(طلب نصيحة) خطوات يجب اتباعها عند استلام سيارة جديدة

[wahba87]

بسم الله الرحمن الرحيم

بكرة ان شاء الله هنجيب كورولا advanced 2009 من التوكيل فى العباسية

الراجل قالنا هنستلمها و احنا واقفين اول ما نديله الشيك

تنصحونى اعمل ايه اول ما استلم العربية ؟



على فكرة الراجل قالنا ان الزينون مش بينزل على الرخصة بس مش هيكون مخالفة لانه جاى مع العربية

كمان هل ممكن امشى بيها كده من غير نمر لحد ما تترخص , ولا لازم اشترى نمر تجارية ؟

خصوصا ان احنا هندفع بشيك , فا الراجل قال هسلمك العربية بس مش هسلمك ورقها لما الشيك يتحصل !

_____________________

حاجة كده بره الموضوع بالنسبة لسعر العربية:


اولا احنا روحنا سمير ريان و اتكلمنا فكل حاجة و اخر كلام ان سعر العربية كاش 154,000 (يوم الجمعة)

روحنا التوكيل السبت و هناك قالنا سعر العربية 155 الف نهائى , و قالنا ان السعر هيزيد ولازم نلحق بسرعة نحجز حتى (الحجز = 50 الف)

روحنا التوكيل يوم الاحد نعمل تيست دريف , وفعلا عملنا و العربية عجبت والدى جدا الحمد لله , بس الراجل قالنا السعر زاد الى 159,000 وورانا الميل على الكومبيوتر (البروفيشنال زادت الى 138,000) , بعد شوية كلام و السوق نايم و كده و ان احنا اتكلمنا على السعر القديم , اتفقنا ان احنا هناخد العربية على 150,000 قبل نهاية الاسبوع , و بعد كده السعر هيبقى 159 الف !

يوم الاثنين كلمونا بتوع سمير ريان و قالولنا ان العربية سعرها هيزيد اخر الاسبوع (شكل الكلام بجد)

معلومة اخيرة , التوكيل و المعرض فاضيين تماما


مع كامل اعتذارى لحملة خلوها تصدى , بس العربية تبع شغل والدى وهو دلوقتى 59 سنة الا شهر , وان شاء الله لما يخرج معاش هياخدها , فلازم كان نشتريها دلوقتى


ادعولنا ربنا يباركلنا فيها ان شاء الله و يدينا خيرها و يكفينا شرها , اللهم امين

[حماده المصري]

ربنا يباركلك فيها يارب ويديك خيرها ويكفيك شرها

الخطوات الى المفروض تعملها

انت بتستلم يا مكن يكون في وصل وممكن ميكونش في وصل بالمبلغ

بس الاساسي اخطار ان العربيه بقيت مسؤول عنها واستملت كل ملحقاتها وانها في مسؤوليتك
باقي اوراق العربيه بتاعه المنشاء والجمارك تقريبا بتستلمها بعديها بيوم مثلا ولو قالولك بعد كام يوم او اسبوع شد عليهم وقولهم لا تاني يوم علطول والمفروض يكون في حركه شيك برضو يبعتوا حد يرخص معاك مثلا عربيتي لما اشتريتها من معرض عملوا كده معايا بالضبط من ناحيه الورق استهبلوا وقالوا 3 ايام وانا رفضت وقولت لا بكره وزودوا فلوس 200 جنيه تقريبا قالولي عشان الورق وبعتوا حد يرخص معايا وكان فعلا منجز عارف كل الي في المرور ورخصت وانا رايح متاخر اساسا ومكنش فيه نمر بس الراجل عمل الصح

لازم تتاكد من الاسبتن والعده والولاعه وشييك على العربيه من كل ناحيه عشان الخبطات وخدلك لفه بيها كمان تتاكد انها مثلا مش بتحدف او الكلام الي من ده وبعد كده استلم
لازم نمر تجاريه طبعا لحد ما ترخص اسئلهم تجيبهم منين وبكام عشان معنديش فكره وخلي الاخطار معاك عشان لو حد كلمك وانت راجع تقوله انا لسه مستلم دلوقتي

بالنسبه لموضوع الزينون والفاميه الخلفي المفروض ان العربيات الي بتنزل ستوك بيهم يثبتوا على الرخصه طبعا
في للاسف في ناس مش بتعرف تثبتهم في المرور وناس بتعرف
متفهمش ليه مع ان في المنتدى سمعت ان واحد اتحايل على الظابط ومرضيش ولا حتى بالفلوس
طبعا لو في اي لجنه او حاجه وكلموك على الزينون قولهم ده فابريكه وتقريبا الفبريكه مبيبقاش في مكن ورا الفنوس ف هيفهموا علطول انه فبريكه ومتخلييش اي حد يديك مخالفه او يسحب الرخص عليه نهاااااائي

اخيرا الف الف مبروووك على العربيه وربنا يديك خيرها ويكفيك شرها

ومتنساش بقى تقيييم للعربيه

[حماده المصري]

ياريت بقى تقولي موضوع التيست درايف بالحجز ولا ازاي

وهل لازم الي يجرب يبقى هيتشري ولا ايه الظروف

[wahba87]

شكرا على ردك الوافى يا استاذ حمادة و ياريت حد يفيدنا فى موضوع النمر التجارية

بالسنبة للتيست درايف , عادى جدا احنا طلبنا الراجل قالنا العربية هتبقى موجودة يوم الاحد , رحنا الاحد و فعلا و جربناها بس كان واضح ان احنا عندنا نية للشراء بس كان وارد انها ماتعجبناش ومنشتريش

التست مش بالحجز عشان اصلا مفيش حد فى التوكيل و الدنيا فاضية

[ابو فرح]

ربنا يباركلك فيها يارب ويديك خيرها ويكفيك شرها

[BUNSH]

الف مليون مبروك... ويارب يديك خيرها ويكفيك شرها

[samirayad]

أن شاء الله تكون قدم خير عليك..................

[eg_falcon]

بس ازاي الكلام دا و غبور قال انه نزل الاسعار

[جمال]

شكرا على ردك الوافى يا استاذ حمادة و ياريت حد يفيدنا فى موضوع النمر التجارية

طبعا ماتقدرش تمشى بيها كدة لازم نمر تجارية لحد ماتترخص
النمر التجارية بتكون من الصالة او التوكيل اللى باع لك العربية وعادة بيكون هدية من الصالة ( بدون ان تدفع شىء ) بس بعضهم بياخد عنها ايجار يومى
انا شخصيا ليه تجربتين , مرة دفعت 50 ج فى اليوم ايجار , ومرة تانية من صالة لم ادفع شىء لغاية ماجاب الورق و رخصت العربية

[nomercy22]

ربنا يباركلك فيها إن شاء الله

[wahba87]

شكرا يا جماعة على ردودكوا ويارب تكون النمر هدية

[جمال]

شكرا يا جماعة على ردودكوا ويارب تكون النمر هدية

اطلبها ما تتكسفش دى حقك , وتخليه يستعجل فى تجهيز الورق و الترخيص علشان يسترد النمر التجارية

[magyver]

انا اول مرة اسمع التيست درايف دة
يعني بتجربها قد اية يعني وافرض لقدر الله
اتخبطت وانت بتجربها لا قدر الله

[Falcon.Crest]

Congratulation

[karimone]

انا اول مرة اسمع التيست درايف دة
يعني بتجربها قد اية يعني وافرض لقدر الله
اتخبطت وانت بتجربها لا قدر الله

في شركات كتير بتعمل تيست درايف لعربيتها خاصة لما يكون موديل جديد لسه نازل...