اسكندرية - شرم

[Islam_galal]

السلام عليكم و رحمه الله و بركاته

الاخوة الاعزاء ، العبد لله بيفكر يروح شرم الشيخ بالعربيه
ممكن حد يشرح لي الطريق بالذات ازاي التحرك عند القاهرة لأن منطقة الدائري و خلافه بالنسبة لي متاهة و كل مرة بتوه فيها مش عارف ليه

و هل فيه مشكلة في توافر محطات بنزين علي طول الطريق

اخونا مينا موحد القطرين كان كتب عن الطريق بس مرورا بالطريق الساحلي الدولي و ده اعتقد اطول بدون ميزة

جزاكم الله خيرا

[Ashraf A.Kader]

بص يا استاذ اسلام
اول متوصل الدائري تفضل ماشي لحد متوصل نزلة طريق السويس المتجهة الي السويس وليس القاهرة
تاخد طريق السويس لحد متوصل كمين السويس بعده علي طول اول U Turn وتدخل يمين الي طريق نفق الشهيد احمد حمدي
بعد النفق تفضل ماشي علي طول حوالي 2 كيلو لحد الطريق مياخدك يمين وبعد يمين حتلاقي طريق طابا شمال سيبك منه وخليك علي طول اخر الطريق ده شرم الشيخ
خللي بالك من مداخل المدن اللي حتعدي عليها علشان متدخلش جوه وخصوصا راس سدر والطور
مفيش مشكلة بنزين خالص علي الطريق اذا كنت بتستعمل 90 اما لو بتستخدم 92 متعديش النفق الال وانت مفول

[Islam_galal]

الطريق الدائري انا معنديش فكرة عنه اطلاقا
و بالبحث في google earth لقيت اني ممكن اخد المحور لغاية طريق النصر ثم طريق السويس من اوله مع العلم اني حسافر ليلا
يل تري الطريق ده افضل و للا الدائري
و لو مكن حد عنده شرح سريع للدائري
في النهاية اشكر Ashraf A.Kader جزاه الله خيرا

[Hossam_Hassan]

الدائرى أحسن، أطلعه من الصحراوى و امشى حوالى 35 كم لطريق السويس، المحور و البلد مسافة أقل بس وجع دماغ.

[Islam_galal]

جزاك الله خيرا يا حسام باشا
بس لو اخدت الطريق كله بالليل بمعني انا ناوي اطلع حوالي 12 بالليل من اسكندرية و بالتالي حاكون تقريبا من 2 الي 3 فجرا عند المحور او الدائري الافضل يكون الدائري برضه
بصراحة انا حاولت افهمه من Google earth فاستعصي علي فهل الدائري عليه لافتات ارشاديه كفايه

[Islam_galal]

رجاءا يا جماعة اللي عنده معلومة لا يبخل بها
اخوكوا مزنووووق :P

[Migo123]

طالما ها تدخل القاهرة 3 فجرا يبقى امشي محور --- على الاقل مفيهاش توهان وكده كده الفتره دي مش زحمه خالص .....

[Migo123]

لو ها تيجي صحراوي .... بعد البوبات ها يقابلك المحور تسيبه ..... ويعدين هتلاقي مطلع الدائري تطلع وتمش على طووول
لغايه ما تنزل نفق كبير .. تبتدي تركز لان منزل طريق السويس هيبقى بعده ب 4 كلم تقريبا ....

[Islam_galal]

جزاك الله خيرا يا Mgio

[Mina W]

يا ريت ياسلام تقول ايه الاخبار علشان لو كده ابقى اجربه المرة الجاية، هو فعلا مفيش بنزين 92 تقريبا بس ممكن تلاقى راس سدر او الطور غير كده لا
و تروح و ترجع بالسلامة

[Islam_galal]

الله يسلمك يا باشا و زي ما افدتنا سابقا ان شاء الله مذكرات السفر ستنشر بعد العودة
انا ناوي ان شاء الله اسافر 18/10

[fady]

مادام حضرتك هتكون في القاهرة الساعه 2 او 3 يبقى امشي محور على طول في الوقت ده الدنيا بتكون فاضيه و مافيش زحمه و اعتقد الدائري بيكون عليه نقل تقيل كتير و دول مش من المستحب انك تمشي معاهم بالليل.

تروح و ترجع بالسلامه ان شاء الله .

[Migo123]

جزاك الله خيرا يا Mgio

جزانا واياكم يا باشا ............. تروح وترجع بالف سلامه ....

[mtema99]

انصحك تاخده من اوله هرم ثم صلاح سالم
المسافه احسن و اريح و اقصر و الساعه 3 بعد منتصف الليل يعني هيبقى فاضي