ليه يا جماعة مكتوب فى الجرايد كلام و الحقيقة كلام تانى خلاص

[Hacker5]

واحد قريبى عايز يشترى دايو لانوس زيرو
شاف فى الجرنان فى المصرية للسيارات ان مقدم السيارة 6350 و قسط شهرى 435 جنية
فانزلنا نلف على المعارض (مش المصرية) معارض تانية

فهو كان معاه مقدم 25000 الف

و كل لمان نروح معرض يقول القسط هايبقى 1038 للانوس Se و 1141 للانوس S
فسألت صاحب المعرض قالى انا دة كلام جرايد و روح هاتسمع كلام تانى

انا مش فاهم يعنى كلام تانى و هما ليه كتبين كدة فى الجرايد
و ياريت لو حد يعرف معرض يكون القسط فيه 700 او 800 يقولى عشان الواد محتاس و الاقساط كبيرة عليه

فياريت اى معرض يكون فيه القسط بالسعر دة و عايز اعرف ايه حكايت المصرية للسيارات فى حوارات القسط و ليه كتبين ارقام كدة و خلاص انا لسة مرحتش للمصرية طبعا لكن كل اصحاب المعارض خوفونا منها

انا اسف على كثرة اسالتى

[معاذ الشرباصى]

المصرية دول نصابين كبار جدا

حاول تبعد عنهم, و اللى هما كاتبينه فى الجرنان مش الحقيقة للاسف

هل حاولت مع كونتكت؟

[معاذ الشرباصى]

كونتكت هتعمل حوالى 1050-1150 لو على خمس سنين

فى بنك ابوظبى بيقسط بفايدة ثابتة 7%, و بنك ناصر ب 6%

حاول تشوف المعارض اللى بتتعامل مع دول, بس مع بنك ابوظبى التأمين اجبارى لكن مع بنك ناصر لأ

[mada121977]

الاستاذ الفاضل Hacker5 فعلا كل اللى بيكتب فى اعلانات المصريه كلام جرايد و نصب فى نصب هما بيحطوا اقل مقدم مع اقل قسط و بيوهمك فى الاعلان ان المقدم ده بتاع القسط اللى جنبه و الحقيقه غير كده خالص هوا بيحط مقدم قليل و لما بتروح لهم بيقولولك ان القسط بتاعه كبير و العكس القسط القليل المقدم بتاعه بيكون كبير و الفايده يكتبلك انها 6% او 7% و لما بتروحلهم برده بيقولولك ان الفايده دى على الودائع يعنى اللى عنده وديعه بتمن العربيه كلها ( طب اللى معاه تمن العربيه كلها يحطها وديعه و يقسط لييه ما يجيب كاش احسن ) كله يا استاذى الفاضل نصب و ضحك على الزبون لغايه ما يجيب رجله
انا عن نفسى مقسط تبع معرض فى مدينه نصر اسمه ( موتور وان ) امتداد عباس العقاد قدام شركه انبى للبترول على طول
و صاحب المعرض صديق عزيز قوى اذا كنت حضرتك عاوز تستفسر على اى حاجه و نظم التقسيط عندهم انا تحت امرك

[hazem_khidr]

بيحطوا اقل مقدم مع اقل قسط و بيوهمك فى الاعلان ان المقدم ده بتاع القسط اللى جنبه و الحقيقه غير كده خالص هوا بيحط مقدم قليل و لما بتروح لهم بيقولولك ان القسط بتاعه كبير و العكس القسط القليل المقدم بتاعه بيكون كبير و الفايده يكتبلك انها 6% او 7% و

بالضبط كده و المصريه بالذات اساتذه في الحاجات دي.و كمان الفايده بيزودوها كل سنه .
بس لعلم حضرتك موضوع 600 او 700 جنيه دي مش حتلاقيها لانه مع التقسيط 5 سنين و الفايده 8 او 7% زي معم المعارض و البنوك مش حتلاقي قسط بالتمن دا خالص

[Nader]

دة كلة ضحك على الدقون علشان يجر رجل المشتري وخلاص.

[AhmedElsayed]

حيلاقى ان شاء الله

عليك وعلى بنك ناصر لانه بيقسط على سبع سنين بقايدة 6%
دى اطول فترة تقسيط واقل فايدة فى مصر كلها
فكده القسط ممكن يقل صحيح الفترة اطول بس حسب ظروفه

هو بنك متخلف فى اجرائته بس اهو افيدله

[محمد البحيري]

ابعد عن المصريه تماما والاخوه الاعضاء وضحولك الاسباب
ده اذا كان بيغشك في اعلانه هتامنله في عربيتك :roll: :?:

[Islam_galal]

الاستاذ الفاضل Hacker5 فعلا كل اللى بيكتب فى اعلانات المصريه كلام جرايد و نصب فى نصب هما بيحطوا اقل مقدم مع اقل قسط و بيوهمك فى الاعلان ان المقدم ده بتاع القسط اللى جنبه

تحيا جمهورية مصر العربية
:twisted: :twisted: :twisted:

[goodwave]

"المصرية" دول حرمية ابعد عنهم!

