الى كل من زار المعرض اتوماك 2009

[Abo_Lina]

كلامك مليان أخطاء المونديو 1600 و لو كانت 2000 cc كانت هاتبقى في حدود 400 الف..
و بعدين انت اتكلمت على العزل اللي اعرفه ان الانسان لو عاوز يقيم عزل عربية بياخدها في الشوارع و يشوف الضوضاء الي واصلة داخل المقصورة من كلاكسات و اصوات محركات بما فيها محرك السيارة المختبرة..الا لو كانو سمحولك تاخد العربيات من المعرض و تاخد بيها لفة..
ايضا مش عارف سبب حساسيتك الزيادة من البلاستيك ..انت لو عاوز خشب فاخر و جلد طبيعي يبقى عليك بال S Class و مافيش داعي تروح معارض..
اخيرا يرجى مراجعة المعلومات قبل نشرها زي المونديو 2000 سي سي ب 190 الف و الكلام ده

[Amr_Moh]

شركة جولف:

1:جولف:عربية جميلة جدا قعدتها حلوة من قدام عيبها حاجة واحدة مسند الظهر كان خابط فى ظهرى فى الكنبة الخلفية بس بجد كماليات وفخامة وست وسائد هوائية وكمان وسائد عند الركبة من تحت وخامات نظيفة وتابلوة شيك عربية بجد حلوة

2:تيجوان:حلوة وواسعة وخامتها جميلة ومعمولة باتقان فعلا بس شكلها مش عاجبنى فية حاجة غلط بس كخامات وفخامة جامدة


[/info]

اسمها شركة فولكس يا هندسة

[Bossy_Fadl]

انا كمان استغربت كتير من نقطة العزل هاي

حضرتك من وين حكمت عليها

العزل لا يتم الحكم عليه و العربيه واقفه في مكانها بين الناس

لازم الواحد يمشي بيها في الشارع و يحكم عليها في وسط الاصوات و الضوضاء الموجودة بالطريق.

كمان ملاحظة ان حضرتك قيمت اغلب العربيات بانها ضيقه جدا برغم ان معظمهم عربيات معروفة بعكس هيك.

حضرتك ما شاء الله طويل فصعب شوي الحكم من وجهة نظرك علي مساحة العربيه الداخليه.

و بالنهاية طبعا وجهة نظرك لازم تحترم

الف شكر لالك و منتظرين بقيه التقييم

[fars777]

حد خد باله من النيسان البلوبيرد؟...انا شايف أنا عربية واسعة جدا وخامتها الداخلية محترمة وسعرها بعد مانزلوه عشرين ألف أصبح 140 ألف ، بس الحقيقة مشكلتها انها مش معروفة وأكيد سعر أعادة البيع ضايع ده غير انها مش متجربة لسه، ولا إيه رأيكو؟

[bmwx5]

يا جماعة انا لسة جاى من المعرض النهاردة
اولا هحب اقول ان من اكثر العربيات التى عجبتنى
1 الاسبلندر اولا هى 1600cc واسعة جدا و القعدة فيها ملريحة اوى كما انها شيك فهى شاسية المانى و تعليق بورش و الماتور بتعها متسوبيشى
2 السيراتو الجديدة عجبتنى جدا لانها واسعة شوية

[seaman]

عموما هو ده المتوقع اليومين دول نصبر كام شهر اكيد الموديلات الجديده هتنزل بقوه الماذدا- التويوتا-اوبل
لكن فعلا السيارات الموجوده اليومين دول خامات رديئه بسعر عالى ..
لما تدفع 126 الف فى الكيا...وتبقى الخامات نص نص يبقى حرام الفلوس اللى تتدفع فيها..

