملات اللي ذكرتها من شوية.


شروط السلامة والأمان

أولا مش اي عربية بتتقبل في أوبر
يعني مثلا لازم تكون عربية حديثة ماعداش علي موديلها 5 سنين وشكلها كالزيرو بالأضافة انها لازم يكون فيها ABS - Air Bags وباقي مواصفات الأمان العادية زي احزمة الأمان وخلافه

ثانياً بمجرد طلب أوبر وموافقة السائق علي الطلب بيظهر أسمه وصورته ونوع عربيته ورقمها

ثالثاً سجل رحلاتك بيكون فيه مساعدة تقدر من خلالها ترجع للشركة في حالة اي شكوي زي مثلاً مشكلة مع السائق او مع العربية او فقدت امتعتك او الأجرة غالية او اي شكوي اخري من وجهة نظرك

رابعاً لو انت طلبت أوبر للبيت عندك انت بتكون شايف العربية علي الخريطة ومتابع خط سيرها

خامساً السائقين بيخضعوا لتدريب للتعامل مع الركاب بالأضافة للفحوصات الطبية

سادساً كل سائق بيكون ليه تقييم انت بتعمله في نهاية كل رحلة وبالتالي لو سائق مش كويس كأخلاق او كسواقة بيتم استبعاده بناء علي تقييمات الركاب وشكاويهم منه وبالتالي انت بتضمن ان السائق كويس بناء علي تجربة الغير


ملاحظات

- تقدر تسجل في البرنامج مكانين (Home - Work) ودي بتفيدك لو بتروح مكانين بشكل متكرر وبالتالي بتساعدك كتير في سرعة الطلب

- الأحسن انك قبل الطلب تحدد مكانك بدقة لأن زي ما قولت في الأول عيب البرنامج انه مش بيحدد مكانك بدقة وبالتالي السواق يقدر يوصلك بسهولة لو استخدم الـGPS

- بنفس المنطق الأحسن انك تحدد الـDestination او المكان اللي انت رايحه بدقة قبل الطلب علشان تساعد السائق انه لو استخدم الـGPS يوصل بسهولة

- وانت بتطلب لو لقيت ان الحساب هيكون بنسبة كبيرة زي مثلا ان المشوار هتكون اجرته 1.8 او 2.0 استني دقيقتين وارجع اطلب تاني هتلاقي النسبة قلت شوية


التجربة بصراحة كانت تستحق الكتابة لأني معجب جداً بالفكرة وبالموضوع

تحياتي للجميع

[غزلة]

حاجة جميلة ؛ بس انا سمعت ان لازم فيزا كارد لا يوجد تعامل كاش ؟

[A_H_M_A_D]

انا لسه مجرب الخدمة دي من اسبوع بس , بصراحة حسيت انه اختراع , ومبسوط قوي ان مصر فيها حاجه منظمة كده وبالجمال ده

انضف من التاكسيات 100 مرة , كفاية انك بتركب مع ناس واضح ان مستواها اجتماعيا عالي , وغالبا بيكونو اصحاب العربيات نفسها , وطبعا الاسعار أقل من التاكسي

[YaSSerwIN]

الكاش اتفعل فيها مش شرط فيزا بس

[Mohamed_Hamid]

جربته كذا مرة ورائع جدا فعلا

[Mohamed_Hamid]

فيه نقطة مهمة كمان ان لما تركبوا مع اوبر اتاكدوا فى نهاية المشوار ان السواق عمل انهاء للرحلة من الابليكشن علشان بعضهم ممكن ياخد لفتين تلاتة علشان يحملك فلوس اكتر.

[aymanshebl]

شكرا

[acura]

مراجعة شاملة ورائعة للخدمة الف شكر

[JOKER_KLEN]

طيب وبالنسبة لو الزبون قالى استنيى فى مكان معين والزبون خرج من مكان تانى ومشى وسب الراجل واقف مستنى الزبون ولا جاش يابقه ايه الحل ؟؟؟؟؟؟؟؟؟

[waelfarid]

ايه الحلاوة دي
ايشي خيال يا ناس
بقاله قد ايه المشروع ده
وماذا عن .......مين اللي مركبهم معاك دول وهات رخصك وكدة ؟؟؟؟؟

[samyyousef]

تجربتي معه كانت ممتازة بنسبة 90%
لكن فيه موقف حسسني ان التاتش المصري حايأثر فيه
كنت اعاني من مشكلة في ركبتي و كانت معي شنطة ثقيلة و حقيبة اخرى، لاحظت ان قائد السيارة لا يرغب في التعاون معي في وضعها بالشنطة...و لمح لي فيما معناه انه ليس سائق...في حين ان التعاون في مثل هذا الظرف ليس له علاقة بانك سائق او دكتور............
و اتوقع - و يارب مايحصلش - انه مع انتشارة و زيادة المنضمين له من اصحاب العربيات او الراكبين حاتظهر المشكلة دية بوضوح... ان قائد السيارة حايحاول بكل الطرق يؤكد للراكب انه مش سواء عنده...و بعض الركاب مش حايفهموا طبيعة الخدمة....باختصار الحساسية و النفسنة حاتبوظ الخدمة

[memo_p910]

جربته في مشوار طويل وكان رائع بصراحه

[Aboibrahim0100]

ازاى احمل البرنامج ده واشتغل عليه انا حاولت انزله من iOS مفيش فيه مصر أرجو الافاده

[Elawany13]

بس ازاي الملاكي يشتغلوا اجره.... ده مخالف لقوانين المرور

[gade2]

تجربتي معه كانت ممتازة بنسبة 90%
لكن فيه موقف حسسني ان التاتش المصري حايأثر فيه
كنت اعاني من مشكلة في ركبتي و كانت معي شنطة ثقيلة و حقيبة اخرى، لاحظت ان قائد السيارة لا يرغب في التعاون معي في وضعها بالشنطة...و لمح لي فيما معناه انه ليس سائق...في حين ان التعاون في مثل هذا الظرف ليس له علاقة بانك سائق او دكتور............
و اتوقع - و يارب مايحصلش - ان[overline]ه مع انتشارة و زيادة المنضمين له من اصحاب العربيات او الراكبين حاتظهر المشكلة دية بوضوح... ان قائد السيارة حايحاول بكل الطرق يؤكد للراكب انه مش سواء عنده...و بعض الركاب مش حايفهموا طبيعة الخدمة....باختصار الحساسية و النفسنة حاتبوظ [/overline]الخدمة

هى دى المشكله فى مصر كل حاجه فى بدايتها كويسه