العربية مركونة من ٩ شهور ايه الصيانة المطلوبة

[Mohamed hider]

السلام عليكم

العربية مركونة من ٩ شهور من غير ما تدور ،، كنت مسافر و حاططها ف جراچ ، ايه الصيانة المفروض اعملها ما اجي اشغلها تاني ؟

*العربية تويوتا كورولا ٢٠١٠

[Sherif Mandoor]

تغيير زيت الموتور وزيت الفرامل ومياه التبريد
تغيير السيور والبوحيهات والكشف علي تيل الفرامل
زيت الباور وزيت الجير

[mosaad mohsen]

زي مقلك ا/ شريف بضبط
زيت متورك زيت الفتس زيت الفرامل مع تغيير السيور وتيل الفرامل والكوتش والبطريه اكيد باظت وتشك علي العفشه والبجهات تتغير
بس يريت الزيوت والفلاتر والسيور ودورة التبريد وهي وقفه مكنها اما بلنسبة للباقي ممكن تتحرك وتعمله في اي مركز صيانه ونصيحه ممكن تتصل بشل تيجي لحد عندك وتعمل كل ده
اسف علي الاطاله

[Mohamed Desoky]

يعنى طول ال 9 شهور دول مفيش حد دورها خالص ؟ لازم ميكانيكى هو اللى يدور الموتور لان الموتور ثابت على وضع البساتم والشنابر قفشه عليه لازم الموتور يلف يدوى فى الاول لحد ماالبساتم والشنابر تخرج من وضع الثبات والتمركز اوعى تدور الموتور بلمارش لازم تلف الكرنك يدوى دى اول نصيحه وتعمل زى الاخوه الزملاء ما قاله السيور كلها تتغير لانها من الركنه انكمشت وشققت والزيوت بانواعها موتور وفلتر زيت جديد زيت فيتيس زيت فرامل فلتر بنزين زيت باور ؟ المهم لازم تلف الموتور يدوى وربنا يوفقك

[borio1704]

لو ما كنتش غيرت خراطيم المية قبل كده توقع إنها ممكن تعمل معاك حركة نقص..

بشكل عام.. أي جزء كاوتش عمره حوالي 5 سنين... ويوم ما يطول مش هيزيد عن 7 سنين.


...

[tasaka]

عن نفسى

- ساقيس مستوى الزيوت كلها .. و ادور العربيه .. تغيير زيت الموتور فقط لاغير فى اسرع فرصه

- لو العربيه مانيوال ممكن انى اعشق نقله و ازق العربيه نصف متر للامام و الخلف .. كنوع من التأكد قبل تدوير الموتور

- و ممكن لو فيه ميكانيكى قريب .. اخليه ييجى و يشيك على العربيه و يدورها

[hayway90]

هات فنى كويس يكشف على العربيه و متغيرش اى حاجه من نفسك علشان متغرمش على الفاضى لانك لن تعوض الاجزاء الاصليه ان كانت سليمه.

[mizomizomizo]

انا عندي عربية مرفوعة بالثلاث سنين وكل ماجي ادور اجيب مكانيكي يدورها العربية بيجو كربارتير وبدو بعد عدد محلات وبغيز زيت ماتور ومرة كان في قفل علي التكيف وي لمبة زيت وحساس زيت وتشيك بشكل عام وغسلة كويس و بتسافر بدون مشاكل

[S O P H O S]

تغير الزيت والتاكد من مستوي الميه والكشف
علي دورة الميه ومستوي الزيوت الاخري فقط
لا داعي لتكبير الصيانة غير للحاجة الي محتاجة تتغير فقط فرأي

[memoo305]

ولا أي حاجة
حضرتك تشيك على مستوى الزيوت والمياه واضغط الكاوتش وتتوكل على الله وتدورها.
بعديها تطلع على المحطة أو مركز صيانة (اي كان الي بتتعامل معاه) تغيير زيت وتظبط كاوتش
عربيتك مركونة لعدة شهور وليس 9 سنوات