[SAMEH_FOUAD]

اول حاجة احب بس اشكر كل اللى شاركوا معايا برائيهم واوضح النقط اللى انا اتكلمت فيها

1:انا اكيد طبعا عارف انها شركة فولكس فاجن بس يمكن نسيت وانا بكتب محدش مابينساش خصوصا وانا كنت بكتب التقرير وكان فاضلى وقت قصير جدا ونازل اسف للخطأ
2:سعر المونديو انا ماكنتش اعرفة العارض بتاع فورد هو اللى قال انها 2000 c.c وتمنها 190 الف ممكن يكون غلط بس انا لااعتقد ذلك او هذا السعر ابدا 400 الف عشان كدة هى عدت سعر البى ام والمرسيدس الفئة الثالثة والc class
3:انا اكتر حاجة مضايقانى فعلا مستوى الخامات والتقفيل بقى زفت ودة على فكرة كان انطباع كل اللى يدخل عربية سعرها مايعديش 130 الف ,ومعلش انا مش هدفع فى عربية 120 الف والاقيها كلها بلاستيك *بلاستيك وتقفيل وحش وانا لما بقول خامات رديئة مش بقصد يحطوا خشب غالى ولا اى حاجة لا يبقى فية نوع من تغطية سطح التابلوة واذرع الابواب ومسند يد السائق بجلد لكن مافيش اى حاجة من دية نهائى واللى لاقيت فيها الكلام دة التويوتا والاسكودا a4 طبعا هاتكلم عن الفئة السعرية ,عشان كدة شكرت فى التويوتا لانى معنديش استعدا ادفع فى عربية فوق ال100 الف جنية فى حبة بلاستيك وماتور
4:بالنسبة لمساحة السيارة اللى بتكلم عليها ,اعتقد ان اى عربية المفروض لما حد يختبرها مايجيبش واحد قصير ويقولك العربية واسعة لأ المفروض بتتقاس على شخص طولة لايتعدى 190 او 188 كحد ادنى ,وانا كان معايا صاحبى طولة حوالى 182 كان بردة حاسس ان العربيات ضيقة اللى وبردة الناس كانت بتشاركنا نفس الاراء ,وانا فى الاول قولت دية وجهة نظرى ليس اكتر
5:بالنسبة للعزل كانت فية عربيات كتير محركها شغال ومشغلين التكيف كمان ولو حد لاحظ انا مذكرتش العزل الا فى بعض السيارات ,دة غير ان معظم السيارات عزلها واحد ,

وبعدين فية كلمة اتقالت حلوة اوى وعجبتنى جدا وبتاكد كلامى فى حاجة(مستنى اية من عربيات كورى) لان اغلب الناس معجبهاش مستوى السيارات الكورى نهائى وفعلا المعرض دة كانت الافضلية فى الترتيب لمصنعى السيارات كالتالى:
1:الالمانى
2:اليابانى
3:الفرنسى
4:الكورى
5:الصينى

واى حد هيقول الكورى حلو يبقى عايز يركب عربية وخلاص فية جميع وسائل الرفاهية ولكن ينقصها اشياء كثيرة

وانا ان شاء الله هكمل الموضوع ,
وللعلم انا حاولت بقدر الامكان انى اشوف اراء الناس اللى معرفهاش من مختلف الاعمار يعنى شباب وكبار السن يعنى رائى دة تقدر تقول شوية اجماع على وجهة نظر شخصية

[askanas]

good job ya semsem

[Sherif Sharaf]

بالنسبة للوسع فأعتقد إن حضرتك لازم تجرب الكيا كارينز
هى صحيح مش عربية فخمة بس فيها كل الكماليات الأساسية
بس وسعها مش طبيعى ..... واسعة جداً جداً جداً ودى أهم ميزة فيها
التقفيل وجودة الخامات مش بطالة
السعر يعتبر جيد جداً (100 ألف للمانيوال) (110 ألف للأوتوماتيك)

[Ashraf_Ashraf]

تقرير رائع انا اوافقك عليه

[Terrible_DaRsH]

http://www.nilemotors.net/Nile/showthread.php?t=79301

[for_ever]

بالنسبة للوسع فأعتقد إن حضرتك لازم تجرب الكيا كارينز
هى صحيح مش عربية فخمة بس فيها كل الكماليات الأساسية
بس وسعها مش طبيعى ..... واسعة جداً جداً جداً ودى أهم ميزة فيها
التقفيل وجودة الخامات مش بطالة
السعر يعتبر جيد جداً (100 ألف للمانيوال) (110 ألف للأوتوماتيك)

