بتعلم السواقة وكرهتها لسة مخضوضة من اللى حصل

[Lolo86]

السلام عليكم

انهردة كان تالت يوم لى احتكاك مع المواصلات

بعد مالحمدلله جمدت قلبى وقررت انزل شوية

بعد مكنت فى الفاضى بس

ماشية فى حالى لاقيت عالرصيف مجموعة شباب

عايزين يعدوا عملت كلاكس يعنى استنو متعدوش

وفعلا وقفوا

وفجاة لاقيت واحد من الولاد دول معرفش بيعاكس ولا ايه

راح واقف قدام عربيتى فجاة ياريته عدى لا ده رمى نفسه على


ووقف قدام عربيتى ربنا يسامحه

دوست فرامل فجاة والله بينى وبينه ثانية وكنت حخبطه

طبعا اللى ورايا ميعرفش انى حقف

الحمد لله فرمل على اخر ثانية وكان حيخبطنى من ورا


والله نزلت لاقيته يدوب لامسنى بس مش خبطنى

بس اللى وراه هو خبطه ملحقش يفرمل بس الحمد لله برضو بسيطة
كل ده عشان فرملت فجاة

طبعا وقغت شوية ابص للولد باندهاش ورعب وخوف

ومقدرتش انطق كلمة من الرعب

الحمدلله صحبتى اللى بتعلمنى جنبى هدتنى

و قلتلى لو منك حدخل فيه هو اللى غلطان

انا يا جماعة اهم حاجة عندى ارواح الناس

فرملت فجاة عارفة انه غلط عشان لو مفرملتش

كنت دسته والله

بس الناس هزقوه وقاموا بالواجب

وهو اعتذر كل ده فى لحظة الاندهاش اللى سيطرت على

ولغاية دلوقتى ايدى وجعانى ورجلى ومخضوضة

معلش انا غلطت اما وقفت مين اللى غلط مش فاهمة اى حاجة

والمفروض اعمل ايه كرهت السوقة ومش حابة انزل تانى

لسة مرعوووبة بعد مكنت جمدت قلبى رجعت لنقطة الصفر

حاسة انى مش حقدر اسوق تانى خلاص

يمكن تحسوه موضوع تافه بس بتكلم جد

كل حاجة وجعانى ايدى بترتعش لسة ورجلى وقلبى

والموقف قدامى لو حياقبلنى ناس كدة بلاها سواقة احسن

ساعدونى .....

[volociximab]

انت مش غلطانة...الى يخبط فى عربيتك من ورا هو الغلطان بعيدا عن قوانين الغابة اقصد الشارع المصرى...في السعودية اي واحد يخبط عربية من ورا بيتحمل الخطأ ميه في المية بغض النظر عن ظروف الحادث
انت عملتى الصح و الى وراكي المفروض يقدر الامور و مفيش حاجة اسمها تدهسى واحد عشان بيستهبل

[rotanamasoud]

قاعده 1 لسواقه الستات
لو مش حتقدرى تتعاملى سورى فى الكلمه اصيع من الرجاله حتتبهدلى ومش حينفع تسوقى فى مصر
لازم تكونى مستعده لمواقف من
توكتوك
ميكروباص
شباب
سواقين التاكس
لانهم ممكن يعملو تزنيق حك قله ادب معاكسات واستظراف فى صوره تزنيق

[bluemail]

اهدي يا حاجه، عادي بتحصل
بصي جمدي قلبك انتي هتشوفي اكتر بكتير من ده
للاسف في ناس مريضه مابتصدق تشوف واحده سايقة عربية
نصيحة خلي اعصابك في تلاجه

[Lolo86]

انت مش غلطانة...الى يخبط فى عربيتك من ورا هو الغلطان بعيدا عن قوانين الغابة اقصد الشارع المصرى...في السعودية اي واحد يخبط عربية من ورا بيتحمل الخطأ ميه في المية بغض النظر عن ظروف الحادث
انت عملتى الصح و الى وراكي المفروض يقدر الامور و مفيش حاجة اسمها تدهسى واحد عشان بيستهبل

هو ده اللى عملته وصحبتى قلتلى كنتى دخلتى فيه
طاب ازاى يعنى

هو تقريبا اللى ورايا واللى وراه لازقين فى بعض

مش سايبين مسافة هو لازق فى واللى وراه لازق فيه

دى مشكلة كتير وعلمتنى احافظ على المسافة بينى وبين اللى قبلى

ميرسي لردك واهتمامك

انا مش مستوعبة عمل ليه كدة معقولة يعنى بيغلس

ايه الاستظراف ده

[Lolo86]