انا رحت مره عندهم ومعايا جرنال أهرام الجمعة ومكتوب فية اعلان ليهم بيقول مقدم 10% فقط! العيال بتوع المبيعات اللي هناك قالوللي منعرفش حاجة عن النظام دة ! دة اكيد نزل غلط! ولما عملتلهم "بالو" ووريتهم الجرنال جالي مدير المبيعات وقالي كلام الاعلان مظبوط بس لسة ما اطبقش في الفرع بتاعنا!!! والله عيب واستخفاف بعقول الناس!

طبعا هما حطوا الاعلان دة علشان يضربوا في باركليز اللي كان عامل العرض بتاع ال 10%.

[Hacker5]

واللهى يا جماعة انا مش عارف اقولكوا ايه بجد شكرا جدا على مساعدتكم ليا

ام بالنسبة لبنك ناصر هوا فين بالظبط و يا ترى لو دفع مقدم 25000 هايبقى القسط كام بالظبط؟
هوا كويس بصراحة الفايدة قليلة و القسط اطول يعنى ممكن يكون القسط 700 او 800 جنية

انا اسف يا جماعة تعبتكوا معايا واللهى نا اسف عشان قريبى دة واللهى متبهدل من غير عربية

ارجو الرد على استفسارى بخصوص بنك ناصر

[Hacker5]

يا ترى لما يروح البنك يقولهم ايه؟
و ياترى البنك هوا اللى هايجبلو العربية ولا يعرف منين ان المعارض ممكن تقسط مع بنك ناصر
او الحوار كله هايبقى ازاى
ارجو من الجميع و الاستاذ AhmedElsayed مساعدتى

و الاستاذ mada121977 هوا المعرض هايرضى يقسط بـ 700 او 800 جنية :D ؟

[معاذ الشرباصى]

ببساطة هو يروح البنك و يقدم على طلب

و هما هيعملوا استعلام ائتمانى عليه

بعد كده بيجيب عرض سعر من معرض متسجل عن بنك ناصر (معارض كتير متسجلة عنده, بس هو يسأل المعرض نفسه)

ده اللى انا اعرفه

[Hacker5]

يسال المعرض عن ايه بالظبط؟ و يعنى ايه يجيب عرض سعر سعر من معرض متسجل عن بنك ناصر؟
و هل ممكن القسط يوصل 700 او 800 جنية

معلش يا استاذ معاذ الشرباصى وجعتلك دماغك

[AhmedElsayed]

تمام زى مالاستاذ معاذ قال بالظبط
هو بنك ناصر مبيبعش عربيات لكن متعاقد مع معارض كتير وتوكيلات علشان يقسطوزا من خلاله زيه زى اى بنك يعنى
المهم انت ممكن تروح اى فرع لبنك ناصر وتسال على السعر حيبقى كام
مع انك ممكن تحسبها بسهولة يعنى لو تمن العربية مثلا 60 الف جنيه حتدفع منهم 25 الف يبقى حتقسط 45الف ن

شوف ال 45الف دول فى 42% (اللى هم 6% فى سبع سنين) = حوالى 19 الف
19 الف + 45 ألف = 64
64/84 شهر = 760 جنيه تقريبا
طبعا بيبقى فى مصاريف ادارية وطبعا انا مش عارف تمن عربيتك بالظبط كام بس يعنى ده تقريبيا
برده لو عايز تسال بنفسك ممكن تروح بنك ناصر وده فروعه فى وسط البلد شارع قصر النيل بعد البنك المركزى او فى الكوربة جنب الشهر العقارى اللى هنا او فى شبرا قدام محطة المترو علطول وطبعا الدليل ممكن يدلك بالظبط على عنوانهم

او بسهولة فى كل الجرايد حتلاقى ناس منزلة اعلانات تقسيط على 84 شهر دى بتاعة بنك ناصر اتصل بيهم فى التليفون وسالهم لو حتدفع 25 الف يبقى القسط كام (بس خلى بالك علشان حيحاولوا يزهقوك من بنك ناصر ويخلوك تروح بنك تانى لانه بيقرفهم على ما يخدوا فلوسهم)

روح البنك ومش حتخسر حاجة وسيب صورة بطاقتك علشان يعملوا استعلام عنها (وده بدون اى التزام منك) واعرف كل التفاصيل عجبتك كان بها معجبتكش مخسرتش حاجة
هما بس حيقرفوك فى حكاية الضمانات والكلام ده