حضرتك متأكد من المعلومة دي ؟
اصل معلوماتي بتقول ان كيا كارنز 2000 سي سي و تمنها اكتر من 200 الف
يا ريت حد يصححلي المعلومة دي لو كنت غلطان

[SAMEH_FOUAD]

شركة:سكودا

1:سكودا اوكتافياa4:سيارة جميلة خامات كويسة ومعقولة مقارنة بسعرها حجم المقصورة جيد الى حد ما, يعيبها اماكن تخزين قليلة ,شكل قدم بقى خلاص كفاية علية كدة

2:سكودا رومستر:سيارة غريبة جدا ولا شكل ولا منظر ,دخلت العربية بطريقة عجيبة وصعبة ومتعبة خاماتها عادية جدا وان كانت انضف من خامات السيارات الكورى ,مساحات جيدة فى الامام وجيدة فى الخلف ولكن غير مريحة
3:سكودا فابيا:مش هتكلم عنها فى حاجة لان العربية انا شبة مادخلتش فيها ضيقة جدا جدا جدا وحرام بجد ادفع فيها مليم واحد
4:سكودا فانتازيا:سيارة بجد جميلة جدا ماشاء الله شكل ومضمون واسعة من جوة اوسع من الa5 وخاماتها جميلة ومعمولة بعناية تستاهل فلوسها
5:سكودا اوكتافيا a5:سيارة بردة جميلة بس يعيبها انها ضيقة شوية ووضعية القيادة غير مريحة ,وفتحة السقف صغيرة جدا كما هو الحال لمعظم السيارات الجديدة مش عارف لية ,ولكن كخامات وتجهيزات مقدرش اتكلم عليها فى حاجة سيارة فخمة ورفاهية عالية وكمان منظر الكراسى جميل جدا

شركة نيسان:
1:نسيان صنى :سيارة لم يتم التجديد فيها بالعكس ودية وجهة نظرى شكلها بقى اوحش كتير عن موديل 2008 ,السيارة ضيقة عن باقى سيارات فئتها بشكل واضح,خاماتها وشكلها من جوة لم يتغير فى شىء عن موديل 2008 ,فوانيسها الخلفية الشفافة بقى شكلها وحش اوى بجد بهدلوا العربية بالمنظر دة
2:نيسان تيدا هاتشباك:سيارة جميلة ,شبابية بكتير عن تيدا السيدان لكن السيدان اوسع منها بفرق ملحوظ ,نفس الخامات وخاماتها كويسة الى حد ما ,لكن بحس انها بتميل اكتر للسيدات يعنى لو شاب راكبها مش هتكون لايقة علية ,بس فيها عيب انها هتبقى حلوة اوى لفردين فى الكنبة الخلفية لكن الراكب اللى قاعد فى النص هيكون مضايق عشان مسند اليد اللى فى الكنبة الخلفية طالع شوية لبرة وهيكون مضايق فعلا وبتشترك معاها كمان التيدا السيدان فى دة,وانا اصلا صاحبى معاة تيدا سيدان 2008 وهى عربية كويسة ناعمة فى المطبات الى حد ما يعنى نقدر نقول 70% لكن عيبها تجميع قليل خصوصا لما تجرى بالكيك داون ,صوتها هادى حتى وانت ضاغط على الماتور ,الثبات وحش بعد 120 العربية بتبدا تخف جامد,عزلها كويس مشاكلها قليلة فعلا العربية لحد دلوقتى ماتغيرلهاش غير تيل فرامل فى اول 10,000 عشان كان بيصفر وتم تغيرة ودلوقتى بقالة 7000 كيلو بدون مشاكل مع الضغط الجامد عليها والمشاوير الطويلة
3:نيسان ليفينيا:اضيق بكتير من التيدا مش معترف بيها كعربية اللى عاجبنى فيها بس رسمة الاكصدام بتاعها بجد معمول حلو خاماتها نفس خامات التيدا وتقريبا اغلى من التيدا بعشر الاف جنية بس لو هاتختار التيدا افضل نفس الماتور والهدوء والعزل لكن انشف قليلا فى المطبات وبالذات فى المطبات الخلفية والعربية على فكرة انا مجربها لانها مع والد صديقى
4:نيسان بلو بيرد:عربية جميلة وواسعة وشكل تابلوة مختلف عن التيدا وممكن يتحطلها شاشة فى نص التابلوة هيبقى شكلها جامد بجد لكن عيبها خاماتها مش زى التيدا يعنى البلاستيك فى اماكن كتير جدا ,ودة عيبها ,لكن المقارنة مابين التيدا والبلو بيرد هيبقى لصالح البلو بيرد

