لما تحب تضيع فلوسك اشتري العربيات دي.....!!!

[ahmedsrs]

انا بختلف معاك فى الراى بره الى بيجيب عربية بيجيبها بما يعادل اجر عمل ثلاث او اربع اشهر اما هنا فى مصر فممكن اغلب الناس مش كلهم يقعد يحوش فى تمن العربية 10 سنوات وفى الأخر تغلى كمان وممكن ميعرفش يشتريها برضه فعشان يشترى بيقعد يسال طوب الأرض عن العربية ( الأنتشار , وقطع الغيار , والميكانيكية , وحلجات محدش بره بتخطرله على بال ) طيب ولما يشتريها هيركنها فى الشارع وهيمشى بيها فى الشارع واحنا كلنا عارفين الشوارع عامله اذاى فلازم قطع الغيار تكون رخيصة ومفيش مانع تكون مضروبه كمان عشان يعرف يلاحق على القطع التالفة دى بفلوسه القليله طيب عاوز فلوس وتقريبا حاطط جزء كبير من فلوسه فى العربية فلازم تكون العربية منتشرة عشان يعرف يبيع . ممكن الكلام ده كله يتغير لو الناس دخلها زاد والعربيات رخصت

[medhatamr]

[abo3bdolrahman]

أتفق معاك تماما و الله ينور عليك فى الموضوع ده و خصوصا موضوع إعادة البيع ده تلاقى واحد لسه هايشترى و بيفكر يبيع إزاى حاجة تجنن و كمان كل واحد حاسس إنه إتدبس نفسه يدبس أكبر عدد ممكن معاه علشان ما يبقاش لوحده و ده جزء من ثقافتنا ده غير إن ما فيش حد بيعترف إنه غلطان أبدا مع إن الإعتراف بالحق من شيم الرجال ده غير الفتىىىىىىىىىىىىىىىىىىىى الغريب اللى بيعمل سوق لمنتج ما على حساب آخر من غير ما تلاقى حد عارف حاجة عن ده أو ده بس بيفتى و خلاص و ربنا يسترها مع الجميع

[mo7a_mo7a]

سيدي العزيز:
أتفق معك في معظم ما تفضلتم به و لكن أضيف أن المصريون معذورون فمعظم فترات حياتهم كانوا يقعون تحت طائلة التجار الجشعين و بالتالي لم تصلهم أي سلعة و منها السيارات بسعرها الحقيقي الذي يشتريه بها خلق الله في العالم كله فأصبحت إختياراتهم لا تخضع لمقياس المتانة أو الإعتمادية أو الإسم العالمي أكثر من خضوعها لعوامل السعر و توفر قطع الغيار و خدمة ما بعد البيع و كلها أمور تبعدنا عن السيارات القيمة بالفعل فأنا أحب ما على قلبي أن أركب مرسيدس أو بيجو أو حتى تويوتا و لكن العين بصيرة و الإيد قصيرة بفعل فحش و تجبر الميزان التجاري في مصر و الذي يجعلنا دائما و أبدا أقل من مواطنين كثيرين في الدول المجاورة حتى الأقل منا اقتصاديا و إجتماعيا.
أما فيما يتعلق بالسيارات القديمة التصميم و ربما يصح التعبير اذا قلنا أنها تاريخية التصميم مثل 128 و شاهين, فأنا أتفق معك تماما بل أزيد أن شركة النصر تفعل تماما مثل النعامة التي تدفن رأسها في الرمال حتى لا يراها الآخرون فكيف تباع ال128 ب 45 ألف و الشاهين 1400 بدون أي كماليات بحوالي 70 ألفا العيب مش عليهم العيب على ال.... اللي بيشتروا.
انا عاوزك تحط الشاهين 1400 التي تباع بسبعين الف جنب اسبيرانزا 1600 جميع الكماليات و التي تباع ب 67 الف و اديني عقلك , فلا يوجد مقارنة لا في السعر و لا في الشكل و لا التقفيل و لا الكماليات و لا أي حاجة و إذا سلمنا بأن الإسبيرانزا صيني فالشاهين تركي/مصري يعني لا تعايرني و لا أعايرك الهم طايلني و طايلك.
تبقى حقيقة واحدة أن موضوع السيارات في مصر مثله مثل مواضيع كثيرة ماشي ب... ضهره الناس كلها بتتقدم و إحنا للأسف بنتأخر:k40:

الف شكر علي مداخلتك الاكثر من رائعة والتي اثرت الموضوع لكن منقدرش ننكر ان العقلية المصرية في اختيار سيارة يجب تغييرها والبداية باننا نعترف اننا غلط

الف شكر مرة تانية وبارك الله فيك

[mo7a_mo7a]

كل كلامك جميل ورائع ولكن يمكن تلخيصه واختزاله فى كلمتين
انها ثقافة الفقر ياأخى الكريم وشكرا

يمكن عندك حق لكن انا كنت بشوفها ثقافة المنظرة..
وربما انها مشتقة او نابعة من ثقافة الفقر لكن اللي انا شايفه منظرة وتباهي اكثر منه تفكير منطقي

[mo7a_mo7a]

بارك الله فيك
بجد انت جبت الوتر الحساس

الف شكر علي مداخلتك ويا ريت الناس تتفاعل

[mo7a_mo7a]

كلامك في معظمه صح و حقيقة واقعة ولكن لي بعض التعليق...

-نوعية الإعلانات الهابله عينة مني و احمد دي موجوده بره برضه ومش بس هنا ونوعية المستهلك (عفواً) الجاهل ...برضه موجوده بره برضه مش بس في مصر ..طب ايه الفرق؟؟؟ الفرق انهم بره بيعتمدوا علي وجود اجهزة حماية المستهلك و الأجهزة الرقابية وبعدين سمعة الوكيل و كلام رجل التسويق وعايز اقلك ان اغلب الجيل بتعنا يعتبر مثقف بالمقارنه بنفس الجيل في كثير من الدول الغربية .

اولا شكرا لتعليقك ومشاركتك ورايك الذي له منا كل احترام وتقدير
لكن واضح ان حضرتك معشتش برة كتير وخلينا نعرف كلمة برة الاول بانها بلاد المجتمعات المتحضرة المتقدمة زي اوروبا وكندا ووسط اسيا ودعنا نستثني امريكا والهند واستراليا باعتبارهم بلاد غير ناضجة

وباختصار حتلاقي الاعلانات نوعين
1- اعلان تفصيلي وبيتكلم عن السيارة وقدرتها وكمالياتها ووووووو
2- اعلان تنشيطي قصير وده بيحمل بس شعار الشركة وسلوجان بسيط حاجة كده زي (الحزب الوطني لمصلحتك) وخلاص وده ممكن يكون اعلان خفيف بس لتذكير المستهلك بالسيارة
وبالتالي الموضوع منهجي مش عشوائي
الي جانب ان المستهلك مش لازم يكون بيفهم لان الوكلاء هنا محترمين وبقدموا دعم فني ونصيحة بامانة
لدرجة ان الوكيل ممكن يرفض يبيعلك السيارة وينصحك بماركة اخري لو شاف انها مش مناسبة لاحتياجاتك
بمنطق انه يخسر بيع عربية احسن ما يخسر راي زبون وووو

-سعر إعادة البيع احد العوامل المهمه والتي تحدد حاجات كتير ...انتشار العربيه والذي يعني توافر قطع غيار لها بشكل كبير والذي يؤدي إلي رخص قطع غيارها وبرضه العامل ده موجود بره وبيحسبولوا الف حساب مش بس في مصر واعتقد ان موضوع العربيه التقيله في البيع دي بتبقي بسبب التوكيل بنسبة 95 % ...اما انه مبيوفرش قطع غيار و إما انه مبيوفرش دعم للسيارة بشكل عام او ان سعره مغالي فيه

في الدول المحترمة بيتم الزام المستورد او الوكيل بكم معين من قطع الغيار كحد ادني ولا يصرح له بالبيع في منطقة لا تغطيها شبكة صيانته او لا يستطيع توفير قطع غيار كافية

شكرا مرة تانية علي اثرائك للموضوع

تحياتي

[mo7a_mo7a]

[QUOTE=ahmed76;748922]

[COLOR="Blue"][SIZE="5"]
ثانيا سعر الشراء وسعر اعادة البيع وهي من الامور الغريبة عند الشعب المصري حيث يفكر المشتري في البيع اثناء الشراء ويفضل السيارة سهلة البيع (مثال احجام الكثيرين عن شراء الرينو بانواعها باعتبار انها تفقد الكثير من ثمنها عند اعادة بيعها مقارنة بماركات اخري)

مع حضرتك فى كل كلامك ماعدا البند ثانيا
اللى انا عن نفسى لازم اعمل حسابه
(طبعا لان انا من المصريين :

