"العربية عاوزة البخيييييييييييييييل"... ياترى رأيك إيه؟

[mabdelaziz]

"العربية عاوزة البخيييييييييييييييل"
الجملة دى قالها لى كهربائى معرفة كنت بستشيره فى شوية سمكرة عاوز أعملها للعربية لكن لقيت تكلفتها عالية جداً فى الوقت الحالى.
قام نصحنى أستنى لغاية الفحص واعمل السمكرة, وقال: "وبعدين العربية مش عاوزة السخى... العربية عاوزة البخيييييييييييييل".

ياترى إيه رأيكم فى المبدأ ده, هل فعلاً العربية عاوزة البخيل ولا لأ؟ وإيه الحاجات اللى ينفع فيها المبدأ ده وإيه الحاجات اللى ماينفعش فيها؟

[A.Saad]

زى ما تديها تديك
يعنى ما تبخلش فى الميكانيكا والكهربة
السمكرة فيه حاجات بسيطة ممكن تسيبها
لكن حاجة هتجيب بارومة طبعا لا
الكماليات دى براحتك

[meromar]

لا طبعا العربية مش عاوزة البخيل لانها بالطريقة دى حتبقى عربية مهملة ومخبطة ومتبهدلة لانة بخيل ومش عاوز يصرف عليها ..ومش عاوزة بردو السخى..الاعتدال حلو فكل حاجة يعنى اصرف على عربيتى باعتدال بمعنى انى اهتم بشكلها سواء من برة او من جوة ومصرفش فحاجات ملهاش اى داعى .

[karmoty]

العربية مش عايزة البخيل اوي اوي لكن فيه حاجات ممكن تطنشها لحد لما تخلص الاساسيات يعني الميكانيكا مثلا ما ينفعش تبخل عالعربية فيها"عن تجربة" لان اللي هتبخل عالعربية فيه دلوقتي ممكن تدفع اضعافه بعد كده لا قدر الله
وفي نفس الوقت مش اي حاجة هايفة تحصل تروح تجري على الصنايعي عشان يعملها العربية برضه مش عايزة الاسراف وومكن تتغلب على الاسراف في المرواح للصنايعية بانك تتعلم شوية حاجات بسيطة تساعدك على تصليح السيارة بنفسك واهه برضه اسمك استفدت حاجة جديدة او انك تسال اخوانك في المنتدى هنا هيفيدوك في اي حاجة تقف معاك وان كانت عايزة تصرف فيها ع العربية ولا تطنش ولا حتى تعملها بنفسك
وفي النهاية ما تقلقش عالعربية لحد الهوس ولا تطنشها لحد الاهمال الاعتدال حلو

[Amr_Moh]

أولمرة أسمع النصيحة ده-- حتى ضد المنطق

[tamertamer]

العربية عيزة المعتدل فى الصرف يعنى ولا تصرف ببزخ ولا ببخل العتدال كويس فى كل شىء

[gade2]

ادى العربيه تديلك
كل قرش بتحطه فى العربيه بيقابله راحه واطمئنان وامان

[nomercy22]

لا طبعا العربية مش عاوزة البخيل

[ابوهاشم]

عربيتك تصونها تصونك تهينها تهينك

[HeMa_LanCeR]

هين قرشك ولا تهين نفسك
يعني لو مظبطش العربيه انت اللي هتتبهدل لو عطلت او حصل فيها اي حاجه وباردو هتدفع

[Abo_Lina]

راجل ميكانيكي عاوزه يقول ايه
و كما قال المثل خذو الحكمة من أفواه الميكانيكية

[amrico]

احترم عربيتك تحترمك
وعلى فكرة انا عندي قناعة شخصية ان العربية بتحس بصاحبها وبتحس بإهتمامه بيها وانها مش مجرد حتة حديد
اعتبرها واحد من عيلتك وحبها عمرها ماهتقصر معاك

==
عمرو
==

[ams]

العربية عاوزه الب-------------------------------------------نزين

وهو البخيل بيجيب عربية اساسا؟!

[M.Osman]

البخيل ده ممكن يحط بنزين 80 في لانسر و ميجان مثلا.....

طب و ده ينفع ؟؟

لأ طبعاً ... انا متفق تماماً مع الأستاذ عمرو

[amrico]

نفسي أعرف مين التلاتة اللي موافقين علي البخل