شركة بى ام دبليو
1:الفئة الثالثة 318:سيارة جميلة جدا جدا كفرش وعزل وترتيب للمقصورة وتقفيل لكن يعيبها حلوة جدا لاتنين ورا وغير مريحة للراكب التالت ,التابلوة من غير الشاشة مش حلو اوى ,دخول العربية وخاصة فى الامام صعب لان الكرسى تحس انة فى الارض غير كدة عربية تحفة
2:الفئة الثالثة 320:سيارة جامدة جدا الشاشة مخلية التابلوة شكلة جامد اوى والface lift اللى اتعمل للسيارة مخلى شكلها قمة فى الابداع دة غير الاوبشن الرهيب اللى موجود فيها هى وال330 اللى بجد صاروخ ارض جو فى كل حاجة سيارة مش ناقصها حاجة
3:الفئة الخامسة 525:مش هتكلم عنها العربية بتعبر عن نفسها جامد جدا كخامات وتقفيل وجودة ورفاهية عالية اوى وراحة غريبة فى الكراسى او فى طريقة القيادة ,واحسن بكتير من المرسيدس e class 2008 لانى ركبتها وقعدت معايا يومين بجد البى ام احسن منها بكتير
4:x3 :ماشوفتش فى حياتى رحابة ولا جمال بالطريقة دية اوسع من الفئة الخامسة والسقف البانوراما مديها منظر رائع وتابلوة شيك اوى
ومساحة تخزين للشنطة الخلفية واسعة بالرغم من الوسع فى مقصورة السيارة

شركة جاجوار
جاجوار :xf :وهممممممممممممممممممم سيارة جميلة جدا جدا جدا عجبانى اوى وكمان لون الفرش بتاعها وجلد السيارة الوثير ومتعدد الطبقات ورسمة عدادها والعربية دية اتفتحت بس عشر دقايق واتقفلت تانى ودة كان من حظى فعلا لان كان حلم حياتى ان اشوف الجاجوار والفرق بينها وبين باقى السيارات التانية وتستاهل فعلا ال900,000 الف