طبعا لازم تعمل حسابه لكن ميكنش وانت بتشتري عربية جديدة وميكنش محرك ومؤثر علي قرار الشراء

وان كان يبقي انصحك بتغيير وجهه نظرك

[mo7a_mo7a]

اقول اية بس والله العظيم انت قولت المفيدة وزيادة شوية
وللاسف 90% من الناس كدا
احمدك يا رب انى من 10 %
بجد بجد تسلم ايديك على الكلام دة

العفو يا فندم ونورت الموضوع

[mo7a_mo7a]

على كلامك محدش هيشترى عربيات خالص :]

ليه بس

انا مقلتش كده
انا قلت باختصار في نهاية المقال 5 نقاط لاتباعها وده لاقتناء سيارة فعالة ومواكبة لاحتياجاتك بدون تبذير

تحياتي

[mo7a_mo7a]

احلى حاجة اننا عارفين نفسنا وبرده مفيش فايدة ..

ننتقد فى نفسنا وبرده مبنشفش تقدم ..

عارفين ايه عيوبنا وايه اللى جيبنا ورا وبرده مبتقدمش ..

يبقي البلد دى فيها عفريت ..:)

ههههههههههههههه
حلوة اوي يا درش

يلا بقي ابدا بنفسك والله الموفق

[mo7a_mo7a]

الله ينور عليك...

انت غيبت الفتره اللي فاتت علشان تطلع علينا بالكلام الجامد ده...

بص انا ليا رأي في انتشار الشاهين و ال128 في مصر:
- الشاهين انتشرت في التسعينات علشان كان تقريباً البديل الوحيد ليها هو اللانوس و معظم اللي جابوها كان علشان قطع الغيار ارخص نسبياً من اللانوس و كانت نظرتهم انها عربيه تستحمل اكتر الشوارع المصريه

- اللي بيشتري 128 دلوقتي او خلال الكام سنه اللي فاتوا علشان البديل في نفس الفئه السعريه هو السوزوكي الألتو و ديه عربيه تعتبر صغيره و هتبقي ضيقه علي راجل معاه مراته و طفلين او تلاته... ف 128 هي البديل الانسب لما تكون عايز تجيب زيرو...

ده بالنسبه للعربيتين دول... الناس مش بمزجها تجيب العربيات ديه بس هو ده اللي قدمهم علي قد الفلوس اللي معاهم...

كرييييييييييييييييييييييييييييم

منور الموضوع يا حبيبي واسف علي الغياب

انما اعذرني انا مش معاك
في الوقت اللي طانت الشاهين بتنافس اللانوس كانت في اللادا وهي بردو عربية قديمة وكان في نفس السعر الفلشيا والاسترا والهيونداي اكسل وبعديها الاكسنت ومعاهم المتسوبيشي فعذرا مكنش في سبب منطقي وحكاية الشوارع دي انا شخصيا مش مقتنع بيها

نيجي ل 128 دي عربية ارفض ان يتقال عليها انها ناجحة لان هي كل مقوماتها انها رخيصة فقط لكن لا اتزان ولا ثبات ولا سرعة ومتعتبرش عائلية ابدا وفي رنج سعرها غير الالتو في الماروتي وفي الاونو قبل ما تغلي والريو وحاليا السيراتو والاتوس وحتي لو بعضهم اغلي 5 او 10 الاف فان الفرق شاسع بين الاتنين


نورت الموضوع وفي انتظار مشاركتك

[mo7a_mo7a]

هوه فالاول وفالاخر كل واحد حر فاللي يشتريه
بس لازم يكون فيه حماية مستهلك
وياريت الجماعه بتوع خلوها تصدي وموديلها يعدي يستغلوا الموضوع ده ويقلبوها جمعية حماية ستهلك خاصه

مش زي التانيه الي بتغطي عالتجار

المستهلك واجب عليه يحمي نفسه اولا وده اولي من ان حد تاني يحميه
بالتفكير السليم والحكمة
ثم ياتي بعد ذلك دور الاجهزة الرقابية وليس العكس

تحياتي

[mo7a_mo7a]

أعتقد إن ده ( الوهن ) الذي أخبرنا به رسولنا الكريم صلى الله علية وسلم في حديث من أحاديثة .
آسف جدآ لإني غير متذكر نص الحديث بالظبط .

الوهن هو حب الدنيا وكراهية الموت كما قال صلي الله عليه وسلم

[mo7a_mo7a]

تحليل ممتاز

الف شكر لمرورك يا دكتور