اهدي يا حاجه، عادي بتحصل
بصي جمدي قلبك انتي هتشوفي اكتر بكتير من ده
للاسف في ناس مريضه مابتصدق تشوف واحده سايقة عربية
نصيحة خلي اعصابك في تلاجه

طيب برضو المفروض اعمل ايه اشتمه مثلا ازاى انا هادية اصلا وخجولة وصوتى واطى مقدرش اعمل كدة

لانه كتير قالى انه لازم اتعلم الرد والشتيمة مع اللى زى كدة

بس انا مش كدة

[Lolo86]

قاعده 1 لسواقه الستات
لو مش حتقدرى تتعاملى سورى فى الكلمه اصيع من الرجاله حتتبهدلى ومش حينفع تسوقى فى مصر
لازم تكونى مستعده لمواقف من
توكتوك
ميكروباص
شباب
سواقين التاكس
لانهم ممكن يعملو تزنيق حك قله ادب معاكسات واستظراف فى صوره تزنيق

انا بطبيعتى هادية وخجولة وصوتى واطى

استحالة ابقى كدة ولو اتغير بنسبة قليلة

مقدرش مقدرش انزل واشتم وازعق


وفعلا ده بيستهبل رسمى لانى بنت ربنا يسامحه

[bluemail]

طيب برضو المفروض اعمل ايه اشتمه مثلا ازاى انا هادية اصلا وخجولة وصوتى واطى مقدرش اعمل كدة

لانه كتير قالى انه لازم اتعلم الرد والشتيمة مع اللى زى كدة

بس انا مش كدة

لا تشتمي ولا حاجه، تجاهلي الاشكال الضاله دي، دايما حاولي تقصري في الحوار
يعني كلمتين وبس، للراجل اللي وراكي انا اسفه بس واحد عدي قدامي فجاه
للحيوان الناطق اللي رمي نفسه علي عربيتك، انت ايه مابتشفش

وبس تدخلي عربيتك وتقفلي الازاز وشكرا
المهم انك تبقي عارفه ان الاشكال دي كتير وهيقابلك منهم كتير

[ahmed_wagih]

السواقة فى مصر ليها طبيعة خاصة وهى ان اغلب المشاكل بتكون بسبب اخطاء الغير اتعملى اية لو ماشية على طريق مفتوح وميكروباص او سواق تاكسى رمى عليكى او وقف مرة واحدة علان ياخذ زبون او سواق توك توك

الخلاصة توكلى على الله ومتخفيش والموضوع مش مرتبط ب انك لسة بتتعلمى فيه ناس محترفين سواقة وبسبب اخطاء الغير بتحصل لهم مشاكل

كل ما اتسوقى وتنزلى اتكتسبى خبرة التعامل مع اخطاء الغير واتتعلمى متخفيش وجمدى قلبك

[sherif_mahalla]

حسب كلامك و الموقف زي ما حكيتيه
الناس دي شافتك و انتي جايه واضح عليكي الارتباك
و هديتي السرعة بتاع العربية عشان كده اتجرأ و ووقف قدامك
طبعا هو مش أهبل و عارف إنك هتفرملي و تقفي و لو مفرملتيش كان هيجري بس طبعا ده لو انتي ماشية بسرعة مش هديتي
المفترض حاجه من اتنين لما تلاقي ناس عايزة تعدي قدامك بمسافة
لو فيه عربيه قدامك أو صف عربيات و مفيش مطبات و لا حفر و لا أي عطلة و لا زحمة
إما تشدي بالعربية و انتي داخله عليهم و تقربي قدر الإمكان من العربية اللي قدامك و تجمدي قلبك فساعتها هيرجعوا و محدش أهبل هيرمي نفسه عليكي بس دي عايزة احساس بالعربية و الطريق و احترافيه شوية
إما تهدي بالعربية و تسيبيهم يعدوا و ممكن تشاوري بإيدك ليهم يعدوا و لو هتقفي شغلي اشارة الإنتظار و ده الحل الأمثل في حالتك لأن ده مش محتاج إحتراف و لو هما غلسوا عليكي ساعتها اي غضنفر وراكي هيربيهم ده إن معداكيش و دهسهم