شركة هيونداى :
1:هيونداى النترا:متهيالى ناس كتير ركبتها وممكن تحكم عليها بس اللى انا حاسة ان خاماتها وجودة التقفيل بدأت تقل بطريقة ملحوظة والعربية متوسطة الرحابة يعنى لا واسعة ولا ضيقة بس خامات رديئة
2:هيونداى سوناتا:معقولة فى المساحة لكن شكل التابلوة وحش اوى والعربية نفسها مش عجبانى خاصة انها مافيهاش حاجة جديدة غير الفوانيس الled خسارة فيها 150 الف
3:هيونداى سانتافى:اضيق عربية جيب ركبتها فى حياتى حسيت انى راكب عربية صغيرة اوى اوى ,كان فية واحد ومراتة كانوا بتفرجوا على العربية الراجل مش طويل طولة حوالى 178 ركب العربية وكان معاة احد عارضى هيونداى مكملش يسمع بقيت اوبشن العربية وقال كل العربية دية وضيقة جدا الراجل ماستحملش العربية وانا معاة ,وعلى فكرة دة كمان الراكب الامامى التابلوة معمول بطريقة غبية جدا جدا تخليك تضطر ترجع الكرسى اكتر دة غير مساحة الشنطة المبالغ فيها اوى يعنى الشنطة كبيرة جدا
4:هيونداى i30:كويسة عجبتنى تقفيلها حلو خامات الى حد ما كويسة مقارنة بسعرها قعدة كويسة الى حد ما بالنسبة لكونها هاتشباك تابلوة شكلة حلو
لكن الحلو مايكملش العربية عفشتها ناشفة لانى جربتها قبل كدة ولكن ثابتة فى الملفات ,واطية اوى ولكن كل دة فى مقابل السعر كويس جدا
5:هيونداى i20:متهيالى دة الشكل الجديد للانترا الهاتشباك بس ضيقة اكتر من i30 صغيرة عنها بفرق واضح فيهم شبة كبير اوى من جوة بس خاماتها وحشة
6:هيونداى i10:صغيرة ضيقة بس اوسع سيارة على مااعتقد فى فئتها يعنى مستغليين كل جزء فيها طبعا مش هتكلم عن الخامات والتقفيل بسبب قلة السعر فدة كويس جدا على اللى فيها
7:هيونداى فيرنا:اسواء سيارة ركبتها فى المعرض الموديلات اللى قبل كدة احسن منها بكتير حسيت فعلا بسوء الخامات المستخدمة ومدى ضيق السيارة بجد العربية دية فعلا ماتور جامد على فرامل توقف عربية سعتها 1000 سى سى مش 1600
8:هيونداى جيتز:ضيقة صغيرة اوى لاتصلح غير للسيدات

مع اعتذارى التام لمالكى هيونداى بس بجد هيونداى بقت بتهبل

شركة فيات:
فيات 500:سيارة غريبة اوى شكلها من قدام حلو ومن ورا شكلها قديم جدا جدا ,سيارة ضيقة بمعنى الكلمة الكنبة الخلفية مالهاش اى لازمة لانك مش هاتعرف تقعد قدام غير لما ترجع الكرسى على الاخر ,تابلوة حديد زى شكل الزستافا مع طبعا تعديلا 2009
فيات برافو: سيارة شكل ومضمون جميلة جدا عيبها الوحيد ضيقة ورا لكن العربية بجد تحفة ,كانك راكب عربية سباق عجبتنى اوى
فيات لينيا:كما هو الحال فى البرافو بس اللينيا شكلها مش زى البرافو ولا كمان جودة فى الخامات زيها ومساحتها ضيقة من ورا ومن قدام شوية
بس بجد فيات عاملة شغل حلو اوى فى البرافو بالذات

شركة سوبارو

1:سوباروا ليجاسى :سيارة قمة فى الجمال والشياكة والاناقة تابلوة جميل جدا جدا تكيف قوى فرش جلد جميل تقفيل عالى عيبها صوت ماتورها مرتفع اوى وهتستغربوا من حاجة انها ضيقة شوية بعكس حجمها الكبير وسعرها على فكرة 350 الف جنية بس بجد جميلة جدا جدا وعجبتنى اوى اوى

مش عارف اكون نسيت حاجة ولا لأ بس ان شاء الله بكرة هاكملكوا السيارات الصينية بس بجد اغلبيتها مهذلة فى حق السيارات وفى حق المستهلك المصرى عموما

[sherifahmed]

حد خد باله من النيسان البلوبيرد؟...انا شايف أنا عربية واسعة جدا وخامتها الداخلية محترمة وسعرها بعد مانزلوه عشرين ألف أصبح 140 ألف ، بس الحقيقة مشكلتها انها مش معروفة وأكيد سعر أعادة البيع ضايع ده غير انها مش متجربة لسه، ولا إيه رأيكو؟

نيسان يلوبيرد و ليفينيا معمولين فى مصنع نيسان اللى فى الصين

[sherifahmed]

هيونداى i20:متهيالى دة الشكل الجديد للانترا الهاتشباك

حضرتك دى مفروض بديل الحيتز بس عمو غبور بيضحك علينا كالعادة