نصيحة
من اللي بنشوفه في شوارعنا الجميلة
متنزليش من عربيتك تحت أي ظرف
لو حد خبطك من ورا من الجنب من قدام من فوق حتي
اتعاملي و انتي جوا العربية و واربي الزجاج بحيث محدش يعرف يلمسك و اقفلي اللوك كمان عشان تأمني غدر الناس
و مروريا مشكلتك في الأساس لو انتي خبطتي العربية اللي قدامك مش اللي وراكي خبطك
يعني متحمليش هم انك تفرملي فجأة قوي , طبعا متجيش قدام حد بيشد وراكي و تكبسي فرامل بس أقصد لو مثلا اتفاجئتي بعربية قدامك أو حد عدى أو حفرة أو حيوان فرملي جامد لما يخبط فيكي من ورا أحسن ما تخبطي حد أو عربية من قدامك
و بالنسبة للسواقة في أم الدنيا لسه مشوفتيش حاجه
لو ده اللي هيخليكي تبطلي سواقه
بطلي من دلوقت احسن
مالها التاكسات و المكروباصات و الأتوبيسات و التكاتك؟
أو حتى هاتي عربية بسواق
هيعفيكي من مسئولية القيادة و تعبها

[mbx4e]

عادي كتير بيحصل في الشارع !!!!!
لدرجة الستات بقت هي اللي بتزنق عشان حد تاني زنق عليها !!!!!!!!!!!
تقوم هي راميه على جنبها !!!!!!!!!!
او
ماشي او ماشيه معطلين الشارع او الطريق او الكوبري او المحور بيشوف او يعمل لايك على الفيس او بيرغي في التلفون بحجة الشغل.
والله احنا في زمن النفخ اتمنى ان اللي بيعلم حد سواقة يعلمه معاه الذوق .
وازاي يمشي في حاره صح وازاي يدي اشارة صح وياخد يمين او شمال صح من وسط الطريق وازاي يبص على الطريق صح وازاي مايزنقش او يمشي بالكلاكس او يراعى ابعاد الامان والسرعة والتجاوز.
اما حتة الدركسيون والبنزين والفرامل كله بيعرف او هايعرف لكن فين ذوق السواقة بتاع زمان ومراعاة اداب الطريق والسلامه.

[Colin Chapman]

عادي كتير بيحصل في الشارع !!!!!
لدرجة الستات بقت هي اللي بتزنق عشان حد تاني زنق عليها !!!!!!!!!!!
تقوم هي راميه على جنبها !!!!!!!!!!
او
ماشي او ماشيه معطلين الشارع او الطريق او الكوبري او المحور بيشوف او يعمل لايك على الفيس او بيرغي في التلفون بحجة الشغل.
والله احنا في زمن النفخ اتمنى ان اللي بيعلم حد سواقة يعلمه معاه الذوق .
وازاي يمشي في حاره صح وازاي يدي اشارة صح وياخد يمين او شمال صح من وسط الطريق وازاي يبص على الطريق صح وازاي مايزنقش او يمشي بالكلاكس او يراعى ابعاد الامان والسرعة والتجاوز.
اما حتة الدركسيون والبنزين والفرامل كله بيعرف او هايعرف لكن فين ذوق السواقة بتاع زمان ومراعاة اداب الطريق والسلامه.

[tasaka]

معلش انا غلطت اما وقفت مين اللى غلط مش فاهمة اى حاجة

طبعا لازم تقفى .. و شيلى اى فكره تانيه من دماغك

ارواح الناس موش لعبه .. و لو لا قدر الله تسببتى فى حاجه زى كده .. قضايا و محاكم و عقاب .. اعتقد بتكون قتل خطا او حاجه زى كده موش متاكد .. بس الاكيد الموضوع بيكون فيه عقاب و احكام

هو ده اللى عملته وصحبتى قلتلى كنتى دخلتى فيه
طاب ازاى يعنى

هو تقريبا اللى ورايا واللى وراه لازقين فى بعض

مش سايبين مسافة هو لازق فى واللى وراه لازق فيه

دى مشكلة كتير وعلمتنى احافظ على المسافة بينى وبين اللى قبلى

ميرسي لردك واهتمامك

انا مش مستوعبة عمل ليه كدة معقولة يعنى بيغلس

ايه الاستظراف ده

صاحبتك اللى قالت لكى خشى فيه .. دى بتنصحك بمصيبه كبيره ليكى .. دى لا تاخذى نصايحها تانى على الاقل فى السواقه

كويس انك اتعلمتى تحافظى على مسافه بينك و بين اللى قدام .. المسافه دى تزوديها كل ما السرعه بتاعتك كانت اعلى

و فى جميع الاحوال حتى لو سائق محترف .. المفاجات وارده .. و لا تترددى فى استعمال الفرامل لحفظ حياه انسان .. لمصلحتك و لمصلحته و مصلحه اسرته

ربنا يسهل لكى امورك .. و لا تبدئى القياده فى الزحمه صباحا .. ابدئى فى المساء عندما تكون فيه زحمه بس موش كتيره